Chapter 4

[English text for this chapter is available]

śrīruvāca |
sīmāpratīcī kṣetrasya śaṃkhākārasya mūrddhani |
sarvakāmaprado devaḥ sa āste vṛṣabhadhvajaḥ || 1 ||
[Analyze grammar]

śaṃkhāgre nīlakaṇṭhaḥ syādetatkrośaṃ sudurlabham |
paramaṃ pāvanaṃ kṣetraṃ sākṣānnārāyaṇasya vai || 2 ||
[Analyze grammar]

siṃdhurājasya salilādyāvanmūlaṃ vaṭasya vai |
śaṃkhasyodarabhāgastu samudrodakasaṃplutaḥ || 3 ||
[Analyze grammar]

yatsaṃparkātsamudro'tra tīrtharājatvamāgataḥ |
yathāyaṃ bhagavānmuktiprado dṛṣṭipathaṃ gataḥ || 4 ||
[Analyze grammar]

tathedaṃ maraṇātkṣetraṃ siṃdhuḥ snānādvimuktidaḥ |
ciccheda brahmaṇaḥ pūrvaṃ rudraḥ krodhāttu pañcamam || 5 ||
[Analyze grammar]

tacchiro dustyajaṃ gṛhṇanbrahmāṃḍaṃ paribabhrame |
atrāgato yadā brahmakapālaṃ parimuktavān || 6 ||
[Analyze grammar]

kapālamocanaṃ liṃgaṃ dvitīyāvartasaṃsthitam |
kapālamocanaṃ paśyetpūjayetpraṇamecca yaḥ || 7 ||
[Analyze grammar]

brahmahatyādipāpānāṃ kaṃcukaṃ vijahātyasau |
tasya dakṣiṇapārśve tu maraṇaṃ bhavamocanam || 8 ||
[Analyze grammar]

tṛtīyāvartagāmādyāṃ śaktiṃ me vimalāhvayām |
jānīhi dharmarāja tvaṃ bhuktimuktiphalapradām || 9 ||
[Analyze grammar]

ya imāṃ pūjayedbhaktyā praṇametkīrtayettu vā |
sarvānkāmānavāpnoti muktiṃ cāṃte ca viṃdati || 10 ||
[Analyze grammar]

nābhideśe sthitaṃ hyetattrayaṃ kuṃḍaṃ vaṭo vibhuḥ |
kapālamocanādyāvadarddhāśinī pratiṣṭhitā || 11 ||
[Analyze grammar]

madhyaṃ śaṃkhasya jānīyātsuguptaṃ cakrapāṇinā |
arddhamaśnāti salilaṃ mahāpralayavarddhitam || 12 ||
[Analyze grammar]

sṛṣṭyādau dharmarājeyaṃ śaktirme'rddhāṃśinī smṛtā |
tāṃ dṛṣṭvā praṇamedyastu bhogānso'śnāti śāśvatān || 13 ||
[Analyze grammar]

sindhurājasya salilādyāvanmūlaṃ vaṭasya vai |
kīṭapakṣi manuṣyāṇāṃ maraṇānmuktido mataḥ || 14 ||
[Analyze grammar]

antarvedī tviyaṃ puṇyā vāṃchyate tridaśairapi |
yatra sthitāṃ hi paśyaṃti sarvāṃścakrābjadhāriṇaḥ || 15 ||
[Analyze grammar]

pṛthivyāṃ yāni tīrthāni gagane ca triviṣṭape |
sārddhatrikoṭisaṃkhyāni svargamokṣapradāni vai || 16 ||
[Analyze grammar]

teṣāmayaṃ tīrtharājaḥ kīrtitaḥ puruṣottamaḥ |
sarveṣāṃ muktikṣetrāṇāmidaṃ sāyujyadaṃ matam || 17 ||
[Analyze grammar]

atra sthitā na śocaṃti jarājanmamṛtiṣvapi |
kuṇḍaṃ hyetadrohiṇākhyaṃ kāruṇyākhyajalena vai || 18 ||
[Analyze grammar]

saṃbhṛtaṃ tiṣṭhate nityaṃ sparśanādbaṃdhamuktidam |
atra pratiṣṭhitaṃ vāri pralaye yatpravarddhate || 19 ||
[Analyze grammar]

atraiva līyate paścāttasmādrohiṇasaṃjñitam |
tasmātte mā'tra ciṃtāstu svādhikāraviparyaye || 20 ||
[Analyze grammar]

mokṣādhikāriṇāmatra neśvarastvaṃ paretarāṭ |
dharmarājaṃ samādiśya lakṣmīrevaṃ puraḥ sthitam || 21 ||
[Analyze grammar]

brahmāṇamāha jagatāmaṃbā sapraśrayā girā |
pitāmaha jagannātha viditaṃ sarvameva yat || 22 ||
[Analyze grammar]

mokṣadaṃ sarvajaṃtūnāmetatkṣetraṃ samādiśa |
kāmākhyaṃ kṣetrapālaṃ ca vimalaṃ vā tapāsthitā || 23 ||
[Analyze grammar]

sākṣādbrahmasvarūpo'sau nṛsiṃho dakṣiṇe vibhoḥ |
hiraṇyakaśiporvakṣo vidāryāyaṃ prabhojjvalaḥ || 24 ||
[Analyze grammar]

darśanādasya naśyaṃti pātakāni na saṃśayaḥ |
bhuktermukteśca yogyaḥ syānnātra kāryā vicāraṇā || 25 ||
[Analyze grammar]

asyāgre saṃtyajanprāṇānbrahmasāyujyamāpnuyāt |
yatkiṃcitkurute karma koṭikoṭiguṇaṃ bhavet || 26 ||
[Analyze grammar]

chāyaiṣā kalpavṛkṣasya nṛsiṃhārkeṇa bhāsitā |
tasyāṃ naśyatyavidyā hi jñānato'jñānato mṛtau || 27 ||
[Analyze grammar]

vedāṃteṣu prasiddhaistairvijñānaiḥ śravaṇādibhiḥ |
mūḍhānāṃ durlabhairviprā vināpyatra vimocanam || 28 ||
[Analyze grammar]

avimukte mumukṣostu karṇamūle maheśvaraḥ |
diśati brahmasaṃjñānaṃ bodhopāyaṃ kṛpānidhiḥ || 29 ||
[Analyze grammar]

tena budyā samabhyasya kramānmokṣamavāpnuyāt |
upadeṣṭurmahimnā hi tasya jñānaṃ na hīyate || 30 ||
[Analyze grammar]

atra tyajaṃti ye prāṇāṃsteṣāṃ tatkṣaṇa eva hi |
svarūpājjāyate muktiḥ saṃśayo mā'stu te yama || 31 ||
[Analyze grammar]

gatāgata prasaktānāṃ karmiṇāṃ mūḍhacetasām |
vaivasvata kadācinno viśvāso hyatra jāyate || 32 ||
[Analyze grammar]

utsṛjya vāri gāṃgeyaṃ svādu śītaṃ sunirmalam |
pipāsuḥ palvalaṃ yāti tadvatte mūḍhacetasaḥ || 33 ||
[Analyze grammar]

bhramaṃti tīrthānyanyāni tyaktvaitatkṣetramuttamam |
palāśāmodakaistṛptā labhaṃte śramajaṃ phalam || 34 ||
[Analyze grammar]

snānādabdhidṛśā devaśchāyayā kalpapādapaḥ |
yatra kutrāpi ca kṣetraṃ maraṇānmuktidaṃ nṛṇām || 35 ||
[Analyze grammar]

yo yatra viṣaye bhaktyā viśvāsaṃ kurute naraḥ |
sa tu tenaiva mucyeta nedṛśaṃ tīrthamasti vai || 36 ||
[Analyze grammar]

etattyaktvānyatīrthe vai vidadhāti ruciṃ tu yaḥ |
nūnaṃ sa māyayā viṣṇorvaṃcito lobhalālasaḥ || 37 ||
[Analyze grammar]

upadeśena bahunā na prayojanamasti te |
pratyakṣo hyanubhūto'yaṃ karaṭo viṣṇurūpadhṛk || 38 ||
[Analyze grammar]

antarvedīrakṣaṇārthaṃ śaktayo'ṣṭau prakīrtitāḥ |
ugreṇa tapasā pūrvamahaṃ rudreṇa bhāvitā || 39 ||
[Analyze grammar]

patnyarthaṃ sā mayā sṛṣṭā gaurī tasyātha bhāvinī |
sarvasauṃdaryavasatirvapuṣo me vinirgatā || 40 ||
[Analyze grammar]

tadādiṣṭā mayā bhadre vacanaṃ me priyaṃ kuru |
antarvedī rakṣa mama paritastvaṃ svamūrtibhiḥ || 41 ||
[Analyze grammar]

sā tu tiṣṭhati matprītyā aṣṭadhā dikṣu saṃsthitā |
maṃgalā vaṭamūle tu paścime vimalā tathā || 42 ||
[Analyze grammar]

śaṃkhasya pṛṣṭhabhāge tu saṃsthitā sarvamaṃgalā |
arddhāṃśinī tathā laṃbā kuberadiśi saṃsthitā || 43 ||
[Analyze grammar]

kālarātrirdakṣiṇasyāṃ pūrvasyāṃ tu marīcikā |
kālarātryāstathā paścāccaṃḍarūpā vyavasthitā || 44 ||
[Analyze grammar]

etābhirugrarūpābhiḥ śaktibhiḥ parirakṣitam |
alpapuṇyasya puṃso hi sthānametatsudurlabham || 45 ||
[Analyze grammar]

etāsāmaṣṭaśaktīnāṃ darśanātkīrtanāttathā |
naśyaṃti sarvapāpāni hayamedhaphalaṃ labhet || 46 ||
[Analyze grammar]

rudrāṇyāścāṣṭadhā bhedaṃ dṛṣṭvā rudro'pi śaṃkaraḥ |
ātmānamaṣṭadhā bhittvā upāste parameśvaram || 47 ||
[Analyze grammar]

ārādhya tapasā viṣṇuṃ prārthayadvaramuttamam |
yatra tvaṃ deva tatrāhaṃ vaseyaṃ hi yathāsukham || 48 ||
[Analyze grammar]

tvāmṛte kamalākāṃta nānyannirvāṇakāraṇam |
aṃtaryāminprabho me tvaṃ tvāṃ vinā vigrahaḥ kutaḥ || 49 ||
[Analyze grammar]

mūḍhā ye tvāṃ na jānaṃti hṛṣyaṃti viṣaye'śucau |
nirmalāṃbarasaṃkāśa tvāmahaṃ śaraṇaṃ gataḥ || 50 ||
[Analyze grammar]

jaiminiruvāca |
bhagavānapi rudraṃ taṃ kṣetrapālaṃ tathā vibhuḥ |
sthāpayāmāsa paritaḥ svayaṃ madhye vyavasthitaḥ || 51 ||
[Analyze grammar]

kapālamocanaṃ nāma kṣetrapālaṃ yameśvaram |
mārkaṇḍeyaṃ tatheśānaṃ bilveśaṃ nīlakaṃṭhakam || 52 ||
[Analyze grammar]

vaṭamūle vaṭeśaṃ ca liṃgānyaṣṭau maheśituḥ |
yāni dṛṣṭvā tathā spṛṣṭvā pūjayitvā vimucyate || 53 ||
[Analyze grammar]

atra kṣetre mṛtā ye ca na teṣāṃ tu prabhuryamaḥ |
yadarthamāgatastvaṃ hi tadanyatra prasādhaya || 54 ||
[Analyze grammar]

tathāpyasau jagannātho bhaktāyātmasamarpakaḥ |
yamena toṣito bhaktyā prapannārtiharaḥ prabhuḥ || 55 ||
[Analyze grammar]

sudarśanena cakreṇa māyāṃ ca vyavadhāsyati |
atyājye'sminkṣetravare svarṇavālukayā vṛte || 56 ||
[Analyze grammar]

taṃ yamaṃ vaṃcayitvā tu prasthāpayya yamālayam |
sādhu matvā tataḥ prāha brahmāṇaṃ purataḥ sthitam || 57 ||
[Analyze grammar]

śrīruvāca |
iṃdradyumno nāma rājā yuge satye bhaviṣyati |
vaiṣṇavaḥ sarvayajñānāmāharttā śāstrakovidaḥ || 58 ||
[Analyze grammar]

atrāgatya mahābhaktiṃ kariṣyati nṛpottamaḥ |
bhagavatprītaye yena vājimedhasahasrakam || 59 ||
[Analyze grammar]

kariṣyate prajānātha tadanugrahakāraṇāt |
ekadārusamutpannaścaturddhā saṃbhaviṣyati || 60 ||
[Analyze grammar]

dāravapratimānāni viśvakarmā ghaṭiṣyati |
pratiṣṭhāpayitā tvaṃ hi iṃdradyumnaprasāditaḥ || 61 ||
[Analyze grammar]

asmākaṃ sadṛśānāṃ ca pratimānāṃ pitāmaha |
tadrūpakā pratiṣṭhā hi ghaṭanā ca bhaviṣyati || 62 ||
[Analyze grammar]

iti śrutvā śriyo vākyaṃ caturvaktro yamaśca saḥ |
svaṃsvaṃ puraṃ jagmatustau mudā paramayā yutau || 63 ||
[Analyze grammar]

kṣetrasya mahimānaṃ taṃ saṃsmṛtya ca muhurmuhuḥ |
vismayena ca harṣeṇa romāṃcāṃcitavigrahau || 64 ||
[Analyze grammar]

sāṃprataṃ munayastasminniṃdradyumnaprasāditaḥ |
śaṃkhacakradharaḥ śrīmānnīlajīmūtasaṃnibhaḥ || 65 ||
[Analyze grammar]

nīlācalaguhāṃtaḥstho bibhraddārumayaṃ vapuḥ |
āste lokopakārāya balena ca subhadrayā || 66 ||
[Analyze grammar]

sudarśanena cakreṇa dāruṇā nirmitena ca |
sahitaḥ praṇatārtīnāṃ nāśanaḥ karuṇārṇavaḥ || 67 ||
[Analyze grammar]

yaṃ dṛṣṭvā pāpabaṃdhena sudṛḍhena vimucyate |
sukarmaughaparīpāko yugapatsamupasthitaḥ || 68 ||
[Analyze grammar]

paśyatāṃ bho muniśreṣṭhāstāpatrayasudhānidhim |
bahavo hyavatārā hi viṣṇordivyāśca mānuṣāḥ || 69 ||
[Analyze grammar]

atyadbhutāni karmāṇi māhātmyaṃ cāpi varṇitam |
pāricityānmanuṣyāṃstu na manyaṃte surā api || 70 ||
[Analyze grammar]

devāsuramanuṣyāṇāṃ gaṃdharvoragarakṣasām |
tiraścāmapi bho viprāstasmindārumaye harau || 71 ||
[Analyze grammar]

sarvātmabhūte vasati cittaṃ sarvasukhāvahe |
upajīvaṃtyasya sukhaṃ yasyānanyasvarūpiṇaḥ || 72 ||
[Analyze grammar]

brahmaṇaḥ śrutivāgāhetyetadatrānubhūyate |
dyati saṃsāraduḥkhāni dadāti sukhamavyayam || 73 ||
[Analyze grammar]

tasmāddārumayaṃ brahma vedāṃteṣu pragīyate |
na hi kāṣṭhamayī mokṣaṃ dadāti pratimā kvacit || 74 ||
[Analyze grammar]

kṛtenākṛtatā viprāḥ kadācinnopalabhyate |
akṛto hyapavargastu kṛtādvā dāruṇaḥ katham || 75 ||
[Analyze grammar]

adhiṣṭhānaṃ vinā brāhmyamaiśvaryaṃ nopalabhyate |
rahasyametatparamaṃ viṣṇoḥ sthānamanuttamam || 76 ||
[Analyze grammar]

alaukikī sā pratimā laukikīti prakāśitā |
kutra śrutā vā dṛṣṭā vā pratimā vyāharediti || 77 ||
[Analyze grammar]

iṃdradyumnāya sa varaṃ tadā dāruvapurdadau |
dīnānāthaikaśaraṇaṃ taraṇaṃ bhavavāridheḥ || 78 ||
[Analyze grammar]

carācara sadāvaṃdya caraṇaṃ taṃ parāyaṇam |
nārāyaṇaṃ jagadyoniṃ sṛṣṭisaṃhṛtikāraṇam || 79 ||
[Analyze grammar]

mokṣaṇaṃ sarvapāpānāṃ dāraṇaṃ sakalāpadām |
vibhūtīnāṃ visaraṇaṃ varaṇaṃ sarvayoginām || 80 ||
[Analyze grammar]

bharaṇaṃ sarvajaṃtūnāṃ dharaṇaṃ jagatāmapi |
bhāṣaṇaṃ sarvabhāṣāṇāṃ dūṣaṇaṃ sarvaduṣkṛtām || 81 ||
[Analyze grammar]

śoṣaṇaṃ sarvapaṃkānāṃ nīlādriśaraṇaṃ harim |
śaraṇaṃ prayāta munayo hyananyaśaraṇaṃ vibhum || 82 ||
[Analyze grammar]

niśceṣṭo dāruvarṣmāpi divyalīlāvilāsakṛt |
kṣamate svalpabhaktyāpi soparādhaśataṃ nṛṇām || 83 ||
[Analyze grammar]

atra vaḥ kathayiṣyāmi caritaṃ pāpanāśanam |
līlayā dārudehasya munayaḥ paramātmanaḥ || 84 ||
[Analyze grammar]

kurukṣetre samudbhūtau brāhmaṇakṣatriyāvubhau |
sakhāyau jagmatuḥ prītyā ekāhāravihāriṇau || 85 ||
[Analyze grammar]

vṛttacyutau niṣiddhānāmāharttārau vimohitau |
asvādhyāyavaṣaṭkārau svadhāsvāhāvivarjitau || 66 ||
[Analyze grammar]

apātrabhūtau dharmasya mahāpātakadūṣitau |
madhubhakṣau paṇyayoṣitsahavāsau mudānvitau || 87 ||
[Analyze grammar]

pāralaukikaciṃtā tu tayoḥ svapnepi nāgatā |
evaṃ pravartamānau tāvāyuṣo'rddhaṃ ca ninyatuḥ || 88 ||
[Analyze grammar]

ekadā bhramamāṇau tau yajñavāṭamagacchatām |
śṛṇvanto dūrataḥ stotraṃ śāstraśabdaṃ manoharam || 89 ||
[Analyze grammar]

dṛṣṭvā tāstāḥ kriyāḥ sarvāḥ śrutisaṃcoditā dvijāḥ |
tau tadā cakratuḥ śraddhāṃ dharme vartmanyadhārmikau || 90 ||
[Analyze grammar]

saṃsmaraṃtau svajātiṃ tau puṃḍarīkāṃbarīṣakau |
niṃdantau duścaritraṃ svaṃ parasparamabhāṣatām || 91 ||
[Analyze grammar]

kathamāvāṃ tariṣyāvo duṣkṛtārṇavamulbaṇam |
ihaiva janmanyajaraṃ buddhipūrvamupārjjitam || 92 ||
[Analyze grammar]

na tacchāstraṃ hi jānāti yadāvābhyāṃ ca duṣkṛtam || |
sañcitaṃ tasya ghorasya prāyaścittaṃ sudurllabham || 93 ||
[Analyze grammar]

tathāpi brāhmaṇānetānbrahmiṣṭhānvai sadogatān |
praṇipātaprapannānvai pṛcchāvo'tra ca niṣkṛtim || 94 ||
[Analyze grammar]

iti niścitya tau viprānabhivādyābhyapṛcchatām |
yathāvatkalmaṣaṃ svaṃsvaṃ vijñāpya ca muhurmuhuḥ || 95 ||
[Analyze grammar]

te tayorvacanaṃ śrutvā mīlitākṣā dvijottamāḥ |
nābruvankiṃsvidanyonyaṃ vīkṣaṃto vismitānanāḥ || 96 ||
[Analyze grammar]

aho sughorakarmāṇi saṃcitāni durātmanoḥ |
yeṣu śāstraṃ padaṃ dātuṃ prāyaścittāya na hyalam || 97 ||
[Analyze grammar]

śaknumo na vayaṃ tasmādanayorniṣkṛtāviti |
teṣāṃ madhye sadomukhyaḥ kaścidvaiṣṇavapuṃgavaḥ || 98 ||
[Analyze grammar]

bhagavadbhaktimāhātmya kṣapitāśeṣakalmaṣaḥ |
tānuvāca vihasyedaṃ vākyaṃ vākyavidāṃ varaḥ || 99 ||
[Analyze grammar]

vaiṣṇava uvāca |
bho dvija kṣatradāyāda pāparāśeḥ sudāruṇāt |
muktiṃ cedvāṃcchatastūrṇaṃ gacchataṃ puruṣottamam || 100 ||
[Analyze grammar]

kṣetrottamaṃ dārumayo yatrāste puruṣottamaḥ |
indradyumnasya rājarṣerbhaktyānugrahakṛdvibhuḥ || 101 ||
[Analyze grammar]

tamārādhya jagannāthaṃ śaṃkhacakragadādharam |
pāpakṣayaṃ vā muktiṃ vā svecchayā prāpsyatha dhuvam || 102 ||
[Analyze grammar]

ghoraduṣkṛtatūlaugha dāvāgnisadṛśastu saḥ |
tapase tatkṣayaṃ netuṃ na śakyaṃ janmakoṭibhiḥ || 103 ||
[Analyze grammar]

yugapatsaṃkṣayaṃ yāti yaṃ dṛṣṭvā sarvakilbiṣam |
tanmā vilaṃbaṃ kurutaṃ prayātaṃ tatra satvaraṃ || 104 ||
[Analyze grammar]

supuṇye cotkale deśe dakṣiṇārṇavatīrage |
nīlādriśikharāvāsaṃ vrajataṃ śaraṇaṃ vibhum || 105 ||
[Analyze grammar]

so'bhīṣṭasiddhiṃ vāṃ devaḥ pradāsyati kṛpānidhiḥ |
ityādiṣṭau tato viprakṣatriyau harṣasaṃyutau || 106 ||
[Analyze grammar]

tenaiva vartmanā viprāḥ prayātau puruṣottame || 107 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde caturtho'dhyāyaḥ || 4 ||
[Analyze grammar]