Chapter 3

[English text for this chapter is available]

śrīruvāca |
sādhu te buddhirutpannā viṣṇoḥ saṃnidhimāśritā |
adbhutaṃ kathayāmyetatkṣetrasya ravinaṃdana || 1 ||
[Analyze grammar]

yathāhaṃ bhagavadvakṣaḥ sthalasthā dadṛśe purā |
carācare jagatyasminpralīne pralaye yama || 2 ||
[Analyze grammar]

etatkṣetramahaṃ caiva dve evopasthite tadā |
sa tadā saptakalpāyurmṛkaṃḍorātmajo muniḥ || 3 ||
[Analyze grammar]

praṇaṣṭe sthāvaracare nimagnaḥ pralayārṇave |
nāvasthānamavāpyaiva śarma lebhe na kutracit || 4 ||
[Analyze grammar]

jalārṇave bhrāmyamāṇaḥ pralaye sa itastataḥ |
puruṣottamasādṛśye kṣetre sa vaṭamaikṣata || 5 ||
[Analyze grammar]

utplutyotplutya mūlaṃ tu nyagrodhasya samīpataḥ |
śuśrāva bāla vacanaṃ mārkaṇḍeya mamāṃtikam || 6 ||
[Analyze grammar]

praviśya duḥkhamatulaṃ jahīhi khalu mā śucaḥ |
tacchrutvā citravacanamapratarkyaṃ tadā muniḥ || 7 ||
[Analyze grammar]

vismayaṃ paramaṃ lebhe svaduḥkhaṃ nāpyacintayat |
vāribhiḥ śīryate naitaddahyate kālavahninā || 8 ||
[Analyze grammar]

saṃvartakādibhirnaitacchoṣyate nāpi cālyate |
ekārṇave mahāghore nauriva kṣetramīkṣyate || 9 ||
[Analyze grammar]

tatrāyaṃ yūpasadṛśo nyagrodhastiṣṭhate mahān |
yaṃ gṛhītvā kṣetramidaṃ nyagrodha īśitustanuḥ || 10 ||
[Analyze grammar]

mahāpralaya vātena śākhā nāsya hi kampate |
tasyādhastātsa hi muniḥ sthitvā caitadaciṃtayat || 11 ||
[Analyze grammar]

ekārṇave'sminpralaye naṣṭe sthāvarajaṃgame |
bhūpradeśaḥ sthirataraḥ kathameṣa vibhāvyate || 12 ||
[Analyze grammar]

yatrāyaṃ śākhipravaraḥ komalaḥ paridṛśyate |
mārkaṃḍeyāgaccha muhuriti sapraśrayaṃ vacaḥ || 13 ||
[Analyze grammar]

kuto nirāśramiyadaṃ cintayanniti sa plavan |
śaṃkhacakragadāpāṇiṃ nārāyaṇamalokayat || 14 ||
[Analyze grammar]

tadaṃgapadmāsanagāṃ māṃ ca vaivasvataikṣata |
vivaśo jalavātābhyāṃ tadā sustho vyavasthitaḥ || 15 ||
[Analyze grammar]

hṛṣṭāṃtarātmā sa munirāvāṃ sāṣṭāṃgamānataḥ |
prasādanāya devasya stotrametadudāharat || 16 ||
[Analyze grammar]

mārkaṃḍeya uvāca |
tvatpādapadmānusarānuṣaṃgaṃ rudreṃdrapadmāsanasampadāḍhyam |
tvadbhaktihīnaṃ paritaḥ prataptaṃ dīnaṃ paritrāhi kṛpāṃbudhe mām || 17 ||
[Analyze grammar]

brahmādibhiryatparicaryamāṇaṃ padāmbujadvandvamaciṃtyaśakti |
śvaḥ śreyasaprāptinidānatattvaṃ dīnaṃ paritrāhi kṛpāmbudhe mām || 18 ||
[Analyze grammar]

yadaṃgabhūtaṃ jagadaṇḍametadanekakoṭi praguṇaṃ vibhāti |
līlāvilāsasthitisṛṣṭilīnaṃ tanmāṃ sudīnaṃ parirakṣa viṣṇo || 19 ||
[Analyze grammar]

ekaṃ suvarṇaṃ kaṭakādibhedairnānā yathā vā nabhasodito'rkaḥ |
ādhāravaiṣamyajaleṣu tādṛgvibhāvyase nirguṇa eka eva || 20 ||
[Analyze grammar]

aśeṣasaṃpūrṇaruciprahīṇopādānasaṃkalpavivarjito'pi |
dīnānukaṃpānuguṇaṃ bibharṣi yuge yuge dehamapāraśakte || 21 ||
[Analyze grammar]

tvatpādapadmaṃ jagadīśa pūrvamasevyatānātmadhiyā mayā yat |
tatkarmaṇā dāruṇapākabhājaṃ dīnaṃ paritrāhi kṛpāṃbudhe mām || 22 ||
[Analyze grammar]

aśeṣalokasthitisṛṣṭilīnavilāsi yatte triguṇaṃ vibhāti |
vapurmahātmanmahadādiheturhetornamaste prakṛteḥ parasya || 23 ||
[Analyze grammar]

sarvatra gatvā bṛhadaprameyaṃ pravarddhamānaṃ tvayi bṛṃhitaṃ ca |
tadbahmarūpaṃ pariṇāmahetuṃ svādhyātmaviśvātmakamāśrayāmi || 24 ||
[Analyze grammar]

ekārṇave mahāghore nāvasthātuṃ pradeśabhūḥ |
asti lakṣmīpate meghavārivātaprakaṃpanāt || 25 ||
[Analyze grammar]

trāhi viṣṇo jagannātha magnaṃ saṃsārasāgare |
māmuddharāsmādgoviṃda kṛpāpāṃgavilokanāta || 26 ||
[Analyze grammar]

śrīruvāca |
stuvaṃtamevaṃ brahmarṣi sākṣānnārāyaṇo vibhuḥ |
vilokyānugrahadṛśā vākyaṃ cedamuvāca ha || 27 ||
[Analyze grammar]

śrībhagavānuvāca |
mārkaṃḍeya sudīno'si māmajñāya dvijottama |
duścaraṃ tu tapastaptaṃ dīrghāyustena kevalam || 28 ||
[Analyze grammar]

śayānaṃ patrapuṭake paśya kalpavaṭordhvagama |
bālasvarūpaṃ sarveṣāṃ kālātmānaṃ mahāmune |
praviśya vistṛtaṃ vaktraṃ tatrāvasthātumarhasi || 29 ||
[Analyze grammar]

śrīruvāca |
evamukto bhagavatā sa munirvismitānanaḥ || 30 ||
[Analyze grammar]

āruhya dadṛśe bālarūpaṃ tasyāviśanmukhe |
praviṣṭaḥ kaṃṭhamārgeṇa mahāyāmaṃ mahodaram || 31 ||
[Analyze grammar]

tatrāsau dadṛśe vipro bhuvanāni caturdaśa |
brahmādidikpālasurānsiddhagaṃdharvarākṣasān || 32 ||
[Analyze grammar]

ṛṣīndivyaṛṣīṃścaiva bhūtalaṃ sāgarāṃkitam |
nānātīrthairnadībhiśca parvataiḥ kānanaistathā || 33 ||
[Analyze grammar]

lakṣitaṃ pattanapuraṃ grāmakharvaṭakairyutam |
pātālāni tathā sapta nāgakanyāḥ sahasraśaḥ || 34 ||
[Analyze grammar]

mahārghyamaṇisaudhaiśca sudhāpātraiḥ samujjvalaiḥ |
anarghyamaṇibhirnāgaiḥ sevitaṃ paramādbhutam || 35 ||
[Analyze grammar]

jagatāṃ dhāriṇaṃ śeṣaṃ sahasraphaṇamaṃḍitam |
vyākartāramaśeṣāṇāṃ śāstrāṇāṃ śiṣyamadhyagam || 36 ||
[Analyze grammar]

brahmāṃḍodaragaṃ vastu yatkiṃcitparameṣṭhinā |
sṛṣṭaṃ sarvaṃ dadṛśe'sau tatkukṣau sa mahāmuniḥ || 37 ||
[Analyze grammar]

nāpaśyadaṃtaṃ kukṣestu bhramamāṇa itastataḥ |
tato viniṣkramya punardadṛśe ca mayā saha || 38 ||
[Analyze grammar]

pūrvamālakṣitaṃ yadvadāsthitaṃ puruṣottamam |
vismayotphullanayanaḥ praṇipatyedamabravīt || 39 ||
[Analyze grammar]

mārkaṃḍeya uvāca |
bhagavandevadeveśa kimadbhutamidaṃ prabho |
mahāpralayasaṃrodhe sṛṣṭiratra vibhāvyate || 40 ||
[Analyze grammar]

tvanmāyā duravacchedyā kathaṃ vai jñāyate mayā || 41 ||
[Analyze grammar]

śrībhagavānuvāca |
mune kṣetramidaṃ citraṃ śāśvataṃ me vibhāvaya |
na sṛṣṭipralayāvatra vidyete na ca saṃsṛtiḥ || 42 ||
[Analyze grammar]

sadaikarūpaṃ puruṣottamākhyaṃ muktipradaṃ māmiha saṃprabudhya |
atra praviṣṭo na punaḥ prayāti garbhasthitiṃ sāṃdrasukhasvarūpaḥ || 43 ||
[Analyze grammar]

ityājñapto bhagavatā mārkaṃḍeyo mahāmuniḥ |
atra vāsaṃ kariṣyāmītyanyatīrthaparāṅmukhaḥ |
prahṛṣṭavadanaḥ prāha praṇipatya jagadgurum || 44 ||
[Analyze grammar]

mārkaṇḍeya uvāca |
uvāca sa tathā viṣṇuṃ bhaktiśraddhāsamanvitaḥ |
anugṛhṇīṣva bhagavankṣetresminpuruṣottame |
yathā sthito mṛtyuvaśaṃ na vraje puruṣottama || 45 ||
[Analyze grammar]

śrībhagavānuvāca |
atra sthitiṃ me viprarṣe kṣetre mokṣaprasādhake || 46 ||
[Analyze grammar]

kariṣyāmi na saṃdeho yāvadābhūtasaṃplavam |
pralayāvasāne tīrthaṃ te racayiṣyāmi śāśvatam || 47 ||
[Analyze grammar]

yattīre tapa āsthāya maddvitīyatanuṃ śivam |
ārādhya madanukrośānmṛtyuṃ jeṣyasi niścitam || 48 ||
[Analyze grammar]

jaiminiruvāca |
evaṃ purā dattavaro mārkaṃḍeyo mahāmuniḥ |
nyagrodhavāyavyakoṇe khātaṃ cakreṇa vai hareḥ || 49 ||
[Analyze grammar]

pāvanaṃ gartamāsthāya pūjayitvā maheśvaram |
mahatā tapasā vipro jitavānmṛtyumaṃjasā || 50 ||
[Analyze grammar]

munestasyaiva nāmnāyaṃ prakhyāto garta uttamaḥ |
yatra snātvā śivaṃ dṛṣṭvā vājimedhaphalaṃ labhet || 51 ||
[Analyze grammar]

śrīruvāca |
pañcakrośamidaṃ kṣetraṃ samudrāṃtarvyavasthitam |
dvikrośaṃ tīrtharājasya taṭabhūmau sunirmalam || 52 ||
[Analyze grammar]

suvarṇavālukākīrṇaṃ nīlaparvataśobhitam |
yo'sau viśveśvaro devaḥ sākṣānnārāyaṇātmakaḥ || 53 ||
[Analyze grammar]

saṃyamya viṣayagrāmaṃ samudrataṭamāsthitaḥ |
upāsituṃ jagannāthaṃ catuḥṣaṣṭitamaḥ prabhuḥ || 54 ||
[Analyze grammar]

yameśvara iti khyāto yamasaṃyamanāśanaḥ |
yaṃ dṛṣṭvā pūjayitvā tu koṭiliṃgaphalaṃ labhet || 55 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde tṛtīyo'dhyāyaḥ || 3 ||
[Analyze grammar]