Chapter 1

[English text for this chapter is available]

atha puruṣottama kṣetramāhātmya prārambhaḥ |
nārāyaṇaṃ namaskṛtya naraṃ caiva narottamam |
devīṃ sarasvatīṃ vyāsaṃ tato jayamudīrayet || 1 ||
[Analyze grammar]

munaya ūcuḥ |
bhagavansarvaśāstrajña sarvatīrthamahattvavit |
kathitaṃ yattvayā pūrvaṃ prastute tīrthakīrtane |
puruṣottamākhyaṃ sumahatkṣetraṃ paramapāvanam || 2 ||
[Analyze grammar]

yatrāste dāravatanuḥ śrīśo mānuṣalīlayā |
darśanānmuktidaḥ sākṣātsarvatīrthaphalapradaḥ || 3 ||
[Analyze grammar]

tanno vistarato brūhi tatkṣetraṃ kena nirmitam |
jyotiḥprakāśo bhagavānsākṣānnārāyaṇaḥ prabhuḥ || 4 ||
[Analyze grammar]

kathaṃ dārumayastasminnāste paramapūruṣaḥ |
vada tvaṃ vadatāṃ śreṣṭha sarvalokaguro mune || 5 ||
[Analyze grammar]

śrotumicchāmahe brahmanparaṃ kautūhalaṃ hi naḥ |
jaiminiruvāca |
śṛṇudhvaṃ munayaḥ sarve rahasyaṃ paramaṃ hi tat || 6 ||
[Analyze grammar]

avaiṣṇavānāṃ śravaṇe bhaktistava na jāyate |
yasya saṃkīrtanādeva sakalaṃ līyate tamaḥ || 7 ||
[Analyze grammar]

yadyapyeṣa jagannāthaḥ sarvagaḥ sarvabhāvanaḥ |
skandena kathitaṃ pūrvaṃ śrutvā śaṃbhormukhāmbujāt |
saṃti kṣetrāṇi cānyāni sarvapāpaharāṇi vai || 8 ||
[Analyze grammar]

etatkṣetraṃ paraṃ cāsya vapurbhūtaṃ mahātmanaḥ |
svayaṃ vapuṣmāṃstatrāste svanāmnā khyāpitaṃ hi tat || 9 ||
[Analyze grammar]

tatra ye sthātumicchaṃti tepi sarve hatāṃhasaḥ |
kiṃ punastava tiṣṭhaṃto ye paśyanti gadādharam || 10 ||
[Analyze grammar]

aho tatparamaṃ kṣetraṃ vistṛtaṃ daśayojanam |
tīrtharājasya salilādutthitaṃ vālukācitam || 11 ||
[Analyze grammar]

nīlācalena mahatā madhyasthena virājitam |
ekastanamiva pṛthvyāḥ sudūrātparibhāvitam || 12 ||
[Analyze grammar]

varāharūpiṇā pūrvaṃ samuddhṛtya vasundharām |
sarvataḥ susamāṃ kṛtvā parvataiḥ susthirīkṛtām || 13 ||
[Analyze grammar]

sṛṣṭvā carācaraṃ sarvaṃ tīrthāni saridabdhikān |
kṣetrāṇi ca yathāsthānaṃ saṃniveśya yathā purā || 14 ||
[Analyze grammar]

brahmā vicintayāmāsa sṛṣṭibhāranipīḍitaḥ |
punaretāṃ kriyāṃ gurvīṃ nārabheya kathaṃ tviti || 15 ||
[Analyze grammar]

tāpatrayābhibhūtā hi mucyaṃte jaṃtavaḥ katham |
evaṃ cintayamānasya matirāsītprajāpateḥ || 16 ||
[Analyze grammar]

muktyekakāraṇaṃ viṣṇuṃ stoṣye 'haṃ parameśvaram |
brahmovāca |
namaste jagadādhāra śaṅkhacakragadādhara || 17 ||
[Analyze grammar]

yannābhipaṃkajādeva jāto'haṃ viśvasṛṣṭikṛt |
paramārthasvarūpaṃ te tvaṃ vai vetsi jaganmaya || 18 ||
[Analyze grammar]

yanmāyayā jagatsarvaṃ nirmitaṃ mahadādikam |
yanniḥśvāsasamudbhūtaṃ śabdabrahma tridhā'bhavat || 19 ||
[Analyze grammar]

upajīvya tadevāhamasṛjaṃ bhuvanāni vai |
tvatto nānyaḥ sthūlasūkṣmadīrghahrasvādi kiṃcana || 20 ||
[Analyze grammar]

vikārabhedairbhagavaṃstvamevedaṃ carācaram |
kaṭakādi yathā svarṇaṃ guṇatrayavibhāgaśaḥ || 21 ||
[Analyze grammar]

sraṣṭā sṛjyaṃ tvamevātra poṣṭā poṣyaṃ jagatprabho |
ādhāro dhriyamāṇaṃ ca dharttā tvaṃ parameśvara || 22 ||
[Analyze grammar]

tvatpreritamatiḥ sarvaścarate ca śubhā'śubham |
tataḥ prāpnoti sadṛśīṃ tvayaiva vihitāṃ gatim || 23 ||
[Analyze grammar]

jagato'sya gatirbharttā sākṣī tvaṃ parameśvara |
carācaraguro sarvajīvabhūta kṛpāmaya |
prasīdādya jagannātha nityaṃ tvaccharaṇyasya me || 24 ||
[Analyze grammar]

jaiminiruvāca |
evaṃ saṃstūyamānaśca brahmaṇā garuḍadhvajaḥ |
nīlajīmūtasaṃkāśaḥ śaṃkhacakrādicihnitaḥ || 25 ||
[Analyze grammar]

patageṃdrasamārūḍhaḥ sphuradvadanapaṃkajaḥ |
āvirāsīddvijaśreṣṭhā vivakṣuḥ sphuritādharaḥ || 26 ||
[Analyze grammar]

śrībhagavānuvāca |
yadarthaṃ māṃ stuṣe brahmanna śakyaḥ pratibhāti saḥ || 27 ||
[Analyze grammar]

anādyavidyā sudṛḍhā suśchedyā karmabaṃdhanaiḥ |
prabhavaṃtyāṃ kathaṃ tasyāṃ hrīyete mṛtijanmanī || 28 ||
[Analyze grammar]

tathāpi cedatra kṛte vyavasāyastavānagha |
krameṇa yena hi bhavettatte vakṣyāmi kāraṇam || 29 ||
[Analyze grammar]

ahaṃ tvaṃ tvamahaṃ brahmanmanmayaṃ cākhilaṃ jagat |
ciste yatra me tatra nānyatheti vicāraya || 30 ||
[Analyze grammar]

sāgarasyottare tīre mahānadyāstu dakṣiṇe |
sa pradeśaḥ pṛthivyāṃ hi sarvatīrthaphalapradaḥ || 31 ||
[Analyze grammar]

tatra ye manujā brahmannivasaṃti subuddhayaḥ |
janmāṃtarakṛtānāṃ ca puṇyānāṃ phalabhāginaḥ || 32 ||
[Analyze grammar]

nālpapuṇyāḥ prajāyaṃte nābhaktā mayi padmaja |
ekāmrakānanādyāvaddakṣiṇodadhitīrabhūḥ || 33 ||
[Analyze grammar]

padātpadācchreṣṭhatamaḥ kramātparamapāvanaḥ |
sindhutīraṃ tu yo bahmanrājate nīlaparvataḥ || 34 ||
[Analyze grammar]

pṛthivyāṃ gopitaṃ sthānaṃ tava cāpi sudurlabham |
surāsurāṇāṃ durjñeyaṃ māyayāchāditaṃ mama || 35 ||
[Analyze grammar]

sarvasaṃgaparityaktastatra tiṣṭhāmi dehabhṛt |
kṣarākṣarāvatikramya vartte'haṃ puruṣottame || 36 ||
[Analyze grammar]

sṛṣṭyā layena nākrāntaṃ kṣetraṃ me puruṣottamam |
yathā māṃ paśyasi brahmanrūpaṃ cakrādicihnitam || 37 ||
[Analyze grammar]

īdṛśaṃ tatra gatvaiva drakṣyase māṃ pitāmaha |
nīlādreraṃtarabhuvi kalpanyagrodhamūlataḥ || 38 ||
[Analyze grammar]

vāruṇyāṃ diśi yatkuṇḍaṃ rauhiṇaṃ nāma viśrutam |
tattīre nivasantaṃ māṃ paśyantaścarmacakṣuṣā || 39 ||
[Analyze grammar]

tadambhasā kṣīṇapāpā mama sāyujyamāpnuyuḥ |
tatra vraja mahābhāga dṛṣṭvā māṃ dhyāyatastava || 40 ||
[Analyze grammar]

prakāśaṃ yāsyate tasya kṣetrasya mahimā'paraḥ |
āścaryabhūtaḥ paramastavāpi ca bhaviṣyati || 41 ||
[Analyze grammar]

śrutismṛtīhāsapurāṇagopitaṃ manmāyayā tanna hi kasya gocaram |
prasādato me stuvatastavādhunā prakāśamāyāsyati sarvagocaram || 42 ||
[Analyze grammar]

vrateṣu tīrtheṣu ca yajñadānayoḥ puṇyaṃ yaduktaṃ vimalātmanāṃ hi tat |
aharnivāsāllabhate'tra sarvaṃ niḥśvāsa vāsātkhalu cāśvamedhikam || 43 ||
[Analyze grammar]

ityādiśya vidhiṃ viprāstadāsau puruṣottamaḥ |
paśyatastasya tatraiva prabhurantaradhīyata || 44 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde prathamo'dhyāyaḥ || 1 ||
[Analyze grammar]