Chapter 37

[English text for this chapter is available]

atha śaṃkhābhidhānanṛpavṛttāntaḥ |
bhāradvāja uvāca |
śṛṇu pārtha pravakṣyāmi kathāmāścaryakāriṇīm |
yathā'sau bhagavānasmiñchaile prāpa prakāśatām || 1 ||
[Analyze grammar]

śrutābhidhāno nṛpatirasti haihayavaṃśajaḥ |
yaḥ prajāḥ svā iva ciraṃ śaśāsa dharaṇīṃ śubhām || 2 ||
[Analyze grammar]

tasya putro guṇanidhiḥ śaṃkho nāma mahīpatiḥ |
pālayāmāsa vasudhāṃ sarvaśāstraviśāradaḥ || 3 ||
[Analyze grammar]

tasya viṣṇau jagannāthe puṇḍarīkāyatekṣaṇe |
babhūva niścalā bhaktiḥ parityaktānyasaṃśrayā || 4 ||
[Analyze grammar]

devadevaṃ jagannāthamanantaṃ puruṣottamam |
pragāḍhaniścayo nityaṃ dhyāyannadbhutavaibhavam || 5 ||
[Analyze grammar]

cakre vratāni dānāni puṇyāni vividhāni ca |
vedavedyasya niyataṃ prītyarthaṃ madhuvidviṣaḥ || 6 ||
[Analyze grammar]

tamuddiśyaiva vidadhe vājimedhādikānkratūn |
yathoktadakṣiṇāyogātprīṇitāśeṣabhūsuraḥ || 7 ||
[Analyze grammar]

iṣṭāpūrttātmakaṃ cakre karmajātamatandritaḥ |
vinyastahṛdayo nityaṃ keśave bhaktavatsale || 8 ||
[Analyze grammar]

smaratyajasraṃ govindaṃ japatyacyutamavyayam |
pūjayatyabjanayanaṃ saṃkīrtayati śārṅgiṇam || 9 ||
[Analyze grammar]

śṛṇoti satataṃ rājā saṃsārārṇavatāriṇīḥ |
paurāṇikaiḥ samākhyātāḥ pavitrā vaiṣṇavī kathāḥ || 10 ||
[Analyze grammar]

brāhmaṇānarcati smāyaṃ hariprītyarthameva ca |
itthaṃ sarvātmanā yukto'pyaśrāntaḥ pṛthivīpatiḥ || 11 ||
[Analyze grammar]

nāpaśyacchāśvataiśvaryaṃ svatantraṃ puruṣottamam |
aprāpya darśanaṃ viṣṇoḥ sarvayajñamayātmanaḥ || 12 ||
[Analyze grammar]

saśokākrāntahṛdayaḥ parāṃ cintāmupāgamat || 13 ||
[Analyze grammar]

śaṃkha uvāca |
paraḥ sahasrairjanairatītaduṣkṛtaṃ bahu |
kṛtaṃ mayā yadaprāptaṃ hṛṣīkeśasya darśanam || 14 ||
[Analyze grammar]

upārjitānāṃ tamasāmanekaiḥ pūrvajanmabhiḥ |
akhaṇḍaṃ hi phalaṃ viṣṇordarśanaṃ madhughātinaḥ || 15 ||
[Analyze grammar]

kathaṃ nu yāyādbhagavānviṣayaṃ mama netrayoḥ |
kadā vā labhyate śreyastadvākyākarṇanātmakam || 16 ||
[Analyze grammar]

hā dhiṅmāṃ vihitāgaskaṃ kriyāsāphalyavarjitam |
nārāyaṇakṛpādūraṃ saṃsārakleśagocaram || 17 ||
[Analyze grammar]

bharadvāja uvāca |
iti cintākule tasminrājñi jīvitaniḥspṛhe |
adṛśyamūrtiḥ sarveṣāṃ śṛṇvatāmāha keśavaḥ || 18 ||
[Analyze grammar]

śrībhagavānuvāca |
mā śokasya vaśaṃ yāyāḥ śṛṇu vakṣyābhi te hitam |
madekaśaraṇaṃ sādhuṃ tvāṃ tyakṣyāmi kathaṃ nṛpa || 19 ||
[Analyze grammar]

ayaṃ veṃkaṭanāmādristriṣu lokeṣu viśrutaḥ |
vaikuṇṭhādapi me rājannāvāso'tipriyāvahaḥ || 20 ||
[Analyze grammar]

taṃ gatvā bhūdharavaraṃ tava bhaktyā tapasyataḥ |
gate sahasre varṣāṇāṃ yāsyāmyālokanīyatām || 21 ||
[Analyze grammar]

bhavānivodyato'gastyo mama darśanamañjasā |
kva vā saṃdṛśyate viṣṇurevamāha caturmukham || 22 ||
[Analyze grammar]

vṛṣabhādrau harirdraṣṭuṃ labhyate niyatātmabhiḥ |
gaccha tatreti munaye kathayāmāsa padmabhūḥ || 23 ||
[Analyze grammar]

ambhojasaṃbhavenetthamādiṣṭaḥ kumbhasambhavaḥ |
añjanādrau mahāvāse tapastaptuṃ sameṣyati || 24 ||
[Analyze grammar]

tasminmahīdhare puṇye kṛtavāso bhavānapi |
ārādhya māṃ taponiṣṭho mama darśanamāpsyasi || 25 ||
[Analyze grammar]

atha bhagavaduktyā śaṃkhanṛpasya śrīveṃkaṭācalāgamanam |
bharadvāja uvāca |
ityājñapto bhagavatā śaṃkho dānavavairiṇā |
jagāma prītimatulāṃ dhanyosmīti svacetasi || 26 ||
[Analyze grammar]

vinyasya tanayaṃ vajraṃ prajāpālanakarmaṇi |
govindadarśanāpekṣī nārāyaṇagiriṃ yayau || 27 ||
[Analyze grammar]

tasya śṛṃge samuttuṃge svāmipuṣkariṇīṃ śubhām |
divyaiḥ payobhirāpūrṇāmapaśyadamṛtopamaiḥ || 28 ||
[Analyze grammar]

anekasiddhagandharvadevarṣigaṇasevitām |
bhavatāpapraśamanī sarvatīrthasamāśrayām || 29 ||
[Analyze grammar]

jalakākabakakrauñcahaṃsakāraṇḍavākulām |
kumudotpalarājīvasaugandhikamanoharām || 30 ||
[Analyze grammar]

tāṃ dṛṣṭvā padminīṃ divyāṃ tattīre vihitoṭajaḥ |
toṣitaḥ snānapānādyairnirvikalpamanogatiḥ || 31 ||
[Analyze grammar]

sarvakarmāṇi vinyasya jagadīśe janārdane || 32 ||
[Analyze grammar]

atha bhagavaddarśanārthamagastyasya veṃkaṭācalāgamanam |
japadhyānaparo nityaṃ tapastepe sudāruṇam |
tasminneva muniḥ kāle śāsanātparameṣṭhinaḥ || 33 ||
[Analyze grammar]

agastyo'pyāsasādādyaṃ śailaṃ muniśatāvṛtaḥ |
pratīcīṃ diśamārabhya kṛtayatnaḥ pradakṣiṇe || 34 ||
[Analyze grammar]

paśyaṃstīrthāni puṇyāni babhrāma suciraṃ girau |
tatra tatra dadarśāsau haridarśanalālasān || 35 ||
[Analyze grammar]

viriṃciguhaśakreśaviṣvaksenādikānkramāt |
sanakādyāṃśca yogīndrānnāradapramukhānṛṣīn || 36 ||
[Analyze grammar]

siddhagandharvadaiteyayakṣarākṣasapannagān |
taistaiḥ saṃmānyamāno'sau praśrayapriyabhāṣaṇaiḥ || 37 ||
[Analyze grammar]

paśyannāścaryabhūtāni sarvāṇi vicacāra ha |
snātvā tīrtheṣu sarveṣu skandadhārādikeṣu ca || 38 ||
[Analyze grammar]

tatra tatrārcayāmāsa govindaṃ jagatāṃ patim |
evaṃ bhrāntvā gate'bdānāṃ sahasre munisattamaḥ || 39 ||
[Analyze grammar]

nāpaśyatpuṇḍarīkākṣaṃ cintāśokaparo'bhavat || 40 ||
[Analyze grammar]

athāgastyaṃ prati guruvasvādyuktiḥ |
tasminkāle samājagmurdhiṣaṇośanasau punaḥ |
rājoparicaro nāma vasuśca tamṛṣīśvaram || 41 ||
[Analyze grammar]

asmākaṃ saphalaṃ jātaṃ jīvitaṃ munisattama |
dṛṣṭo bhavānyadasmābhirnārāyaṇa ivāparaḥ || 42 ||
[Analyze grammar]

brahmaṇā lokanāthena yadādiṣṭā vayaṃ mune |
acyutālokanaparāstadidaṃ kathyate tava || 43 ||
[Analyze grammar]

asti dakṣiṇadigbhāge veṃkaṭonāma bhūdharaḥ |
śvetadvīpādapi harerāvāso'yamabhīpsitaḥ || 44 ||
[Analyze grammar]

tasmingirāvagastyasya śaṃkhasya ca mahīpateḥ |
darśayiṣyati govindo nijarūpaṃ jagadguruḥ || 45 ||
[Analyze grammar]

tadānīṃ sarvadevānāmṛṣīṇāṃ yakṣarakṣasām |
asmākaṃ devadevasya darśanaṃ saṃbhaviṣyati || 46 ||
[Analyze grammar]

acireṇaiva tadbhāvi tataḥ saṃtyaktakalmaṣāḥ |
anveṣṭuṃ gacchatāgastyaṃ tasminnārāyaṇācale || 47 ||
[Analyze grammar]

ityājñaptā vayaṃ dhātrā samāgamyātra bhāgyataḥ |
dṛṣṭavanto mahābhāgaṃ bhavaṃtaṃ bhūritejasam || 48 ||
[Analyze grammar]

bhavatā sahitā gatvā svāmipuṣkariṇītaṭe |
tamapyālokayiṣyāmaḥ śaṃkhaṃ bhāgavatottamam || 49 ||
[Analyze grammar]

athāgastyādikṛtaśrīveṃkaṭācalastharamyavastudarśanam |
bharadvāja uvāca |
gīṣpatipramukhairitthamādiṣṭaḥ kumbhasaṃbhavaḥ |
śokajālaṃ parityajya yayau taiḥ sahito drutam || 50 ||
[Analyze grammar]

sa dadarśa mahāvṛkṣānphalapuṣpabharānatāt |
prarūḍhaśākhānikaracchāyācchāditadiktaṭān || 51 ||
[Analyze grammar]

siṃhadaṃtāvalavyāghravarāhamahiṣādikān |
mṛgānālokayāmāsa paṃthānaṃ cāṃtarāṃtarā || 52 ||
[Analyze grammar]

taistadānīṃ dadṛśire sānavo'pyambubhṛdbhṛtaḥ |
suvarṇaraupyatāmrādiśobhitāstatra tatra tu || 53 ||
[Analyze grammar]

uccalacchīkarāsāranirvāhitadivaukasaḥ |
vegoddhṛtaśilā dṛṣṭāḥ śataśo girinirjharāḥ || 54 ||
[Analyze grammar]

teṣāmāpādayāmāsa pramodaṃ maṃdamārutaḥ |
kamalāmodasaṃvāhī vicarangirisānuṣu || 55 ||
[Analyze grammar]

śukānāṃ kokilānāṃ ca tadā śuśruvire giraḥ || 56 ||
[Analyze grammar]

tatra tatra samāsīnānvistīrṇāsu dṛṣatsu te |
siddhānapaśyankṛṣṇasya gāyato guṇavaibhavam || 57 ||
[Analyze grammar]

agastyapramukhāḥ sarve parikramya munīśvarāḥ |
svāmipuṣkariṇīṃ divyāṃ dadṛśurvimalodakām || 58 ||
[Analyze grammar]

tattīre vihitāvāsamapaśyacchaṅkhabhūpatim |
vāṅmanaḥkāyajaṃ karma sanniveśya sthitaṃ harau || 59 ||
[Analyze grammar]

sa tānālokya sahasā munīndrānsaṃśitavratān |
yathoktamakarotpūjāṃ praṇāmastutipūrvikām || 60 ||
[Analyze grammar]

āsīnāstatra te sarve saṃbhāvyānyo'nyamutsukāḥ |
govindakīrtanaparāḥ kṛtārthatvaṃ prapedire || 61 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye suvarṇamukharīmāhātmyapraśaṃsāyāṃ śrīveṃkaṭācalaṃ prati śaṃkhāgastyādyāgamanavarṇanaṃnāma saptatriṃśo'dhyāyaḥ || 37 ||
[Analyze grammar]