Chapter 36

[English text for this chapter is available]

atha varāhakṛtadharaṇyuddharaṇakramaḥ |
bharadvāja uvāca |
purā niśātyaye dhātuḥ prabuddho madhusūdanaḥ |
punaḥ pravṛttiṃ bhūtānāmanviyeṣa dhiyā bhṛśam || 1 ||
[Analyze grammar]

vinā vasumatīmanye bhūtaughadharaṇakṣamāḥ |
na bhavantīti hṛdaye tarkastasyājaniṣṭa ca || 2 ||
[Analyze grammar]

apaśyatpraṇidhānena mahīṃ pātālagocarām |
atimātrabhayodvignāṃ parītāṃ mahatāmbunā || 3 ||
[Analyze grammar]

pratipede tadā rūpaṃ bhūsamuddharaṇocitam |
upakarmoṣṭhamanalajihvaṃ praṇavaghoṣaṇam || 4 ||
[Analyze grammar]

caturāmnāyacaraṇaṃ prāyaścittakhurāṃcitam |
prāgvaṃśakāyaṃ vilasaddarbharomāvalīyutam || 5 ||
[Analyze grammar]

pravargyāvartasaṃpannaṃ dakṣiṇāgnyudarānvitam |
sruktuṇḍamakhilaiḥ sarvaiḥ saṃvibhaktāṃgasandhikam || 6 ||
[Analyze grammar]

divyasūktasaṭājālaṃ paratrahmaśirastathā |
havyakavyarayopetaṃ viśuddhapaśujānukam || 7 ||
[Analyze grammar]

uktātyuktādikacchandomārgamaṃtra balānvitam |
sarvayajñamayaṃ divyaṃ vārāhaṃ rūpamāsthitaḥ || 8 ||
[Analyze grammar]

anveṣṭuṃ dharaṇīmabdherviveśa salilāṃtaram |
daṃṣṭrābālaśaśāṃkotthalasatkāṃticayairhaṭhāt || 9 ||
[Analyze grammar]

kalpāṃtasamayasphītaṃ tamisramapasārayan |
abhibhūtāṃbubhṛdghoṣairmuhurbrahmāṇḍakandarām || 10 ||
[Analyze grammar]

ninādamukharāṃ kurvangāḍhairghurughurusvanaiḥ |
khuraprakhuravinyāsairjarjarīkṛtavigraham || 11 ||
[Analyze grammar]

itastato viluṭhayannuragāṇāmadhīśvaram |
tīvrairniḥśvāsapavanairāpātālaṃ saritpateḥ || 12 ||
[Analyze grammar]

prāpayannatalasparśamantaraṃ darśanīyatām |
atidīrgheṇa pātreṇa magnonmagnena vāridheḥ || 13 ||
[Analyze grammar]

saṃkṣobhitāni pāthāṃsi kurvannantaryayau tadā |
saptapātālamūlādhaḥ sthitāṃ toye bhayākulām || 14 ||
[Analyze grammar]

vepamānāṃ samālokya dharaṇīṃ hṛṣṭamānasaḥ |
tāmāropya svadaṃṣṭrāgramunmamajja saritpateḥ || 15 ||
[Analyze grammar]

saṃstūyamāno munibhirjanalokanivāsibhiḥ |
tasminnudvahati premṇā deve vasumatīṃ kṣaṇam || 16 ||
[Analyze grammar]

pratisārā babhūvādho vāridhemarṅgalocitā |
taduttāraṇavelāyāṃ varāhavapuṣo'rjuna || 17 ||
[Analyze grammar]

gambhīraghoṣairambhodhiḥ prāpa maṃgalatūryatām |
udvṛttavīcivikṣiptaśīkarāsārasaṃgataḥ || 18 ||
[Analyze grammar]

bheje muktāphalacayo maṃgalākṣatavibhramam |
udūḍhā tena devena sā babhau salilāplutā || 19 ||
[Analyze grammar]

gāḍharāgasamutpannasvedaklinnatanūriva |
itthamuddhṛtya bhagavānmahīṃ pātālamūlataḥ || 20 ||
[Analyze grammar]

sudṛḍhaṃ sthāpayāmāsa madhye'mbunidhipāthasām |
tenoddhṛtāyāṃ medinyāṃ pūrṇaṃ tadbhūnabhontare || 21 ||
[Analyze grammar]

jalaṃ tatkṛtamaryādā'vyavacchinnamabhūttadā |
saṃsthāpya pṛthivīmitthaṃ tadīyādhārasiddhaye || 22 ||
[Analyze grammar]

diggajānahirājaṃ ca kamaṭhaṃ ca nyaveśayat |
teṣāmapi ca sarveṣāmādhāratvena sādaram || 23 ||
[Analyze grammar]

avyaktarūpāṃ svāṃ śaktiṃ yuyoja ca dayānidhiḥ |
tato dharāṃ samuddhṛtya sthitaṃ kiṭitanuṃ harim || 24 ||
[Analyze grammar]

tuṣṭuvuḥ sanakādyāstaṃ janalokanivāsinaḥ |
tadā varāhavapuṣamārādhya puruṣottamam || 25 ||
[Analyze grammar]

tadājñayā jagadbrahmā yathāpūrvamakalpayat || 26 ||
[Analyze grammar]

arjuna uvāca |
kalpāntasalile magnā kathaṃ tiṣṭhati bhūriyam |
saptapātālalokādhaḥ kimādhārā mahāmune || 27 ||
[Analyze grammar]

kalpakālaḥ kiyāneṣa syāttadvṛttiśca kīdṛśī || 28 ||
[Analyze grammar]

atha kalpavṛttāṃtavarṇanapūrvakaṃ śvetavarāhāvatāravarṇanam |
etadvistārya sakalaṃ mama brahmanmune vada || 29 ||
[Analyze grammar]

bharadvāja uvāca |
vināḍikānāṃ ṣaṣṭyā syānnāḍikaikā dinaṃ bhavet |
tatṣaṣṭyā divasāstriṃśanmāsaḥ pakṣadvayātmakaḥ || 30 ||
[Analyze grammar]

māsau dvāvṛturityuktastaiḥ ṣaṅbhirvatsaro bhavet |
ayanadvitayākāraḥ śītavarṣoṣṇasaṃśrayaḥ || 31 ||
[Analyze grammar]

devāsurāṇāmanyoyamahorātraṃ viparyayāt |
uttaraṃ dakṣiṇe bhānorayane te yathākramam || 32 ||
[Analyze grammar]

mānuṣābdaiḥ khakhavyomakhākṣipāvakasāgaraiḥ |
mahāyugaṃ bhavetpārtha kṛtādyākārasaṃyutam || 33 ||
[Analyze grammar]

saptatyā saikayā kālo yugānāmantaraṃ manoḥ |
asmiñchvetavarāhākhye kalpe jātānmanūñchṛṇu || 34 ||
[Analyze grammar]

svāyaṃbhuvaḥ syātprathamastataḥ svārociṣo manuḥ |
uttamastāmasākhyaśca raivataścākṣuṣāhvayaḥ || 35 ||
[Analyze grammar]

ete gatāḥ prāṅmanavaḥ ṣaṭsendrasuratāpasāḥ |
vaivasvato vartate'dya saptamo manurarjuna || 36 ||
[Analyze grammar]

ādityavasurudrādyāstatkāle devatāgaṇāḥ |
iṣṭvāśvamedhaśatakaṃ tejasvī prāpa śakratām || 37 ||
[Analyze grammar]

viśvāmitro'hamatriśca jamadagniśca kaśyapaḥ |
vasiṣṭho gautamaścaiva te vai saptarṣayo'rjuna || 38 ||
[Analyze grammar]

ikṣvākupramukhāḥ śūrā manuputrā mahābalāḥ |
avaniṃ pālayāmāsurnityaṃ dharmaparāyaṇāḥ || 39 ||
[Analyze grammar]

sūryadakṣabrahmadharmarudrāṇāṃ pañca sūnavaḥ |
sāvarṇiraucyabhaumādyā bhaviṣyanmanusaptakam || 40 ||
[Analyze grammar]

caturdaśa vidhātuste bhavanti manavo'hani |
tatkalpasaṃjñaṃ tasyānte niśā syāttatsamā śṛṇu || 41 ||
[Analyze grammar]

dināvasānasamaye brahmaṇaḥ pāṇḍunandana |
jāyate'vagraho ghoraḥ pṛthivyāṃ śatavārṣikaḥ || 42 ||
[Analyze grammar]

tasminnavagrahe pṛthvyāṃ nīrasāyāṃ dhanañjaya |
caturvidhāni bhūtāni samāyānti parikṣayam || 43 ||
[Analyze grammar]

tadā taptaśikhākārairupeto gharmadīdhitiḥ |
mayūkhairagnisadṛśairvamadbhiḥ pāvakacchaṭāḥ || 44 ||
[Analyze grammar]

vinaṣṭagrāmanagaraśailavṛkṣādikānanā |
kūrmapṛṣṭhopamorvī syāttaptāyaḥpiṇḍasannibhā || 45 ||
[Analyze grammar]

tato vidhāturgātrebhyaḥ samutpannā mahāghanāḥ |
ācchādayanto gaganaṃ garjitadhvānabandhurāḥ || 46 ||
[Analyze grammar]

sitapītāruṇaśyāmāścitravarṇāśca bhīṣaṇāḥ |
śailebhasaudhavṛkṣādinānārūpasamanvitāḥ || 47 ||
[Analyze grammar]

te śatābdamitaṃ kālaṃ mahāvṛṣṭiṃ vitanvate |
tenāmbhasā śamaṃ yāti sūryodbhūto mahānalaḥ || 48 ||
[Analyze grammar]

bhūyaśca śatavarṣāṇi varṣantyugraṃ mahāghanāḥ |
tadambhasā samudvelā vikṛtiṃ yānti vārddhayaḥ || 49 ||
[Analyze grammar]

kalpāntāmbudanirmuktaṃ lokānvyāpnoti tajjalam |
bhūrbhuvaḥsvarmaharlokānāvṛṇoti tamo mahat |
tadā nimagnā salile mahī pātālamūlagā || 50 ||
[Analyze grammar]

anaṣṭā kathamapyāste brahmaśaktyavalambitā |
atha niḥśvāsasaṃbhūto māruto brahmaṇo'rjuna || 51 ||
[Analyze grammar]

utsārayati tānsarvānkalpāntotthānmahāghanān |
evaṃ pravṛddhaḥ pavanaḥ śatasaṃvatsarātmakam || 52 ||
[Analyze grammar]

kālaṃ nirantaraṃ vāti durnivārarayotthitaḥ |
tamugramanilaṃ hitvā harernābhisaroruhe || 53 ||
[Analyze grammar]

yoganidrāmavāpnoti tasminpāthasi padmabhūḥ |
yoganidrānuṣaktasya yāti tasya jagadvibhoḥ || 54 ||
[Analyze grammar]

tāvatī śarvarī pārtha dinaṃ yāvatpramāṇakam |
niśāyāṃ samatītāyāmutthito vegavānpunaḥ || 55 ||
[Analyze grammar]

sṛjapyakhilajantūnvai pūrvavacchāsanāddhareḥ |
kalpekalpe samucitai rūpaiḥ pāti jagaddhariḥ || 56 ||
[Analyze grammar]

asminkalpe śvetavarṇāṃ prāptavānyajñapotritām |
varāhavapuṣā devo viharannavanītale || 57 ||
[Analyze grammar]

svapūrvaniyatāvāsaṃ prapede veṃkaṭācalam |
svāmipuṣkariṇītīre caraṃściramadhokṣajaḥ || 58 ||
[Analyze grammar]

bhaktyā paramayā yuktamapaśyajjalajāsanam |
saṃpūjya prārthayāmāsa brahmā taṃ bhūtabhāvanam || 59 ||
[Analyze grammar]

purātanīṃ nijāṃ svāminbhaja divyāṃ tanūmiti |
gṛhītvānunayaṃ tasya tyaktvā tāṃ sūkarākṛtim || 60 ||
[Analyze grammar]

ananyabhajanīyāṃ svāṃ prāpa viśvātmikāṃ tanum |
tathāsthitaṃ girau tatra kṛtvāpyutsāhamūrjitam || 61 ||
[Analyze grammar]

draṣṭuṃ na śekuḥ sarve'pi kālena bahunāpi ca || 62 ||
[Analyze grammar]

arjuna uvāca |
darśanasmaraṇādīnāṃ hariritthamagocaraḥ |
kathaṃ pratyakṣatāṃ prāpa mānuṣāṇāṃ mahāmune || 63 ||
[Analyze grammar]

bhāgyabhūto'tha jagatāṃ yaḥ ko vā'rādhya taṃ vibhum |
iha prakāśayāmāsa kathāmetāṃ nivedaya || 64 ||
[Analyze grammar]

harikathāśravaṇaṃ duritāpahaṃ kathayatāṃ sakalāgamavidbhavān |
sukṛtināṃ nanu saṃprati dhuryatā munivareṇya mamādya samāgatā || 65 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye suvarṇamukharīmāhātmyapraśaṃsāyāṃ varāhāvatārakīrtanaṃ nāma ṣaṭtriṃśo'dhyāyaḥ || 36 ||
[Analyze grammar]