Chapter 35

[English text for this chapter is available]

atha suvarṇamukharyā kalyānadīsaṃgamaḥ |
bharadvāja uvāca |
suvarṇamukharī tatra saṃgatā maṃgalapradā |
kalyānāma nadī puṇyā kālindī jāhnavīmiva || 1 ||
[Analyze grammar]

vṛṣabhācalasaṃbhūtā tīrtharājavirājitā |
nadīnāmuttamā kalyā kaluṣaughavināśinī || 2 ||
[Analyze grammar]

nānātarulatāvrātavibhūṣitataṭadvayā |
munisaṃghasukhāvāsā puṇyāśramasamutkaṭā || 3 ||
[Analyze grammar]

dvijadattārdhyavilasatkuśākṣatalasattaṭā |
apsaraḥkucakastūrīpaṃkakṣālanapaṃkilā || 4 ||
[Analyze grammar]

dantāvalakaṭacyotanmadāmbusurabhīkṛtā |
viprabhūpālavitatamakhayūpa śatāvṛtā || 5 ||
[Analyze grammar]

anāvilajalāpūratoṣitāśeṣamānavā |
ekaivālaṃ parā kartuṃ mahānadyostu pātakam || 6 ||
[Analyze grammar]

tayoḥ saṃgatayoḥ stotuṃ mahimānaṃ ka īśate |
yatra brahmaśilānāma sarinmadhye ca vartate || 7 ||
[Analyze grammar]

agastyatapasā paścādgayā sāṃnidhyameti ca |
nadīdvayajale tatra snātāḥ puṇye kurūdvaha || 8 ||
[Analyze grammar]

makhānāṃ pauṇḍarīkāṇāṃ śatasya phalamāpnuyuḥ |
brahmahatyādipāpāni samāyāṃti parikṣayam || 9 ||
[Analyze grammar]

tatrābhiṣekapūtānāṃ nadīdvitayasaṃgame |
saṅgatā bhavanāśinyā kṛṣṇaveṇīva pāvanī || 10 ||
[Analyze grammar]

atha suvarṇamukharītīrasthitaśrīveṃkaṭācalavarṇanam |
rājate svarṇamukharī kalyayā saṃgatā tadā || 11 ||
[Analyze grammar]

athodīcyāṃ mahānadyā yojanārddhe virājate |
yojanotsedhasahito vikhyāto veṃkaṭācalaḥ || 12 ||
[Analyze grammar]

sarveṣāmeva tīrthānāmāśrayo'yaṃ nagottamaḥ |
añjanānantavṛṣabhanīlakesaripotriṇaḥ || 13 ||
[Analyze grammar]

etānyupavanānyadreḥ syurnārāyaṇaveṃkaṭau |
varāhavapuṣā pūrvaṃ svīkṛtatvānmadhudviṣā || 14 ||
[Analyze grammar]

varāhakṣetramityāryaiḥ kīrtito'yaṃ mahīdharaḥ |
suvarṇamukharītīre vikhyāte veṃkaṭācale || 15 ||
[Analyze grammar]

nivasatyacyuto nityamabdhīndratanayānvitaḥ |
tasmingirau śriyā sārddhaṃ vasante veṃkaṭādhipam || 16 ||
[Analyze grammar]

sevante siddhagandharvamunimānavadānavāḥ |
tasminvinyastacittānāṃ bhaktānāṃ puruṣottame || 17 ||
[Analyze grammar]

vāṃchitānyāśu sidhyaṃti naśyaṃti vipado'rjuna |
ye smaraṃti jagannāthaṃ veṃkaṭādrinivāsinam || 18 ||
[Analyze grammar]

nirastadoṣāste yāṃti śāśvataṃ padamavyayam || 19 ||
[Analyze grammar]

arjuna uvāca |
veṃkaṭādrau mahāpuṇye surāsuranamaskṛtaḥ |
kathaṃ prādurabhūddevo bhagavānkamalāpatiḥ || 20 ||
[Analyze grammar]

kasya vā kṛtinastatra prasanno nijamadbhutam |
rūpaṃ prakāśayāṃcakre bhuktimuktiphalapradam || 21 ||
[Analyze grammar]

viṣṇordevādidevasya mahimānaṃ mahāmune |
śrotumicchāmi tattvena tanme kathaya vistarāt || 22 ||
[Analyze grammar]

atha śrīveṃkaṭācalavāsibhagavadvaibhavavarṇanam |
bharadvāja uvāca |
śṛṇu veṃkaṭanāthasya mahimānaṃ samāhitaḥ |
vistareṇa samākhyātuṃ brahmaṇāpi na śakyate || 23 ||
[Analyze grammar]

dhanyo'si devadevasya māhātmyaṃ madhuvidviṣaḥ |
yadbhaktiyuktābhūttāta śrotuṃ matirarindama || 24 ||
[Analyze grammar]

kṛtapuṇyo'smyahaṃ pārtha sarvabhūtapaterhareḥ |
pavitrāṇi caritrāṇi stoṣyante yanmayā'dhunā || 25 ||
[Analyze grammar]

purā bhāgīrathītīre janakāya mahātmane |
kratudīkṣāprasaktāya viśuddhajñānaśāline || 26 ||
[Analyze grammar]

vāmadevena kathitāṃ kathāṃ pāpapraṇāśinīm |
kathayiṣyāmi te pārtha viṣṇukīrtanapāvanīm || 27 ||
[Analyze grammar]

sarveṣāmeva bhūtānāmādyo nārāyaṇaḥ prabhuḥ |
jaganmayo jagatkartā citsvarūpo niraṃjanaḥ || 28 ||
[Analyze grammar]

sahasraśīrṣā bhagavānsahasrākṣaḥ sahasrapāt |
yasya bhāsā jagadidaṃ vibhāti sacarācaram || 29 ||
[Analyze grammar]

tasmātparataraṃ tejastasmātparataraṃ tapaḥ |
tasmātparataraṃ jñānaṃ yogastasmātparo na ca || 30 ||
[Analyze grammar]

vidyā tasmādapi parā nāsti pārtha nararṣabha |
sarveṣvapi ca bhūteṣu sadā sannihitaḥ prabhuḥ || 31 ||
[Analyze grammar]

sarvāṇyapi ca bhūtāni tasminnevāsate sukham |
sa eva yajño yajvā ca sādhanaṃ sruksruvādikam || 32 ||
[Analyze grammar]

phalaṃ phalapradātā ca tatsaṃprāpyā gatistathā |
vahnau praṇīte paśunā prokṣitena prajuhvati |
ye taṃ prayāṃti te yāṃti gatiṃ tatpratipāditām || 33 ||
[Analyze grammar]

karmabandhaṃ paśuṃ kṛtvā jñānāgnau saṃpravartite |
ye juhvate tamuddiśya te tatsāyujyabhāginaḥ || 34 ||
[Analyze grammar]

hariḥ sadāśivo brahmā mahendraḥ paramaḥ svarāṭ |
sarveśvarasya tasyaite paryāyāḥ parikīrtitāḥ || 35 ||
[Analyze grammar]

mamāhito'nusaṃdhatte ya idaṃ paramātmanaḥ |
nārāyaṇasya māhātmyaṃ sa na yāti punarbhavam || 36 ||
[Analyze grammar]

cidānandamayaḥ sākṣī nirguṇo nirupādhikaḥ |
nityo'pi bhajate tāṃtāmavasthāṃ sa yadṛcchayā || 37 ||
[Analyze grammar]

pavitrāṇāṃ pavitraṃ yo hyagatīnāṃ parā gatiḥ |
daivataṃ devatānāṃ ca śreyasāṃ śreya uttamam || 38 ||
[Analyze grammar]

bodhyānāṃ bodhya eko'sau dhyeyānāṃ dhyeya uttamaḥ |
vinayānāṃ samadhiko vinayo nayasaṃyutaḥ || 39 ||
[Analyze grammar]

tejasāṃ janakaṃ tejaḥ prakṛṣṭaṃ tapasāṃ tapaḥ |
ādhāraḥ sarvabhūtānāmanādyanto janārdanaḥ || 40 ||
[Analyze grammar]

tasyedaṃ bhāvavijñāne mūḍhā brahmādayo'pi ca |
ajo gṛhṇāti jananaṃ sarvātmā hanti vidviṣaḥ || 41 ||
[Analyze grammar]

svatantro'pi svabhaktānāṃ paratantraḥ pravartate |
sa sākṣī karmaṇāṃ devaḥ sarvajño garuḍadhvajaḥ || 42 ||
[Analyze grammar]

tasya svarūpaṃ munayo mṛgayante samāhitāḥ |
saṅkarṣaṇo vāsudevaḥ pradyumnaśca tathā punaḥ || 43 ||
[Analyze grammar]

aniruddha iti khyātaṃ tanmūrtīnāṃ catuṣṭayam |
kīrtitaḥ praṇavaḥ paścāddhṛdayaṃ tasya bhāsvaram || 44 ||
[Analyze grammar]

bhagavānvāsudevaśca mantro'yaṃ tatprakāśakaḥ || 45 ||
[Analyze grammar]

mantrarājamimaṃ nityaṃ prajapedyaḥ samāhitaḥ |
sa viṣṇoḥ karuṇāyogātsiddhīnāṃ bhājanaṃ bhavet || 46 ||
[Analyze grammar]

atha bhagavatkṛtabhūtasṛṣṭyādivarṇanam |
āpannivārakaḥ saṃpatprāpako bhuktimuktidaḥ |
yathā sasarja bhūtāni kalpādāveva mādhavaḥ || 47 ||
[Analyze grammar]

tatsarvaṃ kathayiṣyāmi samāhitamanāḥ śṛṇu |
tasya cintayataḥ sargaṃ tejorūpaṃ paraṃ hareḥ || 48 ||
[Analyze grammar]

viriṃca iti vikhyātaṃ rājasaṃ guṇamāśritam |
tasya devasya vadanācchakro devaḥ sapāvakaḥ |
jajñe yaśca trilokeśaḥ pākakarmaṇi yaḥ prabhuḥ || 49 ||
[Analyze grammar]

manasaścābhavaccandraḥ karuṇānityaśītalāt |
apāṃ sarvauṣadhīnāṃ ca viprāṇāṃ rakṣakaḥ sadā || 50 ||
[Analyze grammar]

netrābhyāmudabhūtsūryastasya viśvaprakāśakaḥ |
śītoṣṇavarṣakṛtkālakāraṇaṃ tejasāṃ nidhiḥ || 51 ||
[Analyze grammar]

prāṇebhyo'sya jagatprāṇaḥ samīraḥ samajāyata |
dhartā graharkṣasvargaṃgā vimānānāṃ mahābalaḥ || 52 ||
[Analyze grammar]

nābhideśātsamutpannamantarikṣaṃ mahātmanaḥ |
tasyāsīcchiraso vyoma bhūtasaṃbhavakāraṇam || 53 ||
[Analyze grammar]

pādāmbujābhyāmudabhūdbhūmirbhūtagaṇāśrayā |
viniḥsṛtā diśaḥ sarvāḥ śrotrābhyāṃ paramātmanaḥ || 54 ||
[Analyze grammar]

bhūrbhuvādyāstathā lokāḥ smaraṇāttasya jajñire |
rasātalādilokāśca yakṣarakṣogaṇādayaḥ || 55 ||
[Analyze grammar]

mukhabāhūrupādebhyo janayāmāsa sa kramāt |
brāhmaṇānkṣattriyānvaiśyāñchūdrādīṃśca kurūdvaha || 56 ||
[Analyze grammar]

chandāṃsi yajñasturagā gāvo meṣāvikādayaḥ |
atarkyaprabhavāṃ tasmādutpattiṃ pratipedire || 57 ||
[Analyze grammar]

saṃkalpāddevadevasya tasya sthāvarajaṃgamam |
bhūtajātamabhūtkālo bhūto bhāvī bhavaṃstathā || 58 ||
[Analyze grammar]

pibatyambu samudrāṇāṃ baḍavānalarūpadhṛka |
kalpāntakāle tatsarvaṃ visṛjatyātmani sthitam || 59 ||
[Analyze grammar]

sañcārayati bhūtānāṃ vṛttiṃ sūryendurūpadhṛk |
tamonirasanāccāpi kāladharmapravartanāt || 60 ||
[Analyze grammar]

jaganti kalpavirame vinyasya svodarāntare |
līlābālākṛtiḥ śete vaṭapatre mahāmbudhau || 61 ||
[Analyze grammar]

atha codagrabhogīndrabhogatalpe sukhocite |
yoganidrāmavāpnoti sadvitīyo'bjavāsayā || 62 ||
[Analyze grammar]

nābhikāsārasaṃbhūtājjanayāmāsa paṃkajāt || 63 ||
[Analyze grammar]

sarveṣāṃ jagatāṃ nātho vidhātāraṃ caturmukham || 64 ||
[Analyze grammar]

līlā hyeṣā mukundasya svecchāyogapravartinaḥ |
vijñāyate na kenā'pi yāthārthyena sa īśvaraḥ || 64 ||
[Analyze grammar]

yadā dharmasya hāniḥ syādadharmo vardhate yadā |
yadā vā mahatīṃ pīḍāṃ bhajante devatāgaṇāḥ || 65 ||
[Analyze grammar]

yadāvalepadurvārā yāṃti vṛddhiṃ suradruhaḥ |
bhūmerbhūmijanānāṃ ca yadodeti mahadbhayam || 66 ||
[Analyze grammar]

yadā vā nijabhaktānāṃ sādhūnāmanivāritā |
durantātaṃkajananī vipatsamupajāyate || 67 ||
[Analyze grammar]

tadā tadanurūpāṇi rūpāṇyāsthāya kautukāt |
adharmamavadhūyāśu kurute jagato hitam || 68 ||
[Analyze grammar]

sṛjati vidhisamākhyo rājasenātmanā'sau vahati harisamākhyaḥ sattvaniṣṭhaḥ prapañcam |
harati harasamākhyastāmasīmetya vṛttiṃ madhumathanamahimnāmasti vettā na ko'pi || 69 ||
[Analyze grammar]

yajñāṃgaiḥ kṛtasakalāṃgasaṃdhibaṃdhaṃ vārāhaṃ vapuradhigamya lokanāthaḥ |
śaile'sminnabhajadasau yathā nivāsaṃ tadvakṣye śṛṇu vibudhādhināthasūno || 70 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye suvarṇamukharīmāhātmye viṣṇumāhātmyaprastāve sṛṣṭyādivarṇanaṃnāma pañcatriṃśo'dhyāyaḥ || 35 ||
[Analyze grammar]