Chapter 30

[English text for this chapter is available]

atha suvarṇamukharīvarṇanam |
sūta uvāca |
tathā sarvāṇi tīrthāni samālokyāgatasya ca |
mudaṃ praguṇayāñcake sā pārthasya mahāpagā || 1 ||
[Analyze grammar]

yasyāstaṭanikuñjeṣu modante vanitāḥ sukhāḥ |
siddhāḥ saṃsevitā vātaiḥ śīkarāsāraśītalaiḥ || 2 ||
[Analyze grammar]

yā samudyatahasteva gaṅgāmākāśavāhinīm |
āliṃgituṃ samuttuṃgaiḥ kallolairabhrasaṃgibhiḥ || 3 ||
[Analyze grammar]

dhūmairāhutisaṃbhūtaistaruśākhopalaṃbhibhiḥ |
valkalaiśca virājante yattaṭāśramabhūmayaḥ || 4 ||
[Analyze grammar]

munīndraiḥ suravaryaiśca sthāpitāni samantataḥ |
yattaṭadvitaye bhāṃti divyaliṃgāni śūlinaḥ || 5 ||
[Analyze grammar]

yadīyasaikatāvāsaviśrāntā mānasaṃ saraḥ |
na smaraṃti nijāvāsaṃ marālā vihagottamāḥ || 6 ||
[Analyze grammar]

śamitāvagrahātaṃkaiḥ kulyāmukhavinirgataiḥ |
puṣṇāti toyaiḥ sasyāni lokarakṣākṣamāṇi yā || 7 ||
[Analyze grammar]

cakravākakucottuṃgavīcivallīvibhūṣitā |
āvartanābhivilasatsaikataśroṇi maṇḍalā || 8 ||
[Analyze grammar]

praphullapadmavadanā calanmīnayugekṣaṇā |
vilasatphenavasanā haṃsayānamanoharā || 9 ||
[Analyze grammar]

jalapakṣiravālāpā nayanānandakāriṇī |
apūrvakāminīrūpā yā vibhātyambudhipriyā || 10 ||
[Analyze grammar]

rodhasyantaravāhinyā nadyāḥ prācyāṃ dhanañjayaḥ |
dadarśa śailamuttuṃgaṃ kālahastisamāhayam || 11 ||
[Analyze grammar]

udagraśikharābhogollikhitākāśamaṇḍalam |
saptapātālamūlādhorūḍhamūlopalāṃcitam || 12 ||
[Analyze grammar]

atha arjunasya svarṇamukharītīrasthakālahastīśvarādisevāprāptiḥ |
snātvā tasyāṃ mahānadyāṃ tasmiñchaile surārcitam |
apaśyadarjuno devaṃ kālahastīśanāmakam || 13 ||
[Analyze grammar]

saṃpūjya ca mahādevaṃ nagendratanayāsakham |
manasā bhaktiyuktena kṛtārthatvamupeyivān || 14 ||
[Analyze grammar]

tato mahāgirau tasminnadbhutaikaniketane |
cacārābhūtapūrvāṇāṃ viśeṣāṇāṃ didṛkṣayā || 15 ||
[Analyze grammar]

siddhānālokayāmāsa vasato girisānuṣu |
gāyato devadevasya caritrāṇyabalāyutān || 16 ||
[Analyze grammar]

apsarolalanājuṣṭānpuṣpāsavamadākulān |
nikuñjeṣu samāsīnāngaṃdharvānaikṣatādarāt || 17 ||
[Analyze grammar]

vivikteṣu pradeśeṣu śivadhyānaparāyaṇān |
apaśyadyogino divyānādarānandaśālinaḥ || 18 ||
[Analyze grammar]

praśāntānyāśramapadānyavaikṣata samaṃtataḥ |
balinīvāravilasaddvārabhūmīśca pāṇḍavaḥ || 19 ||
[Analyze grammar]

nirāhārānvāyubhujaḥ parṇādānātapāśanān |
śāntānālokayāmāsa munīnniyamitendriyān || 20 ||
[Analyze grammar]

mudaṃ vitenire tasya netrayoḥ kamalākarāḥ |
phullasaugandhikāmodasaṃvāsitadigantarāḥ || 21 ||
[Analyze grammar]

mṛgayāsaṃbhṛtadhiyaścarato'dhijyakārmukān || 22 ||
[Analyze grammar]

athā'rjunasya suvarṇamukharītīrasthabharadvājāśramagamanam |
dadarśānveṣitamṛgānkirātānvanitāyutān |
tato dakṣiṇadigbhāge carannadrermanohare || 23 ||
[Analyze grammar]

puṇyamāśramamadrākṣīdbharadvājasya kauravaḥ |
kadalīnārikelāmrakolacaṃpakacaṃdanaiḥ || 24 ||
[Analyze grammar]

takkolāśokahintālatālaketakidāḍimaiḥ |
jaṃbūkadamvakatakakhadirārjunapāṭalaiḥ || 25 ||
[Analyze grammar]

nāgapunnāgasaraladevadārukarañjakaiḥ |
lavaṃgaluṃgalavalīpriyaṃgutilakairapi || 26 ||
[Analyze grammar]

bibhītaśrīphalāśvatthamadhūkaplakṣakesaraiḥ |
pūgajambīranāraṃganimbāmalakakauśikaiḥ || 27 ||
[Analyze grammar]

anyaiśca phalapuṣpāḍhyaiḥ śobhitaṃ dharaṇīruhaiḥ |
vāsantīkundajātyādilatābhiḥ pariveṣṭitam || 28 ||
[Analyze grammar]

apūrvasaurabhākṛṣṭabhramarībhiḥ samantataḥ |
cakravākabakakrauñcahaṃsakāraṇḍavāśrayaiḥ || 29 ||
[Analyze grammar]

saugandhikotpalāṃbhojakairavaughavirājitaiḥ |
sarobhiramṛtasyaṃdimadhurasphāravāribhiḥ || 30 ||
[Analyze grammar]

samāpāditalakṣmīkaṃ kautukaikaniketanam |
siṃhadantāvalavyāghratarakṣurururaṅkubhiḥ || 31 ||
[Analyze grammar]

mṛgairanyaiḥ samākīrṇamanyo'nyahitakāribhiḥ |
jitacaitrarathodyānamadharīkṛtanandanam || 32 ||
[Analyze grammar]

ativāṅmanasodāraṃ paramānandakāraṇam |
śivāgamānāṃ divyānāmarthajātamanuttamam || 33 ||
[Analyze grammar]

prakāśayanti śāvānāṃ yatra mañjugiraḥ śukāḥ |
yasminhutāśano dāradhūmaśyāmalitaṃ nabhaḥ || 34 ||
[Analyze grammar]

akālajaladabhrāṃtimātanoti śikhaṇḍinām |
yasminvihāraśrāntānāṃ siṃhānāṃ svecchayāgatāḥ || 35 ||
[Analyze grammar]

nirvāpayanti gātrāṇi kariṇaḥ karaśīkaraiḥ |
tadāśramapadaṃ paśyanvismayākrāṃtamānasaḥ || 36 ||
[Analyze grammar]

prabhāvaṃ pāṇḍutanayaḥ praśaśaṃsa tapasvinām |
nivārya tatra tatraiva sakalānanujīvinaḥ || 37 ||
[Analyze grammar]

athārjunakṛtabharadvājasevākramaḥ |
mitrairvipravaraiḥ sārdhaṃ praviveśa tamāśramam |
agre dadarśa kaunteyaḥ sphuratpāvakatejasam || 38 ||
[Analyze grammar]

bharadvājaṃ munivarairanekaiḥ parivāritam |
bhasmānuliptasarvāṃgaṃ mṛgacarmottarīyakam || 39 ||
[Analyze grammar]

navavāridasaṃvītaṃ kailāsamiva bhāsvaram |
jaṭābhirlambamānābhirbhāsvantaṃ svarṇakāṃtibhiḥ || 40 ||
[Analyze grammar]

sthiravidyullatākīrṇamiva śāradanīradam |
śrutismṛti purāṇārthairekībhūya samāgataiḥ || 41 ||
[Analyze grammar]

aṅgīkṛtamivākāraṃ divyajñānaśubhāspadam |
dhṛtikṣāṃtidayātuṣṭiśāṃtibhirnityasevitam || 42 ||
[Analyze grammar]

priyābhiriva raktābhirakhaṃḍabrahmavarcasam |
upagamya śanaiḥ pārthastatpādāṃbujayoḥ puraḥ || 43 ||
[Analyze grammar]

cakre praṇāmaṃ sāṣṭāṃgaṃ samāliṃgitabhūtalam || 44 ||
[Analyze grammar]

athārjunaṃ prati bharadvājakṛtātithyaprakāraḥ |
tamāgataṃ pṛthāputramutthāpya munipuṅgavaḥ |
āśīrbhiredhayāñcakre praharṣotphullamānasaḥ || 45 ||
[Analyze grammar]

saṃpūjya ca yathānyāyaṃ tamarghyādyaiḥ priyātithim |
vinirdiṣṭāsanāsīnaṃ samapṛcchadanāmayam || 46 ||
[Analyze grammar]

saṃmānanamavāpyāsmānmuneḥ pāṇḍavamadhyamaḥ |
priyairvākyairmunipaterakaronmanaso mudam || 47 ||
[Analyze grammar]

sasmārātha bharadvājaḥ svardhenuṃ kāmadohinīm |
sā vitene'timahatīṃ bhakṣyabhojyādikalpanām || 48 ||
[Analyze grammar]

bhuktvā pārthaḥ sānucarastamupāsya taponidhim |
dinaśeṣaṃ kathālāpakautukenātyavāhayat || 49 ||
[Analyze grammar]

tataḥ sāyantanīṃ saṃdhyāmupāsya hutapāvakaḥ |
viprairamātyaiḥ sahito yayau tasya kuṭīgṛhān || 50 ||
[Analyze grammar]

tatrāsīno munipaterāśīrbhirabhinanditaḥ |
ānandyamāno mumude tannadīśītalānilaiḥ || 51 ||
[Analyze grammar]

saṃprāpitā kena bhuvaḥ prabhūtā kasmānmahīdhrādadhikaprabhāvā |
iti prabhāvaṃ paripṛcchya nadyāḥ śrotuṃ munīndrānmatirasya jajñe || 52 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye suvarṇamukharīmāhātmyapraśaṃsāyāṃ bharadvājāśramavarṇanaṃnāma triṃśo'dhyāyaḥ || 30 ||
[Analyze grammar]