Chapter 28

[English text for this chapter is available]

atha kaṭāhatīrthamāhātmyam |
ṛṣaya ūcuḥ |
sūta sarvārthatattvajña vedavedāntapāraga |
śrīveṃkaṭācale tīrthaṃ kaṭāhākhyaṃ supāvanam || 1 ||
[Analyze grammar]

śrūyate tasya māhātmyaṃ ghuṣyate ca jagattraye |
asmākametadbrūhi tvaṃ kṛpayā vyāsaśāsita || 2 ||
[Analyze grammar]

purā vai nāradaḥ śrīmānbrahmaputro mahānṛṣiḥ |
dṛṣṭvā vai naimiṣāraṇyaṃ saṃprāpto dvijasattamaḥ || 3 ||
[Analyze grammar]

tadānīṃ brahmaputraṃ tamarghyapādyādibhiḥ śubhaiḥ |
pūjayitvā yathānyāyaṃ pavitre ca kuśāsane || 4 ||
[Analyze grammar]

sanniveśya mahābhaktyā vinayānatakandharāḥ |
praṇamya prārthayāmāsurime sarve maharṣayaḥ || 5 ||
[Analyze grammar]

tvāṃ vinā nārada śrīmannasmākaṃ bhuvanatraye |
dharmopadeśakaḥ kaścinnāsti nāsti maharṣiṣu || 6 ||
[Analyze grammar]

veṃkaṭādrau mahāpuṇye sarvadevaniṣevite |
vaikuṇḍādāgate divye siddhagandharvasevite || 7 ||
[Analyze grammar]

kaṭāhatīrthamāhātmyaṃ varṇayādya vanaukasām || 8 ||
[Analyze grammar]

śrīnārada uvāca |
śṛṇudhvamṛṣayaḥ sarve śaunakādyā mahaujasaḥ |
kaṭāhatīrthamāhātmyaṃ ko vetti bhuvanatraye || 9 ||
[Analyze grammar]

mahādevo vijānāti tasya tīrthasya vaibhavam |
yāni kāni ca puṇyāni brahmāṇḍāntargatāni vai || 10 ||
[Analyze grammar]

tāni gaṃgāditīrthāni svapāpapariśuddhaye |
kaṭāhatīrthasevāṃ ca kurvanti dvijasattamāḥ || 11 ||
[Analyze grammar]

brāhmaṇāḥ kṣattriyā vaiśyāḥ śūdrāścetarajātayaḥ |
spṛśanti tajjalamiti na pibedyo vimūḍhadhīḥ || 12 ||
[Analyze grammar]

sa hi caṇḍālatāṃ prāpya kumbhīpāke patiṣyati |
brahmacārī gṛhastho vā vānaprastho yatīśvaraḥ || 13 ||
[Analyze grammar]

sevayā tasya tīrthasya prāpnoti paramaṃ padam |
śrutismṛtipurāṇeṣu tattīrthasya praśaṃsanam || 14 ||
[Analyze grammar]

bahudhā varṇyate paṃcamahāpātakanāśanam |
atyadbhutataraṃ viprāḥ sarvalokaikapāvanam || 15 ||
[Analyze grammar]

brahmahatyāyutaṃ cāpi surāpānāyutaṃ tathā |
ayutaṃ gurudārāṇāṃ gamanaṃ pāpakāraṇam || 16 ||
[Analyze grammar]

steyāyutaṃ suvarṇānāṃ tatsaṃsargāśca koṭayaḥ |
śīghraṃ vilayamāyāṃti tasya tīrthasya sevayā || 17 ||
[Analyze grammar]

yāni niṣkṛtihīnāni pāpāni vividhāni ca |
tāni sarvāṇi naśyaṃti tīrthasyāsya niṣevaṇāt || 18 ||
[Analyze grammar]

idaṃ tīrthaṃ mahāpuṇyaṃ bhagavatpādanissṛtam |
kuṣṭhādirogayukto yaḥ pratyahaṃ ca pibedidam || 19 ||
[Analyze grammar]

atha kaṭāhatīrthamahimaśraddhāśūnyānāṃ mahānarakaprāptiḥ |
so'pi rogavihīnaḥ sanviṣṇulokaṃ ca gacchati |
bhagavāñchaṃkaro devo rahasyānubhave purā || 20 ||
[Analyze grammar]

pārvatyai kathayāmāsa tasya tīrthasya vaibhavam |
ukteṣveteṣu sandeho na kartavyaḥ kadācana || 21 ||
[Analyze grammar]

arthavādo'yamiti ca na vaktavyaṃ kadācana |
ye'rthavādamidaṃ brūyusteṣāṃ vai nāstikātmanām || 22 ||
[Analyze grammar]

jihvāgre paraśuṃ taptaṃ prakṣipanti ca kiṃkarāḥ |
tasmātkaṭāhatīrthaṃ tu sevanīyaṃ prayatnataḥ || 23 ||
[Analyze grammar]

sarvaduḥkhapraśamanamapavargaphalapradam |
yatra pītvā naro bhaktyā sarvānkāmānavāpnuyāt || 24 ||
[Analyze grammar]

evamuktvā mahābhāgaḥ kāśīṃ trailokyapāvanīm |
saṃprāpto nāradaḥ śrīmānsūta paurāṇikottama || 25 ||
[Analyze grammar]

saṃkṣepataśca bhagavānnaimiṣe hyuktavānkhalu |
idānīṃ śrotumicchāmaḥ kaṭāhasya ca vaibhavam || 26 ||
[Analyze grammar]

suvistareṇa cāsmākaṃ vada sūta kṛpāvaśāt || 27 ||
[Analyze grammar]

atha kaṭāhatīrthapānakramaḥ |
śrīsūta uvāca |
bhobhostapodhanāḥ sarve naimiṣāraṇyavāsinaḥ |
kaṭāhatīrthamāhātmyaṃ śṛṇudhvaṃ dvijasattamāḥ || 28 ||
[Analyze grammar]

kaṭāhatīrthaṃ bho viprāḥ sarva lokeṣu viśrutam |
sarvasampatkaraṃ śuddhaṃ sarvapāpapraṇāśanam || 29 ||
[Analyze grammar]

duḥsvapnanāśanaṃ hyetanmahāpātakanāśanam |
mahāvighnapraśamanaṃ mahāśāntikaraṃ nṛṇām || 30 ||
[Analyze grammar]

smṛtimātreṇa yatpuṃsāṃ sarvapāpaniṣūdanam |
mantreṇāṣṭākṣareṇaiva pibettīrthaṃ manoharam || 31 ||
[Analyze grammar]

athavā keśavādyaiśca nāmabhirvā pibejjalam |
yadvā nāmatrayeṇā'pi pibettīrthaṃ śubhapradam || 32 ||
[Analyze grammar]

āhosvidveṃkaṭeśasya mantreṇāṣṭākṣareṇa vai |
pibetkaṭāhatīrthaṃ tadbhuktimuktipradāyakam || 33 ||
[Analyze grammar]

vinā maṃtreṇa yo vipraḥ saṃpibettīrthamuttamam |
pāpaṃ me nāśaya kṣipraṃ janmāntarakṛtaṃ mahat || 34 ||
[Analyze grammar]

ityuktvā sa pibennityaṃ mokṣamārgaikasādhanam |
svāmipuṣkariṇīsnānaṃ varāhaśrīśadarśanam || 35 ||
[Analyze grammar]

kaṭāhatīrthapānaṃ ca trayaṃ trailokyadurlabham |
bahunā kimihoktena brahmahatyādināśanam || 36 ||
[Analyze grammar]

atha keśavākhyadvijavṛttāntaḥ |
purā kaściddvijo mohātkeśavākhyo bahuśrutam |
hatvā khaḍgena durbuddhyā brahmahatyāmavāptavān || 37 ||
[Analyze grammar]

so'pi tasminmahātīrthe pītvā jalamanuttamam |
keśavākhyo mahāpāpī vimukto brahmahatyayā || 38 ||
[Analyze grammar]

ṛṣaya ūcuḥ |
kasya putraḥ keśavākhyaḥ kathaṃ prāpto bhayaṃkarīm |
brahmahatyāmatikrūrāmasmākaṃ vaktumarhasi || 39 ||
[Analyze grammar]

śrīsūta uvāca |
tuṅgabhadrātaṭe ramye gandharvairupasevite |
agrahāro mahānāsīdvedāḍhya iti nāmataḥ || 40 ||
[Analyze grammar]

tasminvedapure ramye brāhmaṇā vedapāragāḥ |
śabdaśāstraparāḥ sarve jyotiḥśāstrapravartakāḥ || 41 ||
[Analyze grammar]

mīmāṃsātarkaśāstrajñāḥ sarve vedāntavādinaḥ |
dharmaśāstreṣu niratā annadānaparāḥ sadā || 42 ||
[Analyze grammar]

putravantaśca te sarve hyagrahāre mahājanāḥ |
vedāḍhaye'pyagrahāre vai padmanābha iti śrutaḥ || 43 ||
[Analyze grammar]

atha gaṇikālaṃpaṭasya keśavadvijasya brahmahatyāprāptikramaḥ |
tasya putraḥ keśavākhyaḥ sarvakarmabahiṣkṛtaḥ |
mātaraṃ pitaraṃ tyaktvā bhāryāmapi pativratām || 44 ||
[Analyze grammar]

sarvadā gaṇikāsakto veśyāgāraṃ viveśa ha |
dinadvaye ca tāṃ veśyāmanubhūya dvijastataḥ || 45 ||
[Analyze grammar]

niṣkadvayaṃ pradātavyaṃ haste dattvā gataḥ sukham |
veśyayā cādhanastyaktastatsaṃyogaikatatparaḥ || 46 ||
[Analyze grammar]

itastataścorayitvā bahudravyāṇi santatam |
dattvā tayā ciraṃ reme tadgṛhe bubhuje ca saḥ || 47 ||
[Analyze grammar]

ekena caṣakeṇāsau tayā saha surāṃ papau |
sa kadācitkirātaistu dravyaṃ hartuṃ yayau dvijaḥ || 48 ||
[Analyze grammar]

viprasya kasyacidgehe so'pi kairātaveṣadhṛk |
keśavo viprabandhurvai sāhasī khaṅgahastavān || 49 ||
[Analyze grammar]

tadgṛhasvāminaṃ vipraṃ hatvā khaḍgena sāhasāt |
samādāya bahu dravyaṃ veśyāgāraṃ viveśa ha || 50 ||
[Analyze grammar]

taṃ yāntamanuyāti sma brahmahatyā bhayaṃkarī |
nīlavastradharā bhīmā bhṛśaṃ raktaśiroruhā || 51 ||
[Analyze grammar]

garjantī sāṭṭahāsaṃ sā kampayantī ca rodasī |
anudrutastayā vipro babhrāma jagatītale || 52 ||
[Analyze grammar]

evaṃ bhramandharāṃ sarvāṃ viprabandhurdurātmavān |
svagrāmaṃ prayayau bhītyā śaunakādyā mahaujasaḥ || 53 ||
[Analyze grammar]

anudrutastayā bhītaḥ prayayau svaniketanam |
brahmahatyāpyanudrutya tena sākaṃ gṛhaṃ yayau || 54 ||
[Analyze grammar]

janakaṃ rakṣa rakṣeti keśavaḥ śaraṇaṃ yayau |
mā bhaiṣīriti sa procya pitā rakṣitumudyataḥ || 55 ||
[Analyze grammar]

atha svasutarakṣaṇodyukte padmanābhe brahmahatyoktiḥ |
krūrainaṃ brahmahatyā sā janakaṃ pratyabhāṣata || 56 ||
[Analyze grammar]

brahmahatyovāca |
mainaṃ tvaṃ pratigṛhṇīṣva padmanābha dvijottama |
ayaṃ surāpī steyī ca brahmahā cātipātakī || 57 ||
[Analyze grammar]

mātṛdrohī pitṛdrohī bhāryātyāgī ca duṣṭadhīḥ |
gaṇikāsaktacittaśca hyenaṃ muñca durātmakam || 58 ||
[Analyze grammar]

gṛhṇāsi cetsutaṃ vipra mahāpātakinaṃ vṛthā |
tvadbhāryāmasya bhāryāṃ ca tvāṃ ca putramimaṃ dvija || 59 ||
[Analyze grammar]

bhakṣayiṣyāmi vaṃśaṃ ca tasmānmuñca durātmakam |
imaṃ tyajasi cetputraṃ yuṣmānmuñcāmi sāṃpratam || 60 ||
[Analyze grammar]

naikasyārthe kulaṃ hantumarhasi tvaṃ mahāmate |
ityuktaḥ sa tayā tatra padmanābho'bravīcca tām || 61 ||
[Analyze grammar]

padmanābha uvāca |
bādhate māṃ sutasnehaḥ kathaṃ putraṃ parityaje |
brahmahatyā tadākarṇya padmanābhaṃ tamabravīt || 62 ||
[Analyze grammar]

brahmahatyovāca |
putro'yaṃ patito'bhūtte varṇāśramabahiṣkṛtaḥ |
putresminmā kuru snehaṃ niṃditaṃ tasya darśanam || 63 ||
[Analyze grammar]

ityuktvā brahmahatyā sā padmanābhasya paśyataḥ |
hastena prajahārāsya sutaṃ keśavanāmakam || 64 ||
[Analyze grammar]

ruroda tātatāteti janakaṃ prabruvanmuhuḥ |
rurudurjanako mātā bhāryā tasya durātmanaḥ || 65 ||
[Analyze grammar]

atha padmanābhaṃ prati bharadvājakathito brahmahatyāvimuktyupāyaḥ |
tasminkāle mahābhāgo bharadvājo mahāmuniḥ |
diṣṭyā samāyayau yogī śaunakādyā mahaujasaḥ || 66 ||
[Analyze grammar]

padmanābho'tha taṃ dṛṣṭvā bharadvājaṃ mahāmunim |
stutvā praṇamya śaraṇaṃ yayāce putrakāraṇāt || 67 ||
[Analyze grammar]

bharadvāja mahābhāga sākṣādviṣṇvaṃśako bhavān |
tvaddarśanamapuṇyānāṃ bhavitā na kadācana || 68 ||
[Analyze grammar]

brahmahā ca surāpī ca steyī cābhūtsuto mama |
putraṃ prahartumā yātā brahmahatyā bhayaṃkarī || 69 ||
[Analyze grammar]

bhūyādyathā me putroyaṃ mahāpātakamocitaḥ |
ghoreyaṃ brahmahatyā ca yathā śīghraṃ layaṃ vrajet || 70 ||
[Analyze grammar]

tamupāyaṃ vadasvādya mama putre dayāṃ kuru |
eka eva hi putro me nānyo'sti tanayo mune || 71 ||
[Analyze grammar]

sute mṛte tu vaṃśo me samucchidyeta mūlataḥ |
tataḥ pitṛbhyaḥ piṇḍānāṃ dātā'pi na bhaveddhruvam || 72 ||
[Analyze grammar]

tataḥ kṛpāṃ kuruṣva tvamasmāsu bhagavanmune |
ityuktaḥ sa bharadvājaḥ sākṣānnārāyaṇāṃśakaḥ || 73 ||
[Analyze grammar]

dhyātvā tu suciraṃ kālaṃ padmanābhaṃ vaco'bravīt || 74 ||
[Analyze grammar]

bharadvāja uvāca |
padmanābha kṛtaṃ pāpamatikrūraṃ sutena te |
nāsya pāpasya śāntiḥ syātprāyaścittāyutairapi || 75 ||
[Analyze grammar]

tathā'pi te sutasyāhamasya pāpasya śāntaye |
prāyaścittaṃ vadiṣyāmi padmanābha śṛṇu dvija || 76 ||
[Analyze grammar]

gaṅgāyā dakṣiṇe bhāge dviśatīyojane dvija |
pūrvāmbhodheḥ paścime tu pañcabhiryojanairmite || 77 ||
[Analyze grammar]

suvarṇamukharītīre cottare krośamātrake |
veṃkaṭādriti khyātaḥ sarvalokanamaskṛtaḥ || 78 ||
[Analyze grammar]

meruputro mahāpuṇyaḥ sarvadevābhivanditaḥ |
vaikuṇṭhalokādānīto viṣṇoḥ krīḍācalo mahān || 79 ||
[Analyze grammar]

garutmatā vegavatā svarṇamukhyāstaṭe śubhe |
vartate devasaṃghaiśca ṛṣisaṃghaiśca pūjitaḥ || 80 ||
[Analyze grammar]

tasminveṃkaṭaśailendre sākṣānnārāyaṇaḥ svayam |
lakṣmīdevyā ca bhūdevyā nīlādevyā samāgataḥ || 81 ||
[Analyze grammar]

vartate veṃkaṭeśaḥ sa sākṣānmokṣapradāyakaḥ |
tasya veṃkaṭanāthasya hyālayasya tathottare || 82 ||
[Analyze grammar]

kaṭāhatīrthaṃ viprendra vartate maṅgalapradam |
brahmahatyādipāpaghnaṃ vāñchitārthapradāyakam || 83 ||
[Analyze grammar]

sutena sākaṃ vipreṃdra piba tīrthaṃ manoharam |
bharadvājasya vākyaṃ tacchrutvā vai vedasaṃmitam || 84 ||
[Analyze grammar]

śirasā taṃ praṇamyātha yayau veṃkaṭaparvatam || 85 ||
[Analyze grammar]

atha bharadvājoktyā kaṭāhatīrthapānena keśavasya brahmahatyāvimuktiḥ |
taṃ gatvā veṃkaṭaṃ śailaṃ svāmipuṣkariṇījale |
sutena sākaṃ vipreṃdraḥ sasnau niyamapūrvakam || 86 ||
[Analyze grammar]

varāhasvāminaṃ natvā śrīnivāsālayaṃ gataḥ |
pradakṣiṇaṃ tataḥ kṛtvā vimānaṃ saṃpraṇamya ca || 87 ||
[Analyze grammar]

padmanābho'tha putreṇa keśavena durātmanā |
papau kaṭāhatīrthaṃ tadbrahmahatyāvināśakam || 88 ||
[Analyze grammar]

tadānīṃ brahmahatyā sā śīghrameva layaṃ gatā |
anantaraṃ tato gatvā veṃkaṭeśaṃ kṛpānidhim || 89 ||
[Analyze grammar]

putreṇa saha viprendraḥ padmanābho dadarśa saḥ |
tadā prādurabhūddevo veṅkaṭeśo dayānidhiḥ || 90 ||
[Analyze grammar]

kaṭāhatīrthapānena toṣito vākyamabravīt || 91 ||
[Analyze grammar]

atha brahmahatyāvimuktasutena sahitaṃ padmanābhaṃ prati bhagavaduktiḥ |
śrībhagavānuvāca |
padmanābha mahābuddhe vedavedāntapāraga |
bharadvājasya vākyena prāpya veṃkaṭaparvatam || 92 ||
[Analyze grammar]

kaṭāhatīrthaṃ tvaṃ pītvā kṛtārtho'si na saṃśayaḥ |
tava putraḥ keśavākhyo vimukto brahmahatyayā || 93 ||
[Analyze grammar]

tasmātkaṭāhatīrthaṃ tu sevanīyaṃ prayatnataḥ |
tasmiṃstīrthe mahābhāga pītvā jalamanuttamam || 94 ||
[Analyze grammar]

pāpino'pi kṛtārthāḥ syuḥ satyaṃ satyaṃ na saṃśayaḥ |
māmakaṃ lokamāgatya sukhī bhava mahāmate || 95 ||
[Analyze grammar]

ityuktvā veṃkaṭeśo'sāvantardhānaṃ gatastataḥ || 96 ||
[Analyze grammar]

śrīsūta uvāca |
tasmāttapodhanāḥ sarve śaunakādyā mahaujasaḥ |
kaṭāhatīrthamāhātmyamitihāsasamanvitam || 97 ||
[Analyze grammar]

yathāśrutaṃ mayā samyaktathoktaṃ bhavatāṃ dvijāḥ || 98 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye sūtaśaunaka saṃvāde kaṭāhatīrthapraśaṃsanaṃnāmāṣṭāviṃśo'dhyāyaḥ || 28 ||
[Analyze grammar]