Chapter 25

[English text for this chapter is available]

atha jābālitīrthamāhātmyavarṇanam |
śrīsūta uvāca |
bhobhostapodhanāḥ sarve naimiṣāraṇyavāsinaḥ |
veṃkaṭādrau mahāpuṇye sarvapātakanāśane || 1 ||
[Analyze grammar]

tato jābālitīrthasya māhātmyaṃ varṇayāmyaham |
durācārābhidho yatra snātvā mukto'bhavaddvijāḥ || 2 ||
[Analyze grammar]

munaya ūcuḥ |
durācārābhidhaḥ ko'sau sūta tattvārthakovida |
kiñca pāpaṃ kṛtaṃ tena durācāreṇa vai mune || 3 ||
[Analyze grammar]

kathaṃ vā pātakānmuktastīrthesminsnānavaibhavāt |
etacchuśrūṣamāṇānāṃ vistarādvada no mune || 4 ||
[Analyze grammar]

atha kāverītīravāsidurācārākhyadvijodantaḥ |
śrīsūta uvāca |
munayaḥ śrūyatāṃ tasya durācārasya pātakam |
jābālitīrthasnānena yathā muktaśca pātakāt || 5 ||
[Analyze grammar]

durācārābhidho vipraḥ kāverītīramāśritaḥ |
kaścidāste dvijaḥ pāpī krūrakarmarataḥ sadā || 6 ||
[Analyze grammar]

brahmaghnaiśca surāpaiśca steyibhirgurutalpagaiḥ |
sadā saṃsargaduṣṭo'sau taiḥ sākaṃ nyavasaddvijāḥ || 7 ||
[Analyze grammar]

mahāpātakasaṃsargadoṣeṇāsya dvijasya vai |
brāhmaṇyaṃ sakalaṃ naṣṭaṃ niḥśeṣeṇa dvijottamāḥ || 8 ||
[Analyze grammar]

mahāpātakibhiḥ sārdhaṃ dinamekaṃ tu yo dvijaḥ |
nivasetsādaraṃ tasya tatkṣaṇādvai dvijanmanaḥ || 9 ||
[Analyze grammar]

brāhmaṇasya tu caikāṃśo naśyatyeva na saṃśayaḥ |
dvidinaṃ sevanātsparśāddarśanācchayanāttathā || 10 ||
[Analyze grammar]

bhojanātsaha paṃktau ca mahāpātakibhirdvijāḥ |
dvitīyabhāgo naśyeta brāhmaṇyasya na saṃśayaḥ || 11 ||
[Analyze grammar]

tridinācca tṛtīyāṃśo naśyatyeva na saṃśayaḥ |
caturdināccaturthāṃśo vilayaṃ yāti hi dhuvam || 12 ||
[Analyze grammar]

ataḥ paraṃ ca taiḥ sākaṃ śayanāsanabhojanaiḥ |
tattulyapātakī bhūyānmahāpātakisaṃgavān || 13 ||
[Analyze grammar]

tena brāhmaṇyahīno'yaṃ durācārābhidho dvija |
grasto'bhavadbhīṣaṇena vyāleneva balīyasā || 14 ||
[Analyze grammar]

asau paravaśastena vetālenātipīḍitaḥ |
deśāddeśaṃ bhramanvipro vanāccaiva vanāntaram || 15 ||
[Analyze grammar]

pūrvapuṇyavipākena daivayogena sa dvijaḥ |
veṃkaṭādriṃ mahāpuṇyaṃ sarvapātakanāśanam || 16 ||
[Analyze grammar]

atha jñābālitīrthasnānāddurācāravetālayormahapātakādinivṛttiḥ |
 anudrutaḥ piśācena vetālena dvijo yayau |
nyamajjayatsa vetālo mahāpātakanāśane || 17 ||
[Analyze grammar]

jābālitīrthe viprendrā mahāpātakisaṃginam |
udatiṣṭhatkṣaṇādeva vetālena vimocitaḥ || 18 ||
[Analyze grammar]

utthito'sau dvijo viprāstasmāttīrthāttu pāvanāt |
svastho vyacintayatko'yaṃ svarṇamukhyāḥ samīpataḥ || 19 ||
[Analyze grammar]

kathaṃ mayāgatamaho kāverītīravāsinā |
iti cintākulaḥ so'yaṃ jābālestīrthamuttamam || 20 ||
[Analyze grammar]

jābāliṃ ca mahātmānaṃ yogīndravaramuttamam |
samāgamya praṇamyāsau durācāro'bhyabhāṣata || 21 ||
[Analyze grammar]

na jāne bhagavanvipra parvato'yaṃ vadādhunā |
kāverītīranilayo durācārābhidho hyaham || 22 ||
[Analyze grammar]

kṛpayā brūhi me brahmanmayātra kathamāgatam |
iti pṛṣṭo munistena durācāreṇa suvrataḥ || 23 ||
[Analyze grammar]

dhyātvā muhurtamavadaddurācāraṃ kṛpānidhiḥ || 24 ||
[Analyze grammar]

atha jābālivarṇitapārvaṇaśrāddhākaraṇadoṣakathanam |
jābāliruvāca |
mahāpātakisaṃsargāddurācārasya te purā |
brāhmaṇyaṃ naṣṭamabhavadvetālastvāṃ tato'grahīt || 25 ||
[Analyze grammar]

tenāviṣṭastvamāyāto vivaśo'tra vimūḍhadhīḥ |
nyamajjayattvāṃ vetālastīrthe'sminnatipāvane || 26 ||
[Analyze grammar]

atra majjanamātreṇa vimuktaḥ pātakādbhavān |
jābālitīrthe ye snānaṃ puṇyaṃ kurvanti mānavāḥ || 27 ||
[Analyze grammar]

teṣāṃ naśyaṃti vai satyaṃ pañcapātakasaṃcayāḥ |
satkarmasādhane puṇyatīrthe'sminsnānamātrataḥ || 28 ||
[Analyze grammar]

mahāpātakisaṃsargadoṣaste vilayaṃ gataḥ |
tvāmagrahīdyo vetālaḥ purāyaṃ brāhmaṇo'bhavat || 29 ||
[Analyze grammar]

mṛte'hani pitṛśrāddhaṃ nākarotpārvaṇena vai |
tena svapitṛbhiḥ śapto vetālatvamagādayam || 30 ||
[Analyze grammar]

so'pi jābālitīrthasya jale snānaprabhāvataḥ |
vetālatvaṃ vihāyaiva viṣṇulokamavāptavān || 31 ||
[Analyze grammar]

na kuryādyo naraḥ śrāddhaṃ mātāpitrormṛte'hani |
vetālatvamavāpyāśu paścānnarakamaśnute || 32 ||
[Analyze grammar]

śrīsūta uvāca |
durācāro mahāpāpī tīrthe'smitsnānamātrataḥ |
prāptavānviṣṇulokaṃ vai punarāvṛttivarjitam || 33 ||
[Analyze grammar]

evaṃ vaḥ kathitaṃ puṇyaṃ durācāravimokṣaṇam |
tasmātpuṇyatamaṃ tīrthaṃ sarvapāpaharaṃ śubham || 34 ||
[Analyze grammar]

yatra hi snānamātreṇa durācāro vimocitaḥ |
yāni niṣkṛtihīnāni pāpānyapi vināśayet || 35 ||
[Analyze grammar]

śūdreṇa pūjitaṃ liṅgaṃ viṣṇuṃ vā yo nameddvijaḥ |
prāyaścittaṃ na smṛtiṣu tasyoktaṃ paramarṣibhiḥ || 36 ||
[Analyze grammar]

naśyettasyāpi tatpāpaṃ tīrthe jābālisaṃjñake |
vipranindākṛtāṃ caiva prāyaścittaṃ na vidyate || 37 ||
[Analyze grammar]

viśvāsaghātukānāṃ ca kṛtaghnānāṃ ca niṣkṛtiḥ |
bhrātṛbhāryāratānāṃ ca prāyaścittaṃ na vidyate || 38 ||
[Analyze grammar]

teṣāṃ jābālitīrthe vai snānācchuddhirbhaviṣyati |
evaṃ vaḥ kathitaṃ viprā jābālestīrthavaibhavam || 39 ||
[Analyze grammar]

yacchrutvā sarvapāpebhyo mucyate mānavo bhuvi || 40 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye jābālitīrthamahimānuvarṇanaṃnāma pañcaviṃśo'dhyāyaḥ || 25 ||
[Analyze grammar]