Chapter 24

[English text for this chapter is available]

atha sundarākhyagandharvasya rākṣasatvaprāptinivṛttyorupodghātaḥ |
ṛṣaya ūcuḥ |
bhagavanrākṣasaḥ ko'sau sūta paurāṇikottama |
viṣṇubhaktaṃ mahātmānaṃ yo brāhmaṇamabādhata || 1 ||
[Analyze grammar]

śrīsūta uvāca |
vakṣyāmi rākṣasaṃ krūraṃ taṃ viprāḥ śṛṇutādarāt |
yathā ca rākṣaso jāto munīnāṃ śāpavaibhavāt || 2 ||
[Analyze grammar]

purā vaikuṇṭhasadṛśe śrīraṅge viṣṇumaṃdire |
vasiṣṭhātrimukhāḥ sarve viṣṇubhaktā mahaujasaḥ || 3 ||
[Analyze grammar]

śrīraṅganāthaṃ deveśaṃ bhaktānāmabhayapradam |
upāsāṃcakrire muktyai śrīraṅgapuravāsinaḥ || 4 ||
[Analyze grammar]

kadācittatra gandharvo vīrabāhusuto balī |
sundaro nāma vipreṃdrā viṭagoṣṭhīparāyaṇaḥ || 5 ||
[Analyze grammar]

lalanāśatasaṃyukto vivastraḥ salilāśaye |
cikrīḍa sa vivastrābhiḥ sākaṃ yuvatibhirmudā || 6 ||
[Analyze grammar]

kaverajāyāstīrthe tu vasiṣṭho munibhiḥ saha |
mādhyāhnikaṃ kartumanā yayau śrīraṃgamaṃdirāt || 7 ||
[Analyze grammar]

tānṛṣīnavalokyātha rāmāstā bhayakātarāḥ |
vāsāṃsyācchādayāmāsuḥ sundaro na tu sāhasī || 8 ||
[Analyze grammar]

tato vasiṣṭhaḥ kupitaḥ śaśāpainaṃ gatatrapam || 9 ||
[Analyze grammar]

vasiṣṭha uvāca |
yasmātsundara gandharva dṛṣṭvā'smāṃllajjayā tvayā |
vāso nācchāditaṃ śīghraṃ yāhi rākṣasatāṃ tataḥ || 10 ||
[Analyze grammar]

evamukte vasiṣṭhena rāmāḥ prāñjalayastadā |
praṇipatya vasiṣṭhaṃ taṃ bhaktinamreṇa cetasā || 11 ||
[Analyze grammar]

munimaṇḍalamadhye tu vasiṣṭhamidamabruvan || 12 ||
[Analyze grammar]

rāmā ūcuḥ |
bhagavansarvadharmajña caturānananandana |
dayāsindho'valokyāsmānna kopaṃ kartumarhasi || 13 ||
[Analyze grammar]

patireva hi nārīṇāṃ bhūṣaṇaṃ paramucyate |
patihīnā tu yā nārī śataputrāpi sā mune || 14 ||
[Analyze grammar]

vidhavetyucyate loke tāsāṃ janma nirarthakam |
tatprasādaṃ kuru mune patyāvasmākamādarāt || 15 ||
[Analyze grammar]

eko'parādhaḥ kṣaṃtavyo munibhistattvadarśibhiḥ |
kṣamāṃ kuru dayāsindho yuṣmacchiṣye'tra sundare || 16 ||
[Analyze grammar]

śrīsūta uvāca |
vasiṣṭhaḥ prārthitastvevaṃ sundarasyāṃganājanaiḥ |
provāca vacanaṃ bhūyaḥ prasannaḥ sa dvijottamaḥ || 17 ||
[Analyze grammar]

atha sundarākhyasya vasiṣṭhoktarākṣatvanivṛttyupāyaḥ |
vasiṣṭha uvāca |
na me syādvacanaṃ mithyā kadācidapi subhruvaḥ |
upāyaṃ vaḥ pravakṣyāmi śṛṇudhvaṃ śraddhayā saha || 18 ||
[Analyze grammar]

ṣoḍaśābdāvadhiḥ śāpo bharturvai bhavitā dhruvam |
ṣoḍaśābdāvadhau caiva sundaro rākṣasākṛtiḥ || 19 ||
[Analyze grammar]

yadṛcchayā veṃkaṭādriṃ sarvapāpaharaṃ śubham |
gatvāsau cakratīrthaṃ tadgamiṣyati surāṃganāḥ || 20 ||
[Analyze grammar]

āste tatra mahāyogī padmanābho munīśvaraḥ |
bhakṣārthaṃ taṃ muniṃ so'yaṃ rākṣaso'bhigamiṣyati || 21 ||
[Analyze grammar]

tato brāhmaṇarakṣārtha preritaṃ cakramuttamam |
viṣṇunāsya śiraḥ kāyāddhariṣyati na saṃśayaḥ || 22 ||
[Analyze grammar]

tataḥ svaṃ rūpamāsādya śāpānmuktaḥ sa sundaraḥ |
patirvastridivaṃ bhūyo gantā nāstyatra saṃśayaḥ || 23 ||
[Analyze grammar]

tatastridivamāsādya sundaro'yaṃ patirhi vaḥ |
ramayiṣyati sundaryo yuṣmānsundaraveṣabhṛt || 24 ||
[Analyze grammar]

śrīsūta uvāca |
ityuktvā tu vasiṣṭhastāḥ sundarasya varāṃganāḥ |
svāśramaṃ prayayau tūrṇaṃ śrīraṃgeśvarabhaktimān || 25 ||
[Analyze grammar]

atha rāmāstamāliṃgya sundaraṃ patimātmanaḥ |
ruruduḥ śokasantaptā duḥkhasāgaramadhyagāḥ || 26 ||
[Analyze grammar]

dṛśyamānāsu tāsvevaṃ sundaro rākṣaso'bhavat |
mahādaṃṣṭro mahākāyo raktaśmaśruśiroruhaḥ || 27 ||
[Analyze grammar]

taṃ dṛṣṭvā bhayasaṃvignā jagmū rāmāstriviṣṭapam |
tato rākṣasaveṣo'yaṃ suṃdarī bhairavākṛtiḥ || 28 ||
[Analyze grammar]

bhakṣayanprāṇinaḥ sarvāndeśāddeśaṃ vanādvanam |
bhramannanilavego'yaṃ veṃkaṭādriṃ nagottamam || 29 ||
[Analyze grammar]

praviśyāsau mahāpāpī cakratīrthaṃ tato yayau |
evaṃ ṣoḍaśavarṣāṇi bhramato'sya yayustadā || 30 ||
[Analyze grammar]

tatastu ṣoḍaśābdānte rākṣaso'yaṃ munīśvarāḥ |
bhakṣituṃ padmanābhaṃ taṃ cakratīrthanivāsinam || 31 ||
[Analyze grammar]

upādravadvāyuvegaḥ sacāstauṣījjanārdanam |
yoginā ca stuto viṣṇustadā cakramacodayat || 32 ||
[Analyze grammar]

rakṣituṃ padmanābhaṃ taṃ rākṣasena prapīḍitam |
athāgatya hareścakraṃ rākṣasasya śiro'harat || 33 ||
[Analyze grammar]

atha sundarākhyasya rākṣasatvavimuktipūrvakaṃ svasvarūpaprāptiḥ |
tato'yaṃ rākṣasaṃ dehaṃ tyaktvā divyakalevaraḥ |
vimānavaramāruhya sundaraḥ puṣpavarṣitaḥ || 34 ||
[Analyze grammar]

prāñjaliḥ praṇato bhūtvā vavaṃde tatsudarśanam |
tuṣṭāva śrutiramyābhirvāgbhiragryābhirādarāt || 35 ||
[Analyze grammar]

sundara uvāca |
sudarśana namaste'stu viṣṇuhastaikabhūṣaṇa |
namaste'surasaṃhartre sahasrādityatejase || 36 ||
[Analyze grammar]

kṛpāveśena bhavatastyakvāhaṃ rākṣasīṃ tanum |
svaṃ rūpamabhajaṃ viṣṇoścakrāyudha namo'stu te || 37 ||
[Analyze grammar]

anujānīhi māṃ gaṃtuṃ tridivaṃ viṣṇuvallabha |
bhāryā me pariśocanti virahāturacetasaḥ || 38 ||
[Analyze grammar]

tvanmanasko bhaviṣyāmi yāvajjīvaṃ yathā hyaham |
tathā rūpaṃ kuruṣva tvaṃ mayi cakra namo'stu te || 39 ||
[Analyze grammar]

evaṃ stutaṃ viṣṇucakraṃ sundareṇa sabhaktikam |
anujagrāha sahasā tathāstviti munīśvarāḥ || 40 ||
[Analyze grammar]

cakrāyudhābhyanujñātaḥ sundaro brāhmaṇottamam |
praṇamya tenānujñāto gandharvastridivaṃ yayau || 41 ||
[Analyze grammar]

sundare tu gate svargaṃ padmanābho munīśvaraḥ |
taccakraṃ prārthayāmāsa viṣṇvāyudha namo'stu te || 42 ||
[Analyze grammar]

cakrāyudha namāmi tvāṃ mahāsuravimardana |
sannidhānaṃ kuruṣva tvaṃ cakratīrthe'male śubhe || 43 ||
[Analyze grammar]

tvatsannidhānātsarveṣāṃ snātānāṃ pāpināmiha |
pāpanāśaṃ kuruṣva tvaṃ mokṣaṃ ca kuru śāśvatam || 44 ||
[Analyze grammar]

cakratīrthamiti khyātiṃ loke'sya parikalpaya |
tvatsannidhānādatratyamunīnāṃ bhayanāśanam || 45 ||
[Analyze grammar]

itaḥ paraṃ bhavatvārya cakrāyudha namo'stu te |
bhūtapretapiśācebhyo bhayaṃ mā bhavatu prabho || 46 ||
[Analyze grammar]

iti samprārthitaṃ cakraṃ padmanābhena yoginā |
tathaivāstviti sambhāṣya tasmiṃstīrthe tirohitam || 47 ||
[Analyze grammar]

śrīsūta uvāca |
evaṃ vaḥ kathitaṃ viprā rākṣasasyodbhave mayā |
māhātmyaṃ cakratīrthasya kathitaṃ ca malāpaham || 48 ||
[Analyze grammar]

yacchutvā sarvapāpebhyo mucyate mānavo bhuvi || 49 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye cakratīrthamahimānuvarṇanaṃnāma caturviṃśo'dhyāyaḥ || 24 ||
[Analyze grammar]