Chapter 22

[English text for this chapter is available]

atha dānārhasatpātranirṇayaḥ |
ṛṣaya ūcuḥ |
bhagavansūta sarvajña vedavedāntakovida |
dānāni kasmai deyāni dānakālaśca kīdṛśaḥ || 1 ||
[Analyze grammar]

kaśca tatpratigṛhṇīyātsarvaṃ no vaktumarhasi || 2 ||
[Analyze grammar]

śrīsūta uvāca |
mahāpuṇyaprade kṣetre veṃkaṭākhye dvijottamāḥ |
sarveṣāmeva varṇānāṃ brāhmaṇaḥ paramo guruḥ || 3 ||
[Analyze grammar]

tasmai dānāni deyāni sa tārayati paṃḍitaḥ |
brāhmaṇaḥ pratigṛhṇīyādvarjayitvā tvavarṇakam || 4 ||
[Analyze grammar]

ṣaṇḍasya putrahīnasya daṃbhācāraratasya ca |
vedavidveṣiṇaścaiva dvijavidveṣiṇastathā || 5 ||
[Analyze grammar]

svakarmatyāginaścāpi dattaṃ bhavati niṣphalam |
paradāraratasyāpi paradravyaratasya ca || 6 ||
[Analyze grammar]

gāyakasyāpi viprasya dattaṃ bhavati niṣphalam |
asūyāviṣṭamanasaḥ kṛtaghnasya ca māyinaḥ || 7 ||
[Analyze grammar]

jñānaśūnyasya viprasya dattaṃ bhavati niṣphalam |
nityaṃ yāñcāparasyāpi hiṃsakasyābalasya ca || 8 ||
[Analyze grammar]

nāmavikrayiṇaścaiva vedavikrayiṇastathā |
smṛtivikrayiṇaścaiva dharmavikrayiṇastathā || 9 ||
[Analyze grammar]

paropatāpaśīlasya dattaṃ bhavati niṣphalam |
ye kecitpāpaniratā ninditāḥ sukṛtaistathā || 10 ||
[Analyze grammar]

na tebhyaḥ pratigṛhṇīyānna deyaṃ vāpi kiñcana |
satkarmaniratāyaiva śrotriyāyāhitāgnaye || 11 ||
[Analyze grammar]

vṛttihīnāya vai deyaṃ daridrāya kuṭumbine |
devapūjāsu saktāya purāṇakathakāya ca || 12 ||
[Analyze grammar]

deyaṃ prayatnato viprā daridrasya viśeṣataḥ |
bahunā kimihoktena śṛṇudhvaṃ dvijasattamāḥ || 13 ||
[Analyze grammar]

sarveṣāṃ brāhmaṇānāṃ ca pradātuṃ śakyate sadā |
vandhyābhartre pradattañcedrāsabho jāyate naraḥ || 14 ||
[Analyze grammar]

nāstikaṃ bhinnamaryādaṃ putrahīnaṃ jaḍaṃ khalam |
steyinaṃ kitavaṃ caiva kadācinnābhivādayet || 15 ||
[Analyze grammar]

pāṣaṇḍaṃ patitaṃ vrātyaṃ vedavikrayiṇaṃ tathā |
kṛtaghnaṃ pāpanirataṃ kadācinnābhivādayet || 16 ||
[Analyze grammar]

tathā snānaṃ prakurvantaṃ samitpuṣpakaraṃ tathā |
udapātradharañcaiva bhuṃjantaṃ nābhivādayet || 17 ||
[Analyze grammar]

vivādaśālinaṃ caṇḍaṃ vamantaṃ janamadhyagam |
bhikṣānnadhāriṇaṃ caiva śayānaṃ nābhivādayet || 18 ||
[Analyze grammar]

vandhyāñca puṣpiṇīṃ jārāṃ sūtikāṃ garbhapātinīm |
vrataghnīñca tathā caṇḍīṃ kadācinnābhivādayet || 19 ||
[Analyze grammar]

sabhāyāṃ yajñaśālāyāṃ devatāyataneṣvapi |
pratyekaṃ tu namaskāro hanti puṇyaṃ purātanam || 20 ||
[Analyze grammar]

śrāddhavrate niyuktañca devatābhyarcakaṃ tathā |
yajñaṃ ca tarpaṇañcaiva kurvantaṃ nābhivādayet || 21 ||
[Analyze grammar]

kurvate vandanaṃ yastu na kuryātprativandanam |
nābhivādyaḥ sa vijñeyo yathā śūdrastathaiva ca || 22 ||
[Analyze grammar]

tasmātsarvepu kāleṣu buddhimānbrāhmaṇottamaḥ |
vandhyāpatiṃ dvijaṃ krūraṃ kadācinnābhivādayet || 23 ||
[Analyze grammar]

athākāśagaṃgāmāhātmyam |
śrīsūta uvāca |
atretihāsaṃ vakṣyāmi puṇyaśīlasya dhīmataḥ |
sanatkumāramunaye nāradena prabhāṣitam || 24 ||
[Analyze grammar]

tadvakṣyāmi muniśreṣṭhāḥ śṛṇudhvaṃ susamāhitāḥ |
purā godāvarītīre sarvadharmaparāyaṇaḥ || 25 ||
[Analyze grammar]

puṇyaśīlo dvijavaraḥ satyavādī jitendriyaḥ |
dayāvānsarvabhūteṣu devāgnidvijapūjakaḥ || 26 ||
[Analyze grammar]

karmaṇā janmaśuddhaśca mātāpitṛhite rataḥ |
gurubhaktiḥ sadākṣiṇyo brahmaṇyaḥ sādhusaṃmataḥ || 27 ||
[Analyze grammar]

etādṛśaguṇairyuktaḥ puṇyaśīlasya dhīmataḥ || 28 ||
[Analyze grammar]

atha puṇyaśīlasya vandhyāpatinimantraṇena gardabhamukhatvaprāptiḥ |
gṛhaṃ samprāptavānvipro vedavedāṃgapāragaḥ |
prārthitaḥ puṇyaśīlena pitṛśrāddhe'tivegataḥ || 29 ||
[Analyze grammar]

taṃ vipraṃ śrotriyaṃ śāntaṃ pitṛśrāddhe niyojya vai |
śrāddhaṃ cakāra dharmātmā pratyābdikamanuttamam || 30 ||
[Analyze grammar]

tataḥ kālāntare tasya puṇyaśīlasya cānane |
vairūpyaṃ prāptamatyugraṃ rāsabhānanavattadā || 31 ||
[Analyze grammar]

tataḥ khinnamanā bhūtvā puṇyaśīlo'tidhārmikaḥ |
niḥśvasya bahudhā khinnaḥ prapede'gastyayoginaḥ || 32 ||
[Analyze grammar]

suvarṇamukharītīre ṛṣisaṃghaniṣevite |
āśramaṃ paramaṃ divyaṃ sarvakāmaphalapradam || 33 ||
[Analyze grammar]

tatrāśrame munivaraiḥ sevyamānamaharniśam |
dṛṣṭvāgastyaṃ mahātmānaṃ sarvalokahitaiṣiṇam || 34 ||
[Analyze grammar]

praṇāmamakarottasmai gārdabhāsyo'tiduḥkhitaḥ || 35 ||
[Analyze grammar]

puṇyaśīla uvāca |
taponidhe namastubhyamagastya munisevita |
kutsitāsyaṃ mahāpāpaṃ rakṣarakṣa dayānidhe || 36 ||
[Analyze grammar]

kena doṣeṇa me cātra mukhasyāsītkurūpatā || 37 ||
[Analyze grammar]

mayi prītyā mahābhāga vadasva munisattama || 38 ||
[Analyze grammar]

agastya uvāca |
vipravarya mahābhāga puṇyaśīla mahāmate |
ānanasya virūpaṃ vai śṛṇu nānyamanā dvija || 39 ||
[Analyze grammar]

atha vandhyāpateḥ śrāddhanimantraṇānarhatvakathanam |
kañcidvipraṃ guṇanidhiṃ vedavedāṃgapāragam |
śrotriyaṃ putrarahitaṃ śrāddhe tvaṃ viniyuktavān || 40 ||
[Analyze grammar]

tena doṣeṇa mahatā mukhe tava virūpatā |
ye loke havyakavyādau vandhyāyāḥ svāminaṃ dvijam || 41 ||
[Analyze grammar]

niyojayanti te yānti mukhe gardabharūpatām |
śubhakarmaṇi vā vipra paitṛke vāpi karmaṇi || 42 ||
[Analyze grammar]

vandhyāpatiṃ mahāpāpaṃ kadācinna nimantrayet |
vandhyāpatiṃ mahākrūraṃ vṛṣalīpatimeva vā || 43 ||
[Analyze grammar]

śreyaskāmī hi vipreṃdra śrāddhe tu na nimantrayet |
vedaśāstrādiyukto'pi kulīnaḥ karmaṭho'pi vā || 44 ||
[Analyze grammar]

vandhyābhartā dvijaśreṣṭha śrāddhe tyājyaḥ kathañcana |
jyotiṣṭomādiyajñeṣu vrateṣu ca tapaḥsu ca || 45 ||
[Analyze grammar]

samartho'pi dvijaśreṣṭhaḥ śrāddhe vandhyāpatiṃ tyajet |
alabhye tu dvije pātre tantumātropajīvinam || 46 ||
[Analyze grammar]

putravantaṃ sadācāraṃ śrāddhārthaṃ tu nimantrayet |
tadabhāve dvijaśreṣṭha putraṃ vā'nujameva vā || 47 ||
[Analyze grammar]

ātmānaṃ vā niyuñjīta śrāddhe vandhyāpatiṃ tyajet |
puṇyaśīla mahābhāga coddhṛtya bhujamucyate || 48 ||
[Analyze grammar]

sarvathā putrahīnaṃ tu śrāddhārthaṃ na niyojayet |
vandhyāpatiṃ dvijaṃ yastu śrāddhakartā niyokṣyati || 49 ||
[Analyze grammar]

tacchrāddhamāsuraṃ jñeyaṃ kartā ca narakaṃ vrajet || 50 ||
[Analyze grammar]

athākāśagaṃgāsnānena puṇyaśīlasya tadvikṛtinivṛttiḥ |
bahunātra kimuktena taddoṣavinivṛttaye |
upāyaṃ te pravakṣyāmi svarṇamukhyāstaṭe śubhe || 51 ||
[Analyze grammar]

vartate devasaṃghaiśca sevito veṃkaṭācalaḥ |
meruputro mahāpuṇyaḥ sarvakāmaphalapradaḥ || 52 ||
[Analyze grammar]

tasminveṃkaṭaśailendre surāsuranamaskṛte |
viyadgaṃgeti nāmnā vai tīrthamasti mahattaram || 53 ||
[Analyze grammar]

sarvapāpapraśamanamāyurārogyavardhanam |
tvaṃ gatvā veṃkaṭaṃ śailaṃ svāmipuṣkariṇījale || 54 ||
[Analyze grammar]

snātvā saṃkalpapūrvaṃ tu gaṃgātīrthamanantaram |
gatvā tīrthavidhānena snānaṃ kuru mahāmate || 55 ||
[Analyze grammar]

snānamātrāttataḥ sadyo mukhasyāsya mahāmate |
vairūpyaṃ tatkṣaṇādeva naṃkṣyatyeva na saṃśayaḥ || 56 ||
[Analyze grammar]

evamuktaḥ puṇyaśīlo hyagastyena mahātmanā |
taṃ praṇamya mahātmānaṃ veṃkaṭādriṃ tato yayau || 57 ||
[Analyze grammar]

tatra gatvā mahābhāgaḥ svāmipuṣkariṇījale |
snātvā niyamapūrvaṃ tu viyadgaṃgāsamīpagaḥ || 58 ||
[Analyze grammar]

tatra snānena dharmātmā kāmavakropamaṃ mukham |
prāptavānpuṇyaśīlastu aho tīrthasya vaibhavam || 59 ||
[Analyze grammar]

śrīsūta uvāca |
evaṃ vaḥ kathitaṃ viprā nāradena prabhāṣitam |
sanatkumāramunaye śaunakādyā mahaujasaḥ || 60 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmya ākāśagaṃgāmāhātmyavarṇanaṃnāma dvāviṃśatitamo'dhyāyaḥ || 22 ||
[Analyze grammar]