Chapter 20

[English text for this chapter is available]

atha pāpavināśanatīrthamāhātmyavarṇanam |
śrīsūta uvāca |
punaścāhaṃ pravakṣyāmi pāpanāśanavaibhavam |
bhagavadbhaktibhāvena śṛṇudhvaṃ susamāhitāḥ || 1 ||
[Analyze grammar]

itihāsaṃ pravakṣyāmi sarvapāpavināśanam |
yacchrutvā sarvapāpebhyo mucyate nātra saṃśayaḥ || 2 ||
[Analyze grammar]

atha bhadramatyākhyadaridradvijavṛttāntaḥ |
āsītpurā dvijavaro vedavedāṃgapāragaḥ |
daridro vṛttihīnaśca nāmnā bhadramatirdvijaḥ || 3 ||
[Analyze grammar]

śrutāni sarvaśāstrāṇi tena vipreṇa dhīmatā |
śrutāni ca purāṇāni dharmaśāstrāṇi sarvaśaḥ || 4 ||
[Analyze grammar]

abhavaṃstasya ṣaṭ patnyaḥ kṛtā siṃdhuryaśovatī |
kāminī mālinī caiva śobhā caiva prakīrtitāḥ || 5 ||
[Analyze grammar]

tāsu patnīṣu tasyāsītputrāṇāṃ ca śatadvayam |
te sarve tasya putrādyāḥ kṣudhayā paripīḍitāḥ || 6 ||
[Analyze grammar]

akiñcano bhadramatiḥ kṣudhārtānātmajānpriyān |
paśyanpriyāḥ kṣudhārtāśca vilalāpākulendriyaḥ || 7 ||
[Analyze grammar]

dhigjanma bhāgyarahitaṃ dhigjanma dhanavarjitam |
dhigjanma kīrtirahitaṃ dhigjanmātithyavarjitam || 8 ||
[Analyze grammar]

dhigjanmācārarahitaṃ dhigjanma jñānavarjitam |
dhigjanma yatnarahitaṃ dhigjanma sukhavarjitam || 9 ||
[Analyze grammar]

dhigjanma bandhurahitaṃ dhigjanma khyātivarjitam |
narasya bahvapatyasya dhigjanmaiśvaryavarjitam || 10 ||
[Analyze grammar]

aho guṇāḥ saumyatā ca vidvattā janma satkule |
dāridryāmbudhimagnasya sarvametanna śobhate || 11 ||
[Analyze grammar]

viprāḥ putrāśca pautrāśca bāndhavā bhrātarastathā |
śiṣyāśca sarve manujāstyajantyaiśvaryavarjitam || 12 ||
[Analyze grammar]

iti niścitya matimāndhīro bhadramatirdvijaḥ |
caṇḍālo vā dvijo vāpi bhāgyavāneva pūjyate || 13 ||
[Analyze grammar]

daridraḥ puruṣo loke śavavallokaninditaḥ |
aho sampatsamāyukto niṣṭhuro vāpyaniṣṭhuraḥ || 14 ||
[Analyze grammar]

guṇahīno'pi guṇavānmūrkho vāpi sa paṇḍitaḥ |
niṣṭhuro vā guṇī vāpi dharmahīno'tha vā naraḥ || 15 ||
[Analyze grammar]

aiśvaryaguṇayuktaścetpūjya eva na saṃśayaḥ |
aho daridratā duḥkhaṃ tatrāpyāśātiduḥkhadā || 16 ||
[Analyze grammar]

āśābhibhūtāḥ puruṣā duḥkhamaśnuvate kṣaṇāt || 17 ||
[Analyze grammar]

āśāyā ye dāsā dāsāste sarvalokasya |
āśā dāsī yeṣāṃ teṣāṃ dāsāyate lokaḥ || 18 ||
[Analyze grammar]

sarvaśāstrārthavettāpi daridro bhāti mūrkhavat |
ākiñcanyamahāgrāhagrastānāṃ nāsti mocakaḥ || 19 ||
[Analyze grammar]

aho duḥkhamaho duḥkhamaho duḥkhaṃ daridratā |
tatrāpi putradārāṇāṃ bāhulyamatiduḥkhadam || 20 ||
[Analyze grammar]

evamuktvā bhadramatiḥ sarvaśāstrārthapāragaḥ |
atyaiśvaryapradaṃ dharmaṃ manasā cintayaṃstadā |
tūṣṇīṃ sthito bhadramatimahākleśasamanvitaḥ || 21 ||
[Analyze grammar]

atha bhadramateḥ kāminīkṛtaveṃkaṭādrigamanaprotsāhanam |
tadānīṃ tāsu bhāryāsu kāminī patidevatā || 22 ||
[Analyze grammar]

bhāryā sādhuguṇairyuktā patiṃ taṃ pratyabhāṣata || 23 ||
[Analyze grammar]

kāminyuvāca |
bhagavansarvadharmajña sarvaśāstrārthapāraga |
mama nātha mahābhāga vākyaṃ śṛṇu mahāmate || 24 ||
[Analyze grammar]

suvarṇamukharītīre ṛṣisaṃghaniṣevite |
vartate daivataiḥ sevyaḥ pāvano veṃkaṭācalaḥ || 25 ||
[Analyze grammar]

tasminveṃkaṭaśailendre surāsuranamaskṛte |
vartate pāvanaṃ tīrthaṃ pāpānāṃ dāhakaṃ śubham || 26 ||
[Analyze grammar]

tatra gatvā mahābhāga pāpanāśe mahāmate |
kuru snānaṃ prayatnena bhāryāputrasamanvitaḥ || 27 ||
[Analyze grammar]

tasya tīrthasya māhātmyaṃ nāradācca śrutaṃ mayā |
bālabhāve mama pituraṃtike proktavānmuniḥ || 28 ||
[Analyze grammar]

veṃkaṭādrau mahāpuṇye sarvapātakanāśane |
sarvaduḥkhapraśamane sarvasaṃpatpradāyake || 29 ||
[Analyze grammar]

pāpanāśe mahātīrthe snātvā saṃkalpapūrvakam |
atyaiśvaryapradaṃ dharmaṃ manasā cintayaṃstadā || 30 ||
[Analyze grammar]

bhūmidānaṃ viniścitya sarvadānottamottamam |
prāpakaṃ paralokasya sarvakāmaphalapradam || 31 ||
[Analyze grammar]

dānānāmuttamaṃ dānaṃ bhūdānaṃ parikīrtitam |
taddattvā samavāpnoti yadyadiṣṭatamaṃ naraḥ || 32 ||
[Analyze grammar]

ityevaṃ nāradenoktaṃ śrutvā me janako dvijaḥ |
saṃprahṛṣṭamanā bhūtvā śeṣādriṃ prāptavāṃstadā || 33 ||
[Analyze grammar]

tatra gatvā mahābhāgaḥ sarvasaṃpatpradāyakam |
bhūdānaṃ vipravaryāya śrotriyāya pradattavān || 34 ||
[Analyze grammar]

tato me janako vidvansarvabhāgyasamanvitaḥ |
ihaloke sukhaṃ prāpya cānte viṣṇupuraṃ yayau || 35 ||
[Analyze grammar]

tvaṃ ca gatvā mahābhāga veṃkaṭādriṃ nagottamam |
kuru dānaṃ prayatnena bhūdānaṃ sarvakāmadam || 36 ||
[Analyze grammar]

atha kāminīkathitabhūdānapraśaṃsā |
bhūmidānasya māhātmyaṃ śṛṇuṣva susamāhitaḥ |
na ko'pi gadituṃ śakto loke'sminbhagavanprabho || 37 ||
[Analyze grammar]

bhūmidānātparaṃ dānaṃ na bhūtaṃ na bhaviṣyati |
paraṃ nirvāṇamāpnoti bhūmido nātra saṃśayaḥ || 38 ||
[Analyze grammar]

svalpāmapi mahīṃ dattvā śrotriyāyāhitāgnaye |
brahmalokamavāpnoti punarāvṛttivarjitam || 39 ||
[Analyze grammar]

bhūmidaḥ sarvadaḥ prokto bhūmido mokṣabhāgbhavet |
bhūbhidānaṃ vṛṣādrau ca sarvapāpapraṇāśanam || 40 ||
[Analyze grammar]

mahāpātakayukto vā yukto vā sarvapātakaiḥ |
daśahastāṃ mahīṃ dattvā sarvapāpaiḥ pramucyate || 41 ||
[Analyze grammar]

satpātre bhūmidātā yaḥ sarvadānaphalaṃ labhet |
bhūmidasya samo nānyastriṣu lokeṣu vidyate || 42 ||
[Analyze grammar]

dvijasya vṛttihīnasya yaḥ pradadyānmahīṃ śubhām |
tasya puṇyaphalaṃ vaktuṃ śeṣo nārhaḥ kadācana || 43 ||
[Analyze grammar]

viprasya vṛttihīnasya sadācārasya kasyacit |
yo 'lpāmapi mahīṃ dadyātsa viṣṇurnātra saṃśayaḥ || 44 ||
[Analyze grammar]

ikṣugodhūmakedārapūgadṛkṣādisaṃyutā |
pṛthvī pradīyate yena sa viṣṇurnātra saṃśayaḥ || 45 ||
[Analyze grammar]

vṛttihīnasya viprasya daridrasya kuṭumbinaḥ |
svalpāmapi mahīṃ dattvā viṣṇusāyujyamaśnute || 46 ||
[Analyze grammar]

saktasya devapūjāsu viprasyāṭavikā mahī |
dattā bhavati gaṃgāyāṃ trirātrasnānajaṃ phalam || 47 ||
[Analyze grammar]

viprasya vṛttihīnasya sadācāraratasya ca |
droṇikāṃ pṛthivīṃ dattvā yatphalaṃ labhate śṛṇu || 48 ||
[Analyze grammar]

gaṃgātīre'śvamedhānāṃ śatāni vidhivannaraḥ |
kṛtvā yatphalamāpnoti tadāpnoti mahatphalam || 49 ||
[Analyze grammar]

dadāti bhārikāṃ bhūmiṃ daridrāya dvijātaye |
tasya puṇyaṃ pravakṣyāmi mannātha bhagavanprabho || 50 ||
[Analyze grammar]

aśvamedhasahasrāṇi vājapeyaśatāni ca |
vidhāya jāhnavītīre yatphalaṃ tallabheta saḥ || 51 ||
[Analyze grammar]

bhūmidānaṃ mahādānamatidānaṃ prakīrtitam |
sarvapāpapraśamanamapavargaphalapradam || 52 ||
[Analyze grammar]

yacchrutvā śraddhayā yukto bhūmidānaphalaṃ labhet |
bhāryāyā vacanaṃ śrutvā tvitihāsasamanvitam || 53 ||
[Analyze grammar]

santuṣṭo manasi dhyātvā śeṣācalanivāsinam || 54 ||
[Analyze grammar]

atha bhadramataye bhūpradānātsughoṣasya sadgatiḥ |
gantuṃ pracakrame buddhyā krīḍācalamanuttamam |
tato bhadramatiḥ saumyaḥ sarvadharmaparāyaṇaḥ || 55 ||
[Analyze grammar]

suśāliṃnāma nagarīṃ kalatrasahito yayau |
sughoṣaṃ nāma viprendraṃ sarvaiśvaryasamanvitam || 56 ||
[Analyze grammar]

gatvā yācitavānbhūmiṃ pañcahastāyatāṃ dvijaḥ |
sughoṣo dharmaniratastaṃ nirīkṣya kuṭumbinam || 57 ||
[Analyze grammar]

manasā prītimāpannaṃ samabhyarcyainamabravīt |
kṛtārtho'haṃ bhadramate saphalaṃ mama janma ca |
matkulaṃ cānaghaṃ jātaṃ tvaṃ hi grāhyo'si me yataḥ || 58 ||
[Analyze grammar]

ityuktvā taṃ samabhyarcya sughoṣo dharmatatparaḥ |
pañcahastapramāṇāṃ tāṃ dadau tasmai mahāmatiḥ || 59 ||
[Analyze grammar]

pṛthivī vaiṣṇavī puṇyā pṛthivī viṣṇupālitā |
pṛthivyāstu pradānena prīyatāṃ me janārdanaḥ || 60 ||
[Analyze grammar]

mantreṇānena viprendrāḥ sughoṣastaṃ dvijeśvaram |
viṣṇubuddhyā samabhyarcya tāvatīṃ pṛthivīṃ dadau || 61 ||
[Analyze grammar]

sa bhadramataye viprā dhīmāṃstāṃ yācitāṃ bhuvam |
dattavānharibhaktāya śrotriyāya kuṭuṃbine || 62 ||
[Analyze grammar]

sughoṣo bhūmidānena koṭivaṃśasamanvitaḥ |
prapede viṣṇubhavanaṃ yatra gatvā na śocati || 63 ||
[Analyze grammar]

atha bhadramateḥ pāpanāśanatīre bhūdānārthaṃ veṃkaṭādrigamanam |
vipro bhadramatiścāpi putradārasamanvitaḥ |
gato veṃkaṭaśailendraṃ surāsuranamaskṛtam || 64 ||
[Analyze grammar]

gandharvayakṣaśailādisevitaṃ meruputrakam |
vaikuṇṭhādāgataṃ divyaṃ krīḍācalamanuttamam || 65 ||
[Analyze grammar]

tatra svāmisarastoye nirmale pāvane śubhe |
dāraputrādisaṃyuktaḥ snātvā saṃkalpapūrvakam || 66 ||
[Analyze grammar]

tatpaścimataṭe śvetasūkaraṃ vasudhādharam |
natvā tatra vidhānena śrīnivāsālayaṃ gataḥ || 67 ||
[Analyze grammar]

tatra brahmādidevaiśca sevitaṃ veṃkaṭeśvaram |
dṛṣṭavānsaha putrādyairviṣṇubhakto mahāmatiḥ || 68 ||
[Analyze grammar]

bhaktyā praṇamya deveśaṃ śrīnivāsaṃ kṛpānidhim |
putradārādisaṃyuktaḥ pāpanāśanamāyayau || 69 ||
[Analyze grammar]

tatra snātvā vidhānena kṛtadharmādisatkriyaḥ |
kasmaicidviṣṇubhaktāya śrotriyāya mahāmatiḥ || 70 ||
[Analyze grammar]

viṣṇubuddhyā sa pradadau bhūdānaṃ mokṣadaṃ śubham || 71 ||
[Analyze grammar]

atha bhūdānaprabhāveṇa bhadramaterbhagavatsākṣātkāraḥ |
tadā prādurabhūddevaḥ śaṃkhacakragadādharaḥ || 72 ||
[Analyze grammar]

vinatānandanārūḍho vanamālāvibhūṣitaḥ |
pāpanāśasya tīre tu bhūdānasya prabhāvataḥ || 73 ||
[Analyze grammar]

tadā bhadramatiḥ saumyaḥ stotuṃ samupacakrame || 74 ||
[Analyze grammar]

namonamaste'khilakāraṇāya namonamaste'khilapālakāya |
namonamaste'maranāyakāya namonamo daityavimardanāya || 75 ||
[Analyze grammar]

namonamo bhaktajanapriyāya namonamaḥ pāpavidāraṇāya |
namonamo durjananāśakāya namo'stu tasmai jagadīśvarāya || 76 ||
[Analyze grammar]

namo namaḥ kāraṇavāmanāya nārāyaṇāyāmitavikramāya |
śrīśārṅgacakrāsigadādharāya namo'stu tasmai puruṣottamāya || 77 ||
[Analyze grammar]

namaḥ payorāśinivāsakāya namo'stu lakṣmīpataye'vyayāya |
 namo'stu sūryādyamitaprabhāya namonamaḥ puṇyagatāgatāya || 78 ||
[Analyze grammar]

namonamo'rkenduvilocanāya namo'stu te yajñaphalapradāya |
namostu yajñāṃgavirājitāya namo'stu te sajjanavallabhāya || 79 ||
[Analyze grammar]

namonamaḥ kāraṇakāraṇāya namo'stu śabdādivivarjitāya |
namo'stu te'bhīṣṭasukhapradāya namonamo bhaktamanoramāya || 80 ||
[Analyze grammar]

namonamaste'dbhutakāraṇāya namo'stu te mandaradhārakāya |
namo'stu te yajñavarāhanāmne namo hiraṇyākṣavidārakāya || 81 ||
[Analyze grammar]

namo'stu te vāmanarūpabhāje namo'stu te kṣatrakulāntakāya |
namo'stu te rāvaṇamardanāya namo'stu te nandasutāgrajāya || 82 ||
[Analyze grammar]

namaste kamalākānta namaste sukhadāyine |
śritārtināśine tubhyaṃ bhūyobhūyo namonamaḥ || 83 ||
[Analyze grammar]

vipreṇa saṃstuto devo bhagavānbhaktavatsalaḥ |
vātsalyenābravīdvākyaṃ śrīnivāso dayānidhiḥ || 84 ||
[Analyze grammar]

tāta tuṣṭo'smi bhadraṃ te stotreṇa mahatā dvija |
sarvabhogasamāyuktaḥ putrapautrādibhiryutaḥ || 85 ||
[Analyze grammar]

iha loke sukhaṃ prāpya dehānte muktimāpnuhi |
ityuktvā bhagavānviṣṇustatraivāntaradhīyata || 86 ||
[Analyze grammar]

evaṃ vaḥ kathitaṃ viprāḥ pāpanāśanavaibhavam |
tattīre bhūpradānasya māhātmyaṃ cāpi varṇitam || 87 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye pāpavināśanatīrthe bhūdānaphalānuvarṇanaṃnāma viṃśatitamo'dhyāyaḥ || 20 ||
[Analyze grammar]