Chapter 10

[English text for this chapter is available]

atha toṇḍamānnṛpasya svapituḥ sakāśādrājyaprāptiḥ |
śrīśuka uvāca |
idaṃ padmasaronāma rājanpāpapraṇāśanam |
kīrtanātsmaraṇātsnānānnṛṇāṃ lakṣmīpradaṃ bhuvi |
kṛtvā snānaṃ tvamapyasminvraja svapituraṃtikam || 1 ||
[Analyze grammar]

śrīvarāha uvāca |
etacchukavacaḥ śrutvā snātvā padmasarovare || 2 ||
[Analyze grammar]

taṃ natvā hayamāruhya toṇḍamānsvapuraṃ yayau |
taṃ pitā yuvarājānaṃ kṛtvā trīnvatsarānatha || 3 ||
[Analyze grammar]

raṃjakatvaṃ ca sāmarthyaṃ śauryaṃ vīryaṃ suśīlatām |
bhaktiṃ vipreṣu putrasya vīkṣya rājā svamaṃtribhiḥ || 4 ||
[Analyze grammar]

svapade sthāpayāmāsa svabhiṣicya vidhānataḥ |
anunīya sutaṃ patnyā sārdhaṃ rājā vanaṃ yayau || 5 ||
[Analyze grammar]

atha vasorvalmīke śrīvarāhasandarśanam |
toṇḍamānapi sāmrājyaṃ labdhvā rājyaṃ cakāra ha |
niṣādasya vane devo vārāhaṃ rūpamāsthitaḥ || 6 ||
[Analyze grammar]

śyāmākapakvaṃ bhakṣitvā rātraurātrau cacāra ha |
padāni sa varāhasya cānviyeṣa divādivā || 7 ||
[Analyze grammar]

adṛṣṭvā taṃ varāhaṃ sa rātrau jāgraddhanurdharaḥ |
sthito'paśyaccarantaṃ taṃ caṃdrakoṭisamaprabham || 8 ||
[Analyze grammar]

varāhaṃ subhagākāraṃ śyāmākavanamadhyataḥ |
taṃ dṛṣṭvā dhanurādāya siṃhanādaṃ cakāra ha || 9 ||
[Analyze grammar]

varāhastaddhvaniṃ śrutvā vanānniṣkramya satvaram |
yayau taṃ cāpyanuyayau varāhaṃ sa niṣādapaḥ || 10 ||
[Analyze grammar]

rātriśeṣamanudrutya vane caṃdrasamaprabham |
valmīkaṃ praviśantaṃ ca dadarśa sa niṣādapaḥ || 11 ||
[Analyze grammar]

gacchaṃtaṃ pūrṇimācandramastaṃ girivaraṃ yathā |
vismito'khānayatkopādvalmīkaṃ sa niṣādapaḥ || 12 ||
[Analyze grammar]

dharāvarāho dadṛśe mūrcchito'yaṃ papāta ha |
pitaraṃ mūrcchitaṃ dṛṣṭvā tatputro bhaktimāṃstadā || 13 ||
[Analyze grammar]

varāhadevaṃ tuṣṭāva tena prīto'bhavaddhariḥ |
āviśya pitaraṃ tasya provāca madhusūdanaḥ || 14 ||
[Analyze grammar]

śrībhagavānuvāca |
ahaṃ varāha deveśo nityamasminvasāmyaham |
rājñe tvamuktvā māmatra pratiṣṭhāpyaiva pūjaya || 15 ||
[Analyze grammar]

valmīkaṃ kṛṣṇagokṣīraiḥ kṣālayitvā tadutthite |
śilātale ca vārāhamuddhṛtya dharaṇīsthitam || 16 ||
[Analyze grammar]

kārayitvā pratiṣṭhāpya viprairvaikhānasaiśca mām |
pūjayedvividhairbhogaistoṇḍamānrājasattamaḥ || 17 ||
[Analyze grammar]

ityuktvā taṃ jahau devaḥ sa ca svastho babhūva ha |
sukhāsīnaṃ tu pitaraṃ namaskṛtya niṣādajaḥ || 18 ||
[Analyze grammar]

nyavedayaddevavacaḥ pitre sarvaṃ yathātatham |
sa śrutvā vismito bhūtvā kṛtsnaṃ putravacaḥ śubham || 19 ||
[Analyze grammar]

atha toṇḍamannṛpāya vasuniveditavārāhodaṃtaḥ |
rājñe vaktuṃ yayau śīghraṃ niṣādaḥ svānugaiḥ saha |
vasurniṣādādhipatī rājadvāramupāgamat || 20 ||
[Analyze grammar]

niṣādādhipamājñāya dvārapālairnṛpottamaḥ |
āhūya taṃ niṣādeśaṃ sabhāyāṃ maṃtribhiḥ saha || 21 ||
[Analyze grammar]

satkṛtya taṃ vasuṃ rājā saputraṃ saparicchadam |
papraccha prītimānrājā vasuṃ taṃ vanagocaram |
kimāgamanakṛtyaṃ te vada tvaṃ vanagocara || 22 ||
[Analyze grammar]

vasuruvāca |
rājanmama vane dṛṣṭamāścaryaṃ śṛṇu bhūpate || 23 ||
[Analyze grammar]

kaścicchvetavarāhastu śyāmākamacaranniśi |
taṃ varāhaṃ dhanuṣpāṇiranvadhāvamahaṃ nṛpa || 24 ||
[Analyze grammar]

anudruto vāyuvego gatvā valmīkamāviśat |
svāmipuṣkariṇītīre paśyate mama bhūpate || 25 ||
[Analyze grammar]

valmīkamakhanaṃ krodhānmūrcchito nyapataṃ bhuvi |
matputro'yaṃ samāgatya māṃ dṛṣṭvā mūrcchitaṃ bhuvi || 26 ||
[Analyze grammar]

śucirbhūtvā devadevaṃ tuṣṭāva madhusūdanam |
tato mayi samāviśya varāho'dhyavadatsutam || 27 ||
[Analyze grammar]

rājñe nivedaya kṣipraṃ maccaritraṃ niṣādapa |
kṛṣṇagokṣīrasekena valmīkaṃ kṣālayennṛpaḥ || 28 ||
[Analyze grammar]

dṛśyate ca śilā kācidvalmīkasthā suśobhanā |
vāmāṃkasthabhuvaṃ māṃ ca varāhavadanaṃ sthitam || 29 ||
[Analyze grammar]

kārayitvā śilpinātha pratiṣṭhāpya munīśvaraiḥ |
vaikhānasairmunivarairarcayettoṇḍamānapi || 30 ||
[Analyze grammar]

atha gatvā śrīnivāsaṃ valmīkāvṛtapaddvayam |
kapilākṛṣṇagokṣīrasecanaiḥ kṣālayecchanaiḥ || 31 ||
[Analyze grammar]

āpādapīṭhaparyaṃtaṃ kṣālayitvā dinedine |
kuryātprākāramubhayoruttare dakṣiṇe tathā || 32 ||
[Analyze grammar]

ityuktvā caiva mā'muṃcaddevaḥ svastho'bhavaṃ nṛpa |
idaṃ te vaktumāyāto devadevacikīrṣitam || 33 ||
[Analyze grammar]

atha nṛpasya niṣādavākyasvapnābhyāṃ bilamārgeṇa śeṣācalagamanam || |
śrīvarāha uvāca |
toṇḍamānapi tacchrutvā suprīto vismito'bhavat |
tataḥ kāryaṃ viniścitya mantribhiḥ puṣkarādibhiḥ || 34 ||
[Analyze grammar]

vekaṭādriṃ jigamiṣurgopānāhūya sarvaśaḥ |
kṛṣṇāśca kapilā gāvo yāḥ kāścitsaṃti māmikāḥ || 35 ||
[Analyze grammar]

tāḥ savatsā ānayadhvaṃ veṃkaṭādrisamīpataḥ |
ityājñāpya nṛpo gopāñchvo yātreti ca mantriṇaḥ || 36 ||
[Analyze grammar]

visṛjya prakṛtīḥ sarvā viveśāṃtaḥpuraṃ vaśī |
uktvā kathāṃ tāṃ patnībhyaḥ suṣvāpa niśi pārthivaḥ || 37 ||
[Analyze grammar]

taṃ svapne śrīnivāso'pi bilamārgaṃ hyadarśayat |
svapurādābilaṃ mārge pallavānasṛjaddhariḥ || 38 ||
[Analyze grammar]

evaṃ svapnaṃ nṛpo dṛṣṭvā prātarutthāya satvaraḥ |
āhūya mantriṇaḥ sarvānprakṛtīrbrāhmaṇānapi || 39 ||
[Analyze grammar]

svapnaṃ tathāvidhaṃ coktvā'paśyaddvāre'tha pallavān |
yukte muhūrte prayayau hayamāruhya toṇḍamān || 40 ||
[Analyze grammar]

paśyanpallavabhaṃgāṃśca śanaiḥ prīto yayau bilam |
dṛṣṭvā vismayamāpanno nirmame tatra pattanam || 41 ||
[Analyze grammar]

atha bhagavaduktyā toṇḍamannṛpakṛtakṣīrābhiṣekavapranirmāṇādikam |
bilamaṃtaḥpure kṛtvā prākāraṃ cāpyakārayat |
vasaṃstatra nṛpendro'sau nirjitya pṛthivīmimām || 42 ||
[Analyze grammar]

yathoktaṃ devadevena kṣīraprakṣālanādikam |
kṛtvā prākāranirmāṇaṃ kartumudyogamāyayau || 43 ||
[Analyze grammar]

tadānīṃ devadevena svayamājñāpito nṛpaḥ |
tiṃtiṇīṃ caṃpakaṃ cobhau pālayaitau nagottamau || 44 ||
[Analyze grammar]

mama cāsthānikī ciṃcā lakṣmyāḥ sthānaṃ ca caṃpakaḥ |
namaskāryau nṛpaistau hi ṛṣidevanaraiḥ sadā || 45 ||
[Analyze grammar]

saṃsthāpyaitau nṛpaśreṣṭha cchedayānyānnagottamān |
prākāramātraṃ kuru me dvāragopurasaṃyutam || 46 ||
[Analyze grammar]

vimānaṃ tu bhavadvaṃśyo nāmnā nārāyaṇo nṛpaḥ |
kārayiṣyati madbhaktaḥ svarṇenālaṃkariṣyati || 47 ||
[Analyze grammar]

śrīvarāha uvāca |
evamuktvā toṇḍamānaṃ virarāma śriyaḥ patiḥ || 48 ||
[Analyze grammar]

evaṃ devavacaḥ śrutvā kṛtvā prākārameva ca |
pūjayāmāsa munibhirvaikhānasakulodbhavaiḥ || 49 ||
[Analyze grammar]

nityaṃ bilena cāgatya devaṃ natvā nṛpottamaḥ |
rājyaṃ cakāra dharmeṇa bhuṃjāno bhogamuttamam || 50 ||
[Analyze grammar]

atha gaṃgāsnānāgatavīraśarmākhyavipracaritram |
etasminneva kāle tu dākṣiṇātyo dvijottamaḥ || 51 ||
[Analyze grammar]

gaṃgāsnānāya gacchanvai sadāraḥ prayayau purāt |
mārge'tha garbhiṇī jātā brāhmaṇī brāhmaṇaḥ sa ca || 52 ||
[Analyze grammar]

tāṃ tu garbhavatīṃ dṛṣṭvā svātmānugamane'kṣamām |
rājānaṃ draṣṭukāmo'sau rājadvāramupāgamat || 53 ||
[Analyze grammar]

dvāḥsthenājñāpito rājā tamāhūya dvijottamam |
pūjayitvā tu vidhivatpapraccha kuśalaṃ dvijam || 54 ||
[Analyze grammar]

rājovāca |
kimāgamanakṛtyaṃ te kiṃ kariṣyāmyahaṃ dvija |
brāhmaṇa uvāca |
vāsiṣṭho vīraśarmāhaṃ sāmavedī nṛpottama || 55 ||
[Analyze grammar]

sadāro nirgato rāktagaṃgāsnānāya sādaraḥ |
mārge ca garbhiṇī ceyaṃ kauśikī puṇyaśālinī || 56 ||
[Analyze grammar]

nāmnā lakṣmīriti khyātā śīlā ca pativratā |
saṃsthāpyaināṃ tava gṛhe vrataṃ nirvartayāmyaham || 57 ||
[Analyze grammar]

tasmādrājanprayacchāsyai yatheṣṭaṃ bhaktavetane |
tāvacca rakṣyatāṃ lakṣmīryāvadāgamanaṃ mama || 58 ||
[Analyze grammar]

śrīvarāha uvāca |
rājā tasya vacaḥ śrutvā taṃḍulāni dhanānyapi |
dattvā ṣaṇmāsaparyantaṃ gṛhamaṃtaḥpure dadau || 59 ||
[Analyze grammar]

tāṃ nyasya brāhmaṇaḥ prīto gaṃgāsnānāya niryayau |
gatvā bhāgīrathīṃ gaṃgāṃ prayāge kṣetra uttame || 60 ||
[Analyze grammar]

snātvā kāśīṃ tato gatvā tatroṣitvā dinatrayam |
gayāṃ prāpya pitṛśrāddhamakarodbrāhmaṇottamaḥ || 61 ||
[Analyze grammar]

gatvāyodhyāmapi purīṃ prayayau badarīvanam |
sālagrāmaṃ tato gatvā svadeśaṃ prati niryayau || 62 ||
[Analyze grammar]

saṃvatsaradvaye'tīte caitre māsi śubhe dine |
nivṛtto'sau dvijaśreṣṭhaḥ śanairāgatya mādhave || 63 ||
[Analyze grammar]

ekādaśyāṃ śuklapakṣe punā rājānamāyayau |
rājā tu vismṛtya tadā brāhmaṇīṃ nāsmarannṛpaḥ || 64 ||
[Analyze grammar]

brāhmaṇī māninī gehe mṛtā śuṣkā babhūva ha |
vīraśarmā tato vipro gaṃgātoyakaraṃḍakam || 65 ||
[Analyze grammar]

vimucya bandhanaṃ tvekaṃ gaṃgāṃbhaḥkarakaṃ śubham |
prādāya rājñe papraccha patnī kuśalinīti me || 66 ||
[Analyze grammar]

smṛtvātha rājā vipraṃ taṃ sthīyatāmiti cābravīt |
antaḥpuraṃ tato gatvā tāmapaśyanmṛtāṃ gṛhe || 67 ||
[Analyze grammar]

anuktvā brahmaṇe tasmai praviśya bilamuttamam |
śrīnṛsiṃhaṃ namaskṛtya punaḥ prāpya bilottamam || 68 ||
[Analyze grammar]

śrīnivāsaṃ yayau draṣṭuṃ śrībhūmisahitaṃ param |
taṃ dṛṣṭvā sahasāyāṃtaṃ jugūhāte dharārame || 69 ||
[Analyze grammar]

praṇamantamavocattaṃ kimakāle nṛpāgataḥ |
nṛpo'vadatpraṇamyeśaṃ bhīto'tha brāhmaṇīṃ mṛtām || 70 ||
[Analyze grammar]

atha asthisarovaramāhātmyam |
tacchrutvā devadevo'pi mā bhai rājandvijottamāt |
āndolikāṃ tāmāropya strībhiḥ svābhiḥ samanvitām || 71 ||
[Analyze grammar]

madālayātpūrvabhāge dvādaśyāṃ snāpaya prabho |
asthināmni sarasyasminnapamṛtyunivāraṇe || 72 ||
[Analyze grammar]

prāptajīvā samaṃ strībhirbrāhmaṇena ca yokṣyate |
śīghraṃ yāhi nṛpaśreṣṭha yathoktaṃ vacanaṃ kuru || 73 ||
[Analyze grammar]

iti devavacaḥ śrutvā prayayau svapuraṃ nṛpaḥ |
āndolikāsu ramyāsu striya āropya tāmapi || 74 ||
[Analyze grammar]

brāhmaṇaṃ ca puraskṛtya draṣṭuṃ devaṃ yayau nṛpaḥ |
asthikūṭasaraḥ prāpya snāpayāmāsa tāḥ striyaḥ || 75 ||
[Analyze grammar]

tvagasthirūpā sā cāpi tābhiḥ kṣiptā sarovare |
prāptajīvā yathāpūrvaṃ suvyaṃjitaśarīrajā || 76 ||
[Analyze grammar]

utthitā sarasaḥ snātvā rājñībhiḥ sahamaṃgalā |
prāptā ca brāhmaṇaṃ prītā bhartāraṃ punarāgatam || 77 ||
[Analyze grammar]

rājā hariṃ pūjayitvā brāhmaṇāya dhanaṃ dadau |
sahasraniṣkaparyaṃtaṃ vastrāṇi vividhāni ca || 78 ||
[Analyze grammar]

svadeśagamanāyaiva sādaraṃ visasarja ha |
vipraḥ śrutvā striyo vṛttaṃ prabhāvaṃ veṃkaṭeśituḥ || 79 ||
[Analyze grammar]

āśīḥ prayujya rājñe'tha svadeśaṃ prayayau dvijaḥ |
vipre gate śrīnivāso rājānaṃ punarabravīt || 80 ||
[Analyze grammar]

dinedine ca madhyāhne naivedyānetaraṃ nṛpa |
āgatya māmarcayitvā yatheṣṭaṃ svarṇapaṃkajaiḥ || 81 ||
[Analyze grammar]

gatvā purīṃ svadharmeṇa rājyaṃ kuru narādhipa |
yadyadiṣṭaṃ tava nṛpa bhaviṣyati na saṃśayaḥ || 82 ||
[Analyze grammar]

nāgaṃtavyamakāle tu tvayā nṛpa kadācana |
evaṃ kālārcanaṃ kṛtvā gatvā tvaṃ svapuraṃ vasa || 83 ||
[Analyze grammar]

rājovāca |
tathā kariṣye deveśa madhyāhne cārcayāmyaham |
iti devājñayā nityamarcayansvarṇapaṃkajaiḥ || 84 ||
[Analyze grammar]

tadūrdhvaṃ tulasīpuṣpaṃ jāttvapaśyatsa mṛṇmayam || 85 ||
[Analyze grammar]

atha kurvagrāmasthakulālavaṃśajabhīmākhyabhaktodantaḥ |
vismito devadeveśamapṛcchannṛpasattamaḥ |
rājovāca |
kenārcyase mṛnmayaiśca kamalaistulasīsamaiḥ || 86 ||
[Analyze grammar]

rājñā pṛṣṭo devadevaḥ smṛtvā rājānamabravīt |
kaścitkulālo madbhaktaḥ kurvagrāme vasatyasau || 87 ||
[Analyze grammar]

svagṛhe'rcayate rājaṃstadaṃgīkriyate mayā |
iti devavacaḥ śrutvā taṃ draṣṭuṃ prayayau nṛpaḥ || 88 ||
[Analyze grammar]

gatvā kurvapuraṃ tasya kulālasya gṛhaṃ yayau |
rājānamāgataṃ dṛṣṭvā praṇamyaivāgrataḥ sthitaḥ || 89 ||
[Analyze grammar]

sthitaṃ taṃ bhīmanāmānaṃ papraccha nṛpasattamaḥ |
toṇḍamānuvāca |
bhīma pūjayase devaṃ kathaṃ vada kulottama || 90 ||
[Analyze grammar]

śrīvarāha uvāca |
pṛṣṭaḥ prāha kulālo'pi jātu jāne na cārcanam |
kenoktaṃ nṛpatiśreṣṭha kulālo'rcayatīti hi || 91 ||
[Analyze grammar]

toṇḍamānuvāca |
devena śrīnivāsena mamoktaṃ hi tvadarcanam |
sa tu śrutvā nṛpavacaḥ smṛtvā devavaraṃ purā || 92 ||
[Analyze grammar]

bhīma uvāca |
yadā prakāśitā pūjā yadā rājā samāgataḥ |
toṇḍamāṃstena saṃvādastadā mokṣaṃ gamiṣyasi || 93 ||
[Analyze grammar]

iti pūrvaṃ varaṃ devo dattavānvekaṭeśvaraḥ || 94 ||
[Analyze grammar]

atha kurvagrāmasthabhīmākhyabhaktasya patnyā saha vaikuṇṭhaprāptiḥ |
ityuktvātha kulālo'pi patnyā sārdhaṃ tathaiva ca |
vimānamāgataṃ dṛṣṭvā devaṃ dṛṣṭvā janārdanam || 95 ||
[Analyze grammar]

praṇamanprajahau prāṇānsadāro bhaktasattamaḥ |
paśyato rājarājasya vimānamadhiruhya ca || 96 ||
[Analyze grammar]

divyarūpadharo devyā sārdhaṃ viṣṇupadaṃ yayau |
dṛṣṭvā rājādbhutaṃ tatra svapuraṃ prāpya harṣitaḥ || 97 ||
[Analyze grammar]

svaputraṃ śrīnivāsākhyamabhiṣicya vidhānataḥ |
paripālaya dharmeṇa mānavāṃśca vasundharām || 98 ||
[Analyze grammar]

ityājñāpya sutaṃ dhīmāṃstatāpa paramaṃ tapaḥ |
tapyatastasya devo'pi pratyakṣamabhavaddhariḥ || 99 ||
[Analyze grammar]

atha śrīnivāsakṛpayā toṇḍamannṛpasya sārūpyaprāptiḥ |
āruhya garuḍaṃ devo ramābhūmisamanvitaḥ || 100 ||
[Analyze grammar]

śrībhagavānuvāca |
kiṃ karomi nṛpaśreṣṭha tapasā toṣitastava |
ityukto devadevena toṇḍamānapi rājarāṭ || 101 ||
[Analyze grammar]

prītimānprāñjalirbhūtvā sagadgadamuvāca ha |
tvalloke vastumicchāmi jarāmaraṇavarjite || 102 ||
[Analyze grammar]

idameva varaṃ dehi mādhavaitanmamepsitam || 103 ||
[Analyze grammar]

śrīvarāha uvāca |
ityuktvā nipapātorvyāṃ sāṣṭāṃgaṃ devasannidhau |
tadā kalevaraṃ muktvā vimānaṃ tvāruroha ca || 104 ||
[Analyze grammar]

gandharvaiḥ stūyamāno'sau sārūpyaṃ prāpya śārṅgiṇaḥ |
yacchokamohahataṃ jarāmaraṇavarjitam || 105 ||
[Analyze grammar]

punarāvṛttirahitaṃ tadviṣṇoḥ padamāyayau || 106 ||
[Analyze grammar]

athaitanmāhātmyaśravaṇapaṭhanaphalaśrutiḥ |
etadbhaviṣyaṃ deveśi mayoktaṃ varavarṇini |
yaḥ śrāvayedyaḥ śṛṇuyādviṣṇulokaṃ sa gacchati || 107 ||
[Analyze grammar]

śrīsūta uvāca |
ityuktaṃ devadevena sabhaviṣyaṃ sahottaram |
śṛṇuyādyaḥ paṭhedbhaktyā kathāṃ puṇyāṃ purātanīm || 108 ||
[Analyze grammar]

sa tu bhuktvākhilānkāmānante viṣṇupadaṃ vrajet || 109 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde bhaviṣyadvarṇane toṇḍamāṃścakravartivṛttavarṇanaṃnāma daśamo'dhyāyaḥ || 10 ||
[Analyze grammar]