Chapter 9

[English text for this chapter is available]

atha vasunāmakaniṣādavṛttāṃtaḥ |
dharaṇyuvāca |
kalau yuge bhūmidhara kena tvaṃ drakṣyase priya |
vimānaṃ kena te deva kāryate'sminmahīdhare || 1 ||
[Analyze grammar]

śrīnivāso'pi kenaiva drakṣyate subhagākṛtiḥ |
etadbrūhi mama prītyā śrotuṃ kautūhalaṃ vibho || 2 ||
[Analyze grammar]

śrīvarāha uvāca |
vakṣyāmi śṛṇu he devi bhaviṣyadyadvadāmi te |
asminmahīdhare puṇye niṣādo vasunāmakaḥ || 3 ||
[Analyze grammar]

śyāmākavanapālo'bhūdbhaktimānpuruṣottame |
śyāmākataṃḍulānpaktvā madhunā pariṣicya ca || 4 ||
[Analyze grammar]

nivedya devadevāya śrībhūmi sahitāya ca |
evaṃ bhaktimatastasya bhāryā citravatī śubhā || 5 ||
[Analyze grammar]

asūta tanayaṃ bālā vīranāmānamuttamam |
vasuḥ putreṇa sahito bhāryayā patibhaktayā || 6 ||
[Analyze grammar]

kasmiṃściddivase putraṃ śyāmākaṃ pālayeti ca |
visṛjya patnyā sahito madhvanveṣaṇatatparaḥ || 7 ||
[Analyze grammar]

gato vanāntaraṃ śīghraṃ madhucchatradidṛkṣayā |
bālaḥ śyāmākapakvāni gṛhītvāgnau nidhāya ca || 8 ||
[Analyze grammar]

piṣṭvā nivedayāmāsa vṛkṣamūle śriyaḥ pateḥ |
naivedyaṃ bhakṣayitvaiva vīrastvāsa sukhena vai || 9 ||
[Analyze grammar]

tadantare vasuścāpi madhvādāya samāgataḥ |
śyāmākānbhakṣitāndṛṣṭvā saṃtarjya sutamātmanaḥ || 10 ||
[Analyze grammar]

khaḍgamādāya taṃ hantuṃ tvarayā hastamuddadhau || 11 ||
[Analyze grammar]

atha sutahananodyuktaṃ vasuṃ prati bhagavaduktiḥ |
tadvṛkṣasthastadā viṣṇuḥ khaḍgaṃ jagrāha pāṇinā |
khaḍgo gṛhītaḥ keneti paśyanvṛkṣaṃ dadarśa saḥ || 12 ||
[Analyze grammar]

śaṅkhacakragadāpāṇiṃ vṛkṣārūḍhārdhavigraham |
muktvā vasuśca taṃ khaḍgaṃ praṇamyovāca keśavam || 13 ||
[Analyze grammar]

kimidaṃ devadeveśa ceṣṭitaṃ kriyate tvayā || 14 ||
[Analyze grammar]

śrībhagavānuvāca |
vaso śṛṇu vaco me tvaṃ putraste bhaktimānmayi |
tvatto'pi me priyatamastasmātpratyakṣamāgataḥ || 15 ||
[Analyze grammar]

asya sarvatra tiṣṭhāmi tava svāmisarastaṭe |
iti devavacaḥ śrutvā prītimānabhavadvasuḥ || 16 ||
[Analyze grammar]

etasminneva kāle tu pāṃḍyadeśātsamāgataḥ |
bālyātprabhṛti śūdro'pi viṣṇubhaktisamanvitaḥ || 17 ||
[Analyze grammar]

atha raṃgadāsasya śrīnivāsasevārthaṃ śrīśeṣācalāgamanam |
nārāyaṇapurīṃ prāpya śrīvarāhaṃ praṇamya ca |
tatra śrutvā śrīnivāsaṃ veṃkaṭādrinivāsinam || 18 ||
[Analyze grammar]

svayaṃbhuvaṃ devadevasevitaṃ prayayau tataḥ |
suvarṇamukharīṃ prāpya snātvā cottīrya tattaṭe || 19 ||
[Analyze grammar]

kamalākhye sarasi ca snātvā puṇyapradāyini |
tattīravāsinaṃ devaṃ kṛṣṇaṃ rāmeṇa saṃvṛtam || 20 ||
[Analyze grammar]

namaskṛtya tataḥ prāyādvanaṃ gajaghaṭāyutam |
śanaiḥ saṃprāpya śeṣādriṃ nirjharaṃ saṃdadarśa ha || 21 ||
[Analyze grammar]

tatsamīpaṃ samāsādya kapilāpūjitaṃ śivam |
tatpuraścakratīrthaṃ tadagādhaṃ pāpanāśanam || 22 ||
[Analyze grammar]

tatra snātvā tato'gacchadveṃkaṭādriṃ śanaiḥśanaiḥ |
ārāddhuṃ gacchatā mārge yukto vaikhānasena ca || 23 ||
[Analyze grammar]

raṃgadāsastvāruroha bālo dvādaśavārṣikaḥ |
svāmipuṣkariṇīṃ prāya snātvā bhaktisamanvitaḥ || 24 ||
[Analyze grammar]

vaikhānasena muninā gopīnāthena pūjitam |
vanamadhye tarormūle svāmipuṣkariṇītaṭe || 25 ||
[Analyze grammar]

tiṣṭhantaṃ puṇḍarīkākṣaṃ śrībhūmisahitaṃ harim |
ākāśasthaṃ saṃdadarśa pītanīlākṛtiṃ śubham || 26 ||
[Analyze grammar]

pārśvasthaśaṃkhacakrābhyāṃ gadāsibhyāṃ niṣevitam |
pakṣau vistārya cākāśe devamūrdhni vitānavat || 27 ||
[Analyze grammar]

sthitaṃ ca garuḍeśānaṃ paścācchārṅgaṃ śaraṃ tathā || 28 ||
[Analyze grammar]

atha śrīnivāsārthaṃ raṃgadāsakṛtadivyodyānamaṇḍapādinirmāṇāni |
evaṃ dṛṣṭvā śrīnivāsaṃ vismito raṃgadāsakaḥ |
asya devasya cārāmaṃ kariṣyāmītyacintayat || 29 ||
[Analyze grammar]

niścitya manasā sarvaṃ tarumūle'vasatsudhīḥ |
kṛtvā vaikhānasādviṣṇornaivedyaṃ ca dinedine || 30 ||
[Analyze grammar]

śanaiśchittvā vanaṃ ghoraṃ vṛkṣāṃściccheda pārśvagān |
āsthānaciñcāṃ devasya ramāyāścampakaṃ tarum || 31 ||
[Analyze grammar]

devājñapto varjayitvā tāvubhau devasevitau |
devasyaparito bhūmau śilākuḍyaṃ tadākarot || 32 ||
[Analyze grammar]

tatkuḍyasyaiva paritaḥ puṣpārāmāṃścakāra ha |
mallikākaravīrābjakundamaṃdāramālatīḥ || 33 ||
[Analyze grammar]

tulasīcampakānāṃ tu vanānyeva cakāra ha |
khanitvā tatra kūpaṃ tu vardhayaṃstajjalairvanam || 34 ||
[Analyze grammar]

ārāmapuṣpāṇyādāya svayaṃ dāmānyathākarot |
vicitrāṇi tadā baddhvā pūjakasya kare dadau || 35 ||
[Analyze grammar]

ādāya pūjakastāni skandhe mūrdhni babandha ca |
śrīnivāsasya devasya śrībhūmisahitasya ca || 36 ||
[Analyze grammar]

evaṃ devasya kaiṃkaryaṃ kurvaṃstasthāvudāradhīḥ |
tasyaivaṃ vartamānasya samāstvā saptatergatāḥ || 37 ||
[Analyze grammar]

kurvāṇe puṣpāvacayaṃ raṃgadāse mahātmani || 38 ||
[Analyze grammar]

atha raṃgadāsasya gandharvakrīḍādarśanena bhagavatkaiṃkaryavismṛtiḥ |
ārāme sarasi snātuṃ gandharvaḥ kaścidāyayau |
gandharvarājakanyābhistaruṇībhiḥ samanvitaḥ || 39 ||
[Analyze grammar]

jalakrīḍāṃ karoti sma divi sthāpya vimānakam |
surūpābhiśca sahitaṃ krīḍantaṃ kamalākare || 40 ||
[Analyze grammar]

paśyañchrīraṃgadāso'yaṃ vyasmaranmālyasañcayam |
jitendriyo'pi tatkakrīḍāṃ paśyanretaḥ sasarja ha || 41 ||
[Analyze grammar]

paśyatastasya sarasaḥ samuttīrya manoharam |
divyavastrāṇi cācchādya kāntābhiḥ saha sasmitam || 42 ||
[Analyze grammar]

adhiruhya vimānaṃ tu yayau sa dhanadālayam |
gate gandharvarāje tu raṃgadāso vimohitaḥ || 43 ||
[Analyze grammar]

tyaktvā ca tāni mālyāni snātvā sarasi lajjitaḥ |
punarāhṛtya puṣpāṇi śanairdevālayaṃ yayau || 44 ||
[Analyze grammar]

vaikhānasastu taṃ dṛṣṭvā pūjākālamatītya ca |
āgataṃ kimiti prāha sakhe'tikramya cāgataḥ || 45 ||
[Analyze grammar]

na baddhā mālikāścāpi tvayā'rāme ca kiṃ kṛtam || 46 ||
[Analyze grammar]

śrīvarāhauvāca |
itthaṃ pṛṣṭo raṃgadāso nāvadallajjayā tataḥ |
lajjitaṃ raṃgadāsaṃ taṃ provāca madhusūdanaḥ || 47 ||
[Analyze grammar]

atha svarūpānusandhānena lajjitaṃ raṃgadāsaṃ prati śrīnivāsavacanam |
śrībhagavānuvāca |
lajjayā kiṃ raṃgadāsa mayā tvaṃ mohito hyasi |
tvaṃ tāvajjitakāmo'si dhīro bhava mahāmate || 48 ||
[Analyze grammar]

gandharvarājavadrājā bhavitāsi mahītale |
tatra bhuktvā mahābhogānbhaktimānmayi sarvadā || 49 ||
[Analyze grammar]

prākāraṃ ca vimānaṃ ca kārayiṣyasi me tadā |
tatra muktiṃ pradāsyāmi prītyā paramayā yutaḥ || 50 ||
[Analyze grammar]

atraiva kuru sevāṃ tvamāśarīravimokṣaṇāt |
madbhaktānāṃ sakāmānāmevaṃ muktirbhaviṣyati || 51 ||
[Analyze grammar]

ityuktvā bhagavānviṣṇuḥ punarnovāca kiṃcana |
śrutvā tadraṃgadāso'pi cakārārāmamuttamam || 52 ||
[Analyze grammar]

atha toṇḍamānnāmakanṛpavṛttāntaḥ |
sāgraṃ śatābdaṃ sevitvā gataḥ svargamamandadhīḥ |
jātaḥ somakule tuṃge toṇḍamāniti viśrutaḥ || 53 ||
[Analyze grammar]

suvīratanayo vīro nandinīgarbhasaṃbhavaḥ |
sa paṃcavarṣādudbhūtaviṣṇubhaktiḥ svayaṃ sudhīḥ |
sauśīlyaśauryavīryādiguṇānāmākaro mahān || 54 ||
[Analyze grammar]

pāṇḍyasya tanayāṃ padmāmupayeme manoharām |
tato rājā śataṃ kanyā nānādeśyāḥ svayaṃvarāḥ || 55 ||
[Analyze grammar]

reme deveṃdravadbhūmau nārāyaṇapure vasan |
anujñāṃ prāpya pitṛtaḥ putraḥ paṃcāsyavikramaḥ || 56 ||
[Analyze grammar]

uddiśya mṛgayāṃ vīro veṅkaṭādreḥ samīpataḥ || 57 ||
[Analyze grammar]

atha toṇḍamānnṛpasya mṛgayārthaṃ śrīśeṣācalagamanam |
pādacāreṇa vicaranparivāraiḥ samanvitaḥ |
madadhārāṃ vimuṃcaṃtaṃ dadarśa gajayūthapam || 58 ||
[Analyze grammar]

taṃ dṛṣṭvā vismito bhūtvā grahītuṃ tamanudrutaḥ |
suvarṇamukharīṃ tīrtvā brahmāṣa śukamuttamam || 59 ||
[Analyze grammar]

namaskṛtyābhyanujñātastato'gacchadvanādvanam |
dadarśa reṇukāṃ devīṃ valmīkākārasaṃsthitām || 60 ||
[Analyze grammar]

iṣṭadāmiṣṭabhaktānāṃ divyārāmanivāsinīm |
parivāraiḥ sadopetāṃ pūjitāṃ tridaśairapi || 61 ||
[Analyze grammar]

toṇḍamānapi tāṃ natvā tataḥ paścānmukho yayau || 62 ||
[Analyze grammar]

atha śrīnivāsasamīpasthapaṃcavarṇaśukavṛttāṃtaḥ |
paṃcavarṇaṃ śukaṃ dṛṣṭvā taṃ jighṛkṣuranudrutaḥ |
sa vadañchrīnivāseti giriṃ śīghrataraṃ yayau || 63 ||
[Analyze grammar]

anudravansa rājāpi girirājaṃ samāruhat |
darīśca vividhāḥ paśyañchikharāṇi samaṃtataḥ || 64 ||
[Analyze grammar]

śukamanveṣamāṇo'sau śyāmākavanameyivān |
tamadṛṣṭvā śukavaraṃ vanapālaṃ dadarśa ha || 65 ||
[Analyze grammar]

taṃ tu rājānamāyāṃtaṃ pratyudgacchansa satvaraḥ |
praṇamya vinayopetaḥ kṛtāñjalipuṭaḥ sthitaḥ || 66 ||
[Analyze grammar]

toṇḍamānapi saṃpūjya taṃ papraccha vanecaram |
paṃcavarṇaḥ śukaḥ kaściddṛṣṭaścātrāgatastvayā || 67 ||
[Analyze grammar]

śrīnivāseti ca vadankva gato'sau vanecara || 68 ||
[Analyze grammar]

vanecara uvāca |
sa paṃcavarṇo rājeṃdra śrīnivāsapriyaḥ sadā |
pārśvavartī sadā tasya śrībhūmibhyāṃ vivardhitaḥ || 69 ||
[Analyze grammar]

svāmipuṣkariṇītīre sadāste devasannidhau |
grahītuṃ sa śukaḥ śrīmānna tu kenāpi śakyate || 70 ||
[Analyze grammar]

vihṛtya svecchayā nityamasmingirivare śubhe |
dināṃte devamāsādya tatsamīpe vasatyayam || 71 ||
[Analyze grammar]

taṃ devamārādhayituṃ gamiṣyāmi nṛpātmaja |
viśramyatāṃ vṛkṣamūle yāvadāgamanaṃ mama || 72 ||
[Analyze grammar]

putreṇānena sahito vihara tvaṃ yathāsukham || 73 ||
[Analyze grammar]

rājovāca |
tvayā sahāgamiṣyāmi draṣṭuṃ devaṃ janārdanam |
tvaṃ me darśaya deveśaṃ veṃkaṭādrinivāsinam || 74 ||
[Analyze grammar]

tasya rājño vacaḥ śrutvā śyāmākaṃ madhumiśritam |
cūtapatrapuṭe kṣiptvā rājñā saha yayau harim || 75 ||
[Analyze grammar]

atha toṇḍamānnṛpasya niṣādena saha śrīnivāsasamīpāgamanam |
gatvā sudūramadhvānaṃ paśyantau tau śilātalam |
muhūrtādeva saṃprāptau svāmipuṣkariṇīṃ śubhām || 76 ||
[Analyze grammar]

snātvā tatra vidhānena rājñā saha niṣādapaḥ |
darśayāmāsa devaśaṃ rājñastasya mahātmanaḥ || 77 ||
[Analyze grammar]

svāmipuṣkariṇītīre sthitaṃ śrīvṛkṣamūlake |
atasīpuṣpasaṃkāśamaṃbujāyatalocanam || 78 ||
[Analyze grammar]

caturbhujamudārāṅgamīṣatsmitamukhāṃbujam |
divyapītāṃbaradharaṃ kirīṭakaṭakojjvalam || 79 ||
[Analyze grammar]

pārśvasthābhyāṃ surūpābhyāṃ śrībhūmibhyāṃ samanvitam |
paritaḥ śaṃkhacakrāsigadāśārṅgeṣusevitam || 80 ||
[Analyze grammar]

anyairdivyāyudhaiścāpi divyamālyairniṣevitam |
skandenārādhyamānaṃ taṃ trisandhyaṃ puruṣottamam || 81 ||
[Analyze grammar]

valmīkagūḍhapādābjamājānupuruṣottamam |
tato dṛṣṭvā mudā devaṃ praṇematurubhau tadā || 82 ||
[Analyze grammar]

rājā tu prāṃjalirbhūtvā vismayotphullalocanaḥ |
ānaṃdalaharīṃ prāpya na prājñāyata kiṃcana || 83 ||
[Analyze grammar]

niṣādo'pi nivedyaiva śyāmākaṃ madhumiśritam |
rājñe tadardhaṃ dattvaiva śiṣṭārdhaṃ bhuktavānsvayam || 84 ||
[Analyze grammar]

pītvā puṣkariṇītoyaṃ tena rājñā samanvitaḥ |
sa punaḥ śyāmakavane puṇyāṃ parṇakuṭīṃ yayau || 85 ||
[Analyze grammar]

uṣitvā caikarātraṃ tu prātarutthāya bhūmipaḥ |
svasainyena samāyukto nivṛttaḥ svapuraṃ yayau || 86 ||
[Analyze grammar]

atha toṇḍamānnṛpaṃ prati reṇukoktiḥ |
punardevīvanaṃ gatvā hayādavatatāra ha |
caitraśuddhanavamyāṃ tu pūjayāmāsa reṇukām || 87 ||
[Analyze grammar]

haviṣyaṃ paramānnaṃ ca sopaskaramanekaśaḥ |
paśūpahārasahitaṃ dhūpadīpasamanvitam || 88 ||
[Analyze grammar]

surāghaṭīśataṃ dattvā jātīkesaravāsitam |
evaṃ saṃpūjitā devī prītā rājñe varaṃ dadau || 89 ||
[Analyze grammar]

āviṣṭaḥ puruṣaḥ kaścidavadannṛpasattamam |
śṛṇu rājanbhaviṣyaṃ te rājyaṃ nihatakaṃṭakam || 90 ||
[Analyze grammar]

rājaṃstavaiva nāmnātra rājadhānī bhaviṣyati |
matsamīpe mahārāja ciraṃ rājyaṃ kariṣyasi || 91 ||
[Analyze grammar]

devadevaprasādaśca bhaviṣyati tavānagha |
iti dattvā varaṃ tasmā āviṣṭaḥ prakṛtiṃ yayau || 92 ||
[Analyze grammar]

tato labdhavaro rājā yayau śukamuniṃ punaḥ || 93 ||
[Analyze grammar]

atha śukavarṇitapadmasarovaramāhātmyam |
abhivādya muniṃ tena pūjito mudito'bhavat |
māhātmyaṃ saraso brūhi kamalākhyasya me mune || 94 ||
[Analyze grammar]

śrīśuka uvāca |
purā durvāsasaḥ śāpādavatīrṇā surālayāt |
padmā padmākṣadayitā viṣṇunā sahitā nṛpa || 95 ||
[Analyze grammar]

saraḥ kāṃcanapadmāḍhyamidaṃ prāpya maheśvarī |
tapaścakāra varṣāṇāṃ divyānāmayutaṃ ramā || 96 ||
[Analyze grammar]

tato devā vicinvantaḥ śriyaṃ viṣṇusamanvitām |
puraṃdareṇa saṃyuktā rājannasminsarovare || 97 ||
[Analyze grammar]

sthitā suvarṇakamale puṇḍarīkākṣasaṃyutām |
dṛṣṭvā prītisamāyuktāḥ praṇamyāṃbujadhāriṇīm |
kṛtāñjalipuṭāḥ sendrāstuṣṭuvurlokamātaram || 96 ||
[Analyze grammar]

atha devādikṛtaśrīlakṣmīstutiḥ |
devā ūcuḥ |
namaḥ śriyai lokadhātryai brahmamātre namonamaḥ |
namaste padmanetrāyai padmamukhyai namonamaḥ || 99 ||
[Analyze grammar]

prasannamukhapadmāyai padmakāntyai namonamaḥ |
namo bilvavanasthāyai viṣṇupatnyai namonamaḥ || 100 ||
[Analyze grammar]

vicitrakṣaumadhāriṇyai pṛthuśroṇyai namonamaḥ |
pakvabilvaphalāpīnatuṃgastanyai namonamaḥ || 101 ||
[Analyze grammar]

suraktapadmapatrābhakarapādatale śubhe |
suratnāṃgadakeyūrakāṃcīnūpuraśobhite |
yakṣakardamasaṃliptasarvāṃge kaṭakojjvale || 102 ||
[Analyze grammar]

māṃgalyābharaṇaiścitrairmuktāhārairvibhūṣite |
tāṭaṃkairavataṃsaiśca śobhamānamukhāṃbuje || 103 ||
[Analyze grammar]

padmahaste namastubhyaṃ prasīda harivallabhe |
ṛgyajuḥsāmarūpāyai vidyāyai te namonamaḥ || 104 ||
[Analyze grammar]

prasīdāsmānkṛpādṛṣṭipātairālokayābdhije |
ye dṛṣṭāste tvayā brahmarudreṃdratvaṃ samāpnuyuḥ || 105 ||
[Analyze grammar]

atha iṃdrādīnprati stutiprasannalakṣmīvacanam |
śrīśuka uvāca |
iti stutā tadā daivairviṣṇuvakṣaḥsthalālayā |
viṣṇunā saha saṃdṛśyā ramā prītāvadatsurān || 106 ||
[Analyze grammar]

śrīruvāca |
surārīnsahasā hatvā svapadāni gamiṣyatha |
ye sthānahīnāḥ svasthānādbhraṃśitā ye narā bhuvi || 107 ||
[Analyze grammar]

te māmanena stotreṇa stutvā sthānamavāpnuyuḥ |
akhaṃḍairbilvapatrairmāmarcayaṃti narā bhuvi || 108 ||
[Analyze grammar]

stotreṇānena ye devā narā yuṣmatkṛtena vai |
dharmārthakāmamokṣāṇāmākarāste bhavanti vai || 109 ||
[Analyze grammar]

idaṃ padmasaro devā ye kecana narā bhuvi |
prāpya snānaṃ kariṣyanti māṃ stutvā viṣṇuvallabhām || 110 ||
[Analyze grammar]

te'pi śriyaṃ dīrghamāyurvidyāṃ putrānsuvarcasaḥ |
labdhvā bhogāṃśca bhuktvā'nte narā mokṣamavāpnuyuḥ || 111 ||
[Analyze grammar]

iti dattvā varaṃ devī devena saha viṣṇunā |
āruhya garuḍeśānaṃ vaikuṇṭhasthānamāyayau || 112 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde vasu nāmaka niṣādavṛttāntapadmasaromāhātmyādivarṇanaṃnāma navamo'dhyāyaḥ || 9 ||
[Analyze grammar]