Chapter 4

[English text for this chapter is available]

atha udyānavāsinyāḥ padmāvatyāḥ samīpe nāradāgamanam |
dharaṇyuvāca |
uktaṃ bhagavatā tasya viyatputrasya nāma ca |
ayonijāyāstatputryāḥ kiṃ nāma ca tadā'karot || 1 ||
[Analyze grammar]

śrīsūta uvāca |
iti pṛṣṭaḥ punaḥ prāha śrīvarāho jagatpatiḥ || 2 ||
[Analyze grammar]

śrīvarāha uvāca |
ākāśarājo matimāṃstāṃ dṛṣṭvā kamaleśayām || 3 ||
[Analyze grammar]

padminīti ca nāmnā vai cakāra vasudhāsutām |
tāṃ tu yauvanasampannāṃ sakhībhiḥ parivāritām || 4 ||
[Analyze grammar]

ārāme viharaṃtīṃ ca śukakokilanādite |
yadṛcchayā'gatastatra nārado munisattamaḥ || 5 ||
[Analyze grammar]

vanalakṣmīmivālokya vismayādidamabravīt || 6 ||
[Analyze grammar]

nārada uvāca |
kāsi kasya sutā bhīru hastaṃ darśaya me tava |
ityuktā sā sucārvaṃgī svātmānaṃ munaye'bravīt || 7 ||
[Analyze grammar]

viyadrājasutā brahmaṃllakṣaṇāni vadasva me |
ityuktaḥ sa tadā prāha nārado munisattamaḥ || 8 ||
[Analyze grammar]

atha nāradodīrita padmāvatīśarīralakṣaṇāni |
nāradauvāca |
śṛṇu tvaṃ cāruvadane lakṣaṇāni vadāmi te |
pādau pratiṣṭhitau subhru raktapadmadalānvitau || 9 ||
[Analyze grammar]

pādāṃgulyaḥ samā raktā raktatuṃganakhānvitāḥ |
gulphau gūḍhau samāvetau jaṃghe cāromaśe śubhe || 10 ||
[Analyze grammar]

jānunī samasusnigdhe samāvūrū kramādurū |
nitaṃbau pṛthulau pīnau jaghanaṃ ciṃtyameva hi || 11 ||
[Analyze grammar]

nābhirmaṃḍalavānnimnaḥ pārśvau te medurāvubhau |
trivalīlalitaṃ madhyaṃ romarājivirājitam || 12 ||
[Analyze grammar]

stanau pīnau ghanau snigdhābunnatau magnacūcukau |
karau te raktapadmābhau padmarekhāsamanvitau |
susūkṣmau raktasatparva nirantarasamāṃgulī || 13 ||
[Analyze grammar]

śukatuṃḍasamākāranakhapaṃktivirājitau |
dīrghau ca komalau bhadre bhujau te puṣpadaṃḍavat || 14 ||
[Analyze grammar]

pṛṣṭhaṃ te vedivadbhāti vilagnamṛju madhyamam |
kaṃṭhastu rakto dīrghaśca skandhau cāvanatau śubhe || 15 ||
[Analyze grammar]

mukhaṃ prasannaṃ satatamakalaṃkaśaśiprabham |
kapolau kanakādarśasadṛśau kuṃḍalojjvalau || 16 ||
[Analyze grammar]

tilapuṣpasamākārā nāsikā te śubhānane |
akalaṃkāṣṭamīcaṃdrasadṛśo'timanoharaḥ || 17 ||
[Analyze grammar]

dṛśyate'yaṃ lalāṭaste nīlālakasuśobhitaḥ |
mūrdhā te samavṛttaśca snigdhāyatakacānvitaḥ || 18 ||
[Analyze grammar]

smitasaṃśobhidaśanaṃ biṃbādharasamanvitam |
mukhaṃ te viṣṇuyogyaṃ syāditi me niścitā matiḥ || 19 ||
[Analyze grammar]

nābhiste dakṣiṇāvarta āvarta iva gāṃgajaḥ |
tvaṃ hi kṣīrābdhisambhūtā lakṣmīriva hi dṛśyase || 20 ||
[Analyze grammar]

śrīvarāha uvāca |
ityuktvā pūjitastābhirnārado'ntardadhe tadā |
etacchrutvā'tha tatsakhyastāmūcuḥ padminīṃ sakhīm || 21 ||
[Analyze grammar]

atha padmāvatyāḥ svasakhībhiḥ sākaṃ puṣpāṭavī gamanam |
vanaṃ gacchāma puṣpārthaṃ vasantaḥ samupāgataḥ |
karṇikārāśca cūtāśca caṃpakāḥ pāribhadrakāḥ || 22 ||
[Analyze grammar]

palāśāḥ pāṭalāḥ kundā raktāśokāśca puṣpitāḥ |
padminyaḥ sindhuvārāśca mālatyo yūthikālatāḥ || 23 ||
[Analyze grammar]

kahlārakaravīrāśca saṃgharṣādiva puṣpitāḥ |
puṣpāvacayanaṃ kurmo vane'sminsumanohare || 24 ||
[Analyze grammar]

ityuktvā tā vanaṃ jagmurākāśatanayāyutāḥ |
puṣpāṇyāharamāṇāstu vicarantyastatastataḥ || 25 ||
[Analyze grammar]

kaṃcidgajeṃdraṃ dadṛśuḥ śubhradantadvayojjvalam |
gaṇḍabhittitalodbhūtamadadhārādvayojjvalam || 26 ||
[Analyze grammar]

unnataṃ kariṇīyūthaiḥ samupetaṃ rajojjvalam |
phūtkāripuṣkaraprodyacchīkarāpūritānanam || 27 ||
[Analyze grammar]

dṛṣṭvā codvignahṛdayā vanaspatimupāśritāḥ |
etasminnaṃtare cāśu dadṛśurhayamuttamam || 28 ||
[Analyze grammar]

atha mṛgayārthaṃ puṣpāṭavīṃ prati śrīnivāsāgamanam |
akalaṃkendudhavalaṃ jāmbūnadapariṣkṛtam |
sphuradvidyullatāyuktaśaranmeghamivonnatam || 29 ||
[Analyze grammar]

tasmiṃstu puruṣaṃ kṛṣṇaṃ madanākāravarcasam |
puṃḍarīkadalākārakarṇāntāyatalocanam || 30 ||
[Analyze grammar]

susūkṣmakṣaumasaṃvītanīlacūlikayojjvalam |
padmarāgamaṇidyotisphuratkuṃḍalamaṇḍitam || 31 ||
[Analyze grammar]

suvarṇaratnakhacitaśārṅgadivyadhanurdharam |
apareṇa kareṇaiva vahantaṃ kāñcanaṃ śaram || 32 ||
[Analyze grammar]

pītakakṣomasaṃvītakaṭideśaṃ sumadhyamam |
ratnakaṃkaṇakeyūrakaṭisūtravirājitama || 33 ||
[Analyze grammar]

viśālavakṣaḥ saṃśobhidakṣiṇāvartasaṃyutam |
svarṇayajñopavītena sphuratskandhaṃ manoharam || 34 ||
[Analyze grammar]

īhāmṛgaṃ samuddiśya mahāvegādanudrutam |
taṃ dṛṣṭvā vismitā nāryaḥ sasmitāstasthuratra vai || 35 ||
[Analyze grammar]

taṃ dṛṣṭvā hayamārūḍhaṃ gajendro namramastakaḥ |
tuṇḍamuddhṛtya garjanvai vinirvṛtya yayau vanam || 36 ||
[Analyze grammar]

tasmingate gaje tatra hayārūḍhaḥ samāyayau |
īhāmṛgaṃ vicinvānaḥ puṣpalāvīsamīpataḥ || 37 ||
[Analyze grammar]

atha bhagavataḥ kanyakānāṃ cānyonyasaṃvādaḥ |
tāḥ sametya sa covāca turagopari saṃsthitaḥ |
atrāgato mṛgaḥ kaścidīhāmṛga itīritaḥ || 38 ||
[Analyze grammar]

dṛṣṭo vā bhavatībhiḥ sa brūta me kanyakā iti || 39 ||
[Analyze grammar]

śrīvarāha uvāca |
pratyūcustāstu taṃ kanyā dṛṣṭosmābhirna kaścana || 40 ||
[Analyze grammar]

kimarthamāgatosmākaṃ vanaṃ varadhanurdharaḥ |
atrāvadhyā mṛgāḥ sarve vartamānā niṣādapa || 41 ||
[Analyze grammar]

āśu gaccha vanādasmādākāśanṛpapālitāt |
iti tāsāṃ vacaḥ śrutvā hayādavaruroha saḥ || 42 ||
[Analyze grammar]

kāstu yūyamiyaṃ cāpi kanyakāṃbujasannibhā |
subhagā cārusarvāṃgī pīnonnatapayodharā |
brūta me'haṃ gamiṣyāmi śrutvā svasyālayaṃ girim || 43 ||
[Analyze grammar]

iti tasyā vacaḥ śrutvā dharaṇyātmajayeritā |
sakhī padmāvatī prāha niṣādaṃ parvatālayam || 44 ||
[Analyze grammar]

ākāśarājatanayā vasudhātalasaṃbhavā |
asmākaṃ nāyikā śūra padminīnāma nāmataḥ || 45 ||
[Analyze grammar]

brūhi tvaṃ subhagākāra kinnāmā kasya vā sutaḥ |
jātiḥ kā kutra te vāsaḥ kimarthaṃ tvamihāgataḥ |
iti pṛṣṭaḥ sa tāḥ prāha mandasmitamukhāṃbujaḥ || 46 ||
[Analyze grammar]

divākarakulaṃ prāhurasmākaṃ tu purāvidaḥ |
yasya nāmānyanaṃtāni pāvanāni manīṣiṇām || 47 ||
[Analyze grammar]

varṇato nāmataścāpi kṛṣṇaṃ prāhustapasvinaḥ |
brahmadviṣāṃ surārīṇāṃ yasya cakraṃ bhayāvaham || 48 ||
[Analyze grammar]

yasya śaṃkhadhvaniṃ śrutvā mohamīyurhi vairiṇaḥ |
yasya vai dhanuṣastulyaṃ dhanurnaivāmareṣvapi || 49 ||
[Analyze grammar]

taṃ māṃ vīrapatiṃ prāhurveṃkaṭādrinivāsinam |
tasmādadritaṭātso'haṃ niṣādairanugairvṛtaḥ || 50 ||
[Analyze grammar]

mṛgayārthaṃ hayārūḍho yuṣmākaṃ vanamāgataḥ |
mayāpyanudrutaḥ kaścinmṛgo vāyugatiryayau || 51 ||
[Analyze grammar]

tamadṛṣṭvā vanaṃ paśyandṛṣṭavānsubhagāmimām |
kāmādihāgato'haṃ vo mayā kiṃ labhyate nviyam || 52 ||
[Analyze grammar]

iti kṛṣṇavacaḥ śrutvā kuddhāstāḥ punarabruvan |
ākāśarājo dṛṣṭvā tvāṃ kṛtvā nigaḍabandhanam |
yāvannayati tāvattvaṃ gaccha śīghraṃ svamālayam || 53 ||
[Analyze grammar]

tarjitastābhirevaṃ sa hayamāruhya śīghragam |
yuktaḥ svānucaraiḥ sarvairyayau drutataraṃ girim || 54 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāda udyānavāsinyāḥ padmāvatyāssamīpe nāradāgamana śrīnivāsamṛgayādivarṇanaṃnāma caturtho'dhyāyaḥ || 4 ||
[Analyze grammar]