Chapter 2

[English text for this chapter is available]

atha śrīvarāhamaṃtrārādhanavidhiḥ |
śrīsūta uvāca |
śṛṇudhvaṃ munayaḥ sarve kathāṃ puṇyāṃ purātanīm |
vaivasvateṃ'tare pūrvaṃ kṛte puṇyatame yuge || 1 ||
[Analyze grammar]

nārāyaṇādrau deveśaṃ nivasantaṃ kṣamāpatim |
varāharūpiṇaṃ devaṃ dharaṇī sakhibhirvṛtā || 2 ||
[Analyze grammar]

praṇamya paripapraccha raktapadmāyatekṣaṇam || 3 ||
[Analyze grammar]

dharaṇyuvāca |
ārādhyaḥ kena maṃtreṇa bhavānprīto bhaviṣyati |
taṃ me vada tvaṃ deveśa yaḥ priyo bhavataḥ sadā || 4 ||
[Analyze grammar]

japatāṃ sarvasaṃpattikārakaṃ putrapautradam |
sārvabhaumatvadaṃ caiva kāmināṃ kāmadaṃ sadā || 5 ||
[Analyze grammar]

ante yastvatpadaprāptiṃ dadāti niyamātmanām |
evaṃbhūtaṃ vada prītyā mayi vārāha mānada || 6 ||
[Analyze grammar]

śrīsūta uvāca |
iti pṛṣṭastayā bhūmyā prāha prītismitānanaḥ || 7 ||
[Analyze grammar]

śrīvarāha uvāca |
śṛṇu devi paraṃ guhyaṃ sadyaḥ saṃpattikārakam |
bhūmidaṃ putradaṃ gopyamaprakāśyaṃ kadācana || 8 ||
[Analyze grammar]

kiṃ ca śuśrūṣave vācyaṃ bhaktāya niyatātmane || 9 ||
[Analyze grammar]

oṃ namaḥ śrīvarāhāya dharaṇyuddharaṇāya ca |
vahnijāyāsamāyuktaḥ sadā japyo mumukṣubhiḥ || 10 ||
[Analyze grammar]

ayaṃ maṃtro dharādevi sarvasiddhipradāyakaḥ |
ṛṣiḥ saṃkarṣaṇaḥ prokto devatā tvahameva hi || 11 ||
[Analyze grammar]

chandaḥ paṃktiḥ samākhyātā śrībījaṃ samudāhṛtam |
caturlakṣaṃ japenmaṃtraṃ sadgurorlabdhatanmanuḥ || 12 ||
[Analyze grammar]

juhuyātpāyasānnaṃ vai kṣaudrasarpiḥsamanvitam |
atha dhyānaṃ pravakṣyāmi manaḥśuddhipradāyakam || 13 ||
[Analyze grammar]

śuddhisphaṭikaśailābhaṃ raktapadmadalekṣaṇam |
varāhavadanaṃ saumyaṃ caturbāhuṃ kirīṭinam || 14 ||
[Analyze grammar]

śrīvatsavakṣasaṃ cakraśaṃkhābhayakarāṃbujam |
vāmorusthitayā yuktaṃ tvayā māṃ sāgarāṃbare || 15 ||
[Analyze grammar]

raktapītāṃbaradharaṃ raktābharaṇabhūṣitam |
śrī kūrmapṛṣṭhamadhyasthaśeṣamūrtyabjasaṃsthitam || 16 ||
[Analyze grammar]

evaṃ dhyātvā japenmaṃtraṃ sadā cāṣṭottaraṃ śatam |
sarvānkāmānavāpnoti mokṣaṃ cānte vrajeddhruvam || 17 ||
[Analyze grammar]

proktaṃ mayā te dharaṇi yatpṛṣṭo'haṃ tvayā'male |
ataḥ kiṃ te vyavasitaṃ brūhi tadvimalānane || 18 ||
[Analyze grammar]

atha śrīvarāhamaṃtreṇa dharmādīnāṃ svābhīṣṭasiddhivarṇanam |
śrīsūta uvāca |
etacchrutvā tato bhūmiḥ papraccha punareva tam |
kenaivānuṣṭhitaṃ deva purā prāptaṃ phalaṃ ca kim || 19 ||
[Analyze grammar]

iti pṛṣṭaḥ punardevaḥ śrīvarāho'bravīdidam |
purā kṛtayuge devi dharmo nāma manurmahān || 20 ||
[Analyze grammar]

brahmaṇo'muṃ manuṃ labdhvā japtvāsmindharaṇīdhare |
māṃ ca dṛṣṭvā varaṃ labdhvā prāpto'bhūnmāmakaṃ padam || 21 ||
[Analyze grammar]

iṃdro durvāsasaḥ śāpātpurā bhraṣṭastriviṣṭapāt |
aneneṣṭvā'tra māṃ devi punaḥ prāptastriviṣṭapam || 22 ||
[Analyze grammar]

anye'pi munayo bhūme japtvā prāptāḥ parāṃ gatim |
anaṃtaḥ pannagādhīśo hyamuṃ labdhvātha kaśyapāt || 23 ||
[Analyze grammar]

śvetadvīpe japitvaiva babhūva dharaṇīdharaḥ |
tasmājjapyaḥ sadā ceha manuṣyaiśca dharārthibhiḥ || 24 ||
[Analyze grammar]

śrīsūta uvāca |
etacchrutvātha suprītā punaḥ prāha dharādharam || 25 ||
[Analyze grammar]

dharaṇyuvāca |
veṃkaṭākhye mahāśaile śrīnivāso jagatpatiḥ |
kadā hyāyāti deveśaḥ śrībhūmisahito'malaḥ || 26 ||
[Analyze grammar]

kathaṃ kalpāntarasthāyī bhaviṣyati janārdanaḥ |
etadbrūhi varāhātmanmahatkautahalaṃ mama || 27 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde śrīvarāhamaṃtrārādhanavidhyādivarṇanaṃnāma dvitīyo'dhyāyaḥ || 2 ||
[Analyze grammar]