Chapter 1

[English text for this chapter is available]

veṅkaṭācalamāhātmyam |
nāradasya sumeruśikharasthayajñavarāhadarśanam |
pāvane naimiṣāraṇye śaunakādyā maharṣayaḥ |
cakrire lokarakṣārthaṃ satraṃ dvādaśavārṣikam || 1 ||
[Analyze grammar]

tānabhyagacchatkathako vyāsaśiṣyo mahāmatiḥ |
munirugraśravā nāma romaharṣaṇasambhavaḥ || 2 ||
[Analyze grammar]

samyagabhyarcitastveṣāṃ sūtaḥ paurāṇikottamaḥ |
kathayāmāsa taddivyaṃ purāṇaṃ skandanāmakam || 3 ||
[Analyze grammar]

sṛṣṭisaṃhāravaṃśānāṃ vaṃśānucaritasya ca |
kathāṃ manvantarāṇāṃ ca vistarātsa nyavedayat || 4 ||
[Analyze grammar]

kathāstīrthaprabhāvāṇāṃ śrutvā te munipuṅgavāḥ |
ūcire vaśinaṃ sūtaṃ kathāśravaṇakāṅkṣayā || 5 ||
[Analyze grammar]

ṛṣaya ūcuḥ |
romaharṣaṇa sarvajña purāṇārthaviśārada |
māhātmyaṃ śrotumicchāmo girīndrāṇāṃ mahītale |
brūhi tvaṃ no mahābhāga ke pradhānā mahīdharāḥ || 6 ||
[Analyze grammar]

śrīsūta uvāca |
etameva purā praśnamapṛcchaṃ jāhnavītaṭe |
vyāsaṃ munivaraśreṣṭhaṃ so'bravīnme gurūttamaḥ || 7 ||
[Analyze grammar]

vyāsa uvāca |
purā devayuge sūta nārado munisattamaḥ |
sumeruśikharaṃ gatvā nānāratnasuśobhinam || 8 ||
[Analyze grammar]

tanmadhye vipulaṃ dīptaṃ brahmaṇo divyamālayam |
dṛṣṭvā tasyottare deśe pippaladrumamuttamam || 9 ||
[Analyze grammar]

sahasrayojanocchrāyaṃ vistīrṇaṃ dviguṇaṃ tathā |
tanmūle maṇḍapaṃ divyaṃ nānāratnasamanvitam || 10 ||
[Analyze grammar]

padmarāgamaṇistambhaiḥ sahasraiḥ samalaṃkṛtam |
vaiḍūryamuktāmaṇibhiḥ kṛtasvastikamālikam || 11 ||
[Analyze grammar]

navaratnasamākīrṇaṃ divyatoraṇaśobhitam |
mṛgapakṣibhirākīrṇaṃ navaratnamayaiḥ śubhaiḥ || 12 ||
[Analyze grammar]

puṣparāgamahādvāraṃ saptabhūmikagopuram |
sandīptavajrasukṛtakavāṭadvayaśobhitam || 13 ||
[Analyze grammar]

praviśyā'sau dadarśāntardivyamauktikamaṇḍapam |
vaiḍūryavedikaṃ tuṅgamāruroha mahāmuniḥ || 14 ||
[Analyze grammar]

tanmadhye tuṅgamatulaṃ vasupādavirājitam |
dadarśa muktāsaṅkīrṇaṃ siṃhāsanaṃ mahādyuti || 15 ||
[Analyze grammar]

tanmadhye puṣkaraṃ divyaṃ sahasradalaśobhitam |
śvetaṃ candrasahasrābhaṃ karṇikākesarojjvalam || 16 ||
[Analyze grammar]

tasya madhye samāsīnaṃ pūrṇacandrāyutaprabham |
kailāsaparvatākāraṃ sundaraṃ puruṣākṛtim || 17 ||
[Analyze grammar]

caturbāhumudārāṃgaṃ varāhavadanaṃ śubham |
śaṃkhacakrābhayavarānbibhrāṇaṃ puruṣottamam || 18 ||
[Analyze grammar]

pītāmbaradharaṃ devaṃ puṃḍarīkāyatekṣaṇam |
pūrṇeṃdusaumyavadanaṃ dhūpagaṃdhimukhāṃbujam || 19 ||
[Analyze grammar]

sāmadhvaniṃ yajñamūrtiṃ sruktuṇḍaṃ sruvanāsikam |
kṣīrasāgarasaṃkāśaṃ kirīṭojjvalitānanam || 20 ||
[Analyze grammar]

śrīvatsavakṣasaṃ śubhrayajñasūtravirājitam |
kaustubhaśrīsamuddyotaṃ samunnatamahorasam || 21 ||
[Analyze grammar]

jāṃbūnadamayairdivyaiḥ suratnābharaṇairyutam |
vidyunmālāparikṣiptaśaranmeghamivojjvalam || 22 ||
[Analyze grammar]

vāmapādatalākrāṃtapādapīṭhavirājitam |
kaṭakāṃgadakeyūrakuṇḍalojjvalitaṃ sadā || 23 ||
[Analyze grammar]

caturmukhavasiṣṭhātrimārkaṇḍeyairmunīśvaraiḥ |
bhṛgvādibhiranekaiśca sevyamānamaharniśam || 24 ||
[Analyze grammar]

indrādilokapālaiśca gandharvāpsarasāṃ gaṇaiḥ |
sevitaṃ devadeveśaṃ praṇipatyābhigamya ca || 25 ||
[Analyze grammar]

divyairupaniṣadbhāgairabhiṣṭūya dharādharam |
nāradaḥ paramaprītaḥ sthito devasya sannidhau || 26 ||
[Analyze grammar]

atha varāhasannidhiṃ prati dharaṇyāgamanam |
etasminnaṃtare cābhūddivyadundubhiniḥsvanaḥ || 27 ||
[Analyze grammar]

tatastamāgatā devī dharaṇī sakhisaṃyutā |
suratnasāgarākāradivyāṃbarasamujjvalā || 28 ||
[Analyze grammar]

sumerumandarākārastanabhārāvanāmitā |
navadūrvādalaśyāmā sarvābharaṇabhūṣitā || 29 ||
[Analyze grammar]

ilayā vai piṃgalayā sakhībhyāṃ ca samanvitā |
tatastābhyāṃ samānītaṃ puṣpāṇāṃ nicayaṃ mahī || 30 ||
[Analyze grammar]

śrīmadvarāhadevasya pādamūle vikīrya ca |
praṇamya devadeveśaṃ kṛtāñjalipuṭā sthitā || 31 ||
[Analyze grammar]

tāṃ devīṃ śrīvarāho'pi hyāliṃgyāṃke nidhāya ca || 32 ||
[Analyze grammar]

atha dharaṇivarāhasaṃvādaḥ |
papraccha kuśalaṃ pṛthvīṃ prītipravaṇamānasaḥ || 33 ||
[Analyze grammar]

śrīvarāha uvāca |
tvāṃ niveśya mahīdevi śeṣaśīrṣe sukhāvahe |
lokaṃ tvayi niveśyaiva tvatsahāyāndharādharān |
hahāgato'smyahaṃ devi kimarthaṃ tvamihāgatā || 34 ||
[Analyze grammar]

pṛthivyuvāca |
māṃ samuddhṛtya pātālātsahasraphaṇaśobhite |
ratnapīṭha ivottuṃge saratne'nantamūrdhani |
kṛtvā māṃ susthirāṃ deva bhūdharānsaṃniveśya ca || 35 ||
[Analyze grammar]

maddhāraṇakṣamānpuṇyāṃstvanmayānpuruṣottama |
teṣu mukhyānmahābāho madādhārānvadasva me || 36 ||
[Analyze grammar]

atha śeṣācalasyasarvaparvatātiśāyitvavarṇanam |
śrīvarāha uvāca |
sumerurhimavānviṃdhyo mandaro gaṃdhamādanaḥ |
sālagrāmaścitrakūṭo mālyavānpāriyātrakaḥ || 37 ||
[Analyze grammar]

maheṃdro malayaḥ sahyaḥ siṃhādrirapi raivataḥ |
meruputro'ñjano nāma śailaḥ svarṇamayo mahān || 38 ||
[Analyze grammar]

ete śailavarāḥ sarve tvadādhārā vasundhare |
ye mayā devasaṃghaiśca ṛṣisaṃghaiśca sevitāḥ || 39 ||
[Analyze grammar]

eteṣu pravarānvakṣye tattvataḥ śṛṇu mādhavi |
sālagrāmaśca siṃhādriśśaileṃdro gandhamādanaḥ || 40 ||
[Analyze grammar]

ete śailavarā devi diśaṃ haimavatīṃ śritāḥ |
dakṣiṇasyāṃ pratītāṃstu vakṣye śailānvasundhare || 41 ||
[Analyze grammar]

aruṇādrirhastiśailo gṛdhrādrirghaṭikācalaḥ |
ete śailavarāḥ sarve kṣīranadyāssamīpagāḥ || 42 ||
[Analyze grammar]

hastiśailāduttarataḥ paṃcayojanamātrataḥ |
suvarṇamukharīnāma nadīnāṃ pravarā nadī || 43 ||
[Analyze grammar]

tasyā evottare tīre kamalākhyaṃ sarovaram |
tattīre bhagavānāste śukasya varado hariḥ || 44 ||
[Analyze grammar]

balabhadreṇa saṃyuktaḥ kṛṣṇo bhaktārtināśanaḥ |
vaikhānasairmunigaṇairnityamārādhito'malaiḥ || 45 ||
[Analyze grammar]

kamalākhyasya sarasa uttare kānanottame |
krośadvayārdhamātre tu haricaṃdanaśobhite |
śrīveṃkaṭācalonāma vāsudevālayo mahān || 46 ||
[Analyze grammar]

saptayojanavistīrṇaḥ śailendro yojanocchritaḥ |
asti svarṇamayo devi ratnasānubhṛdāyataḥ || 47 ||
[Analyze grammar]

indrādyā daivatagaṇā vasiṣṭhādyā munīśvarāḥ |
siddhāḥ sādhyāśca maruto dānavā daityarākṣasāḥ |
rambhādyā apsaraḥsaṃghā vasanti niyataṃ dhare || 40 ||
[Analyze grammar]

tapaścaraṃti nāgāśca garuḍāḥ kinnarāstathā |
etairadhiṣṭhitāstatra saritaḥ puṇyadarśanāḥ |
sarāṃsi vividhānyatra saṃti divyāni mādhavi || 49 ||
[Analyze grammar]

atha svāmipuṣkariṇyāḥ sarvatīrthātiśāyitvavarṇanam |
tīrthānāṃ caiva sarveṣāṃ śṛṇuṣva pravarāṇi vai || 50 ||
[Analyze grammar]

cakratīrthaṃ daivatīrthaṃ viyadgaṃgā tathaiva ca |
kumāradhārikātīrthaṃ pāpanāśanameva ca |
pāṇḍavaṃ nāma tīrthaṃ ca svāmipuṣkariṇī tathā || 51 ||
[Analyze grammar]

saptaitāni varāṇyāhurnārāyaṇagirau śubhe |
eteṣu pravarā devi svāmipuṣkariṇī śubhā || 52 ||
[Analyze grammar]

asyāstu paścime tīraṃ nivasāmi tvayā saha |
āste'syā dakṣiṇe tīraṃ śrīnivāso jagatpatiḥ || 53 ||
[Analyze grammar]

gaṃgādyaiḥ sakalaistīrthaiḥ samā sā sāgarāmbare |
trailokye yāni tīrthāni sarāṃsi saritastathā |
teṣāṃ svāmitvamāpannaṃ dhare svāmisarovare || 54 ||
[Analyze grammar]

svāmipuṣkariṇīṃ puṇyāṃ sevituṃ divyabhūdhare |
vasanti sarvatīrthāni teṣāṃ saṃkhyāṃ vadāmi te || 55 ||
[Analyze grammar]

ṣaṭṣaṣṭikoṭitīrthāni puṇye'sminbhūdharottame |
teṣu cātyaṃtamukhyāni ṣaṭ tīrthāni vasundhare || 56 ||
[Analyze grammar]

pañcānāṃ tīrtharājānāṃ tumbo garbhasamo mahān |
garbhavāsabhayadhvaṃsī snātānāṃ bhūdharottame || 57 ||
[Analyze grammar]

dharaṇyuvāca |
ṣaṭ tīrthāni mahābāho tvayoktāni mahīdhare |
māhātmyaṃ vada teṣāṃ me yathākālaṃ yathāvidhi |
phalāni teṣu snātānāṃ narāṇāṃ vada bhūdhara || 58 ||
[Analyze grammar]

śrīvarāha uvāca |
nārāyaṇādrimāhātmyaṃ vadāmi śṛṇu mādhavi || 59 ||
[Analyze grammar]

devāśca ṛṣayaścaiva yoginaḥ sanakādayaḥ |
kṛteṃ'janādriṃ tretāyāṃ nārāyaṇagiriṃ tathā || 60 ||
[Analyze grammar]

dvāpare siṃhaśailaṃ ca kalau śrīveṅkaṭācalam |
pravadantīha vidvāṃsaḥ paramātmālayaṃ girim || 61 ||
[Analyze grammar]

yojanānāṃ sahasrānte dvīpāṃtaragato'pi vā |
yo namedbhūdharendraṃ taddiśamuddiśya bhaktitaḥ |
sarvapāpavinirmukto viṣṇulokaṃ sa gacchati || 62 ||
[Analyze grammar]

tasminṣaṭtīrthamāhātmyaṃ yathākālaṃ vadāmi te || 63 ||
[Analyze grammar]

atha kumāradhārāmāhātmyam |
śṛṇuṣvāvahitā bhadre sarvapāpapraṇāśanam |
kubhasaṃsthe ravau māghe paurṇamāsyāṃ mahātithau || 64 ||
[Analyze grammar]

maghānakṣatrayuktāyāṃ bhūdharendre vasundhare |
kumāradhārikānāma sarasī lokapāvanī || 65 ||
[Analyze grammar]

yatrāste pārvatīsūnuḥ kārtikeyo'gnisaṃbhavaḥ |
devasenāsamāyuktaḥ śrīnivāsārcako'male || 66 ||
[Analyze grammar]

tasyāṃ yaḥ snāti madhyāhne tasya puṇyaphalaṃ śṛṇu |
gaṃgādisarvatīrtheṣu yaḥ snāti niyamāddharaṃ |
dvādaśābdaṃ jagaddhātri tatphalaṃ samavāpnuyāt || 67 ||
[Analyze grammar]

yo'nnaṃ dadāti tattīrthe śaktyā dakṣiṇayānvitam |
sa tāvatphalamāpnoti snāne tūktaṃ phalaṃ yathā || 68 ||
[Analyze grammar]

atha tuṃbatīrthamāhātmyam |
mānasaṃsthe savitari paurṇamāsītithau dhare |
uttarāphālgunīyukte caturthe kāla uttame || 69 ||
[Analyze grammar]

paṃcānāmapi tīrthānāṃ tuṃbe'tha girigahvare |
yaḥ snāti manujo devi punargarbhe na jāyate || 70 ||
[Analyze grammar]

atha ākāśagaṃgāmāhātmyam |
agnivāhasthite bhānau citrānakṣatrasaṃyute |
pūrṇimākhye tithau puṇye prātaḥkāle tathaiva ca |
ākāśagaṃgāsariti snāto mokṣamavāpnuyāt || 71 ||
[Analyze grammar]

atha pāṇḍavatīrthamāhātmyam |
vṛṣabhasthe ravau rādhe dvādaśyāṃ ravivāsare |
śukle vāpyatha vā kṛṣṇe pakṣe bhaumasamanvite || 72 ||
[Analyze grammar]

śukle vāpyathavā kṛṣṇe bhānuvāreṇa saṃyute |
puṣyanakṣatrasaṃyukta hastarkṣeṇa yute'pi vā || 73 ||
[Analyze grammar]

tīrthe pāṃḍavanāmnyatra saṃgave snāti yo naraḥ |
neha duḥkhamavāpnoti paratra sukhamaśnute || 74 ||
[Analyze grammar]

atha pāpanāśanatīrthamāhātmyam |
śukle pakṣe'tha vā kṛṣṇe yārkavāreṇa saptamī |
puṣyanakṣatrasaṃyuktā hastarkṣeṇa yutāpi vā || 75 ||
[Analyze grammar]

tasyāṃ tithau mahābhāge pāpanāśanasaṃjñake |
tīrthe yaḥ snāti niyamādbhūdharendrasya mastake || 76 ||
[Analyze grammar]

koṭijanmārjitaiḥ pāpairmucyate sa narottamaḥ || 77 ||
[Analyze grammar]

atha devatīrthamāhātmyam |
śṛṇu devi paraṃ guhyamanantākhye mahāgirau |
maddivyālayavāyavye śikhare girigahvare |
devatīrthamiti khyātaṃ taṭākamatiśobhanam || 78 ||
[Analyze grammar]

tasminpuṇyatame devi snānakālaṃ vadāmi te || 79 ||
[Analyze grammar]

gurupuṣye vyatīpāte somaśravaṇake tathā |
dineṣveteṣu yaḥ snāti tasya puṇyaphalaṃ śṛṇu || 80 ||
[Analyze grammar]

yāni kānīha pāpāni jñānājñānakṛtāni ca |
tāni sarvāṇi naśyaṃti devatīrthe'tipāvane || 81 ||
[Analyze grammar]

puṇyānyapi ca vardhaṃte devatīrthanimajjanāta |
dīrghamāyuravāpnoti putrapautrasamanvitaḥ |
ante svargaṃ samāsādya candraloke mahīyate || 82 ||
[Analyze grammar]

taddineṣvannado devi yāvajjīvānnado bhavet |
atiguhyatamaṃ devi proktaṃ tubhyaṃ vasundhare || 83 ||
[Analyze grammar]

vyāsa uvāca |
śrutvātha pṛthivī devī prītipravaṇamānasā |
iṣṭābhirvāgbhiratulaṃ tuṣṭāva dharaṇīdharam || 84 ||
[Analyze grammar]

atha dharaṇīkṛta varāhastutiḥ |
dharaṇyuvāca |
namaste devadeveśa varāhavadanācyuta |
kṣīrasāgarasaṃkāśa vajraśṛṃga mahābhuja || 85 ||
[Analyze grammar]

uddhṛtāsmi tvayā deva kalpādau sāgarāṃbhasaḥ |
sahasrabāhunā viṣṇo dhārayāmi jagantyaham || 86 ||
[Analyze grammar]

anekadivyābharaṇayajñasūtravirājita |
aruṇāruṇāṃbaradhara divyaratnavibhūṣita || 87 ||
[Analyze grammar]

udyadbhānupratīkāśapādapadma namonamaḥ |
bālacaṃdrābhadaṃṣṭrāgramahābalaparākrama || 88 ||
[Analyze grammar]

divyacandanaliptāṃga taptakāṃcanakuṇḍala |
indranīlamaṇidyotihemāṃgadavibhūṣita || 89 ||
[Analyze grammar]

vajradaṃṣṭrāgranirbhinnahiṇayākṣa mahābala |
puṇḍarīkābhirāmākṣa sāmasvanamanohara || 90 ||
[Analyze grammar]

śrutisīmantabhūṣātmansarvātmaścāruvikrama |
caturānanaśaṃbhubhyāṃ vanditā'yatalocana || 91 ||
[Analyze grammar]

sarvavidyāmayākāra śabdātīta namo namaḥ |
ānaṃdavigrahā'nanta kālakāla namonamaḥ || 92 ||
[Analyze grammar]

iti stutvā'calā devī vavande pādayorvibhum |
vandamānā samudvīkṣya devaḥ phullavilocanaḥ || 93 ||
[Analyze grammar]

uddhṛtya dharaṇīṃ devīmāliliṃge'tha bāhubhiḥ |
āghrāya dharaṇīvaktraṃ vāmāṃke sanniveśya ca || 94 ||
[Analyze grammar]

atha varāhasya bhagavato dharaṇyā sākaṃ śeṣācalāgamanam |
āruhya garuḍeśānaṃ jagāma vṛṣabhācalam |
munīṃdrairnāradādyaiśca stūyamāno mahīpatiḥ || 95 ||
[Analyze grammar]

svāmipuṣkariṇītīre paścime lokapūjite |
āste varāhavadano munīndraistatra pūjitaḥ |
vaikhānasairmahābhāgairbrahmatulyairmahātmabhiḥ || 96 ||
[Analyze grammar]

atha veṃkaṭācalamāhātmyaśravaṇāvasaraḥ |
vyāsa uvāca |
taṃ dṛṣṭvā nāradaḥ sūta munīnāmuktavānpurā |
tadetadahamaśrauṣaṃ tatra vai munisaṃsadi || 97 ||
[Analyze grammar]

yatpṛṣṭo'haṃ tvayā sūta māhātmyaṃ dharaṇībhṛtām |
mayā tūktaṃ yathāvaddhi nāradācca purā śrutam || 98 ||
[Analyze grammar]

athādhyāyaphalaśrutiḥ |
ya idaṃ dharmasaṃvādamāvayoḥ sūta pāvanam |
paṭhedvā devapurato brāhmaṇānāṃ purastathā || 99 ||
[Analyze grammar]

sarveṣāmapi varṇānāṃ śṛṇvatāṃ bhaktipūrvakam |
sa pratiṣṭhāmavāpnoti putrapautraiḥ samanvitaḥ || 100 ||
[Analyze grammar]

śṛṇvatāmapi sarveṣāṃ yadiṣṭaṃ tadbhaviṣyati || 101 ||
[Analyze grammar]

sūta uvāca |
iti me bhagavānvyāsaḥ provāca munisevitaḥ |
yathāśrutaṃ mayā pūrvaṃ kṛṣṇadvaipāyanādguroḥ || 102 ||
[Analyze grammar]

tattathā sarvamevātra mayāpyuktaṃ munīśvarāḥ |
śrutvā sūtavacastvitthaṃ te prītamanaso'bhavan || 103 ||
[Analyze grammar]

ṛṣaya ūcuḥ |
sūta tvayoktaṃ bhuvi parvateṣu puṇyeṣu puṇyasya mahīdharasya |
māhātmyamasmākamahīndranāmnaḥ pāpāpahaṃ mokṣaphalapradāyakam || 104 ||
[Analyze grammar]

tato vṛṣādriṃ saṃprāpya varāho dharaṇīyutaḥ |
kimuktavāndharaṇyai sa tanno brūhi mahāmate || 105 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde nāradasya sumeruśikharastha yajñavarāhadarśanaprāptyādivarṇanaṃnāma prathamo'dhyāyaḥ || 1 ||
[Analyze grammar]