Chapter 24

[English text for this chapter is available]

mārkaṃḍeya uvāca |
bhagavanbhavamāhātmyaratnākarasudhākaram |
naṃdīśa citraṃ cāritraṃ śrutaṃ vidyābhṛtordvayoḥ || 1 ||
[Analyze grammar]

kadā vajrāṃgadaḥ siddhaḥ kathaṃ devamapūjayat |
kathaṃ cānvagrahītprahvaṃ devastamaruṇeśvaraḥ || 2 ||
[Analyze grammar]

naṃdikeśvara uvāca |
nivarttanecchāṃ hitvātha nṛpo nijapuraṃ prati |
tasyaiva pādaparyaṃte svasya vāsamarocayat || 3 ||
[Analyze grammar]

athāsya mahatī senā vāhamārgānusāriṇī |
prāptā śatāṃgamātaṃgaturaṃgabhaṭasaṃkulā || 4 ||
[Analyze grammar]

samadṛśyata bhūpālastādṛśo dhairyasāgaraḥ |
purodhomaṃtrisāmaṃtasenāpatisuhṛttamaiḥ || 5 ||
[Analyze grammar]

tatastāmāgatāṃ senāmavanīpatirādṛtaḥ |
aruṇādreśca sīmāyā bahireva nyaveśayat || 6 ||
[Analyze grammar]

svakīyamakhilaṃ kośaṃ deśānapi mahāphalān |
śoṇādrināthapūjāyai kalpayāmāsa bhaktimān || 7 ||
[Analyze grammar]

gautamasyāśramābhyāśe svayaṃ kṛtatapovanaḥ |
purodhoktaḥ sasacivaḥ śivārcanarato'bhavat || 8 ||
[Analyze grammar]

ratnāṃgadākhyaṃ tanayaṃ sthāpayitvā nije pade |
tatpreṣitairaparyāptaiḥ śoṇeśaṃ paryatarpayat || 9 ||
[Analyze grammar]

paritaḥ śoṇaśailasya paripūrṇajalāśayān |
agrahārānbahuphalānbrāhmaṇebhyo'tisṛṣṭavān || 10 ||
[Analyze grammar]

tejasāruṇanāthasya jvalanastaṃbharūpiṇaḥ |
dhanvaprāye'pi deśe'smindīrghikāḥ śataśo vyadhāt || 11 ||
[Analyze grammar]

sauṃdaryaśālinīrātmaparivāravarāṃganāḥ |
sevārthaṃ śoṇanāthasya dattavāndīrghadarśanaḥ || 12 ||
[Analyze grammar]

athāgatenāgastyena lopāmudrāsakhena saḥ |
abhyanaṃdyata śoṇādrināthapūjāparāyaṇaḥ || 13 ||
[Analyze grammar]

pratyahaṃ navatīrthākhye sarasi snānamācaran |
pāpanāśapravāleśau prayataḥ paryapūjayat || 14 ||
[Analyze grammar]

mahiṣāsurasaṃhārakāriṇī mānaveśvaraḥ |
nityamārādhayāmāsa durgāṃ durggārtihāriṇīm || 15 ||
[Analyze grammar]

pratikṣaṇaṃ brahmaviṣṇupūjyasya liṃgarūpiṇaḥ |
ādidevasya vividhāḥ saparyāḥ paryakalpayat || 16 ||
[Analyze grammar]

pratyuṣasyutthitaḥ snātaḥ pādābhyāmeva pārthivaḥ |
japanpaṃcākṣarīmaṃtramakārṣīttriḥ pradakṣiṇām || 17 ||
[Analyze grammar]

paurṇamāsyāṃ sa kārttikyāṃ pārvatīvallabhapriyam |
mahādīpotsavaṃ cakre mahitaṃ bhuvanatraye || 18 ||
[Analyze grammar]

sugaṃdhasārakahlārakarpūrajalapūritaḥ |
sahasraiḥ svarṇakuṃbhānāmabhyaṣiṃcattriyaṃtrakam || 19 ||
[Analyze grammar]

pratimāsadhvajārohapūrvaṃ tīrthotsavādikam |
trailokyābhyarhitaṃ cakre rathārohaṃ mahotsavam || 20 ||
[Analyze grammar]

aṃgaṃ pradakṣiṇaṃ cāsya vidadhe viśadāśayaḥ |
yojanatritayāyāmavyāpinaḥ śoṇabhūbhṛtaḥ || 21 ||
[Analyze grammar]

aruṇācalanātheti karuṇāmṛtasāgaraḥ |
aruṇāṃvāsanātheti tuṣṭāva ca muhurmuhuḥ || 22 ||
[Analyze grammar]

saṃlipya vividhairdravyairnityaṃ paṃcāmṛtādibhiḥ |
ācarca yadgaṃdhasārapaṃkaiḥ karpūrapāṃḍuraiḥ || 23 ||
[Analyze grammar]

apūjayata kalhāraiḥ sravanmṛgamadadravaiḥ || prā |
tarārabhya śoṇādrināyakaṃ gaṇarūpiṇam || 24 ||
[Analyze grammar]

iti varṣatrayaṃ tasya vaśino varivasyayā |
aruṇādrīśvarastuṣṭaḥ pratyakṣatvamagāhata || 25 ||
[Analyze grammar]

nīhārācalasaṃkāśamārūḍho vṛṣapuṃgavam |
anvagāsīnayā devyā kṛtagāḍhopagūhanaḥ || 26 ||
[Analyze grammar]

brahmarṣibhirvasiṣṭhādyairnāradādyairmaharṣibhiḥ |
gaṇairnikuṃbhakuṃbhādyaiḥ kriyamāṇajayastutiḥ || 27 ||
[Analyze grammar]

karuṇāsiṃdhukallolaiḥ kamalāvāsaveśmabhiḥ |
kaṭākṣapātairjagatāṃ kāluṣyamiva vārayan || 28 ||
[Analyze grammar]

dṛṣṭvā ca devadevaṃ tamaṣṭāṃgaṃ nyasya bhūtale |
praṇanāma paraṃ hṛṣṭo vajrāṃgadamahīpatiḥ || 29 ||
[Analyze grammar]

vyajñāpayacca bhūpālo maulīkṛtaśatāṃjaliḥ |
kṣālayanniva daṃtāṃśujālaistatpādapaṃkaje || 30 ||
[Analyze grammar]

vajrāṃgada uvāca |
deveśa yadahaṃ mohādbahupātakasaṃcayam |
acāriṣaṃ sa eko'yaṃ kṣamyatāṃ me vyatikramaḥ || 31 ||
[Analyze grammar]

itivādinamatyaṃtaṃ dīnameva dayānidhiḥ |
jagāda jagatīnātho devaḥ śoṇācaleśvaraḥ || 32 ||
[Analyze grammar]

śrīmaheśvara uvāca |
mā bhaiṣīrvatsa bhadraṃ te saṃtyaṣṭau mama mūrttayaḥ |
tāḥ sarvāḥ sarvajaṃtūnāmatyarthaṃ parikalpitāḥ || 33 ||
[Analyze grammar]

purā puraṃdarastvaṃ hi kailāsaśikhare sthitam |
garvito māmavāmaṃsthāḥ staṃbhitaśca tadā mayā || 34 ||
[Analyze grammar]

kṣaṇaṃ galitagarvastvaṃ staṃbhanā vrīḍitastadā |
ayāciṣṭhāḥ śivajñānamakhilaiśvaryakāraṇam || 35 ||
[Analyze grammar]

ādiṣṭastvaṃ mayā vajrinnavatīryāvaniṃ bhavān |
rājā vajrāṃgado bhūtvā lapsyase matkṛpāmiti || 36 ||
[Analyze grammar]

jātaṃ tataḥ prabhāveṇa kṣetrametanmadāspadam |
śikṣitotīva mugdhastvaṃ bhaktosi ca paraṃ mayi || 37 ||
[Analyze grammar]

adhunātisaparyābhistvatkṛtābhiraharniśam |
parituṣṭosmyahaṃ rājannatastvāṃ bodhayāmyaham || 38 ||
[Analyze grammar]

khaṃ vāyuranalo vāri bhūḥ sūrya śaśinau pumān |
iti manmūrttibhirviśvaṃ bhāsate sacarācaram || 39 ||
[Analyze grammar]

kālo hi kālayāmyarthānsattvānadhvana eva ca |
tattvātītaḥ śivaścāhaṃ na mattostīha kiṃcana || 40 ||
[Analyze grammar]

aparyaṃtacidānaṃdasiṃdhorme kecidūrmayaḥ |
vedhomukundarudreṃdramukhānāhuruditvarāḥ || 41 ||
[Analyze grammar]

vāṇīlakṣmīkṣamāśraddhāprajñāsvāhāsvadhādayaḥ |
asaṃkhyeyamahāśaktermama visṛṣṭiśaktayaḥ || 42 ||
[Analyze grammar]

iyaṃ mama mahāśaktirgaurī māyā jagatprasūḥ |
anayācchādyate viśvaṃ śaśvadvistāryate'pi ca || 43 ||
[Analyze grammar]

śaktyānayānvitaḥ sargarakṣāsaṃhṛtivibhramaḥ |
vicitrametatpaśyāmi jagaccitraṃ nijecchayā || 44 ||
[Analyze grammar]

apavāhitamohastvaṃ mahimā me vicāraya |
ātmānamavibhinnaṃ me taraṃgamiva vāridheḥ || 45 ||
[Analyze grammar]

tato madrūpaśālinyā ādhipatyaṃ kṣitergataḥ |
matprasādena rājeṃdra bhuṃkṣva bhogānyathāsukham || 46 ||
[Analyze grammar]

punaḥ puraṃdaratvena bhuktadivyasukhaściram |
madekarūpatāṃ rājanniścayāttvamavāpsyasi || 47 ||
[Analyze grammar]

naṃdikeśvara uvāca |
ityuktvāṃtarhite deve rājā vajrāṃgadaḥ kṛtī |
śoṇeśaṃ pūjayanneva sarvānbhogānavāptavān || 48 ||
[Analyze grammar]

itthaṃ te kathitaṃ sādho śivabhaktavijṛṃbhaṇam |
pradakṣiṇāphalaṃ caiva śoṇaśailasya śāśvatam || 49 ||
[Analyze grammar]

kiṃ vācāṃ vistareṇātra śoṇaśailapradakṣiṇā |
mahatāmaśvamedhānāṃ śatādapi viśiṣyate || 50 ||
[Analyze grammar]

viṣuvāyanasaṃkrāti vyatīpātādiparvasu |
pradakṣiṇācchoṇagirerasaṃkhyeyaṃ phalaṃ labhet || 51 ||
[Analyze grammar]

na kṣetramaruṇādasti nāsti devo'ruṇeśvarāt |
nāpi pradakṣiṇādanyadvipadyate'bhyadhikaṃ tapaḥ || 52 ||
[Analyze grammar]

iti kathayati naṃdikeśvaresminpulakitasarvavapurmṛkaṇḍuputraḥ |
muhuradhigataharṣavāṣpavṛṣṭirmahati nimagna ivābhavatsudhābdhau || 53 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe vajrāṃgadasadgativarṇanaṃnāma caturviṃśatitamo'dhyāyaḥ || 24 ||
[Analyze grammar]