Chapter 22

[English text for this chapter is available]

mārkaṃḍeya uvāca |
svāminnityaśivānanda bhagavannaṃdikeśvara |
āhlādito'smi śoṇeśamāhātmyasudhayā tvayā || 1 ||
[Analyze grammar]

kathaṃ vajrāṃgadaḥ pāṃḍyarājaḥ śoṇavyatikramam |
cakre kathaṃ tadbhaktyaiva prāptavānsaṃpadaṃ punaḥ || 2 ||
[Analyze grammar]

kathaṃ vidyādharādhīśau kāṃtiśālikalādharau |
durvāsaḥśāpanirviddhāvavitau śoṇaśaṃbhunā || 3 ||
[Analyze grammar]

naṃdikeśvara uvāca |
dīrghāyuṣyatvasāphalyaṃ labdhavāṃstvaṃ mṛkaṇḍuja |
yadiyaṃ stheyasī bhaktirbhavato bhūtanāyake || 4 ||
[Analyze grammar]

vakṣye vajrāṃgadodaṃtaṃ vṛttaṃ vidyābhṛtorapi |
yato'bhūnmahito loke śoṇādrīśvaravaibhavaḥ || 5 ||
[Analyze grammar]

āsīdvajrāṃgadonāma purā pāṃḍyeṣu pārthivaḥ |
āste yasya bhujastambhe vasudhā sālabhaṃjikā || 6 ||
[Analyze grammar]

dhārmiko nyāyavijjñātā gaṃbhīro dakṣiṇam kṣamaḥ |
śāṃto vinayavāndhīmānekadāravrataḥ kṛtī || 7 ||
[Analyze grammar]

śivapūjārcanarataḥ śrīmāñchīlavatāṃ varaḥ |
pṛthvīmāsetukedārācchaśāsa jitaśātravaḥ || 8 ||
[Analyze grammar]

kadācinmṛgayāvyājātsa caransuturaṃgamaḥ |
aruṇācalaparyaṃtaṃ kāṃtāraṃ samagāhata || 9 ||
[Analyze grammar]

sa tatra bahalāmodaṃ kaṃcitkastūrikāmṛgam |
dṛṣṭvā tamanvakturagaṃ prāvartayata kautukāt || 10 ||
[Analyze grammar]

sa mṛgo'nudrutastena abhitaḥ śoṇaparvatam |
prādakṣiṇyātparīyāya papāta ca manojavaḥ || 11 ||
[Analyze grammar]

tataḥ sa bhagnasāropi rājā jātaśramaścaran |
papāta vāhādvicchāyaḥ kṣīṇapuṇya iva dyutaḥ || 12 ||
[Analyze grammar]

ajñātakāraṇenaivaṃ mātaṃgeneva pīḍitaḥ |
nājñāsītkṣaṇamātmānaṃ rājā grahagṛhītavat || 13 ||
[Analyze grammar]

aciṃtayacca koyaṃ me nirhetuḥ sattvaviplavaḥ |
kva gataḥ sa hyakasmānme upavāhyasturaṃgamaḥ || 14 ||
[Analyze grammar]

iti ciṃtākule tasmiṃstajjñānepyapaṭīyasi |
taḍittaṭajaṭāleva sahasā dyauradṛśyata || 15 ||
[Analyze grammar]

nirīkṣamāṇa evāsminhitvā tiryakkalevaram |
tūrṇaṃ turaṃgasāraṃgau khecaratvamupāgatau || 16 ||
[Analyze grammar]

kirīṭinau kuṇḍalinau hārakeyūradhāriṇau |
kṣaumāṃtarīyottarīyau sragviṇau ca virejatuḥ || 17 ||
[Analyze grammar]

avocatāṃ ca nṛpatimāścaryākṛṣṭamānasam |
haraṃtāviva dantāṃśujālaistvasyārttijaṃ tamaḥ || 18 ||
[Analyze grammar]

rājannalaṃ viṣādena śoṇādrīśaprabhāvataḥ |
etāṃ jānīhi saṃjātāṃ navāṃ nau cedṛśī daśām || 19 ||
[Analyze grammar]

tadovāca tayoḥ kiṃcidāśvastaiva pārthivaḥ |
kṛtāṃjalirabhāṣiṣṭa tāvubhau vinayānvitaḥ || 20 ||
[Analyze grammar]

kau yuvāṃ nirmito yābhyāmabhiṣaṃgo mamedṛśaḥ |
bhadrau bhaṇatamārttānāṃ trāṇaṃ hi mahatāṃ guṇaḥ || 21 ||
[Analyze grammar]

iti tena kṛte praśne tamuvāca kalādharaḥ |
rājānaṃ janitāścaryaṃ nirdiṣṭaḥ kāṃtiśālinā || 22 ||
[Analyze grammar]

avehi rājannāvāṃ hi purāvidyādhareśvarau |
parasparātisauhārdau vasaṃtamadanāviva || 23 ||
[Analyze grammar]

ekadā tu suvarṇādreḥ pārśve durvāsaso muneḥ |
tapovanamagacchāva manaso'pi durāsadam || 24 ||
[Analyze grammar]

krośeddhāṃ tapasastasya śivārādhanasādhanīm |
puṣpojjvalāmapaśyāva puṇyāmārāmavāṭikām || 25 ||
[Analyze grammar]

vinītāvapyasaṃjātau tattvocitasudhīgaṇau |
prāviśāva tadudyānaṃ prasūnāvacayotsukau || 26 ||
[Analyze grammar]

sthalasya tasya sauhārdātkāṃtiśālyatigarvitaḥ |
saṃcacāra muhuḥ pādanyāsairāghaṭṭayanmahīm || 27 ||
[Analyze grammar]

ahaṃ tu tatra puṣpāṇāṃ gaṃdhātiśayamohitaḥ |
vikasvareṣu puṣpeṣu nyastahasto durāśayaḥ || 28 ||
[Analyze grammar]

tataḥ śāṃḍilyamūlastho vyāghracarmāsane sthitaḥ |
durvāsāstapasāṃ rāśirjvalanniva hutāśanaḥ || 29 ||
[Analyze grammar]

amarṣotkarṣanīraṃdhraspaṃdamānādharacchadaḥ |
karāla bhṛkuṭībaṃdhasārālitaviśālabhūḥ || 30 ||
[Analyze grammar]

saroṣo'bhūttejasāḍhyo gharmadaṃturavigrahaḥ |
dahanniva dṛśā paśyannabhartsayata nau muniḥ || 31 ||
[Analyze grammar]

āḥ pāpau pracyutācārau kau yuvāmatigarvitau |
jvalataḥ kopavahnerme śalabhatvamupāgatau || 32 ||
[Analyze grammar]

tapovanamidaṃ matkaṃ pāvanaṃ bhūtabhāvanam |
pādairna spṛśataḥ kvāpi sūryācaṃdramasāvapi || 33 ||
[Analyze grammar]

puravairisaparyāyāḥ paryāyakamidaṃ vanam |
na spaṃdate'tra vātopi na lipyaṃte'tra ṣaṭapadāḥ || 34 ||
[Analyze grammar]

tadetatpādasaṃcārairdūṣayanneṣa pātakī |
hayo bhavatu bhūloke paravāhyatvapīḍitaḥ || 35 ||
[Analyze grammar]

aparopyayamatyugre patatvacalakaṃdare |
prasūnagaṃdhalobhādyo gaṃdhasāraṃgatāṃ gataḥ || 36 ||
[Analyze grammar]

iti tenograroṣeṇa śāpavajre nipātite |
tatkṣaṇādvigaladgarvāvāvāṃ taṃ śaraṇaṃ gatau || 37 ||
[Analyze grammar]

abhidhāya ca taṃ devamāhitāṃghriparigrahaiḥ |
amogha eṣa tvacchāpastadasyāṃto nivedyatām || 38 ||
[Analyze grammar]

athātidīnamanasāvāvāmālokya pārthiva |
sānugraho'bhūnmunirāṭ kāruṇyādatiśītalaḥ || 39 ||
[Analyze grammar]

abhāṣata ca maivaṃ bho bhavatoḥ kvāpi durdhiyoḥ |
śāpasya bhavitā śāṃtiraruṇādreḥ pradakṣiṇāt || 40 ||
[Analyze grammar]

purā khalu purārātiradhyatiṣṭhacchubhāṃ sabhām |
paryupāsyata dikpālairiṃdropeṃdrayamādibhiḥ || 41 ||
[Analyze grammar]

tadā ca devadevāya naṃdanāraṇyadevatā |
upāyanīkṛtavatī phalaṃ kimapi pāṭalam || 42 ||
[Analyze grammar]

bālyātkutūhalākrāntau gajānanaṣaḍānanau |
pitaraṃ tadayācetāṃ lobhanīyataraṃ phalam || 43 ||
[Analyze grammar]

atha tāvavadaddevastanayau phalatarṣitau |
gopayitvā phalaṃ pāṇisaṃpuṭena kumārakau || 44 ||
[Analyze grammar]

imāṃ samastāṃ pṛthivīṃ lokālokena veṣṭitām |
yo vāṃ pradakṣiṇīkartumīṣṭe tasmai dadāmyaham || 45 ||
[Analyze grammar]

ityukte pārvatīśena smayamānamukheṃdunā |
skaṃdaḥ pradakṣiṇīkartuṃ medinīmupacakrame || 46 ||
[Analyze grammar]

laṃbodarastu devasya śoṇaśailākṛteḥ pituḥ |
pradakṣiṇaṃ tataḥ kṛtvā purastādeva tatkṣaṇāt || 47 ||
[Analyze grammar]

taddṛṣṭvā tasya cāturyaṃ heraṃbāya triyaṃvakaḥ |
phalaṃ vitīrṇavānasmai praṇayāghrātamastakaḥ || 48 ||
[Analyze grammar]

adyaprabhṛti sarveṣāṃ phalānāmadhināyakaḥ |
bhavetyasmai varaṃ dattvā hyekadaṃtāya śaṃkaraḥ || 49 ||
[Analyze grammar]

babhāṣe ca sabhāstārānsarvānapi surāsurān |
prasaraddaśanajyotsnākarburīkṛtamaṃdiraḥ || 50 ||
[Analyze grammar]

sthāvaroyaṃ mamākāraḥ śoṇādriryo'sya bhaktitaḥ |
pradakṣiṇāṃ vitanute sa me sārūpyabhāgbhavet || 51 ||
[Analyze grammar]

gireḥ pradakṣiṇenāsya yasya dhattaḥ pade rujam |
sa samrāṭsakalotkṛṣṭaṃ labhate śāśvataṃ padam || 52 ||
[Analyze grammar]

iti śāsanataḥ śaṃbhoḥ śoṇaśailapradakṣiṇam |
vidhāya sarvagīrvāṇā lebhire svaṃ svamīpsitam || 53 ||
[Analyze grammar]

yuvāmapi madodbhūtamālinyau śikṣitau mayā |
pradakṣiṇena śoṇādreḥ śāpāṃto vāṃ bhaviṣyati || 54 ||
[Analyze grammar]

tiraścorapi vāṃ sidhyedaruṇādreḥ pradakṣiṇā |
vajrāṃgadasya pāṃḍyasya nṛpateranubaṃdhataḥ || 55 ||
[Analyze grammar]

ityamarṣaṇamaharṣimahābdheḥ śāpahālahala śoṣitagātrau |
pātitau bahulapātakabhārātkṣipramaśvamṛgajātiṣu jātau || 56 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe 'ruṇācalapradakṣiṇāmāhātmye vajrāṃgada vṛttāṃtavarṇanaṃ nāma dvāviṃśatitamo'dhyāyaḥ || 22 ||
[Analyze grammar]