Chapter 21

[English text for this chapter is available]

naṃdikeśvara uvāca |
tadā brahmā sarasvatyā mahāviṣṇuśca padmayā |
śakraḥ pulomasutayā pare dikpālakā api || 1 ||
[Analyze grammar]

gaṃdharvāpsarasāṃ saṃghā vasavo'pi surā api |
trayastriṃśatkoṭigaṇāḥ pare muni gaṇā api || 2 ||
[Analyze grammar]

ekādaśamahārudrā ādityā dvādaśāpi ca |
bhairavāśca piśācāśca vetālāḥ kaṭapūtanāḥ || 3 ||
[Analyze grammar]

yakṣarakṣoragā bhūtā ye cānye śivakiṃkarāḥ |
saṃtoṣabhājaḥ sarve'pi vikaṭākāraveṣṭitāḥ || 4 ||
[Analyze grammar]

parivārya maheśānaṃ samājagmuḥ sahasraśaḥ |
tadvīrāśaṃsanaṃ dṛṣṭvā yoginīdānavaiḥ kṛtam || 5 ||
[Analyze grammar]

atīva vismayaṃ bhejuḥ sarve kalpāṃtabhīṣaṇam |
kṛtasāṃnidhyamālokya devamānaṃdayaṃtyumā || 6 ||
[Analyze grammar]

cirarātraprarūḍhāṃ ca tadviyogavyathāṃ jahau |
romāṃcitā svinnamukhī vepamānā ghanastanī || 7 ||
[Analyze grammar]

pādāṃgulīṣu nayane viniveśayati sma sā |
vṛṣabhādavaruhyātha gṛhītvaināṃ kare śivaḥ |
smitaśarīrakaṃṭhaśrīpraṇayenaivamabravīt || 8 ||
[Analyze grammar]

śiva uvāca |
vyākulīkriyate devi kimevaṃ kāraṇaṃ vinā || 9 ||
[Analyze grammar]

sarvairārādhanīyeti mayāpi ghaṭitoṃjaliḥ |
kiṃ na vetsyāvayoraikyaṃ jyotsnācaṃdramasoriva || 10 ||
[Analyze grammar]

anādisiddhaṃ deveśi tavedaṃ maugdhyamīdṛśam |
kvedaṃ śirīṣamṛdvaṃgi śarīraṃ te girīndraje || 11 ||
[Analyze grammar]

tapaḥ samādhayaśceti kva karkaśajanocitāḥ |
nārāyaṇohaṃ lakṣmīstvaṃ brahmāsmi tvaṃ sarasvatī || 12 ||
[Analyze grammar]

vāruṇī tvaṃ phaṇīṃdrohaṃ rohiṇī tvamahaṃ śaśī |
svāhā tvaṃ havyavāho'haṃ sūryo'haṃ tvaṃ suvarcalā || 13 ||
[Analyze grammar]

jāhnavī tvaṃ samudro'haṃ merurasmi tvamurvarā |
pulomajā tvaṃ śakrohaṃ tvaṃ ratiścittabhūraham || 14 ||
[Analyze grammar]

buddhistvaṃ rājarājohaṃ tvaṃ śamā'haṃ samīraṇa |
pāthodhipo'haṃ vīcistvaṃ prakṛtistvaṃ pumānaham || 15 ||
[Analyze grammar]

vidyā tvaṃ veditavyo'haṃ vāktvamarthopi pārvatī |
īśvaro'haṃ madaṃśāsi tvayaivājñāsvarūpayā || 16 ||
[Analyze grammar]

sṛṣṭi sthityupasaṃhāravidhānānugraheśvare |
na bhedo'tastvayā kāryaḥ pṛthagjanavadāvayoḥ || 17 ||
[Analyze grammar]

citprakāśātmanordevi svecchādhṛtaśarīrayā |
vyākulīkuruṣe śaśvadvṛthaiverṣyāyase hi mām || 18 ||
[Analyze grammar]

dṛṣṭāpratikriyā tasya kriyate yādhunā mayā |
ityuktveśo niṣaṇṇastāṃ pārśvadeśe nyaveśayat || 19 ||
[Analyze grammar]

gaurīṃ svakīya evāṃge gūhamānāmiva hriyā |
aṃgadvayaṃ tayoraikyamagātpremṇā ca līnayoḥ || 20 ||
[Analyze grammar]

arthadvayamivāhnāya saṃnikarṣopalaṃbhataḥ |
ardhe karpūradhavalamardhe siṃdhūrapāṭalam || 21 ||
[Analyze grammar]

tadvicitramabhūdaṃgaṃ śivayorekatāṃ gatam |
ardhe kuṃtaladāmārdhahāramadhye tu kuṃcikā || 22 ||
[Analyze grammar]

aṃgādardheṃducūḍasya vapurardhendukūlitam |
ekanūpuratāṭaṃkaparihāryamanoharam || 23 ||
[Analyze grammar]

ekapiṃgalasadhrīco gātramekastanaṃ babhau |
devyai dattvā ca dhāmārthaṃ vāmadevo jagāda tām || 24 ||
[Analyze grammar]

avakāśo ruṣo devi mā bhūrataḥ paraṃ tava |
stanyārthinaṃ guhaṃ hitvā yātāsi tapase yataḥ || 25 ||
[Analyze grammar]

tadapītastanīnāmnā nivasātra mamāṃtike |
tvāmapītastanīṃ devīṃ śoṇādrīśaṃ ca māmapi || 26 ||
[Analyze grammar]

janāḥ sarve samārādhya ramaṃtāṃ bhogamokṣayoḥ |
iyaṃ tvadaṃśajā devī durgā mahiṣasūdinī || 27 ||
[Analyze grammar]

atraiva sannidhattāṃ tu maṃtrasiddhipradā nṛṇām |
khaḍgatīrthamidaṃ puṇyaṃ sakṛdeva nimajjanāt || 28 ||
[Analyze grammar]

sarvarogaharaṃ puṃsāmastu sarvāghanāśanam |
pravālagirināthaśca devo'yaṃ pāpanāśanaḥ || 29 ||
[Analyze grammar]

bhaktiśraddhāvatāṃ nṝṇāṃ bhūyāstāṃ bhūtaye bhṛśam |
ayaṃ ca gautamo devi tvadanugrahabhājanam || 30 ||
[Analyze grammar]

taponurūpaṃ bhajatāṃ lokeṣvācaṃdratārakam |
imāśca mātaraḥ sapta saptalokaikamātaraḥ || 31 ||
[Analyze grammar]

adyaprabhṛti kurvaṃtu sānnidhyaṃ jagatāṃ śriyai |
śāstāro bhairavāḥ kṣetrapālakā baṭukā api || 32 ||
[Analyze grammar]

aruṇakṣetra evātra nityaṃ kurvaṃtu saṃnidhim |
atrāhamaruṇakṣetre nivasāmyaruṇāhvayaḥ || 33 ||
[Analyze grammar]

tvayāpyaruṇayā devyā sthātavyaṃ karuṇārdrayā |
īpsināmaruṇādevau sānnidhyaṃ kuruto yataḥ || 34 ||
[Analyze grammar]

tadasminnaruṇakṣetre sulabhāḥ sarvasiddhayaḥ || 35 ||
[Analyze grammar]

idaṃ kṛtaṃ parvatarājaputryā prasādanaṃ śoṇagirīśvarasya |
śṛṇoti yaḥ sa dviṣato vidhūya svargāpavargau sulabhāvupeyāt || 36 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe śivakṛtapārvatīpraśaṃsāvarṇanaṃnāmaikaviṃśatitamo'dhyāyaḥ || 21 ||
[Analyze grammar]