Chapter 17

[English text for this chapter is available]

sūta uvāca |
iti śrutvāsya vacanaṃ mārkaṃḍeyo'bhyabhāṣata |
mārkaṃḍeya uvāca |
śrutameva mayā deva śrotavyaṃ bhavato mukhāt || 1 ||
[Analyze grammar]

tathāpi kautukenāhamākrāṃto munayo'pyamī |
gauryā kathaṃ tapastaptaṃ mahādevyātra kathyatām || 2 ||
[Analyze grammar]

naṃdikeśvara uvāca |
kathayāmi tadapyetadyathā'dhigatamātmanā |
śṛṇu tvamavadhānena mārkaṃḍeya mahāmate || 3 ||
[Analyze grammar]

nanu jānāsi tatpūrvaṃ yathā dākṣāyaṇī śivaḥ |
upayeme satīṃ nāma satīnāmadhidevatām || 4 ||
[Analyze grammar]

yathā ca sā krudhā bharturdruhi dakṣaprajāpatau |
yogādahāsīdātmīyaṃ vapurityapi te śrutam || 5 ||
[Analyze grammar]

tadā harājñānighnena vīrabhadreṇa yatkṛtam |
adhvaradhvaṃsanaṃ dakṣasyāpi te viditaṃ mahat || 6 ||
[Analyze grammar]

aśrauṣīstasya dakṣasya gaṇaiḥ śīrṣāsakhaṃḍanam |
brahmācyuteṃdramukhyānāṃ devānāmapi śikṣaṇam || 7 ||
[Analyze grammar]

daṃtaghātaṃ raveḥ pāṇipāṭanaṃ jātavedasaḥ |
aditiprabhṛtīnāṃ ca divyastrīṇāṃ parābhavam || 8 ||
[Analyze grammar]

sā ca devī punarjanma lebhe himavato gṛhe |
umeti pārvatītyākhyāṃ dvitīyāṃ vibhratī punaḥ || 9 ||
[Analyze grammar]

devaḥ sthāṇuvane tāṃ ca paricaryāparaṃ rahaḥ |
arurocayiṣuḥ kāmamadhākṣītkālavahninā || 10 ||
[Analyze grammar]

jiteṃdriyaṃ ca taṃ devaṃ kvāpi yātaṃ gaṇaiḥ saha |
tapobhistoṣayāmāsa gaurī śikharavāsinī || 11 ||
[Analyze grammar]

upayamyātha tāṃ devo vṛttāṃtaiścittakhaṃḍibhiḥ |
ramayāmāsa caikāṃte modasveti vilāsinīm || 12 ||
[Analyze grammar]

vaidhavyakhinnayā ratyā prārthitā śailanaṃdinī |
kāmapīṭhe tapasyaṃtī kāmaṃ pratyudadīpayat || 13 ||
[Analyze grammar]

punaśca menayā mātrā pitrā ca himabhūbhṛtā |
ānītā bhavanaṃ bhartrā sākaṃ ciramaraṃsta sā || 14 ||
[Analyze grammar]

tadā śuṃbhaniśuṃbhākhyau lebhāte vedhaso varam |
devadānavamartyeṣu māstu nau puruṣānmṛtiḥ || 15 ||
[Analyze grammar]

iti tadvacanaṃ śrutvā jātatrāsaiḥ suparvabhiḥ |
abhyarthito'vadaddevo rahaścakradharādibhiḥ || 16 ||
[Analyze grammar]

mābhaiṣṭa bhadra kālena tathā pratividhīyate |
yathā niṣūditau syātāṃ tādṛśau dānavāviti || 17 ||
[Analyze grammar]

dattābhayānmukuṃdādīnvisṛjyāṃdhakasūdanaḥ |
aṃtaḥpuragato reme devyā saha yathā purā || 18 ||
[Analyze grammar]

kadācinmarmalakṣyeṇa prītyā kālīti niṃditā |
tasya prītyai kālikā ca tvacamevājahānnijām || 19 ||
[Analyze grammar]

yatrotkṣiptavatī carma svecchayā parameśvarī |
mahākāśīprapātākhyaṃ tadabhūtkṣetramuttamam || 20 ||
[Analyze grammar]

sā ca tvakkauśikī nāmnā kālī viṃdhyādrivāsinī |
tapasyaṃtī vṛṣasyaṃtau to jaghāna mahāsurau || 21 ||
[Analyze grammar]

devī ca gaurī śikhare tasminneva manohare |
tapobhirlabdhagaurītvādbharttāraṃ samatoṣayat || 22 ||
[Analyze grammar]

krameṇa daurhṛdavatī bhūtvā prāsūta pārvatī |
gajānanaṃ ca heraṃbaṃ senānyaṃ ca ṣaḍānanam || 23 ||
[Analyze grammar]

tau cāgamavidaḥ prāhurnārāyaṇacaturmukhau |
pūrvāparādhaśuddhyarthaṃ devīgarbhasamudbhavau || 24 ||
[Analyze grammar]

vardhamānau ca tau bālau pitrorālokamānayoḥ |
magnayoriva varṣābdhau premagraṃthirabhūddṛḍhā || 25 ||
[Analyze grammar]

jātu vīṇāninādena kadāciccitralekhanaiḥ |
vijahratuśśivau svairamekadā maṃḍanairmithaḥ || 26 ||
[Analyze grammar]

jātu vidyāgamālāpaiḥ kadāciccitravastubhiḥ |
ekadā lokavṛttāṃtairdaṃpatibhyāṃ vinoditam || 27 ||
[Analyze grammar]

puṣpāvacayanairjātu kadācidvārikhelanaiḥ |
adīvyatāṃ ca rāgārdrau dolākelibhirekadā || 28 ||
[Analyze grammar]

mainākenārcitau jātu menayā jātu pūjitau |
jātvarhitau himavatā daṃpatī tau vinoditau || 29 ||
[Analyze grammar]

jātu dyūtavinodena gatigoṣṭhyā kadācana |
ekadā dānalīlābhiḥ śivau cikrīḍatuściram || 30 ||
[Analyze grammar]

dyūtanirjitamācchidya patyurutsaṃgatāṃ gatam |
valayīkṛtameṇāṃkaṃ tāṭaṃkīkṛtavatyumā || 31 ||
[Analyze grammar]

iti tau pitarau carācarāṇāṃ nivasaṃtau kanakācalādikeṣu |
rucireṣu padeṣu kāmabhogānatihṛdyānsuciraṃ kilānvabhūtām || 32 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe śivapārvatīvihāravarṇanaṃnāma saptadaśo'dhyāyaḥ || 17 ||
[Analyze grammar]