Chapter 12

[English text for this chapter is available]

brahmovāca |
iti saṃbhāṣamāṇe tu maharṣau muni sevite |
vijahau girijā śaṃkāṃ śivabhaktavadhāśritām || 1 ||
[Analyze grammar]

athāṃtarikṣādudabhūdvāṇī karṇamanoharā |
mā gamaḥ śailakanye tvaṃ pāpanipkṛtikāraṇāt || 2 ||
[Analyze grammar]

gaṃgā ca yamunā siṃdhurgodāpi ca sarasvatī |
narmadā sā ca kāverī śoṇaḥ śoṇanadī ca sā || 3 ||
[Analyze grammar]

atraiva nava tīrthāni saṃbhavaṃtu śilātale |
tvatkhaḍgadārite devi kuru tatrāghamarṣaṇam || 4 ||
[Analyze grammar]

asminnāśviyuje māsi jyeṣṭhānakṣatra āgate |
nimajya khaḍgatīrthe tvaṃ saliṃgā māsamāvasa || 5 ||
[Analyze grammar]

nivartya sāvanaṃ māsamatra dikpālasaṃmitam |
tataḥ pāṇisthitaṃ liṃgaṃ labdhvā pāpaviśodhanam || 6 ||
[Analyze grammar]

pratiṣṭhāpaya tīrthāgre lokānugrahakāraṇāt |
uttīrya tīrthavarye'sminsnātvā liṃge'rcite śive || 7 ||
[Analyze grammar]

tāpatrayopaśāṃtiśca trailokyasya na saṃśayaḥ |
sarvapāpaharaṃ liṃgaṃ sthāvaraṃ tīrthasannidhau || 8 ||
[Analyze grammar]

sthāpaya sthirayā bhaktyā sadālokahitāya ca |
nakṣatre vaiśvadaivatye devakyāḥ saṃgamācara || 9 ||
[Analyze grammar]

mahotsavasamāyuktaṃ yāvaddaśadināvadhi |
kṛtvā cāvabhṛthaṃ puṇyanakṣatre vahnidaivate || 10 ||
[Analyze grammar]

sāyamabhyarcya vidhivacchoṇācalavapurmama |
tataste darśayiṣyāmi taijasaṃ rūpamātmanaḥ || 11 ||
[Analyze grammar]

etatkṛtaṃ te lokānāṃ rakṣāyai saṃbhaviṣyati |
iti tadvacanaṃ śrutvā maharṣivacanaṃ ca sā || 12 ||
[Analyze grammar]

ubhayaṃ kartumārebhe tapasā śailakanyakā |
khaṅgena dārayāmāsa śilātalamanākulā || 13 ||
[Analyze grammar]

udajṛṃbhata tīrthānāṃ navakaṃ tatra tatkṣaṇāt |
tasya kaṇṭhasthitaṃ ligaṃ dhyāyantī parvatātmajā || 14 ||
[Analyze grammar]

tīrthe mamajja tasminsā munīnāmabhyanujñayā |
tīrthānāṃ navakaṃ tatra saṃjātaṃ sphaṭikaprabham || 15 ||
[Analyze grammar]

aṃtarvasatitaḥ kāṃtyā mecakīkṛtamaṃjasā |
vasaṃtyāṃ śailakanyāyāṃ tīrthe triṃśaddinaṃ tvatha || 16 ||
[Analyze grammar]

śambhorvirahasaṃtaptaṃ manaścaṃcalatāṃ yayau |
tatra śriyā sarojāni cakṣuṣotpalakānanam || 17 ||
[Analyze grammar]

maṃdasmitena kumudaṃ sasarja salilasya sā |
devyāstenodavāsena lokāstu nirupadravāḥ || 18 ||
[Analyze grammar]

kṛtārthāssahasā jātāstattatkālaphalānvitāḥ |
māsāṃte sā samuttīrya kṛtvā devyutsavaṃ tathā || 19 ||
[Analyze grammar]

kārtike māsi nakṣatre kṛttikākhye niśodaye |
pūjayitvā tapaḥsiddhairupacārairbahūdayaiḥ || 20 ||
[Analyze grammar]

aruṇādrimayaṃ liṃgaṃ tuṣṭāva jagadaṃbikā |
namaste viśvarūpāya śoṇācalavapurbhṛte || 21 ||
[Analyze grammar]

tejomayādriliṃgāya sarvapātatakanāśine |
brahmaṇā viṣṇunā ca tvaṃ duṣparicchedyavaibhavaḥ || 22 ||
[Analyze grammar]

agnirūpo'pi sañchāṃto lokānugrahaklṛptaye |
śaktyā ca tattvasaṃghātakaraḥ kālānalākṛtiḥ || 23 ||
[Analyze grammar]

adriśreṣṭhāruṇādrīśa rūpalāvaṇyavāridhe |
vicitrarūpametatte vedavedyasurārcitam || 24 ||
[Analyze grammar]

tejasāṃ deva sarveṣāṃ bījabhūtaṃ nigadyase |
divyaṃ hi paramaṃ tejastava deva maheśvara || 25 ||
[Analyze grammar]

yatpurā brahmaṇā dṛṣṭaṃ viṣṇunā ca vicinvatā |
adya pūtāsmi deveśa tava saṃdarśanādaham || 26 ||
[Analyze grammar]

tejo darśaya me divyaṃ sarvadoṣaharaṃ param |
prārthayaṃtyāṃ tadā devyāmaruṇādrimayaḥ śivaḥ || 27 ||
[Analyze grammar]

āvirbabhūva tejobhirāpūrya bhuvanāṃtaram |
koṭisūryodayaprakhyaṃ tulyaṃ pūrṇeṃdukoṭibhiḥ || 28 ||
[Analyze grammar]

kālāgnikoṭisaṃkāśaṃ tejaḥ paramadṛśyata |
praṇamya parayā bhaktyā munibhiḥ sārdhamaṃbikā || 29 ||
[Analyze grammar]

vismayākrāṃtahṛdayā nanaṃda nalinekṣaṇā |
atha tejonidhestasmādaruṇādriḥ samutthitaḥ || 30 ||
[Analyze grammar]

hiraṇmayo'bravīdvācaṃ puruṣaḥ kalakandharaḥ |
prasanno'smi tapobhiste sthāneṣu mama kalpitaiḥ || 31 ||
[Analyze grammar]

tejomayamidaṃ rūpamīkṣitaṃ ca tvayādhunā |
kāraṇairbahubhirlokānrakṣethāstvaṃ jaganmayi || 32 ||
[Analyze grammar]

tapāṃsi kuruṣe bhūmau kimanyatprārthitaṃ tava |
mallocanatviṣā tedya tamorāśiḥ samutthitaḥ || 33 ||
[Analyze grammar]

aśeṣo hi praśāṃto'bhūttejaso'sya nirīkṣaṇāt |
ayaṃ tu mahiṣo duṣṭo madbhaktiṃ liṃgapūjakaḥ || 34 ||
[Analyze grammar]

jagrāha sahasā hyetattasya liṃgaṃ gale sthitam |
anena bhakṣitaṃ tacca nāstikasyopadeśataḥ || 35 ||
[Analyze grammar]

akaronmayyaviśvāsaṃ liṃgarūpe gale sthite |
krameṇa sopi saṃprāpto munijanma manoharam || 36 ||
[Analyze grammar]

māmevābhyarcayandhyāyangaṇanāthatvamāvasan |
pūrvajanmani bhakto'yaṃ mahiṣopi tvayā hataḥ || 37 ||
[Analyze grammar]

ciraṃ malliṃgadhṛgyasmātsiddhirasyāpi devyataḥ |
śivaliṃgeṣvaviśvāsaḥ śivabhaktāvamānanam || 38 ||
[Analyze grammar]

na karttavyaṃ sadā bhaktaistasmādvai muktikāṃkṣibhiḥ |
dīkṣayā rahitaṃ ligaṃ yena saṃdhāryate balāt || 39 ||
[Analyze grammar]

na tādṛśaṃ phalaṃ datte vajravattaṃ nihaṃti ca |
na doṣastatra kiṃcitte śoṇācalanirīkṣaṇāt || 40 ||
[Analyze grammar]

saphalā nayanāvāptiḥ sarvadoṣavināśanāt |
tvatputrastanyadānena dhātryopakṛtamātmaje || 41 ||
[Analyze grammar]

tvāmapītakucāṃ cakre vatsalāṃ bhaktarakṣiṇīm |
nakṣatre kṛttikākhye'tra tava sannidhilobhataḥ || 42 ||
[Analyze grammar]

prāyaścittābhidhānena bhavāpītakucābhidhā |
pūjāśeṣaṃ samādhāya bhaktānugrahahetave || 43 ||
[Analyze grammar]

bhaja māṃ karuṇāmūrtirapītakucanāyikā |
iti devasya vacanamākarṇyātyaṃtaśītalam || 44 ||
[Analyze grammar]

praṇamya prārthitavatī provāca ca tamaṃbikā |
devadeva prasādena tvayānugrahaśālinā || 45 ||
[Analyze grammar]

etatte darśitaṃ tejo dṛṣṭaṃ devaiśca mānavaiḥ |
pratyakṣaṃ kṛttikāmāsi madvratāṃtamahotsave || 46 ||
[Analyze grammar]

nakṣatre kṛttikākhye'smiṃstejaste dṛśyatāṃ param |
tadvīkṣitamidaṃ tejaḥ paramaṃ prativatsaram || 47 ||
[Analyze grammar]

dṛṣṭvā samastairduritairmucyatāṃ sarvajaṃtavaḥ |
tatheti devadevena proce'thāṃtardadhe girau || 48 ||
[Analyze grammar]

pradakṣiṇaṃ cakārainaṃ sakhībhiḥ sā tatoṃ'bikā |
ghanaśyāmalayā kāṃtyā parito jṛṃbhamāṇayā || 49 ||
[Analyze grammar]

aruṇādrimayaṃ liṃgaṃ cakre marakataprabham |
maṃdaṃ carantī jātābhiḥ prabhābhiḥ pādapadmayoḥ || 50 ||
[Analyze grammar]

tastāra parito bhūmiṃ padmapatraiḥ sapallavaiḥ |
praphullakanakāṃbhojanīlotpaladalotkaraiḥ || 51 ||
[Analyze grammar]

arcayantīva śoṇādrimabhito dṛṣṭikāṃtibhiḥ |
indrādilokapālānāmaṃganābhirniṣevitā || 52 ||
[Analyze grammar]

prasāditā mātṛgaṇairgaṃdhadānavibhūṣaṇaiḥ |
chatracāmarabhṛṃgāratālavṛntaphalācikāḥ || 53 ||
[Analyze grammar]

vahantībhiḥ surastrībhirvṛtā munivadhūyutā |
pradakṣiṇaṃ cakārainamaruṇādriṃ svayaṃprabham || 54 ||
[Analyze grammar]

kāṃkṣantī śivasāyujyaṃ vivāhāgnimivādrijā |
tasyāṃ pradakṣiṇaṃ bhaktyā kurvāṇāyāṃ padepade || 55 ||
[Analyze grammar]

preṣitā śaṃbhunā devāḥ parivavruḥ sureśvarāḥ |
sarasvatīsamaṃ dhātrā viṣṇunā ca samaṃ ramā || 56 ||
[Analyze grammar]

sarvadikpālakāṃtābhiḥ sametā śailabālikā |
nirundhatīva devendraṃ salilairvaradānataḥ || 57 ||
[Analyze grammar]

adrināthasvarūpasya śītatvamiva kurvatī |
tapasyayā'vinābhāvāddevasyeva kṛtasmṛtiḥ || 58 ||
[Analyze grammar]

duṣkarasyodavāsasya bodhayantīva sādhutām |
ṛṣīṇāṃ devamānānāmupadeṣṭumiva kramāt || 59 ||
[Analyze grammar]

krīḍāmiva purābhyastāṃ tapasāpi ca saṃgatā |
ātmānaṃ virahottaptāmātmasthaṃ tādṛśa śivam || 60 ||
[Analyze grammar]

saṃciṃtya cobhayoḥ kartuṃ śītalatvaṃ jale sthitā |
tīrthānāmiva sarveṣāmudbhūtānāṃ śilātale || 61 ||
[Analyze grammar]

ādhikyamatha lokasya vaktukāmā svayaṃ sthitā |
duritaghnaṃ ca paṃcāgnimarthāvāsaṃ suduṣkaram || 62 ||
[Analyze grammar]

adhigamya tapastasya śāṃtiṃ kartumiva sthitā |
mahiṣāsurakaṃṭhottharaktadhārāpariplutam || 63 ||
[Analyze grammar]

kṣālayaṃtīva liṃgaṃ tadamalaistīrthavāribhiḥ |
aruṇākhyaṃ puraṃ ramyaṃ nirmitaṃ viśvakarmaṇā || 64 ||
[Analyze grammar]

apītakucanātheśaśoṇādrīśvaratuṣṭaye |
śṛṃgeṣu yasya saudheṣu vasantyo vārayoṣitaḥ || 65 ||
[Analyze grammar]

adhaḥkṛtābhrataḍito jigīṣaṃtīva cāmarīḥ |
yattuṃgasaudhaśṛṃgāgre gāyaṃtīrvārayoṣitaḥ || 66 ||
[Analyze grammar]

siddhacāraṇagaṃdharvavidyādharavirājitam |
aṣṭāpadarathākrāṃtamaṣṭavīthivirājitam || 67 ||
[Analyze grammar]

aṣṭāpadapathākāramaṣṭadikpālapūjitam |
aṣṭasiddhiyutaiḥ siddhairaṣṭamūrtipadāśrayaiḥ || 68 ||
[Analyze grammar]

aṣṭāṃgabhaktiyuktaistairyuktamaṣṭāṃgabuddhibhiḥ |
cāturvarṇyaguṇopetamupavarṇaṃ pariṣkṛtam || 69 ||
[Analyze grammar]

lasatsuvarṇaduvarṇaśālāmālāsamāsthitam |
śaṃkhaduṃdubhinissāṇamṛdaṃgamurajādibhiḥ || 70 ||
[Analyze grammar]

vīṇāveṇumukhaistālaiḥ sālāpairuparaṃjitam |
brahmaghoṣaninādena maharṣīṇāṃ śivātmanām || 71 ||
[Analyze grammar]

sevitavyaṃ dine divyasamadarśavṛṣadhvajam |
navaratnaprabhājālairnavagrahasamodayaiḥ || 72 ||
[Analyze grammar]

niśādivasayorevaṃ darśayanniva sarvadā |
viṣṇuḥ sthitaśca taṃ prītyā siṣeve purato vibhum || 73 ||
[Analyze grammar]

śakraḥ suragaṇaiḥ sārdhaṃ sahasrākṣaḥ samāyayau |
papāta divyagaṃdhāḍhyā puṣpavṛṣṭiḥ samaṃtataḥ || 74 ||
[Analyze grammar]

vyomagaṃgājalotsaṃgaśītalo marudāvavau |
atīva saurabhāmodavāsitākhiladiṅmukhaḥ || 75 ||
[Analyze grammar]

kanakāṃkitaśṛṃgāgraparidhūtavanāvaliḥ |
darpasaṃbhramasaṃnaddho nanāda vṛṣabho muhuḥ || 76 ||
[Analyze grammar]

vasaṃtapramukhāḥ sarve saharṣamṛtavaḥ puraḥ |
asevaṃta priyakaraiḥ puṣpaiḥ svayamathocitaiḥ || 77 ||
[Analyze grammar]

gaṇaiśca vividhākārāḥ siddhāśca paramarṣayaḥ |
surāśca kutukopetāḥ samāgacchandidṛkṣavaḥ || 78 ||
[Analyze grammar]

kuṃkumakṣodasaṃmiśrakarpūrarajasānvitaḥ |
caryāmuṣṭimahāsāraḥ samakīryata sarvataḥ || 79 ||
[Analyze grammar]

atha mṛdaṃgakamardalajhallarīpaṭahaduṃdubhitālasamanvitaiḥ |
jalajakīcakakāhalanisvanaiḥ surakṛtairbhuvana samapūrayan || 80 ||
[Analyze grammar]

suravadhūjananṛttaniraṃtarollulitatuṃbarugāyanagītibhiḥ |
abhivṛto munidevagaṇānvito vṛṣagataḥ samadarśi vṛṣadhvajaḥ || 81 ||
[Analyze grammar]

sarasametya śivaḥ karuṇānidhirnatamukhīmapi tāmapalajjayā |
lalitamaṃkamanaṃgaripuḥ śivāṃ dhṛtimahānadhiropya jaharṣa saḥ || 82 ||
[Analyze grammar]

lalitayā nijayā priyayānvitaḥ suramunīṃdrasamājasamāvṛtaḥ |
lalitamapsarasāṃ muhurādarānnaṭanamaikṣata gītisamanvitam || 83 ||
[Analyze grammar]

atha śivaḥ surarājasamarpitāñchubhapaṭīramukhānilasaurabhān |
himagiriprahitāṃśca samagrahīnmṛgamadaiḥ saha gaṃdhasamuccayān || 84 ||
[Analyze grammar]

samanulepitahārasumaṃḍitāvabhigatau sitatāṃ samalaṃkṛtau |
svayamapītakucākucakuḍmalāvaraṇaraṃbhaṇacañcalasatkarau || 85 ||
[Analyze grammar]

kaṭhinatuṃgaghanastanakorakasthagitamaṃgalagaṃdhamanoharām |
girisutāmadhigamya śivaḥ svayaṃ virahatāpamaśeṣamapākarot || 86 ||
[Analyze grammar]

atha vinodaśatairupalakṣitāṃ nijaviyogajatāpa kṛśānvitām |
aruṇaśailapatiḥ svayamadrijāṃ varamabhīpsitamarthaya cetyaśāt || 87 ||
[Analyze grammar]

sakutukaṃ praṇipatya nagātmajā puraripuṃ bhuvanatrayaguptaye |
imamayācata śoṇagirīśvaraṃ varamudāramanugrahasaṃmudam || 88 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māhaśvarakhaṇḍe'ruṇācalamāhātmye pūrvārdhe devyāḥ śivasamāgamavarṇanaṃnāma dvādaśo'dhyāyaḥ || 12 ||
[Analyze grammar]