Chapter 11

[English text for this chapter is available]

brahmovāca |
sa tu siṃhasthitāṃ gaurīṃ jvalaṃtī vividhāyudhām |
śailavarṣeṇa mahatā kupitaḥ samapūrayat || 1 ||
[Analyze grammar]

śaravarṣeṇa mahatā tannivārya vidūrataḥ |
bibheda niśitaiḥ śastrairaśeṣaṃ tasya vigraham || 2 ||
[Analyze grammar]

bhidyamāno'pi daityeṃdraḥ śailasārapradurdharaḥ |
viṣādaṃ nāgamatkiṃcidvavṛdhe yuddhadurmadaḥ || 3 ||
[Analyze grammar]

bhidyamānaḥ sa khaḍgena cakrairasibhirṛṣṭibhiḥ |
śūlena cāyudhaiścānyairaṃtardhānamagāhata || 4 ||
[Analyze grammar]

tataḥ siṃhākṛtirbhīmaḥ pracaṃḍaninadānanaḥ |
tīkṣṇadaṃṣṭraḥ śitanakhaḥ paribabhrāma kesarī || 5 ||
[Analyze grammar]

devīsiṃhaścapeṭena tāḍayāmāsa pāṇinā |
daityasiṃhasya ca nakhaistasya vakṣo vyadārayat || 6 ||
[Analyze grammar]

atha vyāghratayā prāptaḥ sphuṭavyāttānano mahān |
taṃ haṃtuṃ ca balāddevī vegena karamakṣipat || 7 ||
[Analyze grammar]

dīrghābhirnnīlarekhābhiḥ pūrṇaḥ piṃgalavigrahaḥ |
yānāvalibhirākīrṇaḥ svarṇādririva saṃcaran || 8 ||
[Analyze grammar]

mṛgairiva paritrātuṃ mucyamāno'grato balī |
jvalaṃtamiva roṣāgniṃ jihvāhetibhirāvahan || 9 ||
[Analyze grammar]

āgacchaṃtaṃ rayāddevī bhallena śaśivarcasā |
prativivyādha taṃ vyāghraṃ puratrayamiveśvaraḥ || 10 ||
[Analyze grammar]

sa bāṇastanmukhe magnastadraktena samukṣitaḥ |
jagāhe gaganaṃ bhittvā dehamasya vinirgataḥ || 11 ||
[Analyze grammar]

sa daityo vāraṇo bhūtvā devīmāśvabhyupāgamat |
balibhiḥ paśubhirbhinnaistasyāḥ prītimivāvahan || 12 ||
[Analyze grammar]

taṃ gajeṃdraṃ samāyāṃtaṃ madaklinnamahītalam |
devīsiṃhastadā dṛṣṭvā nanarda ca jaghāna ca || 13 ||
[Analyze grammar]

atha khaḍgadharo vīraścarmapāṇiḥ samudgataḥ |
vaktraṃ dadhāno babhrāma daṃṣṭrābhrukuṭibhīṣaṇam || 14 ||
[Analyze grammar]

devī ca vilasatkhaḍgacakracakralasatkarā |
yuyodha tena vīreṇa bhagnaśīrṣābhyapadyata || 15 ||
[Analyze grammar]

bhūyaḥ sa māhiṣaṃ rūpamāsthāyāsuramāyayā |
devyā yoddhuṃ pravavṛte yathāpūrvamanākulam || 16 ||
[Analyze grammar]

atha devaimunīṃdraiśca codito gautamo muniḥ |
prabodhayitumārebhe stutibhirjagadaṃbikām || 17 ||
[Analyze grammar]

tvayi sarvasya jagataḥ prāṇaśaktiḥ parā matā |
ojaḥśaktirjñānaśaktirbalaśaktiśca gamyate || 18 ||
[Analyze grammar]

kimetadadya mohāya yuddhamārabhyate tvayā |
upasaṃhriyatāmeṣa daityo bhuvanaguptaye || 19 ||
[Analyze grammar]

bhinnānāmasya dehānāmupasaṃharaṇāttava |
valayaścopadiśyante nigamoktā varapradāḥ || 20 ||
[Analyze grammar]

anyathā tṛṇakalpasya śatrorasya nibarhaṇe |
kālāgnivarcaso devi kimarthaṃ saṃbhramastviyān || 21 ||
[Analyze grammar]

svaśaktimavasaṃstabhya samākarṣayatāṃ ripoḥ |
prāṇaśaktiṃ triśūlena guṇatrayavapurdhṛtā || 22 ||
[Analyze grammar]

iti sma bodhitātena purā bhagavatī tadā |
mahiṣāsuramākramya triśūlenābhyadhārayat || 23 ||
[Analyze grammar]

anekagirisaṃkāśaṃ devyā vigrahamātmanaḥ |
aśaktastaṃ dhārayituṃ sasāda mahiṣāsuraḥ || 24 ||
[Analyze grammar]

niṣpiṣṭo viluṭhankrośannākrāṃtaśca parisphuran |
nirgaṃtumudgataśirā na śaśākāsurādhipaḥ || 25 ||
[Analyze grammar]

triśūlamukhabhinnāṃgaraktadhārāsamuddhataḥ |
samudra iva saṃjātaḥ saṃdhyāruṇakalevaraḥ || 26 ||
[Analyze grammar]

atha khaḍgena tīkṣṇena kartayitvā ca tacchiraḥ |
nanartta tasya śirasi tiṣṭhantī mahiṣārdinī || 27 ||
[Analyze grammar]

durgāṃ siddhāśca gandharvāḥ praśaśaṃsurmaharṣayaḥ |
puṣpavṛṣṭiśca mahatī devairmuktā samaṃtataḥ |
praṇataḥ prāṃjalirdevīṃ tuṣṭāva vibudhādhipaḥ || 28 ||
[Analyze grammar]

indra uvāca |
namaste jagatāṃ mātre bhūtānāṃ bījasaṃvide || 29 ||
[Analyze grammar]

bhaktiḥ śraddhā ca bhajatāṃ śaktiścāsi tvamaṃbike |
kāraṇaṃ paramā kīrtiḥ śātirdāṃtiḥ kalā kṣamā || 30 ||
[Analyze grammar]

ekaiva viśvarūpā tvaṃ nāmabhedernigadyase |
teṣuteṣu padeṣvasmāṃstapo'nuguṇasiddhiṣu || 31 ||
[Analyze grammar]

niyujya śatruṃ nirbhidya śivā jñeyā prakāśase |
hatoyaṃ mahiṣo duṣṭo vinikṛttaśca śāṃbhavi || 32 ||
[Analyze grammar]

chinnametasya tu śiraḥ sajīvamiva lakṣyate |
raktanetraṃ tīkṣṇaśṛgaṃ jvalajjihvaṃ calaṃ śiraḥ || 33 ||
[Analyze grammar]

ākramya tava tiṣṭhantyā rūpameva sadāstu naḥ |
cakraśṛṃgadhanurbāṇakhaṅgacarmavarābhayaiḥ || 34 ||
[Analyze grammar]

śūlaghaṇṭāṃkuśakaśākapālakuliśādibhiḥ |
aśeṣadevatāmūrtiraśeṣaideṃvatāyudhaiḥ || 35 ||
[Analyze grammar]

āpūritā tvamevāṃba sarvaśatrūnnihaṃsi naḥ |
āyudhānāṃ sahasrāṇi tanmayāste vibhūtayaḥ || 36 ||
[Analyze grammar]

tvajjitārātayaḥ sarve vividhāyudhavāhanāḥ |
rathanāgahayairyuktāḥ sasainyā api bhūbhṛtaḥ || 37 ||
[Analyze grammar]

kṣaṇena dagdhavīryāḥ syustvatprasādavivarjitāḥ |
apado'pyalpavīryo'pi tvatpādāṃbujasevakaḥ || 38 ||
[Analyze grammar]

trilokanāthatāṃ prāptaḥ prathate kīrtimaṇḍitaḥ |
tadrūpamidamatyugraṃ dhyāyatāmarcatāṃ sadā || 39 ||
[Analyze grammar]

na śatrubhyo bhayaṃ kiṃcidbhavedvijayaśālinām |
īdṛśaṃ sarvalokeṣu rūpaṃ te devavaṃditam || 40 ||
[Analyze grammar]

pūjyatāmiṣṭasiddhyarthaṃ devairbhṛtyaiśca sarvadā |
mātaraśca tvayā sṛṣṭāḥ sarvābhīṣṭaphalapradāḥ || 41 ||
[Analyze grammar]

sagaṇāḥ pratipūjyaṃtāṃ sarvasthāneṣu sarvadā |
ayaṃ ca nihato daityastvatpādakṛtalāṃchanaḥ || 42 ||
[Analyze grammar]

tava bhaktaiḥ sadā pūjyastvatpramādāttvadagrataḥ |
itthaṃ surendrapraṇutā sarvarṣisurasevitā || 43 ||
[Analyze grammar]

tatheti varadā devī sasarja ca divaṃ prati |
svayamapyātmanastatra tadrūpaṃ vividhāyudham || 44 ||
[Analyze grammar]

saṃsthāpya mātṛbhiḥ sārdhaṃ sthānarakṣaṇamātanot |
saṃgṛhya vimalaṃ rūpaṃ sakhījanasamāvṛtā || 45 ||
[Analyze grammar]

mahiṣasya śiro'paśyadvikṛtaṃ khaṅgadhārayā |
kathayantī punastasya citraṃ lokavibhūṣaṇam || 46 ||
[Analyze grammar]

sakhībhiḥ saha sā bālā kaṇṭhaṃ tasya vyalokayat |
apaśyacca tadā ligaṃ karttuṃ tasya ca pūjanam || 47 ||
[Analyze grammar]

ādatta sahasā gaurī ligaṃ tasya gale sthitam |
ālokayacca suciraṃ raktadhārāpariplutam || 48 ||
[Analyze grammar]

āsajjata punarliṃgamasyāḥ pāṇitalaṃ gatam |
vimocayitumudyuktā nāśaknollagnamaṃjasā || 49 ||
[Analyze grammar]

aciṃtayacca sā devī kimetaditi vismayāt |
viṣādena ca saṃyuktā maharṣīṇāṃ puraḥ sthitā || 50 ||
[Analyze grammar]

āhataḥ śivabhakto'yamiti śokaṃ samāviśat |
agarhata bhṛśaṃ mauḍhyamātmanaḥ strīsvabhāvajam || 51 ||
[Analyze grammar]

avicāra samārabdhaṃ śivabhaktanibarhaṇam |
upatāpaparītāṃgī gautamaṃ munisattamam || 52 ||
[Analyze grammar]

upagamyābravīdbālā sāhasaṃ kṛtamātmanā |
bhagavansarvadharmajña gautamārya munīśvara || 53 ||
[Analyze grammar]

mānyayā dharmarūpeṇa ko'pyadharmaḥ prakalpitaḥ |
devānāṃ rakṣaṇaṃ kartumabhayaṃ dātumudyatā || 54 ||
[Analyze grammar]

ajñānānmahiṣaṃ daityaṃ śivabhaktimamardayam |
rajasākrāntabuddhīnāṃ na bhaveddharmasaṃgrahaḥ || 55 ||
[Analyze grammar]

guruprasādasulabhaḥ sphuradvighnaśatākulaḥ |
sudurdharṣā nirācāradurdamāḥ śivasaṃśrayāḥ || 56 ||
[Analyze grammar]

viśeṣato liṃgadharāḥ śivastānbahu manyate |
purā puratrayāvāsā daiteyā liṃgadhārakā || 57 ||
[Analyze grammar]

ajitāḥ śaṃbhunā pūrvaṃ muktaliṃgā niṣūditāḥ |
asya kaṃṭhasthitaṃ liṃgaṃ mama pāṇiṃ na muṃcati || 58 ||
[Analyze grammar]

kathaṃ pāpaṃ nirasyāmi śivabhaktavadhāśritam |
asya kaṃṭhasthitaṃ liṃgaṃ dhārayaṃtī taponvitā || 59 ||
[Analyze grammar]

tīrthayātrāṃ kariṣyāmi yāvacchaṃbhuḥ prasīdati |
punaḥ kailāsamukhyeṣu śaṃbhusthāneṣu bhūriṣu || 60 ||
[Analyze grammar]

tīrtheṣu racitasnānā lapsye pāpaviśodhanam |
iti tasyāḥ pariśrāṃtiṃ durdharmapariśaṃkayā || 61 ||
[Analyze grammar]

ākarṇya śivadharmajño bhayārttāṃ tāmavocata |
mā bhaiṣīrgirije mohācchivabhakto hatastviti || 62 ||
[Analyze grammar]

dharmasūkṣmārthavettārau durlabhā girikanyake |
sadā śivasya vadanaiḥ sadyojātādi saṃśritaiḥ || 63 ||
[Analyze grammar]

āgamāḥ paṃcabhiḥ proktā aṣṭāviṃśatikoṭayaḥ |
nirṇayāḥ śivabhaktānāṃ śivamārgasya śobhanāḥ || 64 ||
[Analyze grammar]

teṣuteṣu munīṃdraiśca natvaiva pratipadyate |
kālo mukhaṃ ca kaṃkālaṃ śaivaṃ pāśupataṃ tathā || 65 ||
[Analyze grammar]

mahāvrataṃ paṃca caitāḥ śivamārgapravṛttayaḥ |
bhedāśca bahavasteṣāmanyonyasya śive ratāḥ || 66 ||
[Analyze grammar]

sādhya eko hi balavānsarvaistairaniśaṃ śivaḥ |
sarva eva sadā pūjyāḥ svadharmapariniṣṭhitaiḥ || 67 ||
[Analyze grammar]

amatsaraiḥ śive bhaktaiḥ śivājñāparipālakaiḥ |
vedaiśca bahubhiryajñairbhaktyā ca parayā śivaḥ || 68 ||
[Analyze grammar]

ārādhyate mahādevaḥ sarvadā sarvadāyakaḥ |
jīvahiṃsā na karttavyā viśeṣaṇa tapasvibhiḥ || 69 ||
[Analyze grammar]

śivadharmasya bhettāro nihaṃtavyāstathāṃjasā |
na veṣajuṣi vīkṣeta na ligaṃ naiva saṃbhavam || 70 ||
[Analyze grammar]

śivadharmasya bhettāraṃ hanyādevāvicārayan |
bahubhiḥ sphūrtayā buddhyā dharmavidbhirnirūpite || 71 ||
[Analyze grammar]

śivadharmasya vilaye sadyaḥ śaktiḥ pravartate |
asya karma punardiṣṭaṃ liṃgamaiśvaryacarcitam || 72 ||
[Analyze grammar]

na jetuṃ śakyate devi tenāsau sarvadaivataiḥ |
yadayaṃ nihato devi tvayā śaṃkaramānyayā || 73 ||
[Analyze grammar]

ākrāṃtaḥ śāpadoṣeṇa maharṣīṇāṃ śivāśrayāt |
atha te kupitāstasya vaiṣamyādavamānataḥ || 74 ||
[Analyze grammar]

śepurmahiṣavadduṣṭo mahiṣo'yaṃ bhavatviti |
tatastadvacanātsadyo mahiṣo'bhūtkṣaṇāttathā || 75 ||
[Analyze grammar]

praṇamya toṣayāmāsa yayāce śāpamocanam |
dattvā prakāmarūpatvaṃ dadurasmai prasāditāḥ || 76 ||
[Analyze grammar]

mahiṣatvepi saṃhāraṃ svayaṃ devyā śivājñayā |
viṣādo na ca karttavyo aṃgadarśanatastvayā || 77 ||
[Analyze grammar]

siddhānāṃ śivarūpāṇāmavajñā kaṃ na bādhate |
mahiṣatve samutpanne doṣeṇa samupasthite || 78 ||
[Analyze grammar]

siddhaprasādāllabdho'yaṃ śāpanāśastvayā kṛtaḥ |
sarve lokāśca saṃtrātā duṣṭoyaṃ parirakṣitaḥ || 79 ||
[Analyze grammar]

śāpadoṣasamutpanne mahiṣatve vimocite |
tvayā ca giriśaprītyai tapaḥ kurvāṇayādrije || 80 ||
[Analyze grammar]

draṣṭavyaṃ taijasaṃ liṃgamaruṇācalasaṃjñitam |
pūrvajanmani bhakto'yamaruṇādripateḥ sphuṭam || 81 ||
[Analyze grammar]

mahiṣatve madākrāṃtaḥ paraṃ liṃgena saṃgataḥ |
bhaktyā liṃgadharaṃ haṃtuṃ kaḥ samartho jagattraye || 82 ||
[Analyze grammar]

dṛṣṭāḥ puratraye pūrvaṃ rudreṇa pūjitāstrayaḥ |
tvatkhaḍgaparikṛttena kaṃṭhenāsya varānane || 83 ||
[Analyze grammar]

dīkṣādirahitaṃ liṃgaṃ dattaṃ haṃtīti coditam |
kṛtaṃ hi mahiṣeṇāpi bhaktito liṃgadhāraṇam || 84 ||
[Analyze grammar]

kadācitkṣapaṇoktānāṃ vibhāṣātpratyayaṃ gataḥ |
pūrvajanmatapoyogātsmaraṇo liṃgadhāraṇāt || 85 ||
[Analyze grammar]

tvatpādapadmasaṃsparśādayaṃ mukto na saṃśayaḥ |
maduktaniṣkṛtīnāṃ tu pātakānāṃ ca nāśanam || 86 ||
[Analyze grammar]

darśanaṃ śailavaryasya prāyaścittaṃ paraṃ matam |
saṃsthāpya vividhāñchaivāñchivasiddhāṃtavedinaḥ || 87 ||
[Analyze grammar]

āvāhya sarvatīrthāni sarvadoṣanivṛttaye |
saraḥ kimapi saṃpādya snātvā tatra varānane || 88 ||
[Analyze grammar]

aghamarṣaṇasaṃyuktā saliṃgā snānamācara |
trisaṃdhyaṃ caiva māsāṃte devayāgamahotsave || 89 ||
[Analyze grammar]

ārādhayopacāraistvamaruṇādrimayaṃ śivam || 90 ||
[Analyze grammar]

evaṃ tasya munerniśamya vacanaṃ śaivārthasaṃbhāvitaṃ prītā devanamaskṛtā girisutā devī jagadrakṣikā |
śaivaṃ dharmamimaṃ vidhātumucitaṃ śoṇācalasyāgratastīrthāgāhanabuddhimāśu vidadhe kartuṃ tvaghakṣālanam || 91 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe mahiṣāsuravadhottaraṃ devīpāṇau mahiṣāsuraśiraḥsaṃlagratāvṛttāṃtavarṇanaṃnāmaikādaśo'dhyāyaḥ || 11 ||
[Analyze grammar]