Chapter 2

[English text for this chapter is available]

brahmovāca |
athāhamuccaranvedānaśeṣairvadanaiḥ śivam |
astauṣaṃ bhaktisaṃpūrṇaṃ kṛtvā mānasamarcanam || 1 ||
[Analyze grammar]

namaḥ śivāya mahate sarvalokaikahetave |
yena prakāśyate sarvaṃ dhriyate satataṃ namaḥ || 2 ||
[Analyze grammar]

viśvavyāptamidaṃ tejaḥ prakāśayati saṃtatam |
nekṣaṃte tvaddayāhīnā jātyaṃdhā bhāskaraṃ yathā || 3 ||
[Analyze grammar]

bhūliṃgamamalaṃ hyetaddṛśyamadhyātmacakṣuṣā |
aṃtassthaṃ vā bahissthaṃ vā tvadbhaktairanubhūyate || 4 ||
[Analyze grammar]

aparicchedyamākāramaṃtarātmani yoginaḥ |
tadetattava deveśa jvalitaṃ darpaṇo yathā || 5 ||
[Analyze grammar]

athavā śāṃkarī śaktiḥ satyā'ṇorapyaṇīyasī |
matto nānyataraḥ kaścidyanmayyapi vilīyate || 6 ||
[Analyze grammar]

aṇuste karuṇāpātraṃ mahattvaṃ dhruvamaśnute |
nādhiko'sti parastvatto na matto'pi tadāśrayāt || 7 ||
[Analyze grammar]

tvayyarpitaṃ manastvato na viyogamapekṣate |
vācaḥ kathaṃ pravṛttiḥ syāttava vaibhavakīrttane || 6 ||
[Analyze grammar]

svayamīśa mahādeva prasīda bhuvanādhika |
ādiśa prayataṃ bhaktamapekṣitaniyuktiṣu || 9 ||
[Analyze grammar]

idaṃ vijñāpya vinayānnamaskṛtvā punaḥpunaḥ |
prāṃjalirdevadeveśaṃ nyaṣīdaṃ savidhe vibho || 10 ||
[Analyze grammar]

atha viṣṇurnavāṃbhodagaṃbhīradhvanirabhyadhāt |
vācaḥ kṛtārthanbhūyaḥ śuklāḥ śaṃkarakīrttanaiḥ || 11 ||
[Analyze grammar]

jaya tribhuvanādhīśa jaya gaṃgādhara prabho |
jaya nātha virūpākṣa jaya caṃdrārddhaśekhara || 12 ||
[Analyze grammar]

avyājamamitaṃ śaṃbho kāruṇyaṃ tava varddhate |
yena nirdhūtamakhilaṃ bhakteṣu jñānamāhitam || 13 ||
[Analyze grammar]

pālanaṃ sarvavidyānāṃ prāpaṇaṃ bhūtisaṃcayaiḥ |
purāṇaṃ ca saputrāṇāṃ pitureva pravardhanam || 14 ||
[Analyze grammar]

śatānāmapi mūrtīnāmekāmapi navaiḥ stavaiḥ |
stotuṃ na śaknumeśāna samavāyastu ki punaḥ || 15 ||
[Analyze grammar]

tvameva tvāmalaṃ vettuṃ yadi vā tvatprasādataḥ |
bhramaraḥ kīṭamākṛṣya svātmānaṃ kiṃ na cānayet || 16 ||
[Analyze grammar]

devāstvadaṃśasaṃbhūtiprabhavo na bhavanti kim |
apyāyasyāgnikīlasya dāhe śaktirna kiṃ bhavet || 17 ||
[Analyze grammar]

deśakālakriyāyogādyathāgnerbhedasambhavaḥ |
tathā viṣayabhedena tvameko'pi vibhidyase || 18 ||
[Analyze grammar]

anugrahaparo deva mūrtiṃ darśaya śaṃkara |
āvayorakhilādhāra nayanānaṃdadāyinīm || 19 ||
[Analyze grammar]

evaṃ praṇamatordevaḥ śraddhābhaktisamanvitam |
prasasāda paraṃ śaṃbhuḥ stuvatorāvayordvayoḥ || 20 ||
[Analyze grammar]

tejaḥstaṃbhātpunastasmāddevaścandrārddhaśekharaḥ |
āvirbabhūva puruṣaḥ kapilaḥ kālakandharaḥ || 21 ||
[Analyze grammar]

paraśuṃ bālahariṇaṃ karairabhayaviśramau |
dadhānaḥ puruṣo'vādītputrāvāvāmiti prabhuḥ || 22 ||
[Analyze grammar]

parituṣṭo'smi yuvayorbhaktyā yuktātmanormayi |
bhavataṃ sarvalokānāṃ sṛṣṭirakṣādhipau yuvām || 23 ||
[Analyze grammar]

yuvayoriṣṭasiddhyarthamāvirbhūto'smyahaṃ yataḥ |
varaṃ vṛṇutamanyaṃ ca varado'hamupāgataḥ || 24 ||
[Analyze grammar]

iti devasya vacanātsaprītau ca kṛtāṃjalī |
vijñāpayāmāsivatau svaṃ svamarthaṃ pṛthakpṛthak || 25 ||
[Analyze grammar]

ahaṃ mantraiḥ śiśuprāyajagattrayavidhāyakaḥ |
saṃstuvanvaidikairmaṃtrairīśānamaparājitam || 26 ||
[Analyze grammar]

namasyehamidaṃ rūpaṃ śaśvadvaradamīśvaram |
tejomayaṃ mahādevaṃ yogidhyeyaṃ niraṃjanam || 27 ||
[Analyze grammar]

āpūryamāṇaṃ bhavatā tejasā gaganāṃtaram |
paripṛcchyaḥ surāvāsaḥ kṣaṇāddeva bhaviṣyati || 28 ||
[Analyze grammar]

siddhacāraṇagandharvā devāśca paramarṣayaḥ |
nāvasandivi saṃcāraṃ labheraṃstejasā tava || 29 ||
[Analyze grammar]

pṛthvī ca sakalā caiva tapyamānā tavaujasā |
carācarasamutpattikṣamā naiva bhavipyati || 30 ||
[Analyze grammar]

upasaṃhṛtya tejaḥ svamaruṇācalasaṃjñayā |
bhava sthāvaraliṃgaṃ tvaṃ lokānugrahakāraṇāt || 31 ||
[Analyze grammar]

jyotirmayamidaṃ rūpamaruṇācalasaṃjñitam |
ye namanti narā bhaktyā te bhavantyamarādhikāḥ || 32 ||
[Analyze grammar]

sevaṃtāṃ sakalā lokāḥ siddhāśca paramarṣayaḥ |
gaṇāśca vividhā bhūmau mānuṣaṃ bhāvamāsthitāḥ || 33 ||
[Analyze grammar]

divyārāma samudbhūtakalpakādyāḥ suradrumāḥ |
sevinastvāṃ prarohaṃtu bharitā vividhaiḥ phalaiḥ || 34 ||
[Analyze grammar]

divyauṣadhigaṇāssarve siṃhādyā mṛgajātayaḥ |
praśāṃtāḥ parivarttaṃtā pāpakalmaṣanāśanam || 35 ||
[Analyze grammar]

ayanadvayabhinnena gamanenāpi saṃyutaḥ |
na laṃghayiṣyati raviḥ śṛṃgaṃ liṃgatanostava || 36 ||
[Analyze grammar]

divya duṃdubhiśaṃkhānāṃ ghoṣaiḥ puṣpaughavṛṣṭibhiḥ |
sevito bhava deva tvamapsaronṛtyagītibhiḥ || 37 ||
[Analyze grammar]

amaratvaṃ ca siddhatvaṃ rasasiddhīśca nirvṛtim |
labhaṃtāṃ mānuṣā nityaṃ tvatsaṃnidhimupāgatāḥ || 38 ||
[Analyze grammar]

īśatvaṃ ca vaśitvaṃ ca saubhāgyaṃ kālavaṃcanam |
tvāmāśritya narāssarve labhaṃtāmaruṇācala || 39 ||
[Analyze grammar]

sarvāvayavadānena sarvavyādhivināśanāt |
sarvābhīṣṭapradānena dṛśyo bhava mahītale || 40 ||
[Analyze grammar]

tatheti varadaṃ devamaruṇādripatiṃ śivam |
praṇamya kamalānāthaḥ prārthayannidamabravīt || 41 ||
[Analyze grammar]

prasīda karuṇāpūrṇa śoṇaśaileśvara prabho |
maheśa sarvalokānāṃ hitāya prakaṭodaya || 42 ||
[Analyze grammar]

yadāhaṃ tvāmupāśritya jagadrakṣaṇadakṣiṇaḥ |
śrīpatitvamanuprāptastadā bhaktā bhavaṃtu te || 43 ||
[Analyze grammar]

nālpapuṇyairupāsyeta tvadrūpaṃ mahadadbhutam |
mayā ca brahmaṇā caivamadṛṣṭapadaśekharaḥ || 44 ||
[Analyze grammar]

pradakṣiṇānamaskārairnṛtyagītaiśca pūjanaiḥ |
tvāmarcayaṃti ye martyāḥ kṛtārthāste gatāṃhasaḥ || 45 ||
[Analyze grammar]

upavāsairvrataiḥ satrairupahāraistathārcanaiḥ |
tvāmarcayaṃti manujāḥ sārvabhaumā bhavaṃtu te || 46 ||
[Analyze grammar]

ārāmaṃ maṃḍapaṃ cāpi kūpaṃ vidhiviśodhanam |
kurvatāmaruṇādrīśa saṃnidhāne punarbhava || 47 ||
[Analyze grammar]

aṃgapradakṣiṇaṃ kurvannaṣṭaiśvaryasamanvitaḥ |
aśeṣapātakaiḥ sadyo vimukto nirmalāśayaḥ || 48 ||
[Analyze grammar]

āvāmapyavimuṃcaṃtau sadā tvatpādapaṃkajam |
dhyātavyaṃ manujaiḥ sarvaistava saṃnidhimāgataiḥ || 49 ||
[Analyze grammar]

tathāstviti varaṃ dattvā viṣṇave caṃdraśekharaḥ |
bharuṇācalarūpeṇa prāptaḥ sthāvaraliṃgatām || 50 ||
[Analyze grammar]

taijasaṃ liṃgametaddhi sarvalokaikakāraṇam |
aruṇādririti khyātaṃ dṛśyate vasudhātale || 51 ||
[Analyze grammar]

yugāṃtasamaye kṣubdhaiścaturbhirapi sāgaraiḥ |
api nirmagnalokāṃtairaspṛṣṭāṃtikabhūtalam || 52 ||
[Analyze grammar]

gajapramāṇaiḥ pṛṣataiḥ pūrayaṃto jagattrayam |
puṣkarādyā mahāmeghā viśrāṃtā yasya sānuni || 53 ||
[Analyze grammar]

pravṛtte bhūtasaṃhāre prakṛtau pratisaṃcare |
bhaviṣyatsarvabījāni niṣeduryatra niścayam || 54 ||
[Analyze grammar]

mayā cāhūyamānebhyaḥ pralayānaṃtaraṃ punaḥ |
yatpādaseviviprebhyo vedādhyayanasaṃgrahaḥ || 55 ||
[Analyze grammar]

sarvāsāmapi vidyānāṃ kalānāṃ śāstrasaṃpadām |
āgamānāṃ ca vedānāṃ yatra satyavyavasthitiḥ || 56 ||
[Analyze grammar]

yadguhāgahvarāṃtassthā munayaḥ śaṃsitavratāḥ |
jaṭinaḥ saṃprakāśaṃte koṭisūryāgnitejasaḥ || 57 ||
[Analyze grammar]

paṃcabrahmamayairmaṃtraiḥ paṃcākṣaravapurdharaiḥ |
akārapīṭhikārūḍho nādātmā yaḥ sadāśivaḥ || 58 ||
[Analyze grammar]

aṣṭabhiśca sadā liṃgairaṣṭadikpālapūjitaḥ |
aṣṭamūrttitayā yo'yamaṣṭasiddhipradāyakaḥ || 59 ||
[Analyze grammar]

yatra siddhāstathā lokānsvānsvānmuktvā sureśvarāḥ |
apekṣaṃte sthitā muktiṃ vihāya kanakācalam || 60 ||
[Analyze grammar]

evaṃ vasuṃdharāpuṇyaparipākasamuccayaḥ |
aruṇādririti khyāto bhaktabhaktivarapradaḥ || 61 ||
[Analyze grammar]

kailāsānmeruśikharādāgatairdevasaṃcayaiḥ |
pūjyate śoṇaśailātmā śaṃbhuḥ sarvavarapradaḥ || 62 ||
[Analyze grammar]

iti kamalajavaktrapadmajāṃ taṃ muditamanāḥ sanako niśamya bhaktyā |
viracitavinayaḥ praṇamya putraḥ pitaramapṛcchadaśeṣavedasāram || 63 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe brahmaviṣṇustutipūrvakaṃ śaṃkarasya sthāvaraliṃgamāhātmyavarṇanaṃnāma dvitīyo'dhyāyaḥ || 2 ||
[Analyze grammar]