Chapter 43

[English text for this chapter is available]

śrīnārada uvāca |
tato'haṃ pārtha bhūyo'pi janānugrahakāmyayā |
pratyakṣadevaṃ mārtaṃḍamatrānetumiyeṣa ha || 1 ||
[Analyze grammar]

sarveṣāṃ prāṇināṃ yasmāduḍupo bhagavānraviḥ |
ihāmutra ca kauṃteya viśvaddhārī ravirmataḥ || 2 ||
[Analyze grammar]

ye smaraṃti raviṃ bhaktyā kīrtayaṃti ca ye narāḥ |
pūjayaṃti ca ye nityaṃ kṛtārthāste na saṃśayaḥ || 3 ||
[Analyze grammar]

sūryabhaktiparā ye ca nityaṃ tadgatamānasāḥ |
ye smaraṃti sadā sūryaṃ na te duḥkhasya bhājinaḥ || 4 ||
[Analyze grammar]

bhavanāni manojñāni vividhābharaṇāḥ striyaḥ |
dhanaṃ cādṛṣṭaparyaṃtaṃ sūryapūjāvidheḥ phalam || 5 ||
[Analyze grammar]

durlabhā bhaktiḥ sūrye vā durlabhaṃ tasya cārcanam |
dānaṃ ca durlabhaṃ tasmai tato homaśca durlabhaḥ || 6 ||
[Analyze grammar]

namaskārādisaṃyuktaṃ ravirityakṣaradvayam |
jihvāgre vartate yasya saphalaṃ tasya jīvitam || 7 ||
[Analyze grammar]

ityahaṃ hṛdi saṃciṃtya māhātmyaṃ ravijaṃ mahat |
pūrṇaṃ varṣaśataṃ pārtha raviṃ bhaktyā hyatoṣayam || 8 ||
[Analyze grammar]

japena suviśuddhena cchandasāṃ vāyubhojanaḥ |
tataḥ khāddvitīyāṃ mūrtiṃ kṛtvā yogabalādvibhuḥ || 9 ||
[Analyze grammar]

tejasā durdṛśo bhāsvānpratyakṣaḥ samajāyata || 10 ||
[Analyze grammar]

tamahaṃ prāṃjalirbhūtvā namaskṛtya raviṃ prabhum |
sāmabhirvividhairdevaṃ paryatoṣayamīśvaram || 11 ||
[Analyze grammar]

tuṣṭo māmāha varado devarṣe suciraṃ tvayā |
tapasārādhito'smīti varaṃ vṛṇu yathepsitam || 12 ||
[Analyze grammar]

ityukto'haṃ lokanāthaṃ prāṃjaliḥ prāstuvaṃ vacaḥ |
yadi tuṣṭo bhavānmahyaṃ yadi deyo varo mama || 13 ||
[Analyze grammar]

tataste kāmarūpe yā kalā nātha pravartate |
rājavardhanarājñā yā'rādhitā ca janaiḥ purā || 14 ||
[Analyze grammar]

tayā ca kalayā bhāno sadātra sthātumarhasi |
tatastatheti devena prokte tuṣṭena bhārata || 15 ||
[Analyze grammar]

asthāpayamahaṃ sūryaṃ bhaṭṭādityābhidhānakam |
bhaṭṭenasthāpitaṃ yasmānmayā tasmādravirjagau || 16 ||
[Analyze grammar]

tataḥ saṃpūjya taṃ puṣpaiḥ kṛtāveśamahaṃ ravim |
bhaktyudrekāplutāṃgo'tha stutimetāmathācaram || 17 ||
[Analyze grammar]

sarvavedarahasyaiśca nāmabhiśca śatāṣṭabhiḥ |
saptasaptiraciṃtyātmā mahākāruṇikottamaḥ || 18 ||
[Analyze grammar]

saṃjīvano jayo jīvo jīvanātho jagatpatiḥ |
kālāśrayaḥ kālakartā mahāyogī mahāmatiḥ || 19 ||
[Analyze grammar]

bhūtāṃtakaraṇo devaḥ kamalānandanandanaḥ |
sahasrapācca varado divyakuṇḍalamaṇḍitaḥ || 20 ||
[Analyze grammar]

dharmapriyocitātmā ca savitā vāyuvāhanaḥ |
ādityo'krodhanaḥ sūryo raśmimālī vibhāvasuḥ || 21 ||
[Analyze grammar]

dinakṛddinahṛnmaunī suratho rathināṃvaraḥ |
rājñīpatiḥ svarṇaretāḥ pūṣā tvaṣṭā divākaraḥ || 22 ||
[Analyze grammar]

ākāśatilako dhātā saṃvibhāgī manoharaḥ |
prajñaḥ prajāpatirdhanyo viṣṇuḥ śrīśo bhiṣagvaraḥ || 23 ||
[Analyze grammar]

ālokakṛllokanātho lokapālanamaskṛtaḥ |
viditāśayaśca sunayo mahātmā bhaktavatsalaḥ || 24 ||
[Analyze grammar]

kīrtikīrtikaro nityo rociṣṇuḥ kalmaṣāpahaḥ |
jitānando mahāvīryo haṃsaḥ saṃhārakārakaḥ || 25 ||
[Analyze grammar]

kṛtakṛtyaḥ susaṃgaśca bahujño vacasāṃ patiḥ |
viśvapūjyo mṛtyuhāri ghṛṇī dharmasya kāraṇam || 26 ||
[Analyze grammar]

praṇatārtiharo'roga āyuṣyamānsukhadaḥ sukhī |
maṅgalaṃ puṇḍarīkākṣo vratī vrataphalapradaḥ || 27 ||
[Analyze grammar]

śuciḥ pūrṇo mokṣamārgadātā bhoktā maheśvaraḥ |
dhanvaṃtariḥ priyābhāṣī dhanurvedavidekarāṭa || 28 ||
[Analyze grammar]

jagatpitā dhūmaketurvidhūto dhvāṃtahā guruḥ |
gopatiśca kṛtātithyaḥ śubhācāraḥ śucipriyaḥ || 29 ||
[Analyze grammar]

sāmapriyo lokabandhurnaikarūpo yugādikṛt |
dharmaseturlokasākṣī kheṭataṛ sarvadaḥ prabhuḥ || 30 ||
[Analyze grammar]

mayaivaṃ saṃstuto bhānurnāmnāmaṣṭaśatena ca |
tuṣyatāṃ sarvalokānāṃ sarvalokapriyo vibhuḥ || 31 ||
[Analyze grammar]

ityevaṃ saṃstavātprīto bhāskaro māmavocata |
sadātra kalayā sthāsye devarṣe tvatpriyepsayā || 32 ||
[Analyze grammar]

yo māmatra mahābhaktyā bhaṭṭādityaṃ prapūjayet |
sahasraśaḥ kā marūpe saṃpūjyāpnoti tatphalam || 33 ||
[Analyze grammar]

māmuddiśya ca yo vipraḥ svalpaṃ vā yadi vā bahu |
dāsyate'trākṣayaṃ tacca grahīṣye karajaṃ yathā || 34 ||
[Analyze grammar]

raktotpalaiśca kahlāraiḥ kesaraiḥ karavīrakaiḥ |
śatatrayairmahāpdamai ravivāreṇa mānavaḥ || 35 ||
[Analyze grammar]

saptamyāmatha ṣaṣṭhyāṃ vā ye'rcayiṣyaṃti māmiha |
yānyānprārthayate kāmāṃstāṃtānprāpsyati niścitam || 36 ||
[Analyze grammar]

darśanānmama bhaktyā ca nāśo vyādhidaridrayoḥ |
praṇāmātsvargamāpnoti śrutvā mokṣaṃ ca nityaśaḥ || 37 ||
[Analyze grammar]

abhaktiṃ yaśca kartā me sa gacchenniściṃtaṃ kṣayam |
aṣṭottaraśataṃ nāma mamāgre yattvayeritam || 38 ||
[Analyze grammar]

trikālamekakālaṃ vā paṭhataḥ śrṛṇuyatphalam |
kīrtimānsubhago vidvānsusukhī priyadarśanaḥ || 39 ||
[Analyze grammar]

bhavedvarṣaśatāyuśca sarvarogavivarjitaḥ |
yastvidaṃ śrṛṇuyānnityaṃ paṭhedvā prayataḥ śuciḥ || 40 ||
[Analyze grammar]

akṣayaṃ svalpamapyannaṃ bhavettasyopasādhitam |
vijayī ca bhavennityaṃ tathā jātismaro bhavet || 41 ||
[Analyze grammar]

tasmādetattvayā jāpyaṃ paraṃ svastyayanaṃ mahat |
tathā mamāgre kuṃḍaṃ ca kuru snānārthamuttamam || 42 ||
[Analyze grammar]

kāmarūpakalā yatra tatra kuṃḍaṃ vane bhavet |
evaṃ dattvā varānbhānustatraivāṃ taradhīyata || 43 ||
[Analyze grammar]

tato bhāskaravākyena siddheśasya ca savyataḥ |
vanamadhye mayā kuṃḍaṃ kṛtaṃ darbhaśalākayā || 44 ||
[Analyze grammar]

kāmarūpabhavaṃ kuṃḍaṃ vṛkṣāste cāpi bhārata |
saṃlīnāstanmahāścaryaṃ mamājāyata cetasi || 45 ||
[Analyze grammar]

māghamāsasya śuklāyāṃ saptamyāṃ strī naro'pi vā |
snānaṃ kuṃḍe śubhaṃ kṛtvā bhaṭṭādityaṃ prapaśyati || 46 ||
[Analyze grammar]

tasyānaṃtaṃ bhavetpuṇyaṃ rathaṃ yaśca prapūjayet |
rathayātrāṃ ca kurute yasminyasminnasau pathi || 47 ||
[Analyze grammar]

ye ca paśyaṃti lokāste dhanyāḥ sarve na saṃśayaḥ |
putradhānyadhanairyuktā nīrujastejasā'nvitāḥ || 48 ||
[Analyze grammar]

bhaviṣyaṃti narāste ye kārayaṃti rathotsavam |
gaṃgādisarvatīrtheṣu yatphalaṃ kīrtitaṃ budhaiḥ || 49 ||
[Analyze grammar]

bhaṭṭādityasya kuṃḍe ca tatphalaṃ saptamīdine |
tatra kuṃḍe ca yaḥ snātvā sūryārghyaṃ prayacchati |
kapilā gośatasyāsau dattasya phalamaśnute || 50 ||
[Analyze grammar]

arjura uvāca |
vāsudevādayaḥ sarve vadaṃtyevaṃ mahāmune || 51 ||
[Analyze grammar]

bhāskarārghaṃ vinā pātaḥ kṛtaṃ sarvaṃ ca niṣphalam |
tasyāhaṃ śrotumicchāmi vidhiṃ vidhividāṃ vara || 52 ||
[Analyze grammar]

nārada uvāca |
yathā brahmādayo devā yacchaṃtyarghaṃ mahātmane |
bhāskarāya śrṛṇu tvaṃ taṃ vidhiṃ sarvāghanāśanam || 53 ||
[Analyze grammar]

prathamaṃ tāvatpratyuṣe udite sūrye śucirbhūtvā gomayakṛtamaṃḍalasyopari raktacaṃdanena maṃḍalakaṃ kṛtvā tatastāmrapātre raktacaṃdanodakaśvetacaṃdanādidravyaiḥ prapūraṇaṃ kṛtvā tanmadhye hemākṣatadūrvādadhisarpīṣi parikṣipya sthāpayet || 54 ||
[Analyze grammar]

svaśarīramālabhet anena maṃtreṇa |
oṃkhakholkāya namaḥ |
saptavārānuccārya sthātavyam |
tena śuddhirupasaṃjāyate dehasyārcārhatā bhavati |
paścādāsanasthaṃ devaṃ savitāraṃ maṃḍalamadhye dvādaśātmakaṃ surādibhiḥ saṃpūjyamānaṃ dhyātvā pūrvoktamarghapātraṃ śirasi kṛtvā bhūmau jānunī nipātya sūryābhimukhastadgatamanābhūtvārghamaṃtramudāharet |
taducyate sūryavaktrādvinirgatamiti || 55 ||
[Analyze grammar]

yasyoccāraṇaśabdena rathaṃ saṃsthāpya bhāskaraḥ |
pratigṛhṇāti caivārghyaṃ varamiṣṭaṃ ca yacchati || 56 ||
[Analyze grammar]

oṃyasyāhuḥ sapta cchaṃdāṃsi rathe tiṣṭhaṃti vājinaḥ |
aruṇaḥ sārathiryasya rathavāho'grataḥ sthitaḥ || 57 ||
[Analyze grammar]

jayā ca vijayā caiva jayaṃtī pāpanāśanī |
iḍā ca piṃgalā caiva vahaṃto'śvamukhāstathā || 58 ||
[Analyze grammar]

ḍiṃḍiśca śeṣanāgaśca gaṇādhyakṣastathaiva ca |
skaṃdarevaṃtatārkṣyāśca tathā kalmāṣapakṣiṇau || 59 ||
[Analyze grammar]

rājñī ca nikṣubhā devī lalitā caiva saṃjñikā |
tathā yajñabhujo devā ye cānye parikīrtitāḥ || 60 ||
[Analyze grammar]

ebhiḥ parivṛto yo'sāvadharottaravāsibhiḥ |
tamahaṃ lokakartāramāhvayāmi tamopaham || 61 ||
[Analyze grammar]

ammayo bhagavānbhānuramuṃ yajñaṃ pravartayan |
idamarghyaṃ ca pādyaṃ ca pragṛhāṇa namonamaḥ || 62 ||
[Analyze grammar]

āvāhanam |
sahasrakiraṇa varada jīvanarūpa te namaḥ |
iti sāṃnidhyakaraṇam ||
oṃvaṣaṭ ityuccārya sūryasya caraṇayugalaṃ paśyan bhuvi padmyāṃ pātrīṃ nirvāpayet pādyaṃ taducyate |
evaṃ pādyaṃ dattvā baddhāṃjaliḥ susvāgatamiti kuryāt |
svāgataṃ bhagavannehi mama prasādaṃ vidhāya āsyatām |
iha gṛhāṇa pūjāṃ ca prasādaṃ ca dhiyā kuru |
tiṣṭha tvaṃ tāvadatraiva yāvatpūjāṃ karomyaham || 63 ||
[Analyze grammar]

evaṃ vijñāpanaṃ dadyādanena maṃtreṇa kamalāsanam |
tatkamalāsanaṃ kamalanaṃdana upāviśati |
āsana upaviṣṭasya śeṣāṃ pūjāṃ niyojayet anena vidhānena |
oṃsomamūrtikṣīrodapataye namaḥ |
iti kṣīrādisnapanam |
oṃbhāskarāya nīrava sine namaḥ |
iti jalasnānam ||
tato vāsoyugaṃ śubhraṃ dadyāt anena maṃtreṇa |
idaṃ vāsoyugaṃ sūrya gṛhāṇa kṛpayā mama |
kaṭibhūṣaṇamekaṃ te dvitīyaṃ cāṃgaprāvaraṇam || 64 ||
[Analyze grammar]

tato yajñopavītaṃ dadyāt anena maṃtreṇa |
sūtrataṃtumayaṃ śuddhaṃ pavitramidamuttamam |
yajñopavītaṃ deveśa pragṛhāṇa namo'stu te || 65 ||
[Analyze grammar]

tato yathāśakti śvetamukuṭamudrikādibhūṣaṇāni dadyāt anena maṃtreṇa |
mukuṭo ratnanaddho'yaṃ mudrikāṃ bhūṣaṇāni ca |
alaṃkāraṃ gṛhaṇemaṃ mayā bhaktyā samarpitam || 66 ||
[Analyze grammar]

evamalaṃkāraṃ nivedya paścātkeśarakuṃkumakarpūraraktacaṃdanamiśramanulepanaṃ dadyāt || 67 ||
[Analyze grammar]

oṃtavātipriya vṛkṣāṇāṃ raso'yaṃ tigmadīdhite |
sa tavaivocitaḥ svāmingṛhāṇa kṛpayā mama || 68 ||
[Analyze grammar]

tataścaṃpakajapākaravīrakarṇakakesarakokanadādibhiḥ pūjāṃ kuryāt || 69 ||
[Analyze grammar]

oṃvanaspatiraso divyo gaṃdhāḍhyo gaṃdha uttamaḥ |
āhāraḥ sarvadevānāṃ dhūpo'yaṃ pratigṛhyatām || 70 ||
[Analyze grammar]

śallakīdhūpamaṃtraḥ |
tataḥ pāyasādiniṣpannaṃ naivedyaṃ nivedayedanena maṃtreṇa |
naivedyamamṛtaṃ sarvabhūtānāṃ prāṇavardhanam |
pūrṇapātre mayā dattaṃ pratigṛhṇa prasīda me || 71 ||
[Analyze grammar]

tataḥ śaucodakatāṃbūladīpārārtikaśītalikāpunaḥ pūjādi nivedya yathāśaktyā stutvā sukṛtaṃ duṣkṛtaṃ vā kṣamasveti procya visarjayet |
tato bhūyo namasya hemavastropavītālaṃkārān brāhmaṇāya nivedya nirmālyaṃ saṃhṛtyāṃbhasi nikṣipet || 72 ||
[Analyze grammar]

ityarghyadānavidhiḥ ||
ya evaṃ bhāskarāyārghyaṃ mūrtau maṃḍalake'pi vā |
nityaṃ nivedayetprātaḥ syādraverātmavatpriyaḥ || 73 ||
[Analyze grammar]

anena vidhinā karṇo bhāskarārghyaṃ prayacchati |
tataḥ sūryasya pārthāsāvātmavadvallabho mataḥ || 74 ||
[Analyze grammar]

aśaktaścennityamekamarghyaṃ dadyāddivākṛte |
tato'tra rathasaptamyāṃ kuṃḍe deyaḥ prayatnataḥ || 75 ||
[Analyze grammar]

aśvamedhaphalaṃ prāpya sūryaloka mavāpnuyāt |
tasmātsarvaprayatnena dātavyo'rgho'tra bhārata || 76 ||
[Analyze grammar]

evaṃvidhastvasau devo bhaṭṭādityo'tra tiṣṭhati |
bhūyānato'pi bahuśaḥ pāpahā dharmavardhanaḥ || 77 ||
[Analyze grammar]

divyamaṣṭavidhaṃ cātra sadyaḥ pratyayakārakam |
pāpānāṃ copabhuktaṃ hi yathā pārtha halāhalam || 78 ||
[Analyze grammar]