Chapter 29

[English text for this chapter is available]

| nārada uvāca |
vrajaṃtī girijā'paśyatsakhīṃ māturmahāprabhām |
kusumāmodinīṃnāma tasya śailasya devatām || 1 ||
[Analyze grammar]

sāpi dṛṣṭvā girisutāṃ snehaviklavamānasā |
kvapunargacchasītyuccairāliṃgyovāca devatā || 2 ||
[Analyze grammar]

sā cāsyai sarvamācakhyau śaṃkarātkopakāraṇam |
punaścovāca girijā devatāṃ mātṛsaṃmatām || 3 ||
[Analyze grammar]

nityaṃ śailādhirājasya devatā tvamaniṃdite |
sarvaṃ ca sannidhānaṃ ca mayi cātīva vatsalā || 4 ||
[Analyze grammar]

tadahaṃ saṃpravakṣyāmi yadvidheyaṃ tavādhunā |
athānya strīpraveśe tu samīpe tu pinākinaḥ || 5 ||
[Analyze grammar]

tvayākhyeyaṃ mama śubhe yuktaṃ paścātkaromyaham |
tathetyukte tayā devyā yayau devī giriṃ prati || 6 ||
[Analyze grammar]

ramye tatra mahāśṛṃge nānāścaryopaśobhite |
vibhūṣaṇādi saṃnyasya vṛkṣavalkaladhāriṇī || 7 ||
[Analyze grammar]

tapastepe girisutā putreṇa paripālitā |
grīṣme paṃcāgnisaṃtaptā varṣāsu ca jaloṣitā || 8 ||
[Analyze grammar]

sthaṃḍilasthā ca hemaṃte nirāhārā tatāpa sā |
etasminnaṃtare daityo hyaṃdhakasya suto balī || 9 ||
[Analyze grammar]

jñātvā gatāṃ girisutāṃ piturvairamanusmaran |
āḍirnāma bakabhrātā rahasyāṃtaraprekṣakaḥ || 10 ||
[Analyze grammar]

jite kilāṃdhake daitye giriśenāmaradviṣi |
āḍiścakāra vipulaṃ tapo harajigīṣayā || 11 ||
[Analyze grammar]

tamāgatyābravīdbrahmā tapasā paritoṣitaḥ |
brūhi kiṃ vāsuraśreṣṭha tapasā prāptumicchasi || 12 ||
[Analyze grammar]

brahmāṇamāha daityastu nirmṛtyutvamahaṃ vṛṇe |
brahmovāca |
na kaścicca vinā mṛtyuṃ jaṃturāsura vidyate || 13 ||
[Analyze grammar]

yatastato'pi daityeṃdra mṛtyuḥ prāpyaḥ śarīriṇā |
ityuktastaṃ tathetyāha tuṣṭaḥ kamalasaṃbhavam || 14 ||
[Analyze grammar]

rūpasya parivarto me yadā syātpadmasaṃbhava |
tadā mṛtyurmama bhavedanyathā tvamaro hyaham || 15 ||
[Analyze grammar]

ityuktastaṃ tathetyāha tuṣṭaḥ kamalasaṃbhavaḥ |
ityukto'maratāṃ mene daityarājyasthito'suraḥ || 16 ||
[Analyze grammar]

ājagāma sa ca sthānaṃ tadā tripuraghātinaḥ |
āgato dadṛśe taṃ ca vīrakaṃ dvāryavasthitam || 17 ||
[Analyze grammar]

taṃ cāsau vaṃcayitvā ca āḍiḥ sarpaśarīrabhṛt |
avārito vīrakeṇa praviveśa harāṃtikam || 18 ||
[Analyze grammar]

bhujaṃgarūpaṃ saṃtyajya babhūvātha mahāsuraḥ |
umārūpī chalayituṃ giriśaṃ mūḍhacetanaḥ || 19 ||
[Analyze grammar]

kṛtvomāyāstato rūpamapratarkyamanoharam |
sarvāvayavasaṃpūrṇaṃ sarvābhijñānasaṃvṛtam || 20 ||
[Analyze grammar]

cakre bhagāṃtare daityo daṃtānvajropamāndṛḍhān |
tīkṣṇāgrānbuddhimohena giriśaṃ haṃtumudyataḥ || 21 ||
[Analyze grammar]

kṛtvomārūpamevaṃ sa sthito daityo harāṃtike |
tāṃ dṛṣṭvā giriśastuṣuṭaḥ samāliṃgya mahāsuram || 22 ||
[Analyze grammar]

manyamāno girisutāṃ sarvai ravayavāṃtaraiḥ |
apṛcchatsādhu te bhāvo giriputrī hyakṛtrimā || 23 ||
[Analyze grammar]

yā tvaṃ madaśayaṃ jñātvā prāpteha varavarṇini |
tvayā virahitaḥ śūnyaṃ manyosminbhuvanatraye || 24 ||
[Analyze grammar]

prāptā prasannā yā tvaṃ māṃ yuktamevaṃvidhaṃ tvayi |
ityukte gūhayaṃśceṣṭāmumārūpyasuro'bravīt || 25 ||
[Analyze grammar]

yātāsmi tapasaścartuṃ kālīvākyāttavātulam |
ratiśca tatra me nābhūttataḥ prāptā tavāṃtikam || 26 ||
[Analyze grammar]

ityuktaḥ śaṃkaraḥ śaṃkāṃ kiṃcitprāpyavadhārayat |
kupitā mayi tanvaṃgī pratyakṣā ca dṛḍhavratā || 27 ||
[Analyze grammar]

aprāptakāmā saṃprāptā kimetatsaṃśayo mama |
rahasīti viciṃtyātha abhijñānādvicārayan || 28 ||
[Analyze grammar]

nāpaśyadvāmapārśve tu tasyāṃkaṃ padmalakṣaṇam |
lomnāmāvartacaritaṃ tato devaḥ pinākadhṛk || 29 ||
[Analyze grammar]

buddhā tāṃ dānavīṃ māyāṃ kiṃcitprahasitānanaḥ |
meḍhre raudrāstramādhāya cakre daityamanoratham || 30 ||
[Analyze grammar]

sa rudanbhairavājrāvānavasādaṃ gato'suraḥ |
abudhyadvīrako naitadasureṃdraniṣūdanam || 31 ||
[Analyze grammar]

hate ca mārutenāśugāminā nagadevatā |
aparicchinnatattvārthā śailaputryāṃ nyavedayat || 32 ||
[Analyze grammar]

śrutvā vāyumukhāddevī krodharaktātilocanā |
apasyadvīrakaṃ putraṃ hṛdayena vidūyatā || 33 ||
[Analyze grammar]

mātaraṃ māṃ parityajya yasmāttvaṃ snehavihvalām |
vihitāvasaraḥ strīṇāṃ śaṃkarasya rahovidhau || 34 ||
[Analyze grammar]

tasmātte paruṣā rūkṣā jaḍā hṛdaya varjitā |
gaṇeśākṣarasadṛśā śilā mātā bhaviṣyati || 35 ||
[Analyze grammar]

evamutsṛṣṭaśāpāyā giriputryāstvanaṃtaram |
nirjagāma mukhātkrodhaḥ siṃharūpī mahābalaḥ || 36 ||
[Analyze grammar]

paścāttāpaṃ samaśritya tayā devyā visarjitaḥ |
sa tu siṃhaḥ karālāsyo mahākesarakaṃdharaḥ || 37 ||
[Analyze grammar]

proddhūtabalalāṃgūladaṃṣṭrotkaṭa guhāmukhaḥ |
vyāvṛtāsyo lalajjihvaḥ kṣāmakukṣiścikhādiṣuḥ || 38 ||
[Analyze grammar]

tasyāsye vartituṃ devī vyavasyata satī tadā |
jñātvā manogataṃ tasyā bhagavāṃścaturānanaḥ || 39 ||
[Analyze grammar]

ājagāmāśramapaṃda saṃpadāmāśrayaṃ tataḥ |
āgamyovāca tāṃ brahmā girijāṃ mṛṣṭayā girā || 40 ||
[Analyze grammar]

kiṃ devī prāptukāmāsi kimalabhyaṃ dadāmi te |
tacchrutvovāca girijā gurugauravagarbhitam || 41 ||
[Analyze grammar]

tapasā duṣkareṇāptaḥ patitve śaṃkaro mayā |
sa māṃ śyāmalavarṇeti bahuśaḥ proktavānbhavaḥ || 42 ||
[Analyze grammar]

syāmahaṃ kāṃcanākārā vāllabhyena ca saṃyutā |
bharturbhūtapateraṃge hyekato nirviśaṃkitā || 43 ||
[Analyze grammar]

tasyāstadbhāṣitaṃ śrutvā provāca jalajāsanaḥ |
evaṃ bhavatu bhūyastvaṃ bharturdehārdhadhāriṇī || 44 ||
[Analyze grammar]

tatastasyāḥ śarīrāttu strī sunīlāṃbujatviṣā |
nirgatā sābhavadbhīmā ghaṃṭāhastā trilocanā || 45 ||
[Analyze grammar]

nānābharaṇapūrṇāṃgī pītakauśeyavāsinī |
tāmabravīttato brahmā devīṃ nīlāṃbujatviṣam || 46 ||
[Analyze grammar]

asmādbhūdharajā radehasaṃparkāttvaṃ mamājñayā |
saṃprāptā kṛtakṛtyatvamekānaṃśā purākṛtiḥ || 47 ||
[Analyze grammar]

ya eṣa siṃhaḥ prodbhūto devyāḥ krodhādvarānane |
sa testu vāhano devī ketau cāstu mahābalaḥ || 48 ||
[Analyze grammar]

gaccha viṃdhyācale tatra surakāryaṃ kariṣyati |
atra śuṃbhaniśuṃbhau ca hatvā tārakasainyapau || 49 ||
[Analyze grammar]

pāṃcālonāma yakṣo'yaṃ yakṣalakṣapadānugaḥ |
dattaste kiṃkaro devī mahāmāyāśatairyutaḥ || 50 ||
[Analyze grammar]

ityuktā kauśikī devī tatetyāha pitāmaham |
nirgatāyāṃ ca kauśikyāṃ jātā svairāśritā guṇaiḥ || 51 ||
[Analyze grammar]

sarvaiḥ pūrvabhavopāttaistadā svayamupastitaiḥ |
umāpi prāptasaṃkalpā paścāttāpaparāyaṇā || 52 ||
[Analyze grammar]

muhuḥ svaṃ pariniṃdaṃtī jagāma giriśāṃtikam |
saṃprayāṃtīṃ ca tāṃ dvārī apavārya samāhitaḥ || 53 ||
[Analyze grammar]

rurodha vīrako devīṃ hemavetralatādharaḥ |
tāmuvāca ca kopena tiṣṭha tiṣṭha kva yāsi ca || 54 ||
[Analyze grammar]

prayojanaṃ na te'stīha gaccha yāvanna bhartsyase |
devyā rūpadharo daityo devaṃ vaṃcayituṃ tviha || 55 ||
[Analyze grammar]

praviṣṭo na ca dṛṣṭo'sau sa ca devena ghātitaḥ |
ghātite cāhamākṣipto nīlakaṇṭhena dhīmatā || 56 ||
[Analyze grammar]

kāpi strī nāpi moktavyā tvayā putreti sādaram |
tasmāttvamatra dvāristhā varṣapūgānyanekaśaḥ || 57 ||
[Analyze grammar]

bhaviṣyasi na cāpyatra praveśaṃ lapsyase vraja |
ekā me praviśedatra mātā yā snehavatsalā || 58 ||
[Analyze grammar]

nagādhirājatanayā pārvatī rudravallabhā |
ityuktā tu tato devī ciṃtayāmāsa cetasā || 59 ||
[Analyze grammar]

na sā nārī tu daityo'sau vāyornaivāvabāsata |
vṛthaiva vīrakaḥ śapto mayā krodhaparītayā || 60 ||
[Analyze grammar]

akāryaṃ kriyate mūḍhaiḥ prāyaḥ krodhasamanvitaiḥ |
krodhena naśyate kīrtiḥ krodho haṃti sthirāṃ śriyam || 61 ||
[Analyze grammar]

aparicchinnasarvārthā putraṃ śāpitavatyaham |
viparītārthaboddhṝṇāṃ sulabhā vipado yataḥ || 62 ||
[Analyze grammar]

saṃciṃtyaivamuvācedaṃ vīrakaṃ prati śailajā |
adho lajjāvikāreṇa vadanenāṃbujatviṣā || 63 ||
[Analyze grammar]

ahaṃ vīraka te mātā mā te'stu manaso bhramaḥ |
śaṃkarasyāsmi dayitā sutā tu himabhūbhṛtaḥ || 64 ||
[Analyze grammar]

mama gātrasthitibhrāṃtyā mā śaṃkāṃ putra bhāvaya |
tuṣṭena gauratā dattā mameyaṃ padmayoninā || 65 ||
[Analyze grammar]

mayā śapto'syavidite vṛttāṃte daityanirmite |
jñātvā nārīpraveśaṃ tu śaṃkare rahasi stite || 66 ||
[Analyze grammar]

na nivartayituṃ śakyaḥ śāpaḥ kiṃ tu bravīmi te |
mānuṣyāṃ tu śilāyāṃ tvaṃ śilādātsaṃbhaviṣyasi || 67 ||
[Analyze grammar]

puṇye cāpyarbudāraṇye svargamokṣaprade nṛṇām |
acaleśvaraliṃgaṃ tu vartate yatra vīraka || 68 ||
[Analyze grammar]

vārāṇasyāṃ viśvanāthasamaṃ tatphaladaṃ nṛṇām |
prabhāsasya ca yātrābhirdaśabhiryatphalaṃ nṛṇām || 69 ||
[Analyze grammar]

tadekayātrayā proktamarbudasya mahāgireḥ |
yatra taptvā tapo martyā dehadhātūnvihāya ca || 70 ||
[Analyze grammar]

saṃsārī na punarbhūyānmaheśvaravaco yathā |
arbudo yadi labhyeta sevituṃ janmaduḥkhitaiḥ || 71 ||
[Analyze grammar]

vārāṇasīṃ ca kedāraṃ kiṃ smaraṃti vṛthaiva te |
tatrārādhya bhavaṃ devaṃ bhavānnandīti nāmabhṛt || 72 ||
[Analyze grammar]

śīghrameṣyasi cātraiva pratīhāratvamāpsyasi |
evamukte hṛṣṭaromā vīrakaḥ praṇipatya tām || 73 ||
[Analyze grammar]

saṃstūya vividhairvākyairmātaraṃ samabhāṣata |
dhanyo'haṃ devi yo lapsye mānuṣyamatidurlabham || 74 ||
[Analyze grammar]

śāpo'nugraharūpo'yaṃ viśeṣādarbudācale |
samīpe yasya puṇyo'sti mahīsāgarasaṃgamaḥ || 75 ||
[Analyze grammar]

ūdhaḥ pṛthivyā deśo'yaṃ yo gireścārṇavāṃtare |
tatra gatvā mahatpuṇyamavāpya bhavabhaktitaḥ || 76 ||
[Analyze grammar]

punareṣyāmi bho mātarityuktvābhūcchilāsutaḥ |
devī ca praviveśātha bhavanaṃ śaśimaulinaḥ || 77 ||
[Analyze grammar]

ityārbudākhyānam |
tato dṛṣṭvā ca tāṃ prāha dhignārya iti tryaṃbakaḥ || 78 ||
[Analyze grammar]

sā ca praṇmya taṃ prāha satyametanna mithyayā |
jaḍaḥ prakṛtibhāgoyaṃ nāryaścārhaṃti nindanām || 79 ||
[Analyze grammar]

puruṣāṇāṃ prasādena mucyaṃte bhavasāgarāt |
tataḥ prahṛṣṭastāmāha haro yogyā'dhunā śubhe || 80 ||
[Analyze grammar]

putraṃ dāsyāmi yena tvaṃ khyātimāpsyasi śobhane |
tato rema hi devyā sa nānāścaryālayo haraḥ || 81 ||
[Analyze grammar]

tato varṣasahasreṣu devāstvaritamānasāḥ |
jvalanaṃ nodayāmāsurjñātuṃ śaṃkaraceṣṭitam || 82 ||
[Analyze grammar]

dvāri sthitaṃ pratihāraṃ vaṃcayitvā ca pāvakaḥ |
pārāvatasya rūpeṇa praviveśa harāṃtikam || 83 ||
[Analyze grammar]

dadṛśe taṃ ca deveśo vinatāṃ prekṣya pārvatīm |
tatastāṃ jvalanaṃ prāha naitadyogyaṃ tvayā kṛtam || 84 ||
[Analyze grammar]

yadidaṃ bhukṣutaṃ sthānānmama tejo hyanuttamam |
gṛhāṇa tvaṃ sudurbuddhe no vā dhakṣyāmi tvāṃ ruṣā || 85 ||
[Analyze grammar]

bhītastato'sau jagrāha sarvadevamukhaṃ ca saḥ |
tena te vahnisahitā vihvalāśca surāḥ kṛtāḥ || 86 ||
[Analyze grammar]

vipāṭya jaṭharāṇyeṣāṃ vīryaṃ māheśvaraṃ tataḥ |
niṣkrāṃtaṃ tatsaro jātaṃ pāradaṃ śatayojanam || 87 ||
[Analyze grammar]

vahniśca vyākulībhūto gaṃgāyāṃ mumuce sakṛt |
dahyamānā ca sā devī taraṃgairvahirutsṛjat || 88 ||
[Analyze grammar]

jātastribhuvanakyātastena ca śvetaparvataḥ |
etasminnaṃtare vahnirāhūtaśca himālaye || 89 ||
[Analyze grammar]

saptarṣibhirvahnihomaṃ kurvadbhirmaṃtravīryataḥ |
āgatya tatra jagrāha vahnirbhāgaṃ ca taṃ hutam || 90 ||
[Analyze grammar]

gate'hnyatvasmiṃśca tatrasthaḥ patnī steṣāmapaśyata |
suvarṇakadalīstaṃbhanibhāstāścaṃdralekhayā || 91 ||
[Analyze grammar]

paśyamānaḥ praphullākṣo vahniḥ kāmavaśaṃ gataḥ |
sa bhūyaściṃtayāmāsa na nyāyyaṃ kṣubhito'smi yat || 92 ||
[Analyze grammar]

sādhvīḥ patnīrdvijeṃdrāṇāmakāmāḥ kāmayāmyaham |
pāpametatkarma cograṃ naśyāmi tṛmavatsphuṭam || 93 ||
[Analyze grammar]

kṛtvaitannaśyate kīrtiryāvadācaṃdratārakam |
evaṃ saṃciṃtya bahudhā gatvā caiva vanāṃtaram || 94 ||
[Analyze grammar]

saṃyantuṃ nābhavacchakta upāyairbahubhirmanaḥ |
tataḥ sa kāmasaṃtapto mūrchitaḥ samapadyata || 95 ||
[Analyze grammar]

tataḥ svāhā ca bhāryāsya bubudhe tadviceṣṭitam |
jñātvā ca ciṃtayāmāsa prahṛṣṭā manasi svayam || 96 ||
[Analyze grammar]

svāṃ bhāryāmatha māṃ tyaktvā bahuvāsādavajñayā |
bhāryāḥ kāmayate nūnaṃ saptarṣīṇāṃ mahātmanām || 97 ||
[Analyze grammar]

tadāsāṃ rūpamāśritya ramiṣye tena cāpyaham |
tatastvaṃgiraso bhāryā śivānāmeti śobhanā || 98 ||
[Analyze grammar]

tasyā rūpaṃ samādhāya pāvakaṃ prāpya sābravīt |
māmagne kāmasaṃtaptāṃ tvaṃ kāmayitumarhasi || 99 ||
[Analyze grammar]

na cetkariṣyase deva mṛtāṃ māmupadhāraya |
ahamaṃgiraso bhāryā śivānāma hutāśana || 100 ||
[Analyze grammar]

sarvābhiḥ sahitā prāptā tāśca yāsyaṃtyanukramāt |
asmākaṃ tvaṃ priyo nityaṃ tvaccittāśca vayaṃ tathā || 101 ||
[Analyze grammar]

tataḥ sa kāmasaṃtaptaḥ saṃbabhūva tayā saha |
prīte prītā ca sā devī nirjagāma vanāṃtarāt || 102 ||
[Analyze grammar]

ciṃtayaṃtī mamedaṃ cedrūpaṃ drakṣyaṃti kānane |
te brāhmaṇīnāmanṛtaṃ doṣaṃ vakṣyaṃti pāvakāt || 103 ||
[Analyze grammar]

tasmādetadrakṣamāṇā garuḍī saṃbhavāmyaham |
suparṇā sā tato bhūtvā dadṛśe śvetaparvatam || 104 ||
[Analyze grammar]

śarastaṃbaiḥ susaṃpṛktaṃ rakṣobhiśca piśācakaiḥ |
sā tatra sahasā gatvā śailapūṣṭhaṃ sudurgamam || 105 ||
[Analyze grammar]

prākṣipatkāṃcane kuṃḍe śukraṃ taddhāraṇe'kṣamā |
śiṣṭānāmapi devīnāṃ saptarṣīṇāṃ mahātmanām || 106 ||
[Analyze grammar]

patnīsarūpatāṃ kṛtvā kāmayāmāsa pāvakam |
divyaṃ rūpamarūṃdhatyāḥ kartuṃ na śakitaṃ tayā || 107 ||
[Analyze grammar]

tasyāstapaḥprabhāveṇa bhartuḥ śuśrūṣaṇena ca |
ṣaṭkṛtvastattu nikṣiptamagniretaḥ kurudvaha || 108 ||
[Analyze grammar]

kuṃḍe'smiṃścaitrabahule pratipadyeva svāhayā |
tataśca pāvako duḥkhācchuśoca ca mumoha ca || 109 ||
[Analyze grammar]

āḥ pāpaṃ kṛtamityeva dehanyāse'karonmatim |
tatastaṃ khecarī vāṇī prāha mā maraṇaṃ kuru || 110 ||
[Analyze grammar]

bhāvyametacca bhāvyarthātko hi pāvaka mucyate |
bhāvyarthenāpi yatte ca paradāropa sevanam || 111 ||
[Analyze grammar]

kṛtaṃ taccetasā tena tvāmajīrṇaṃ pravekṣyati |
śvetaketormahāyajñe ghṛtadhārābhitarpitam || 112 ||
[Analyze grammar]

śokaṃ ca tyaja naitāstāḥ svāhai veyaṃ tava priyā |
śvetaparvatakuṃḍasthaṃ putraṃ tvaṃ draṣṭumarhasi |
tato vahnistatra gatvā dadṛśe tanayaṃ prabhum || 113 ||
[Analyze grammar]

arjuna uvāca |
kasmātsvāhā karodrūpaṃ ṣaṇṇāṃ tāsāṃ mahāmune || 114 ||
[Analyze grammar]

yattā bhartṛparāḥ sādhvyastapasvinyognisaṃnibhāḥ |
na bibheti ca kiṃ tābhyaḥ ṣaḍbhyaḥ svāhā'parādhinī |
bhartṛbhaktyā jagaddagdhuṃ yataḥ śaktāśca tā mune || 115 ||
[Analyze grammar]

nārada uvāca |
satyametatkuruśreṣṭha śrṛṇu taccāpi kāraṇam |
yena tāsāṃ kṛtaṃ rūpaṃ na vā śāpaṃ daduśca tāḥ || 116 ||
[Analyze grammar]

yatra tadvahninā kṣiptaṃ rudratejaḥ sakṛtpurā |
gaṃgāyāṃ tatra sasnustāḥ ṣaṭatnyo'jñanābhāvataḥ || 117 ||
[Analyze grammar]

tatastā vihvalībhūtāstejasā tena mohitāḥ |
lajjayā ca svabhartṝṇāṃ gaṃgātīrasthitā rahaḥ || 118 ||
[Analyze grammar]

etadaṃtamālokya cikīrṣaṃtī manīṣitam |
svāhā śarīramāviśyatāsāṃ tejo jahāra tat || 119 ||
[Analyze grammar]

cikrīḍa vahnijāyāpi yathā te kathitaṃ mayā || 120 ||
[Analyze grammar]

upakāramimaṃ tābhiḥ smaraṃtībhiśca bhārata |
na śaptā sā yataḥ śāpo na deyaścopakāriṇi || 121 ||
[Analyze grammar]

tataḥ saptarṣayo jñātvā jñānenāsucitāṃ gatāḥ |
tatyajuḥ ṣaṭ tadā patnīrvinā devīmaruṃdhatīm || 122 ||
[Analyze grammar]

viśvāmitrastu bhagavānkumāraṃ śaraṇaṃ gataḥ |
stavaṃ divyaṃ saṃpracakre mahāsenasya cāpi saḥ || 123 ||
[Analyze grammar]

aṣṭottaraśataṃ nāmnāṃ śrṛṇu tvaṃ tāni phālguna |
japena yeṣāṃ pāpāni yāṃti jñānamavāpnuyāt || 124 ||
[Analyze grammar]

tvaṃ brahmavādī tvaṃ brahmā brāhmaṇavatsalaḥ |
brahmaṇyo brahmadevaśca brahmado brahmasaṃgrahaḥ || 125 ||
[Analyze grammar]

tvaṃ paraṃ paramaṃ tejo maṃgalānāṃ ca maṃgalam |
aprameyaguṇaścaiva maṃtrāṇāṃ maṃtrago bhavān || 126 ||
[Analyze grammar]

tvaṃ sāvitrīmayo deva sarvatraivāparājitaḥ |
maṃtra śarvātmako devaḥ ṣaḍakṣaravatāṃ varaḥ || 127 ||
[Analyze grammar]

mālī maulī patākī ca jaṭī muṃḍī śikhaṃḍyapi |
kuṇḍalī lāṃgalī bālaḥ kumāraḥ pravaro varaḥ || 128 ||
[Analyze grammar]

gavāṃputraḥ surārighnaḥ saṃbhavo bhavabhāvanaḥ |
pinākī śatruhā śveto gūḍhaḥ skandaḥ karāgraṇīḥ || 129 ||
[Analyze grammar]

dvādaśo bhūrbhuvo bhāvī bhuvaḥ putro namaskṛtaḥ |
nāgarājaḥ sudharmātmā nākapṛṣṭhaḥ sanātanaḥ || 130 ||
[Analyze grammar]

tvaṃ bhartā sarvabhūtātmā tvaṃ trātā tvaṃ sukhāvahaḥ |
śaradakṣaḥ śikhī jetā ṣaḍvaktro bhayanāśanaḥ || 131 ||
[Analyze grammar]

hemagarbho mahāgarbho jayaśca vijayeśvaraḥ |
tvaṃ kartā tvaṃ vidhātā ca nityo nityārimardanaḥ || 132 ||
[Analyze grammar]

mahāseno mahāteja vīrasenaśca bhūpatiḥ |
siddhāsanaḥ surādhyakṣo bhīmaseno nirāmayaḥ || 133 ||
[Analyze grammar]

śauriryadurmahātejā vīryavānsatyavikramaḥ |
tejogarbho'suraripuḥ suramūrtiḥ surorjjitaḥ || 134 ||
[Analyze grammar]

kṛtajño varadaḥ satyaḥ śaraṇyaḥ sādhuvatsalaḥ |
suvrataḥ sūryasaṃkāśo vahnigarbhaḥ kaṇo bhuvaḥ || 135 ||
[Analyze grammar]

pippalī śīghrago raudrī gāṃgeyo ripudāraṇaḥ |
kārttikeyaḥ prabhuḥ kṣaṃtā nīladaṃṣṭro mahāmanāḥ || 136 ||
[Analyze grammar]

nigraho nigrahāṇāṃ ca netā tvaṃ suranaṃdanaḥ |
pragrahaḥ paramānaṃdaḥ krodhaghnastāra ucchritaḥ || 137 ||
[Analyze grammar]

kukkuṭī bahulī divyaḥ kāmado bhūrivardhanaḥ |
amogho'mṛtado hyagniḥ śatrughnaḥ sarvamodanaḥ || 138 ||
[Analyze grammar]

avyayo hyamaraḥ śrīmānunnato hyagnisaṃbhavaḥ |
piśācarājaḥ sūryābhaḥ śivātmā śivanaṃdanaḥ || 139 ||
[Analyze grammar]

apārapāro durjñeyaḥ sarvabhūtahite rataḥ |
agrāhyaḥ kāraṇaṃ kartā parameṣṭhī paraṃ padam || 140 ||
[Analyze grammar]

aciṃtyaḥ sarvabhūtātmā sarvātmā tvaṃ sanātanaḥ |
evaṃ sa sarvabhūtānāṃ saṃstutaḥ parameśvaraḥ || 141 ||
[Analyze grammar]

nāmnāmaṣṭaśatenāyaṃ viśvāmitramaharṣiṇā |
prasannamūrtirāhedaṃ munīṃdraṃ vriyatāmiti || 142 ||
[Analyze grammar]

mama tvayā dvijaśreṣṭha stutireṣā nirūpitā |
bhaviṣyati mano'bhīṣṭaprāptaye prāṇināṃ bhuvi || 143 ||
[Analyze grammar]

vivardhate kule lakṣmīstasya yaḥ prapaṭhedimam |
na rākṣasāḥ piśācā vā na bhūtāni na cāpadaḥ || 144 ||
[Analyze grammar]

vighnakārīṇi tadgehe yatraiva saṃstuvaṃti mām |
duḥsvapnaṃ ca na paśyetsa baddho mucyate baṃdhanāt || 145 ||
[Analyze grammar]

stavasyāsya prabhāveṇa divyabhāvaḥ pumānbhavet |
tvaṃ ca māṃ śrutisaṃskāraiḥ sarvaiḥ saṃskartumarhasi || 146 ||
[Analyze grammar]

saṃskārarahitaṃ janma yataśca paśuvatsmṛtam |
tvaṃ ca madvaradānena brahmarṣiśca bhaviṣyasi || 147 ||
[Analyze grammar]

tato munistasya cakre jātakarmādikāḥ kriyāḥ |
paurohityaṃ tathā bheje skaṃdasyaivājñayā prabhuḥ || 148 ||
[Analyze grammar]

tatastaṃ vahnirabhyāgāddadarśa ca sutaṃ guham |
ṣaṭchīrṣaṃ dviguṇaśrotraṃ dvādaśākṣibhujakramam || 149 ||
[Analyze grammar]

ekagrīvaṃ caikakāyaṃ kumāraṃ sa vyalokayat |
kalilaṃ prathame cāhni dvitīye vyaktitāṃ gatam || 150 ||
[Analyze grammar]

dṛtīyāyāṃ śiśurjātaścaturthyāṃ pūrṇa evaca |
paṃcamyāṃ saṃskṛtaḥ so'bhūtpāvakaṃ cāpyapaśyata || 151 ||
[Analyze grammar]

tatastaṃ pāvakaḥ pārtha āliliṃga cucuṃba ca |
putreti coktvā tasmai sa śaktyastrama dadātsvayam || 152 ||
[Analyze grammar]

sa ca śaktiṃ samādāya namaskṛtya ca pāvakam |
śvetaśrṛṃgaṃ samārūḍho mukhaiḥ paśyandiśo daśa || 153 ||
[Analyze grammar]

vyanadadbhairavaṃ nādaṃ trāsa yansāsuraṃ jagat |
tataḥ śvetagireḥ śrṛṃgaṃ rakṣaḥ padmadaśāvṛtam || 154 ||
[Analyze grammar]

bibheda tarasā śaktyā śatayojanavistṛtam |
tadekena prahāreṇa khaṃḍaśaḥ patitaṃ bhuvi || 155 ||
[Analyze grammar]

cūrṇīkṛtā rākṣasāste satataṃ dharmaśatravaḥ |
tataḥ pravyathitā bhūmirvyaśīryata samaṃtataḥ || 156 ||
[Analyze grammar]

bhītāśca parvatāḥ sarve cukruśuḥ pralayādyathā |
bhūtāni tatra subhṛśaṃ trāhitrāhīti cojjaguḥ || 157 ||
[Analyze grammar]

evaṃ śrutvā tato devā vāsavaṃ saha te'bruvan |
yenaikena prahāreṇa trailokyaṃ vyākulī kṛtam || 158 ||
[Analyze grammar]

sa saṃkruddhaḥ kṣaṇādviśvaṃ saṃhariṣyati vāsava |
vayaṃ ca pālanārthāya sṛṣṭā devena vedhasā || 159 ||
[Analyze grammar]

tacca trāṇaṃ sadā kāryaṃ prāṇaiḥ kaṃṭhagatairapi |
asmākaṃ paśyatāmevaṃ yadi saṃkṣobhyate jagat || 160 ||
[Analyze grammar]

dhiktato janma vīrāṇāṃ ślāghyaṃ hi maraṇaṃ kṣaṇāt |
tadasmābhiḥ sahainaṃ tvaṃ kṣatumarhasi vāsava || 161 ||
[Analyze grammar]

evamuktastathetyuktvā devaiḥ sārdhaṃ tamabhyayāt |
vidhitsustasya vīryaṃ sa śakrastūrṇataraṃ tadā || 162 ||
[Analyze grammar]

ugraṃ tacca mahāvegaṃ devānīkaṃ durāsadam |
nardamānaṃ guhaṛ prekṣya nanāda jaladhiryathā || 163 ||
[Analyze grammar]

tasya nādena mahatā samuddhūtodadhiprabham |
babhrāma tatratatraiva deva sainyamacetanam || 164 ||
[Analyze grammar]

jighāṃsūnupasaṃprāptāndevāndṛṣṭvā sa pāvakiḥ |
visasarjja mukhāttatra pravṛddhāḥ pāvakārciṣaḥ || 165 ||
[Analyze grammar]

adahaddevasainyāni ceṣṭa mānāni bhūtale |
te pradīptaśirodehāḥ pradīptāyudhavāhanāḥ || 166 ||
[Analyze grammar]

pracyutāḥ sahasā bhāṃti divastārāgaṇā iva |
dahyamānāḥ prapannāste śaraṇaṃ pāvakātmajam || 167 ||
[Analyze grammar]

devā vajradharaṃ procustyaja vajraṃ śatakrato |
ukto devaistadā śakraḥ skaṃde vajravāsṛjat || 168 ||
[Analyze grammar]

tadvisṛṣṭaṃ jaghānāśu pārśva skaṃdasya dakṣiṇam |
bibheda ca kuruśreṣṭha tadā tasya mahātmanaḥ || 169 ||
[Analyze grammar]

vajraprahārātskaṃdasya saṃjātaḥ puruṣo'paraḥ |
yuvā kāṃcanasannāhaḥ śaktidhṛgdivya kuṃḍalaḥ || 170 ||
[Analyze grammar]

śākha ityabhivikhyātaḥ sopi vyanadadadbhutam |
tataśceṃdraḥ punaḥ kruddho hṛdi skaṃdaṃ vyadārayat || 171 ||
[Analyze grammar]

tatrāpi tādṛśo jajñe naigameya iti śrutaḥ |
tato vinadya skaṃdādyāścatvārastaṃ tadābhyayuḥ || 172 ||
[Analyze grammar]

tadeṃdro vajramutsṛjya prāṃjaliḥ śaraṇaṃ yayau |
tasyābhayaṃ dadau skaṃdaḥ sahasainyasya sattamaḥ || 173 ||
[Analyze grammar]

tataḥ prahṛṣṭāstrabhidaśā vāditrāṇyabhyavādayan |
vajraprahārātkanyāśca jajñire'sya mahābalāḥ || 174 ||
[Analyze grammar]

yā haraṃ ti śiśūñjātāngarbhasthāṃścaiva dāruṇāḥ |
kākī ca hilimā caiva rudrā ca vṛṣabhā tathā || 175 ||
[Analyze grammar]

āyā palālā mitrā ca saptaitāḥ śiśumātaraḥ |
etāsāṃvīryasaṃpannaḥ śiśuścābhūtsudāruṇaḥ || 176 ||
[Analyze grammar]

skaṃdaprasādajaḥ putro lohitākṣo bhayaṃkaraḥ |
eṣa vīrāṣṭakaḥ proktaḥ skaṃdamātṛgaṇo'dbhutaḥ || 177 ||
[Analyze grammar]

pūjanīyaḥ sadā bhaktyā sarvāpasmāraśāṃtidaḥ |
upātiṣṭhattataḥ skaṃdaṃ hiraṇyakavacasrajam || 178 ||
[Analyze grammar]

lohitāṃbarasaṃvītaṃ trailokyasyāpi suprabham |
yuvānaṃ śrīḥ svayaṃ bheje taṃ praṇamya śarīriṇī || 179 ||
[Analyze grammar]

śriyā juṣṭaṃ ca taṃ prāhuḥ sarve devāḥ praṇamya vai |
hiraṇyavarṇṇa bhadraṃ te lokānāṃ śaṃkaro bhava || 180 ||
[Analyze grammar]

bhavāniṃdro'stu no nātha trailokyasya hitāya vai || 181 ||
[Analyze grammar]

skaṃda uvāca |
kimiṃdraḥ sarvalokānāṃ karotīha surottamāḥ |
kathaṃ devagaṇāṃścaiva pāti nityaṃ sureśvaraḥ || 182 ||
[Analyze grammar]

devā ūcuḥ |
iṃdro diśati bhūtānāṃ balaṃ tejaḥ prajāḥ sukham |
prajñāṃ prayacchati tathā sarvāndāyānsureśvaraḥ || 183 ||
[Analyze grammar]

durvṛttānāṃ sa harati vṛttasthānāṃ prayacchati |
anuśāsti ca bhūtāni kāryeṣu balavattaraḥ || 184 ||
[Analyze grammar]

asūrye ca bhavetsūryastathā'caṃdre ca caṃdramāḥ |
bhavatyagniśca vāyuśca pṛthivyāṃ jīvakāraṇam || 185 ||
[Analyze grammar]

etadiṃdreṇa kartavyamiṃdro hi vipulaṃ balam |
tvaṃ ceṃdro bhava no vīra tārakaṃ jahi te namaḥ || 186 ||
[Analyze grammar]

iṃdra uvāca |
tvaṃ bhaveṃdro mahābāho sarveṣāṃ naḥ sukhāvahaḥ |
praṇamya prārthaye skaṃda tārakaṃ jahi rakṣa naḥ || 187 ||
[Analyze grammar]

skaṃda uvāca |
śādhi tvameva trailokyaṃ bhavāniṃdrostu sarvadā |
kariṣye ceṃdrakarmāṇi na mameṃdratvamīpsitam || 188 ||
[Analyze grammar]

tvameva rājā bhadraṃ te trailokyasya mamaiva ca |
karomi kiṃ ca te śakraśāsanaṃ brūhi tanmama || 189 ||
[Analyze grammar]

iṃdra uvāca |
yadi satyamidaṃ vākyaṃ niścayādbhāṣitaṃ tvayā |
abhiṣicchasva devānāṃ saināpatye mahābala |
ahamiṃdro bhaviṣyāmi tava vākyādyaśo'stu te || 190 ||
[Analyze grammar]

skaṃda uvāca |
dānavānāṃ vināśāya devānāmarthasiddhaye |
gobrāhmaṇasya cārthāya evamastu vacastava || 191 ||
[Analyze grammar]

ityukte sumahānādaḥ surāṇāmabhyajāyata |
bhūtānāṃ cāpi sarveṣāṃ trailokyāṃkapakārakaḥ || 192 ||
[Analyze grammar]

jayeti tuṣṭuvuścainaṃ vāditrāṇyabhyavādayan |
nanṛstaṣṭuvuścaivaṃ karāghātāṃśca cakrire || 193 ||
[Analyze grammar]

tena śabdena mahatā vismitā naganaṃdinī |
śaṃkaraṃ prāha ko deva nādo'yamativartate || 194 ||
[Analyze grammar]

rudra uvāca |
adya nunaṃ prahṛṣṭānāṃ surāṇāṃ vividhā giraḥ |
śrūyaṃte ca tathā devī yathā jātaḥ sutastava || 195 ||
[Analyze grammar]

gavāṃ ca brāhmaṇānāṃ ca sādhvīnāṃ ca divaukasām |
mārjayiṣyati cāśrūṇi putraste puṇyavatyapi || 196 ||
[Analyze grammar]

evaṃ vadati sā devī draṣṭuṃ tamutsukā'bhavat |
śaṃkaraśca mahātejāḥ putrasnehādhiko yataḥ || 197 ||
[Analyze grammar]

vṛṣabhaṃ tata āruhya devyā saha samutsukaḥ |
sagaṇo bhava āgacchatputra darśanalālasaḥ || 198 ||
[Analyze grammar]

tato brahmā mahāsenaṃ prajāpatirathābravīt |
abhigaccha mahādevaṃ pitaraṃ mātaraṃ prabho || 199 ||
[Analyze grammar]

anayorvīryasaṃyogāttavotpattistu prāthamī |
evamastviti cāpyuktvā mahāseno maheśvaram || 200 ||
[Analyze grammar]

apūjayadameyātmā pitaraṃ mātaraṃ ca tām |
tatastamāliṃgya sutaṃ ciraṃ saṃyojya cāśiṣaḥ || 201 ||
[Analyze grammar]

ciraṃ jahṛṣatuścobhau pārvatīparameśvarau |
siddhasārasya tattvaṃ ca dadau tuṣṭo'sya śaṃkaraḥ || 202 ||
[Analyze grammar]

devī prakṛtimokṣaṃ ca tuṣṭā harṣapariplutā |
etasminneva kāle tu ṣaḍdevyastaṃ samāgaman || 203 ||
[Analyze grammar]

ṛṣibhistāḥ parityaktāstaṃ putreti jagustadā |
pārvatī ca tataḥ prāha mama putro na vastvayam || 204 ||
[Analyze grammar]

svāhā mameti ca prāha pāvakaśca mameti ca |
rudro mameti ca prāha mama devanadīti ca || 205 ||
[Analyze grammar]

cakruste kalahaṃ ghoraṃ vivadaṃtaḥ parasparam |
putrasneho hi balavānpārtha kiṃkiṃ na kārayet || 206 ||
[Analyze grammar]

tatastānprahasannāha vivādo yujyate na ca |
sarveṣāṃ vo guhaḥ putro matto vai vriyatāṃ varaḥ || 207 ||
[Analyze grammar]

tataḥ prāhuśca ṣaḍdevyaḥ svargo no hyakṣayo bhavet |
tatheti tā gṛhaḥ prāha śakrastatrāṃtare'bravīt || 208 ||
[Analyze grammar]

rohiṇyāścānujā skaṃda spardhamānābhijitkhalā |
itchaṃtī jyeṣṭhatāṃ devī pṛthatkvaṃ ca taporatā || 209 ||
[Analyze grammar]

tataḥ prabhṛti mūḍho'smi tatsthāne sthāpayaprabho |
tatastatheti ca prokte kṛttikāstā divaṃ gatāḥ || 210 ||
[Analyze grammar]

nakṣatraṃ saptaśīrṣābhaṃ bhāti tadvahnidaivatam |
athainamabravītsvāhā priyā nāhaṃ mahārciṣaḥ |
tadagneḥ priyatāṃ dehi sahavāsaṃ sadaiva ca || 211 ||
[Analyze grammar]

skaṃda uvāca |
havyaṃ kavyaṃ ca yatkiṃciddvijā hoṣyaṃti pāvake || 212 ||
[Analyze grammar]

tatte nāmnā pradāsyaṃti vāsaḥ sārdhaṃ bhavettava |
pāvakaḥ prārthayāmāsa yajñabhāgānpunaḥ sutān || 213 ||
[Analyze grammar]

sa cāpyāhādyaprabhṛti yajñabhāgānavāpnuhi |
itare prārthayāmāsuḥ khyāto nastvaṃ suto bhava || 214 ||
[Analyze grammar]

evameveti tānāha skaṃdastaddhi sudurlabham |
tatastaṃ yoginaḥ sarve saṃbhūya sanakādayaḥ |
abhyaṣiṃcangirau tasminyogināmādipatyake || 215 ||
[Analyze grammar]

yogīśvaramiti prāhustatastaṃ yoginastathā |
jahṛpurdevatāścaiva nānāvādyanyavādayan || 216 ||
[Analyze grammar]

abhiṣiktena tenāsau śuśubhe śvetaparvataḥ |
ādityenevāṃśumatā suramya udayācalaḥ || 217 ||
[Analyze grammar]

tato devāḥ sagandharvā nṛtyaṃtyapsarasastathā |
hṛṣṭānāṃ sarvabhūtānāṃ śrūyate ninado mahān || 218 ||
[Analyze grammar]

evaṃ sendraṃ jagatsarvaṃ śvetaparvatasaṃsthitam |
prahṛṣṭaṃ prekṣya taṃ skandaṃ na ca tṛpyati darśanāt || 219 ||
[Analyze grammar]