Chapter 12

[English text for this chapter is available]

nārada uvāca |
atha te dadṛśuḥ pārtha saṃyamasthaṃ mahāmunim |
kūrmākhyānaṃnāmaikādaśo'dhyāyaḥ || 1 ||
[Analyze grammar]

jaṭāstriṣavaṇasnānakapilāḥ śirasā tadā |
dhārayantaṃ lomaśākhyamājyasiktamivānalam || 2 ||
[Analyze grammar]

savyahaste tṛṇaughaṃ ca cchāyārthe viprasattamam |
dakṣiṇe cākṣamālāṃ ca bibhrataṃ maitramārgagam || 3 ||
[Analyze grammar]

ahiṃsayanduruktādyaiḥ prāṇino bhūmicāriṇaḥ |
yaḥ siddhimeti japyena sa maitro munirucyate || 4 ||
[Analyze grammar]

bakabhūpadvijolūkagṛdhrakūrmā vilokya ca |
nemuḥ kalāpagrāme taṃ ciraṃtanataponidhim || 5 ||
[Analyze grammar]

svāgatāsanasatkāreṇāmunā te'ti satkṛtāḥ |
yathocitaṃ pratītāstamāhuḥ kāryaṃ hṛdi sthitam || 6 ||
[Analyze grammar]

kūrma uvāca |
indradyumno'yamavanīpatiḥ satrijanāgraṇīḥ |
kīrtilopānnirasto'yaṃ vedhasā nākapṛṣṭhataḥ || 7 ||
[Analyze grammar]

mārkaṃḍeyādibhiḥ prāpya kīrtyuddhāraṃca sattama |
nāyaṃ kāmayate svargaṃ punaḥpātādibhīṣaṇam || 8 ||
[Analyze grammar]

bhavatānugṛhīto'yamihecchati mahodayam |
praṇodyastadayaṃ bhūpaḥ śiṣyaste bhagavanmayā |
tvatsakāśamihānīto brūhi sādhvasya vāṃchitam || 9 ||
[Analyze grammar]

paropakaraṇaṃ nāma sādhūnāṃ vratamāhitam |
viśeṣataḥ praṇodyānāṃ śiṣyavṛttimupeyuṣām || 10 ||
[Analyze grammar]

apraṇodyeṣu pāpeṣu sādhu proktamasaṃśayam |
vidveṣaṃ maraṇaṃ cāpi kurute'nyatarasya ca || 11 ||
[Analyze grammar]

apramattaḥ praṇodyeṣu munireṣa prayacchati |
tadeveti bhavānevaṃ dharmaṃ vetti kuto vayam || 12 ||
[Analyze grammar]

lomaśa uvāca |
kūrma yuktamidaṃ sarvaṃ tvayābhihitamadya naḥ |
dharmaśāstropanataṃ tatsmāritāḥ sma purātanam || 13 ||
[Analyze grammar]

brūhi rājansuviśrabdhaṃ sandehaṃ hṛdayasthitam |
kaste kimabravīccheṣaṃ vakṣyāmyahaṃ na saṃśayaḥ || 14 ||
[Analyze grammar]

indradyumna uvāca |
bhagavanprathamaḥ praśrastāvadeva mamocyatām |
grīṣmakāle'pi madhyasthai ravau kiṃ na tavāśramaḥ || 15 ||
[Analyze grammar]

kuṭīmātro'pi yacchāyā tṛṇaiḥ śirasi pāṇigaiḥ || 16 ||
[Analyze grammar]

lomaśa uvāca |
martavyamastyavaśyaṃ ca kāya eṣa patiṣyati |
kasyārthe kriyate gehamanityabhavamadhyagaiḥ || 17 ||
[Analyze grammar]

yasya mṛtyurbhavenmitraṃ pītaṃ vā'mṛtamuttamam |
tasyaitaducitaṃ vaktumidaṃ me śvo bhaviṣyati || 18 ||
[Analyze grammar]

idaṃ yugasahasreṣu bhaviṣyamabhaviddinam |
tadapyadyatvamāpannaṃ kā kathāmaraṇāvadheḥ || 19 ||
[Analyze grammar]

kāraṇānugataṃ kāryamidaṃ śukrādabhūdvapuḥ |
kathaṃ viśuddhimāyāti kṣālitāṃgāravadvada || 20 ||
[Analyze grammar]

tadasyāpi kṛte pāpaṃ śatruṣaḍvarganirjitāḥ |
kathaṃkāraṃ na lajjante kurvāṇā nṛpasattama || 21 ||
[Analyze grammar]

tadbrahmaṇa ihotpannaḥ sikatādvayasambhavaḥ |
nigamoktaṃ paṭhañchṛṇvannidaṃ jīviṣyate katham || 22 ||
[Analyze grammar]

tathāpi vaiṣṇavī māyā mohayatyavivekinam |
hṛdayasthaṃ na jānaṃti hyapi mṛtyu śatāyuṣaḥ || 23 ||
[Analyze grammar]

dantāścalāścalā lakṣmīryauvanaṃ jīvitaṃ nṛpa |
calācalamatīvedaṃ dānamevaṃ gṛhaṃ nṛṇām || 24 ||
[Analyze grammar]

iti vijñāya saṃsārasāraṃ ca calācalam |
kasyārthe kriyate rājankuṭajādi parigrahaḥ || 25 ||
[Analyze grammar]

indradyumna uvāca |
cirāyurbhagavāneva śrūyate bhuvanatraye |
tadarthamahamāyātastatkimevaṃ vacastava || 26 ||
[Analyze grammar]

lomaśa uvāca |
pratikalpaṃ maccharīrādekaromaparikṣayaḥ |
jāyate sarvanāśe ca mama bhāvi pramāpaṇam || 27 ||
[Analyze grammar]

paśya jānupradeśaṃ me dvyaṃgulaṃ romavarjitam |
jātaṃ vapustadbibhemi martavye sati kiṃ gṛhaiḥ || 28 ||
[Analyze grammar]

nārada uvāca |
itthaṃ niśamya tadvākyaṃ sa prahasyātivismitaḥ |
bhūpālastasya papraccha kāraṇaṃ tādṛśāyuṣaḥ || 29 ||
[Analyze grammar]

indradyumna uvāca |
pṛcchāmi tvāmahaṃ brahmanyadāyuridamīdṛśam |
tava dīrghaṃ prabhāvo'sau dānasya tapaso'thavā || 30 ||
[Analyze grammar]

lomaśa uvāca |
śrṛṇu bhūpa pravakṣyāmi pūrvajanmasamudbhavām |
śivadharmayutāṃ puṇyāṃ kathāṃ pāpapraṇāśanīm || 31 ||
[Analyze grammar]

ahamāsaṃ purā śūdro daridro'tīvabhūtale |
bhramāmi vasudhāpṛṣṭhe hyaśanapīḍito bhṛśam || 32 ||
[Analyze grammar]

tato mayā mahalliṃgaṃ jālimadhyagataṃ tadā |
madhyāhne'sya jalādhāro dṛṣṭaścaivā vidūrataḥ || 33 ||
[Analyze grammar]

tataḥ praviśya tadvāri pītvā snātvā ca śāṃbhavam |
talliṃgaṃ snāpitaṃ pūjā vihitā kamalaiḥ śubhaiḥ || 34 ||
[Analyze grammar]

atha kṣutkṣāmakaṃṭho'haṃ śrīkaṃṭhaṃ taṃ namasya ca |
punaḥ pracalito mārge pramīto nṛpasattama || 35 ||
[Analyze grammar]

tato'haṃ brāhmaṇagṛhe jāto jātismaraḥ sutaḥ |
snāpanācchivaliṃgasya sakṛtkamalapūjanāt || 36 ||
[Analyze grammar]

smaranvilasitaṃ mithyā satyābhāsamidaṃ jagat |
avidyāmayamityevaṃ jñātvā mūkatvamāsthitaḥ || 37 ||
[Analyze grammar]

tena vipreṇa vārdhakye samārādhya maheśvaram |
prāpto'hamiti me nāma īśāna iti kalpitam || 38 ||
[Analyze grammar]

tataḥ sa vipro vātsalyādagadānsubahūnmama |
cakāra vyapaneṣyāmi mūkatvamiti niścayaḥ || 39 ||
[Analyze grammar]

maṃtravādānbahūnvaidyānupāyānaparānapi |
pitrostathā mahāmāyāsaṃbaddhamanasostathā || 40 ||
[Analyze grammar]

nirīkṣya mūḍhatāṃ hāsyamāsīnmanasi me tadā |
tathā yauvanamāsādya niśi hitvā nijaṃ gṛham || 41 ||
[Analyze grammar]

saṃpūjya kamalaiḥ śaṃbhuṃ tataḥ śayanamabhyagām |
tataḥ pramīte pitari mūḍhaityahamujjhitaḥ || 42 ||
[Analyze grammar]

saṃbaṃdhibhiḥ pratīto'tha phalāhāramavasthitaḥ |
pratītaḥ pūjayāmīśamabjairbahuvidhaistathā || 43 ||
[Analyze grammar]

atha varṣaśatasyāṃte varadaḥ śaśiśekharaḥ |
pratyakṣo yācito dehi jarāmaraṇasaṃkṣayam || 44 ||
[Analyze grammar]

īśvara uvāca |
ajarāmaratā nāsti nāmarūpabhṛtoyataḥ |
mamāpi dehapātaḥ syādavadhiṃ kuru jīvite || 45 ||
[Analyze grammar]

iti śaṃbhorvacaḥ śrutvā mayā vṛtimidaṃ tadā |
kalpāṃte romapāto'stu maraṇaṃ sarvasaṃkṣaye || 46 ||
[Analyze grammar]

tatastava gaṇo bhūyāmiti me'bhīpsito varaḥ |
tathetyuktvā sa bhagavānharaścādarśanaṃ gataḥ || 47 ||
[Analyze grammar]

ahaṃ tapasiniṣṭhaśca tataḥ prabhṛti cābhavam |
brahmahatyādibhiḥ pāpairmucyate śivapūjanāt || 48 ||
[Analyze grammar]

bradhnābjairitarairvapi kamalairnātra saṃśayaḥ |
evaṃ kuru mahārāja tvamapyāpsyasi vāṃchitam || 49 ||
[Analyze grammar]

harabhaktasya lokasya trilokyāṃ nāsti durlabham |
bahiḥpravṛttiṃ sagṛhya jñānakarmendriyādi ca || 50 ||
[Analyze grammar]

layaḥ sadāśive nityamataryo go'yamucyate |
duṣkaratvādvahiryogaṃ śiva eva svayaṃ jagau || 51 ||
[Analyze grammar]

paṃcabhiścārcanaṃ bhūtairviśiṣṭaphaladaṃ dhruvam |
kleśakarmavipākādyairāśayaiścāpya saṃyutam || 52 ||
[Analyze grammar]

īśānamārādhya japanpraṇavaṃ muktipāpnuyāt |
sarvapāpakṣaye jāte śive bhavati bhāvanā || 53 ||
[Analyze grammar]

pāpopahatabuddhīnāṃ śive vārtāpi durlabhā |
durlabhaṃ bhārate janma durlabhaṃ śivapūjanam || 54 ||
[Analyze grammar]

durlabhaṃ jāhnavīsnānaṃ śive bhaktiḥ sudurlabhā |
durlabhaṃ brāhmaṇe dānaṃ durlabhaṃ vahnipūjanam || 55 ||
[Analyze grammar]

alpapuṇyaiśca duṣprāpaṃ puruṣottamapūjanam || 56 ||
[Analyze grammar]

lakṣeṇa dhanuṣāṃ yogastadardhena hutāśanaḥ |
pātraṃ śatasahasreṇa revā rudraśca ṣaṣṭibhiḥ || 57 ||
[Analyze grammar]

iti damuktamakhilaṃ mayā tava mahīpate |
yathāyurabhavaddīrghaṃ samārādhya maheśvaram || 58 ||
[Analyze grammar]

na durlabhaṃ na duṣprāpaṃ na cāsādhyaṃ mahātmanām |
śivabhaktikṛtāṃ puṃsāṃ trilokyāmiti niścitam || 59 ||
[Analyze grammar]

naṃdīśvarasya tenaiva vapuṣā śivapūjanāt |
siddhimālokya ko rājañchaṃkaraṃ na namasyati || 60 ||
[Analyze grammar]

śvetasya ca mahīpasya śrīkaṃṭhaṃ ca namasyataḥ |
kālopi pralayaṃ yātaḥ kastamīśaṃ na pūjayet || 61 ||
[Analyze grammar]

yadicchayā viśvamidaṃ jāyate vyavatiṣṭhate |
tathā saṃlīyate cāṃte kastaṃ na śaraṇaṃ vrajet || 62 ||
[Analyze grammar]

etadrahasyamidameva nṛṇāṃ pradhānaṃ kartavyamatra śivapūjanameva bhūpa |
yasyāṃtarāyapadavīmupayāṃti lokāḥ sadyoḥ naraḥ śivanataḥ śivameva satyam || 63 ||
[Analyze grammar]