Chapter 5

[English text for this chapter is available]

nārada uvāca |
tato'haṃ dharmavarmāṇaṃ procya tiṣṭheddhanaṃ tvayi |
kṛtyakāle grahīṣyāmītyāgamaṃ raivataṃ girim || 1 ||
[Analyze grammar]

āsaṃ pramuditaścāhaṃ paśyaṃstaṃ girisattamam |
āhvayānaṃ narānsādhūnbhūmerbhujamivocchritam || 2 ||
[Analyze grammar]

yasminnānāvidhā vṛkṣāḥ prakāśaṃte samaṃtataḥ |
sādhuṃ gṛhapatiṃ prāpya putrabhāryādayo yathā || 3 ||
[Analyze grammar]

muditā yatra saṃtṛptā vāśaṃte kokilādayaḥ |
sadgurorjñānasaṃpannā yathā śiṣyagaṇā bhuvi || 4 ||
[Analyze grammar]

yatra taptvā tapo martyā yathepsitamavāpnuyuḥ |
śrīmahādevamāsādya bhakto yadvanmanoratham || 5 ||
[Analyze grammar]

tasyāhaṃ ca gireḥ pārtha samāsādya mahāśilām |
śītasaurabhyamaṃdena prīṇīto'ciṃtayaṃ hṛdi || 6 ||
[Analyze grammar]

tāvanmayā sthānamāptaṃ yadatīva sudurlabham |
idānīṃ brāhmaṇārthe'haṃ kurve tāvadupakramam || 7 ||
[Analyze grammar]

brāhmaṇāśca vilokya me ye hi pātratamā matāḥ |
tathā hi cātra śrūyaṃte vacāṃsi śrutivādinām || 8 ||
[Analyze grammar]

na jalottaraṇe śaktā yadvannauḥ karṇavarjitā |
tadvacchreṣṭho'pyanācāro vipro noddharaṇakṣamaḥ || 9 ||
[Analyze grammar]

brāhmaṇo hyanadhīyānastṛṇāgniriva śāmyati |
tasmai havyaṃ na dātavyaṃ na hi bhasmani hūyate || 10 ||
[Analyze grammar]

dānapātramatikramya yadapātre pradīyate |
taddattaṃ gāmatikramya gardabhasya gavāhnikam || 11 ||
[Analyze grammar]

ūṣare vāpitaṃ bījaṃ bhinnabhāṃḍe ca goduham |
bhasmanīva hutaṃ havyaṃ mūrkhe dānamaśāśvatam || 12 ||
[Analyze grammar]

vidhihīne tathā'pātre yo dadāti pratigraham |
na kevalaṃ hi tadyāti śeṣaṃ puṇyaṃ praṇaśyati || 13 ||
[Analyze grammar]

bhūrāptā gaustathā bhogāḥ suvarṇaṃ dehameva ca |
aśvaścakṣustathā vāso ghṛtaṃ tejastilāḥ prajāḥ || 14 ||
[Analyze grammar]

ghnaṃti tasmādavidvāṃstu bibhiyācca pratigrahāt |
svalpaka kenāpyavidvāṃstu paṃke gauriva sīdati || 15 ||
[Analyze grammar]

tasmādye gūḍhatapaso gūḍhasvādhyāyasādhakāḥ |
svadāraniratāḥ śāṃtāsteṣu dattaṃ sadā'kṣayam || 16 ||
[Analyze grammar]

deśe kāla upāyena dravyaṃ śraddhāsamanvitam |
pātre pradīyate yattatsakalaṃ dharmalakṣaṇam || 17 ||
[Analyze grammar]

na vidyayā kevalayā tapasā vāpi pātratā |
yatra vṛttimime cobhe tadvi pātraṃ pracakṣate || 18 ||
[Analyze grammar]

teṣāṃ trayāṇāṃ madhye ca vidyā mukhyo mahāguṇaḥ |
vidyāṃ vināṃdhavadviprāścakṣuṣmaṃto hi te matāḥ || 19 ||
[Analyze grammar]

tasmāccakṣuṣmato vidvāndeśe deśe parīkṣayet |
praśrānye mama vakṣyaṃti tebhyo dāsyāmyahaṃ tataḥ || 20 ||
[Analyze grammar]

iti saṃciṃtya manasā tasmāddeśātsamutthitaḥ |
āśrameṣu maharṣīṇāṃ vicarāmyasmi phālguna || 21 ||
[Analyze grammar]

imāñchlokāngāyamānaḥ praśrarūpāñchṛṇuṣva tān |
mātṛkāṃ ko vijānāti katidhā kīdṛśākṣarām || 22 ||
[Analyze grammar]

paṃcapaṃcādbhutaṃ gehaṃ ko vijānāti vā dvijaḥ |
bahurūpāṃ striyaṃ kartumekarūpāṃ ca vatti kaḥ || 23 ||
[Analyze grammar]

ko vā citrakathābaṃdhaṃ vetti saṃsāragocaraḥ |
ko vārṇavamahāgrāhaṃ vetti vidyāparāyaṇaḥ || 24 ||
[Analyze grammar]

ko vāṣṭavidhaṃ brāhmaṇyaṃ vetti brāhmaṇasattamaḥ |
yugānāṃ ca caturṇāṃ vā ko mūladivasānvadet || 25 ||
[Analyze grammar]

caturdaśamanūnāṃ vā mūlavāsaraṃ vetti kaḥ |
kasmiṃścaiva dine prāpa pūrvaṃ vā bhāskaro ratham || 26 ||
[Analyze grammar]

udvejayati bhūtāni kṛṣṇāhirivavetti kaḥ |
ko vāsminghorasaṃsāre dakṣadakṣatamo bhavet || 27 ||
[Analyze grammar]

paṃthānāvapi dvau kaścidvetti vakti ca brāhmaṇaḥ |
iti me dvādaśa praśrānye vidurbrāhmaṇottamāḥ || 28 ||
[Analyze grammar]

te me pūjyatamāsteṣāmahāmārādhakaściram |
ityahaṃ gāyamāno vai bhramitaḥ sakalāṃ mahīm || 29 ||
[Analyze grammar]

te cāhurduḥkhadāḥ khyātāḥ praśrāste kurmahe namaḥ |
ityahaṃ sakalāṃ pṛthvīṃ viciṃtyālabdhabrāhmaṇaḥ || 30 ||
[Analyze grammar]

himādriśikharāsīno bhūyaściṃtāmavāptavān |
sarve vilokitā viprāḥ kimataḥ kartumutsahe || 31 ||
[Analyze grammar]

tato me ciṃtayānasya punarjātāmatistviyam |
adyāpi na gataścāhaṃ kalāpagrāmamuttamam || 32 ||
[Analyze grammar]

yasminviprāḥ saṃvasaṃti mūrtānīva tapāṃsi ca |
caturāśītisāhasrāḥ śrutādhyayanaśālinaḥ || 33 ||
[Analyze grammar]

sthāne tasmingamiṣyāmītyuktvāhaṃ calitastadā |
khecaro himamākramya paraṃ pāraṃ gatastataḥ || 34 ||
[Analyze grammar]

adrākṣaṃ puṇyabhūmisthaṃ grāmaratnamahaṃ mahat |
śatayojanavistīrṇaṃ nānāvṛkṣasamākulam || 35 ||
[Analyze grammar]

yatra puṇyavatāṃ saṃti śataśaḥ pravarāśramāḥ |
sarveṣāmapi jīvānāṃ yatrānyonyaṃ na duṣṭatā || 36 ||
[Analyze grammar]

yajñabhājāṃ munīnāṃ yadupakārakaraṃ sadā |
satāṃ dharmavatāṃ yadvadupakāro na śāmyati || 37 ||
[Analyze grammar]

munīnāṃ yatra paramaṃ sthānaṃ cāpyavināśakṛt |
svāhāsvadhāvaṣaṭkārahantakāro na naśyati || 38 ||
[Analyze grammar]

yatra kṛtayugastārthaṃ bījaṃ pārthāvaśiṣyate |
sūryasya somavaṃśasya brāhmaṇānāṃ tathaiva ca || 39 ||
[Analyze grammar]

sthānakaṃ tatsamāsādya praviṣṭo'haṃ dvijāśramān |
tatra te vividhānvādānvivadaṃte dvijottamāḥ || 40 ||
[Analyze grammar]

parasparaṃ ciṃtayānā vedā mūrtidharā yathā |
tatra medhāvinaḥ kecidarthamanyaiḥ prapūritam || 41 ||
[Analyze grammar]

vicikṣipurmahātmāno nabhogatamivāmiṣam |
tatrā haṃ karamudyamya prāvocaṃ pūryatāṃ dvijāḥ || 42 ||
[Analyze grammar]

kākārāvaiḥ kimatairvo yadyasti jñānaśālitā |
vyākurudhvaṃ tataḥ praśrānmama durviṣahānbahūn || 43 ||
[Analyze grammar]

brāhmaṇā ūcuḥ |
vada brāhmaṇa praśrānsvāñchrutvā'dhāsyāmahe vayam |
paramo hyeṣa no lābhaḥ prakṣānpṛcchati yadbhavān || 44 ||
[Analyze grammar]

ahaṃ pūrvikayā te vai nyaṣedhaṃta parasparam |
ahaṃ pūrvamahaṃ pūrvamiti vīrā yathā raṇe || 45 ||
[Analyze grammar]

tatastānbravaṃ praśrānahaṃ dvādaśa pūrvakān |
śrutvā te māmavo caṃta līlāyaṃto munīśvarāḥ || 46 ||
[Analyze grammar]

kiṃ te dvija bālapraśnairamībhiḥ svalpakairapi |
asmākaṃ yannihīnaṃ tvaṃ manyase sa bravītvamūn || 47 ||
[Analyze grammar]

tatoti vismitaścāhaṃ manyamānaḥ kṛtārthatām |
teṣāṃ nihīnaṃ saṃciṃtya prāvocaṃ prabravītvayam || 48 ||
[Analyze grammar]

tataḥ sutanunāmā sa bālo'bālo'bhyuvāca mām |
mama maṃdāyate vāṇī praśnaiḥ svalpaistava dvija |
tathāpi vacmi māṃ yasmānnihīnaṃ manyate bhavān || 49 ||
[Analyze grammar]

sutanuruvāca |
akṣarāstu dvipaṃ cāśanmātṛkāyāḥ prakīrtitāḥ || 50 ||
[Analyze grammar]

oṃkāraḥ prathamastatra caturdaśa svarāstathā |
sparśāścaiva trayastriṃ śadanusvārastathaiva ca || 51 ||
[Analyze grammar]

visarjjanīyaśca paro jihvāmūlīya eva ca |
upadhmānīya evāpi dvipaṃcāśadamī smṛtāḥ || 52 ||
[Analyze grammar]

iti te kathitā saṃkhyā arthaṃ caiṣāṃ śrṛṇu dvija |
asminnarthe ceti hāsaṃ tava vakṣyāmi yaḥ purā || 53 ||
[Analyze grammar]

mithilāyāṃ pravṛtto'bhūdbrāhmaṇasya niveśane |
mithilāyāṃ purā puryāṃ brāhmaṇaḥ kauthumābhidhaḥ || 54 ||
[Analyze grammar]

yena vidyāḥ prapaṭhitā vartaṃte bhuvi yā dvija |
ekatriṃśatsahasrāṇi varṣāṇāṃ sa kṛtādaraḥ || 55 ||
[Analyze grammar]

kṣaṇamapyanavacchinnaṃ paṭhitvā gehavānabhūt |
tataḥ kenāpi kālena kauthumasyābhavatsutaḥ || 56 ||
[Analyze grammar]

jaḍavadvarttamānaḥ sa mātṛkāṃ pratyapadyata |
paṭhitvā mātṛkāmanyannādhyeti sa kathaṃcana || 57 ||
[Analyze grammar]

tataḥ pitā khinnarūpī jaḍaṃ taṃ samabhāṣata |
adhīṣva putrakādhīṣva tava dāsyāmi modakān || 58 ||
[Analyze grammar]

athānyasmai pradāsyāmi karṇāvutpāṭayāmi te || 59 ||
[Analyze grammar]

putra uvāca |
tāta kiṃ modakārthāya paṭhyate lobhahetave |
paṭhanaṃnāma yatpuṃsāṃ parāmārthaṃ hi tatsmṛtam || 60 ||
[Analyze grammar]

kauthuma uvāca |
evaṃ te vadamānasya āyurbhavatu brahmaṇaḥ |
sādhvī buddhiriyaṃ te'stu kuto nādhyeṣyataḥ param || 61 ||
[Analyze grammar]

putra uvāca |
tāta sarvaṃ parijñeyaṃ jñānamatraiva vai yataḥ |
tataḥ paraṃ kaṃṭhaśoṣaḥ kimarthaṃ kriyate vada || 62 ||
[Analyze grammar]

pitovāca |
vicitraṃ bhāṣase bāla jñāto'trārthaśca kastvayā |
brūhi brūhi punarvatsa śrotumicchāmi te giram || 63 ||
[Analyze grammar]

putra uvāca |
ekatriṃśatsahasrāṇi paṭhitvāpi tvayā pitaḥ |
nānātarkānbhrāṃtireva saṃdhitā manasisvake || 64 ||
[Analyze grammar]

ayamayaṃ cāyamiti dharmo yo darśanoditaḥ |
teṣu vātāyate cetastava tannāśayāmi te || 65 ||
[Analyze grammar]

upadeśaṃ paṭhasyeva naivārthajño'si tattvataḥ |
pāṭhamātrā hi ye viprā dvipadāḥ paśavo hi te || 66 ||
[Analyze grammar]

tatte bravīmi tadvākyaṃ mohamārtaṃḍamadbhutam || 67 ||
[Analyze grammar]

akāraḥ kathito brahmā ukāro viṣṇurucyate |
makāraśca smṛto rudrastrayaścaite guṇāḥ smṛtāḥ || 68 ||
[Analyze grammar]

ardhamātrā ca yā mūrdhni paramaḥ sa sadāśivaḥ |
evamoṃkāramāhātmyaṃ śrutireṣā sanātanī || 69 ||
[Analyze grammar]

oṃkārasya ca māhātmyaṃ yāthātmyena na śakyate |
varṣāṇāmayutenāpi graṃthakoṭibhireva vā || 70 ||
[Analyze grammar]

punaryatsārasarvasvaṃ proktaṃ tacchrūyatāṃ param |
aḥkārāṃtā akārādyā manavaste caturdaśa || 71 ||
[Analyze grammar]

svāyaṃbhuvaśca svārocirauttamo raivatastathā |
tāmasaścākṣuṣaḥ ṣaṣṭhastathā vaivasvato'dhunā || 72 ||
[Analyze grammar]

sāvarṇirbrahmasāvarṇī rudrasāvarṇireva ca |
dakṣasāvarṇirevāpi dharmasāvarṇireva ca || 73 ||
[Analyze grammar]

raucyo bhautyastathā cāpi manavo'mī caturdaśa |
śvetaḥ pāṃḍustathā raktastāmraḥ pītaśca kāpilaḥ || 74 ||
[Analyze grammar]

kṛṣṇaḥ śyāmastathā dhūmraḥ supiśaṃgaḥ piśaṃgakaḥ |
trivarṇaḥ śabalo varṇaiḥ karkaṃdhura iti kramāt || 75 ||
[Analyze grammar]

vaivasvataḥ kṣakāraśca tāta kṛṣṇaḥ pradṛśyate |
kakārādya hakārāṃtāstrayastriṃśacca devatāḥ || 76 ||
[Analyze grammar]

kakārādyāṣṭhakārāṃtā ādityā dvādaśa smṛtāḥ |
dhātā mitro'ryamā śakro varuṇāścāṃśureva ca || 77 ||
[Analyze grammar]

bhago vivasvānpūṣā ca savitā daśamastathā |
ekādaśastathā tvaṣṭā viṣṇurdvādaśa ucyate || 78 ||
[Analyze grammar]

jaghanyajaḥ sa sarveṣāmādityānāṃ guṇādhikaḥ |
ḍakārādyā bakārāṃtā rudrāścaikādaśaiva tu || 79 ||
[Analyze grammar]

kapālī piṃgalo bhīmo virupākṣo vilohitaḥ |
ajakaḥ śāsanaḥ śāstā śaṃbhuścaṇḍo bhavastathā || 80 ||
[Analyze grammar]

bhakārādyāḥ ṣakārāṃtā aṣṭau hi vasavo matāḥ |
dhruvo ghoraśca somaśca āpaścaiva nalo'nilaḥ || 81 ||
[Analyze grammar]

pratyūṣaśca prabhāsaśca aṣṭau te vasavaḥ smṛtāḥ |
sau haścetyaśvinau khyātau trayastriṃśadime smṛtāḥ || 82 ||
[Analyze grammar]

anusvāro visargaśca jihvāmūlīya eva ca |
upadhmānīya ityete jarāyujāstathāṃḍajāḥ || 83 ||
[Analyze grammar]

svedajāścodbhijāśceti tata jīvāḥ prakīrtitāḥ |
bhāvārthaḥ kathitaścāyaṃ tattvārthaṃ śrṛṇu sāṃpratam || 84 ||
[Analyze grammar]

ye pumāṃsastvamūndevānsamāśritya kriyāparāḥ |
ardhamātrātmake nitye pade līnāsta eva hi || 85 ||
[Analyze grammar]

caturṇāṃ jīvayonīnāṃ tadaiva parimucyate |
yadābhūnmanasā vācā karmaṇā ca yajetsurān || 86 ||
[Analyze grammar]

yasmiñchāstre tvamī devā mānitā naiva pāpibhiḥ |
tacchāstraṃ hi na maṃtavyaṃ yadi brahmā svayaṃ vadet || 87 ||
[Analyze grammar]

amī ca devāḥ sarvatra śraute mārge pratiṣṭhitāḥ |
pāṣaṇḍaśāstre sarvatra niṣiddhāḥ pāpakarmabhiḥ || 88 ||
[Analyze grammar]

tadamūnye vyatikramya tapo dānamatho japam |
prakurvaṃti durātmāno vepate marutaḥ pathi || 89 ||
[Analyze grammar]

aho mohasya māhātmyaṃ paśyatāvijitātmanām |
paṭhaṃti mātṛkāṃ pāpā manyaṃte na surāniha || 90 ||
[Analyze grammar]

sutanuruvāca |
iti tasya vacaḥ śrutvā pitābhūdativismitaḥ |
papraccha ca bahūnpraśrānsopya vādīttathātathā || 91 ||
[Analyze grammar]

mayāpi tava prokto'yaṃ mātṛkāpraśra uttamaḥ |
dvitīyaṃ śrṛṇu taṃ praśnaṃ paṃcapaṃcādbhutaṃ gṛham || 92 ||
[Analyze grammar]

paṃcabhūtāni pañcaiva karmajñāneṃdriyāṇi ca |
paṃca paṃcāpi viṣayā manobuddhyahameva ca || 93 ||
[Analyze grammar]

prakṛtiḥ puruṣaścaiva pañcaviṃśaḥ sadāśivaḥ |
pañcapañcabhiretataistu niṣpannaṃ gṛhamucyate || 94 ||
[Analyze grammar]

dehametadidaṃ veda tattvato yātyasau śivam |
bahurūpāṃ striyaṃ prāhurbuddhiṃ vedāṃtavādinaḥ || 95 ||
[Analyze grammar]

sā hi nānārthabhajanānnānārūpaṃ prapadyate |
dharmasyaikasya saṃyogādbahudhāpyekikaiva sā || 96 ||
[Analyze grammar]

iti yo vede tattvārthaṃ nāsau narakamāpnuyāt |
munibhiryaśca na proktaṃ yanna manyeta daivatān || 97 ||
[Analyze grammar]

vacanaṃ tadbudhāḥ prahurbaṃdhaṃ citrakathaṃ tviti |
yacca kāmānvitaṃ vākyaṃ paṃcamaṃ vāpyataḥ śruṇu || 98 ||
[Analyze grammar]

eko lobho mahāngrāho lobhātpāpaṃ pravartate |
lobhātkrodhaḥ prabhavati lobhātkāmaḥ pravartate || 99 ||
[Analyze grammar]

lobhānmohaśca māyā ca mānaḥ stambhaḥ pareṣsutā |
avidyā'prajñatā caiva sarvaṃ lobhātpravartate || 100 ||
[Analyze grammar]

haraṇaṃ paravittānāṃ paradārābhimarśanam |
sāhasānāṃ ca sarveṣāmakāryāṇaāṃ kriyāstathā || 101 ||
[Analyze grammar]

sa lobhaḥ saha mohena vijetavyo jitātmanā |
dambho drohaśca niṃdā ca paiśunyaṃ matsarastathā || 102 ||
[Analyze grammar]

bhavantyetāni sarvāṇi lubdhānāmakṛtātmanām |
sumahāṃ tyapi sāstrāṇi dhārayaṃti bahuśrutāḥ || 103 ||
[Analyze grammar]

chettāraḥ saṃśayānāṃ ca lobhagrastā vrajaṃtyadhaḥ |
lobhakrodhaprasaktāśca śiṣṭācārabahiṣkṛtāḥ || 104 ||
[Analyze grammar]

antaḥkṣurā vāṅmadhurāḥ kūpāśdhannāstṛṇauriva |
kurvate ye bahūnmārgāṃstāṃstānhetubalanvitāḥ || 105 ||
[Analyze grammar]

sarvamārgaṃ viluṃmapaṃti lobhājjātiṣu niṣṭhurāḥ |
dharmāvataṃsakāḥ kṣudrā muṣṇaṃti dhvajino jagat || 106 ||
[Analyze grammar]

ete'tipāpino jñeyā nityaṃ lobhasamanvitāḥ |
janako yuvanāśvaśca vṛṣādarbhiḥ prasenajit || 107 ||
[Analyze grammar]

lobhakṣayāddivaṃ prāptāstathaivānye janādhipāḥ |
tasmāttyajaṃti ye lobhaṃ te'tikrāmaṃti sāgaram || 108 ||
[Analyze grammar]

saṃsārākhyamato'naye ye grāhagrastā na saṃśayaḥ |
atha brāhmaṇabhedāṃstvamaṣṭo viprāvadhāraya || 109 ||
[Analyze grammar]

mātraśca brāhmaṇaścaiva śrotriyaśca tataḥ param |
anūcānastathā bhrūṇa ṛṣikalpa ṛṣirmuniḥ || 110 ||
[Analyze grammar]

ete hyaṣṭau samuddiṣṭā brāhmaṇāḥ prathamaṃ śrutau |
teṣāṃ paraḥ paraḥ śreṣṭho vidyāvṛttaviśeṣataḥ || 111 ||
[Analyze grammar]

brāhmaṇānāṃ kule jāto jātimātro yadā bhavet |
anupetaḥ kriyāhīno mātra ityabhidhīyate || 112 ||
[Analyze grammar]

ekoddeśyamatikramya vedasyācāravānṛjuḥ |
sa brāhmaṇa iti prokto nibhṛtaḥ satyavāgghṛṇī || 113 ||
[Analyze grammar]

ekāṃ śākhāṃ sakalpāṃ ca ṣaḍbhiraṃgairadhītya ca |
ṣaṭkarmanirato vipraḥ śrotriyonāma dharmavit || 114 ||
[Analyze grammar]

vedavedāṃgatattvajñaḥ śuddhātmā pāpavarjitaḥ |
śreṣṭhaḥ śrotriyavānprājñaḥ so'nūcāna iti smṛtaḥ || 115 ||
[Analyze grammar]

anūcānaguṇopeto yajñasvādhyāyayaṃtritaḥ |
bhrūṇa ityucyate śiṣṭaiḥ śeṣabhojī jiteṃdriyaḥ || 116 ||
[Analyze grammar]

vaidikaṃ laukikaṃ caiva sarvajñānamavāpya yaḥ |
āśramastho vaśī nityamṛṣikalpa iti smṛtaḥ || 117 ||
[Analyze grammar]

ūrdhvaretā bhavatyagryo niyatāśī nasaṃśa yī |
śāpānugrahayoḥ śaktaḥ satyasaṃdho bhavedṛṣiḥ || 118 ||
[Analyze grammar]

nivṛttaḥ sarvatattvajñaḥ kāmakrodhavivarjitaḥ |
dhyānasthāniṣkriyo dāṃtastulyamṛtkāṃcano muniḥ || 119 ||
[Analyze grammar]

evamanvayavidyābhyāṃ vṛttena ca samucchritāḥ |
triśuklānāma vipreṃdrāḥ pūjyante savanādiṣu || 120 ||
[Analyze grammar]

ityevaṃvidhavipratvamuktaṃ śrṛṇu yugādayaḥ |
navamī kārtike śuklā kṛtādiḥ parikīrtitā || 121 ||
[Analyze grammar]

vaiśākhasya tṛtīyā yā śuklā tretādirucyate |
māghe pañcadaśīnāma dvāparādiḥ smṛtā budhaiḥ || 122 ||
[Analyze grammar]

trayodaśī nabhasye ca kṛṣṇā sā hi kaleḥ smṛtā |
yugādayaḥ smṛtā hyetā dattasyākṣayakārakāḥ || 123 ||
[Analyze grammar]

etāścatasrastithayo yugādyā dattaṃ hutaṃ cākṣayamāśu vidyāt |
yugeyuge varṣaśatena dānaṃ yugādikāle divasena tatphalam || 124 ||
[Analyze grammar]

yugādyāḥ kathitā hyetā manvādyāḥ śrṛṇu sāṃpratam |
aśvayukchuklanavamī dvādaśī kārtike tathā || 125 ||
[Analyze grammar]

tṛtīyā caitramāsasya tathā bhādrapadasya ca |
phālgunasya tvamāvāsyā pauṣasyaikādaśī tathā || 126 ||
[Analyze grammar]

āṣāḍhasyāpi daśamī māghamāsasya saptamī |
śrāvaṇasyāṣṭamī kṛṣṇā tathāṣāḍhī ca pūrṇimā || 127 ||
[Analyze grammar]

kārtikī phālgunī caitrī jyeṣṭhe pañcadaśī sitā |
manvaṃtarādayaścaitā dattasyākṣayakārakāḥ || 128 ||
[Analyze grammar]

yasyāṃ tithau rathaṃ pūrvaṃ prāpa devo divākaraḥ |
sā tithiḥ kathitā viprairmāghe yā rathasaptamī || 129 || || dra ṛ || 4 ||
[Analyze grammar]

tasyāṃ dattaṃ hutaṃ ceṣṭaṃ sarvamevākṣayaṃ matam |
sarvadāridryaśamanaṃ bhāskaraprītaye matam || 130 ||
[Analyze grammar]

nityodvejakamāhuryaṃ budhāstaṃ śrṛṇu tattvataḥ |
yaśca yācaniko nityaṃ na sa svargasya bhājanam || 131 ||
[Analyze grammar]

udvejayati bhūtāni yathā caurāstathaiva saḥ |
narakaṃ yāti pāpātmā nityodvegakarastvasau || 132 ||
[Analyze grammar]

ihopapattirmama kena karmaṇā kva ca prayātavyamito mayeti |
vicārya caivaṃ pratikārakārī budhaiḥ sa cokto dvija dakṣadakṣaḥ || 133 ||
[Analyze grammar]

māsairaṣṭabhirahnā ca pūrveṇa vayasāyuṣā |
tatkarma puruṣaḥ kuryādyenāṃte sukhamedhate || 134 ||
[Analyze grammar]

arcirdhūmaśca mārgau dvāvāhurvedāṃtavādinaḥ |
arciṣā yāti mokṣaṃ ca dhūmenāvartate punaḥ || 135 ||
[Analyze grammar]

yajñairāsādyate dhūmo naiṣkarmyeṇārcirāpyate |
etayoraparo mārgaḥ pākhaṃḍa iti kīrtyate || 136 ||
[Analyze grammar]

yo devānmanyate naiva dharmāṃśca manusūcitān |
naitau sa yāti paṃthānau tattvārtho'yaṃ nirūpitaḥ || 137 ||
[Analyze grammar]

ite te kīrtitāḥ praśrāḥ śaktyā brāhmaṇasattama |
sādhu vā'sādhu vā brūhī khyāpayātmānameva ca || 138 ||
[Analyze grammar]