Chapter 27

[English text for this chapter is available]

lomaśa uvāca |
tathaiva viṣṇunā sarve parvatāśca prapūjitāḥ |
sahyācalaśca viṃdhyaśca maināko gaṃdhamādanaḥ || 1 ||
[Analyze grammar]

mālyavānmalayaścaiva maheṃdro maṃdarastathā |
meruścaiva prayatnena pūjito viṣṇunā tadā || 2 ||
[Analyze grammar]

śvetaḥ kṛtaḥ śvetagirirnilādriśca tathaiva ca |
udayādriśca śrṛṃgaśca astācalavaro mahān || 3 ||
[Analyze grammar]

mānasādristathā śailaḥ kailāsaḥ parvatottamaḥ |
lokālokastathā śailaḥ pūjitaḥ parameṣṭhinā || 4 ||
[Analyze grammar]

evaṃ te parvataśreṣṭhāḥ pūjitāḥ sarva eva hi |
tathānye pūjitāstena sarve parvatavāsinaḥ || 5 ||
[Analyze grammar]

viṣṇunā brahmaṇā sārddhaṃ kṛtaṃ sarvaṃ yathocitam |
anyehani ca saṃprāpte varayātrā kṛtā tathā || 6 ||
[Analyze grammar]

himādriṇā baṃdhubhiśca parvataṃ gaṃdhamādanam |
yayuḥ sarve suragaṇā gaṇāśca bahavastathā || 7 ||
[Analyze grammar]

pramathāśca tathā sarve tathā caṃḍīgaṇāḥ pare |
ye cānye bahavastatra samāyātā himālayā || 8 ||
[Analyze grammar]

śivasyodvahanaṃ viprāḥ śivena paribhāvitāḥ |
paraṃ harṣaṃ samāpannā dṛṣṭvā tau daṃpatī tadā || 9 ||
[Analyze grammar]

pārvatīsahitaḥ śaṃbhuḥ śaṃbhunā saha pārvatī |
puṣpagandhau yathā syātāṃ vāgarthāviva tattvataḥ || 10 ||
[Analyze grammar]

tathā prakṛtipuṃsau ca aikapadyena nānyathā |
daṃpatī tau gajārūḍhau śuśubhāte mahāprabhau || 11 ||
[Analyze grammar]

vimāsthastadā brahmā viṣṇuśca garuḍopari |
airāvatagataśceṃdraḥ kuberaḥ puṣpakopari || 12 ||
[Analyze grammar]

pāśī ca makarā rūḍho yamo mahiṣameva ca |
pretārūḍho nairṛtaḥ syādagnirbastagato mahān || 13 ||
[Analyze grammar]

mṛgārūḍho'tha pavana īśo vṛṣabhameva ca |
ityevaṃ lokapālāśca sagrahāḥ parameṣṭhinaḥ || 14 ||
[Analyze grammar]

svaiḥ svairbalaiḥ parikrāṃtāstathānye pramathādayaḥ |
himādriśca mahāśaila ṛṣabho gaṃdhamādanaḥ || 15 ||
[Analyze grammar]

sahyācalo nīlagirirmaṃdaro malayācalaḥ |
kailāso hi mahātejā mainākaśca mahāprabhaḥ || 16 ||
[Analyze grammar]

ete cānye ca girayaḥ kṣīmaṃto hi mahāprabhāḥ |
sakalatrāśca te sarve sasutāśca manoramāḥ || 17 ||
[Analyze grammar]

balino rūpiṇaḥ sarve mervādyāstatra parvatāḥ |
varayātrāprasaṃgena śivārcanaparābhavan || 18 ||
[Analyze grammar]

naṃdinā hyupaviṣṭāste mervādyāstatra parvatāḥ |
varayātrā kṛtā te yathoktā ca himādriṇā |
sarvaistairbaṃdhubhiḥ sārddhaṃ punarāgamanaṃ kṛtam || 19 ||
[Analyze grammar]

svakālayastho himavānsa reje hi mahā yaśā |
śivasaṃparkajenaiva mahasā paramema ca |
vikhyāto hi mahāśailastriṣu lokeṣu viśrutaḥ || 20 ||
[Analyze grammar]

kanyādānena mahatā tuṣṭo yasya ca śaṃkaraḥ |
te dhanyāste mahātmānaḥ kṛtakṛtatyāstathaiva ca || 21 ||
[Analyze grammar]

dvyakṣaraṃ nāma yeṣāṃ ca jihvāgre saṃsthitaṃ sadā |
śiveti dvyakṣaraṃ nāma yairhṛdīritamadya vai |
te vai manuṣyarūpeṇa rudrā eva na saṃśayaḥ || 22 ||
[Analyze grammar]

kiṃciddānena saṃtuṣṭaḥ patreṇāpi tathaiva ca |
toyenāpi hi saṃtuṣṭo mahādevo nirantaram || 23 ||
[Analyze grammar]

patreṇa puṣpeṇa tathā jalena prīto bhavatyeṣa sadāśivo hi |
tasmācca sarvaiḥ pratipūjanīyaḥ śivo maddābhāgyakaro nṛṇāmiha || 24 ||
[Analyze grammar]

eko mahāñjyotirajaḥ pareśaḥ parāparāṇāṃ paramo mahātmā |
niraṃtaro nirvikāro nirīśo nirābādho nirvikalpo nirīhaḥ || 25 ||
[Analyze grammar]

niraṃjano nityarūpo nirodho nityānando nityamuktāḥ sadeva |
evaṃbhūto devadevo'rccitaśca tairdevādyarviśvavedyo bhavaśca |
stuto dhyātaḥ pūjitaściṃtitaśca sarvajño'sau sarvadā sarvadaśca || 26 ||
[Analyze grammar]

yathā variṣṭho himavānprasiddhaḥ sarvairguṇaiḥ sarvaguṇo mahātmā |
viśveśavaṃdyo hi tadā himālayo jāto girīṇāṃ pravarastadānīm || 27 ||
[Analyze grammar]

menayā saha dharmātmā yathāsthānagatastataḥ |
sarvānvisarjayāmāsa parvatānparvateśvaraḥ || 28 ||
[Analyze grammar]

gateṣu teṣu himavānputraiḥ pautraiḥ prapautrakaiḥ |
rājā girīṇāṃ pravaro mahādevaprasādataḥ || 29 ||
[Analyze grammar]

atho girijayā sārddhaṃ maheśo gandhamādane |
ekāṃte ca matiṃ cakre ramaṇārthaṃ svarūpavān || 30 ||
[Analyze grammar]

suratenaiva mahatā tapasā hi samāgame |
dvayoḥ suratamārabdhaṃ taddvayośca tadā'bhavat || 31 ||
[Analyze grammar]

aniṣṭaṃ mahadāścaryaṃ pralayopamameva ca |
tasminmahārate prāpte nāviṃdaṃta sukhaṃ param || 32 ||
[Analyze grammar]

sarve brahmādayo devāḥ kāryākāryavyavasthitau |
retasā ca jagatsarvaṃ naṣṭaṃ sthāvarajaṃgamam || 33 ||
[Analyze grammar]

sasmāra cāgniṃ brahmā ca viṣṇuścādhyātmadāyakaḥ |
manasā saṃsmṛtaḥ sadyo jagāmāgnistvarānvitaḥ || 34 ||
[Analyze grammar]

tābhyāṃ saṃpreṣito'paśyadruciraṃ śivamāṃdiram |
dvāri sthitaṃ naṃdinaṃ ca dadarśāgre mahāprabham || 35 ||
[Analyze grammar]

agnirhrasvastadā bhūtvā kāśmīrasadṛśacchaviḥ |
praviṣṭoṃtaḥ puraṃ śaṃbhornānāścaryasamanvitam || 36 ||
[Analyze grammar]

anekaratnasaṃvītaṃ prāsādaiśca svalaṃ kṛtam |
tadaṃgaṇamanuprāpya upaviśyāha havyavāṭ || 37 ||
[Analyze grammar]

pāṇipātrasya me hyamba bhikṣāṃ dehyavarodhataḥ |
tacchrutvā vacanaṃ tasya pāṇipātrasya bālikā || 38 ||
[Analyze grammar]

yāvaddātuṃ ca sārebhe bhikṣāṃ tasmai tataḥ svayam |
utthāya suratāttasmācchivo hi kupito bhṛśam || 39 ||
[Analyze grammar]

rudrastriśūlamudyamya bhairavo hya'bhavattadā |
nivārito girijayā vadhāttasmācchivaḥ svayam |
bhikṣāṃ tasmai dadau vācā agnaye jātavedase || 40 ||
[Analyze grammar]

pāṇau bhikṣāṃ gṛhītvātha pratyakṣaṃ tena cāgninā |
bhikṣitā kupitā taṃ vai śaśāpa girijā tataḥ || 41 ||
[Analyze grammar]

re bhikṣo bhavitā śāpātsarvabhakṣo mamāśu vai |
anena retasā sadyaḥ pīḍāṃ prāpsyasi sarvataḥ || 42 ||
[Analyze grammar]

ityukto bhakṣayitvāgnī reta īśasya havyavāṭ |
yatra devāḥ sthitāḥ sarve brahmādyāścaiva sarvaśaḥ || 43 ||
[Analyze grammar]

āgatyākathayatsarvaṃ tadretobhakṣaṇādikam |
sarve sagarbhā hyabhavannindrādyā devatāgaṇāḥ || 44 ||
[Analyze grammar]

agneryathā haviścaiva sarveṣāmupatiṣṭhati |
agnermukhodbhavenaiva retasā te sureśvarāḥ || 45 ||
[Analyze grammar]

sagarbhāhyabhavansarve ciṃtayā caprapīḍitāḥ |
viṣṇuṃ śaraṇamājagmurddevadeveśvaraṃ prabhum || 46 ||
[Analyze grammar]

devā ūcuḥ |
tvaṃ trātā sarvadevānāṃ lokānāṃ prabhureva ca |
tasmādrakṣā vidhātavyā śaraṇāgatavatsala || 47 ||
[Analyze grammar]

vayaṃ sarve martukāmā retasānena pīḍitāḥ |
asurebhyaḥ paritrastā vayaṃ sarve divaukasaḥ || 48 ||
[Analyze grammar]

śaraṇaṃ śaṃkaraṃ yātāḥ paritrātuṃ kṛtodvahāḥ |
yadā putro hi rudrasya bhaviṣyati tadā vayam |
sukhinaḥ syāma sarve nirbhayāśca triviṣṭape || 49 ||
[Analyze grammar]

evaṃ viṣṭabhyamānānāṃ sarveṣāṃ bhayamāgatam |
anena retasā viṣṇo jīvituṃ śakyate katham || 50 ||
[Analyze grammar]

trivargo hi yathā puṃsāṃ kṛto hi supariṣkṛtaḥ |
viparīto bhavatyeva vinā devena nānyathā || 51 ||
[Analyze grammar]

tasmāttadvai balaṃ matvā sarveṣāmapi dehinām |
kāryākāryavyavasthāyāṃ sarve manyāmahe vayam || 52 ||
[Analyze grammar]

tathā niśamya devānāṃ pareśaḥ paridevanam |
uvāca prahasanvākyaṃ devānāṃ devatārihā || 53 ||
[Analyze grammar]

stūyatāṃ vai mahādevo maheśaḥ kāryagauravāt || 54 ||
[Analyze grammar]

tatheti gatvā te sarve devā viṣṇupurogamāḥ |
tathā brahmādayaḥ sarva īḍire ṛṣayo haram || 55 ||
[Analyze grammar]

oṃnamo bhargāya devāya nīlakaṃṭhāya mīḍhuṣe |
trinetrāya trivedāya lokatritayadhāriṇe || 56 ||
[Analyze grammar]

trisvarāya trimātrāya trivedāya trimūrttaye |
trivargāya tridhāmāya tripadāya triśūline || 57 ||
[Analyze grammar]

trāhitrāhi mahādeva retaso jagataḥ pate || 58 ||
[Analyze grammar]

brahmaṇā tu stuto yāvattāvaddevo vṛṣadhvajaḥ |
prādurbabhūva tatraiva surāṇāṃ kāryasiddhaye || 59 ||
[Analyze grammar]

dṛṣṭastadānīṃ jagadekabaṃdhurmahātmabhirdevavaraiḥ supūjitaḥ |
saṃstūyamāno vividhairvacobhiḥ pratyagrūpaiḥ śrutisaṃmataiśca || 60 ||
[Analyze grammar]

stuvatāṃ caiva devānāmuvāca parameśvaraḥ |
trāsaṃ kurvaṃtu mā sarve retasānena pīḍitāḥ || 61 ||
[Analyze grammar]

vamanaṃ vai bhavadbhiśca kāryamadyaiva bhoḥsurāḥ |
tatheti matvā te sarva iṃdrādyā devatāgaṇāḥ |
vemuḥ sarve tadā viprāstadretaḥ śaṃkarasya ca || 62 ||
[Analyze grammar]

aikapadyena tadreto mahāparvatasannibham |
taptacāmīkaraprakhyaṃ babhūva paramādbhutam || 63 ||
[Analyze grammar]

sarve ca sukhino jātā iṃdrādyā devatāgaṇāḥ |
vinā hyagniṃ ca te sarve parituṣṭāstadā'bhavan || 64 ||
[Analyze grammar]

tenāgnināpi coktastu śaṃkaro lokaśaṃkaraḥ |
kiṃ mayādya mahā deva kartavyaṃ devatāvara || 65 ||
[Analyze grammar]

tadbrūhi me prabho'dya tvaṃ yenāhaṃ sarvadā sukhī |
bhaviṣyāmi ca yenāhaṃ devānāṃ havyavāhakaḥ || 66 ||
[Analyze grammar]

tadovāca śivaḥ sākṣāddevānāmiha śrṛṇvatām |
reto visṛjyatāṃ yonau tadāgniḥ prahasannavi || 67 ||
[Analyze grammar]

uvāca śaṃkaraṃ devaṃ bhavattejo durāsadam |
idamulbaṇavattejo dhāryate prākṛtaiḥ katham || 68 ||
[Analyze grammar]

tataḥ provāca bhagavānagniṃ prati maheśvaraḥ |
māsimāsi prataptānāṃ dehe tejo visṛjyatām || 69 ||
[Analyze grammar]

tatheti matvā vacanaṃ mahāprabhaḥ sa jātavedāḥ parameṇa varcasā |
samujjvalaṃstatra mahāprabhāvo brāhme muhūrtte hi sacopaviṣṭaḥ || 70 ||
[Analyze grammar]

tadā prātaḥ samutthāya prātaḥ snānaparāḥ striyaḥ |
yayuḥ sadā ṛṣīṇāṃ ca satyastā jātavedasam || 71 ||
[Analyze grammar]

dṛṣṭvā prajvalitaṃ tatra sarvāstāḥ śītakarṣitāḥ |
taptukāmāstadā sarvvā hyarudhatyā nivāritāḥ || 72 ||
[Analyze grammar]

tayā nivāritāścāpi tāstepuḥ kṛttikāḥ svayam |
yāvattepuśca tāḥ sarvvā retasaḥ paramāṇavaḥ |
viviśū romakūpeṣu tāsāṃ tatraiva satvaram || 73 ||
[Analyze grammar]

nīretognistadā jāto viśrāṃtaḥ svayameva hi || 74 ||
[Analyze grammar]

tatastā ṛṣibhāryā hi yayuḥ svabhavanaṃ prati |
ṛṣibhistu tadā śaptāḥ kṛttikāḥ khecarābhavan || 75 ||
[Analyze grammar]

tadānīmeva tāḥ sarvā vyabhicāreṇa duḥkhitāḥ |
tatsasarjustadā retaḥ pṛṣṭhe himavato gireḥ || 76 ||
[Analyze grammar]

ekapadyena tadretastaptacāmīkaraprabham |
gaṃgāyāṃ ca tadā kṣipraṃ kīcakaiḥ pariveṣṭitam || 77 ||
[Analyze grammar]

ṣaṇmukhaṃ bālakaṃ jñātvā sarve devā mudānvitāḥ |
gargeṇoktāstadaṃte vai sukhena hriyatāmiti || 78 ||
[Analyze grammar]

śaṃbhoḥ putraḥ prasādena sarvo bhavati śāśvataḥ |
gaṃgāyāḥ puline jātaḥ kārttikeyo mahābalaḥ || 79 ||
[Analyze grammar]

upaviṣṭotha gāṃgeyo hyahorātroṣitastadā |
śākho viśākho'tibalaḥ ṣaṇmukho'sau mahābalaḥ || 80 ||
[Analyze grammar]

jāto yadātha gaṃgāyāṃ ṣaṇmukhaḥ śaṃkarātmajaḥ |
tadānīmeva girijā saṃjātā prasnutastanī || 81 ||
[Analyze grammar]

śivaṃ nirīkṣya sā prāha he śaṃbho prasnavo mahān |
saṃjāto me mahādeva kimarthastannirīkṣyatām |
sarvajño'pi mahādevo hyabravīttāmathājñavat || 82 ||
[Analyze grammar]

nāradastatra cāgatya proktavāñjanma tasya tat |
śivāya ca śivāyai ca putro jāto hi suṃdaraḥ || 83 ||
[Analyze grammar]

tadākarṇya vaco viprā harṣanirbharamānasāḥ |
babhūvuḥ pramathāḥ sarve gaṃdharvā gītatatparāḥ || 84 ||
[Analyze grammar]

anekābhiḥ patākābhiścailapallavatoraṇaiḥ |
tathā vimānairbahubhirbabhau prajvalito mahān |
parvataḥ putrajananācchaṃkarasya mahātmanaḥ || 85 ||
[Analyze grammar]

tadā sarve suragaṇā ṛṣayaḥ siddhacāraṇāḥ rakṣogaṃdharvayakṣāśca apsarogaṇasevitāḥ || 86 ||
[Analyze grammar]

ekapadyena te sarve sahitāḥ śaṃkareṇa tu |
draṣṭuṃ gāṃgeyamadhikaṃ jagmuḥ pulinasaṃsthitam || 87 ||
[Analyze grammar]

tato vṛṣabhamāruhya yayau girijayā saha |
anyaiḥ sameto bhagavānsurairiṃdrādibhistathā || 88 ||
[Analyze grammar]

tadā śaṃkhāśca bheryaśca nedustūryīṇyanekaśaḥ || 89 ||
[Analyze grammar]

tadānīmeva sarveśaṃ vīrabhadrādayo gaṇāḥ |
anvayuḥ kelisaṃrabdhā nānāvāditravādakāḥ |
vādayantaśca vādyāni tatāni vitatāni ca || 90 ||
[Analyze grammar]

kecinnṛtyaparāstatra gāyakāśca tathā pare |
stāvakāḥ stūyamānāśca cakruste guṇakīrtanam || 91 ||
[Analyze grammar]

evaṃvidhāste surasiddhayakṣā gaṃdharvavidyādharapannagā hyamī |
śivena sārddhaṃ parihṛṣṭacittā draṣṭuṃ yayustaṃ varadaṃ ca śāṃkarim || 92 ||
[Analyze grammar]

yāvatsamīkṣayāmāsurgāṃgeyaṃ śaṃkaropamam |
dadṛśuste mahattejo vyāptamāsījjagattrayam || 93 ||
[Analyze grammar]

tattojasāvṛtaṃ bālaṃ taptacāmīkaraprabham |
sumukhaṃ suśriyā yuktaṃ sunasaṃ susmitekṣaṇam || 94 ||
[Analyze grammar]

cāruprasanna vadanaṃ tathā sarvāgasuṃdaram |
taṃ dṛṣṭvā mahadāścaryaṃ gāṃgeyaṃ prathitātmakam || 95 ||
[Analyze grammar]

vavaṃdire tadā bālaṃ kumāraṃ sūryavarcasam |
pramathāśca gaṇāḥ sarve vīrabhadrādayastathā || 96 ||
[Analyze grammar]

parivāryopatasthuste vāmadakṣiṇabhāgataḥ |
tathā brahmā ca viṣṇuśca iṃdraścāpi surairvṛtaḥ || 97 ||
[Analyze grammar]

ṛṣayo yakṣagaṃdharvāḥ parivārya kumārakam |
daṃḍavatpititā bhūmau kecicca natakaṃdharāḥ || 98 ||
[Analyze grammar]

praṇemuḥ śirasā cānye matvā svāminamavyayam |
avādyaṃta vicitrāṇi vāditrāṇi mahotsave |
evamabhyudaye tasminnṛṣayaḥ śāṃtimāpaṭham || 99 ||
[Analyze grammar]

etasminnaṃtare yātaḥ śaṃkaro girijāpatiḥ |
avatīrya vṛṣācchīghraṃ pārvatyā sahasuvratāḥ || 100 ||
[Analyze grammar]

putraṃ niraikṣata tadā jagadekabaṃdhuḥ prītyā yutaḥ paramayā saha vai bhavānyā |
snehānvito bhujagabhogayuto hi sākṣātsarveśvaraḥ parivṛtaḥ pramathaiḥ prahṛṣṭaḥ || 101 ||
[Analyze grammar]

upaguhya guhaṃ tatra pārvatī jātasaṃbhramā |
prasnutaṃ pāyayāmāsa stanaṃ snehapariplutā || 102 ||
[Analyze grammar]

tadā nīrājito devaiḥ sakalatrairmudānvitaiḥ |
jayaśabdena mahatā vyāptamāsīnnabhastalam || 103 ||
[Analyze grammar]

ṛṣayo brahmagoṣeṇa gītenaiva ca gāyakāḥ |
vādyaiśca vādakāścaiva upatasthuḥ kumārakam || 104 ||
[Analyze grammar]

svamaṃkamārepya tadā girīśaḥ kumārakaṃ taṃ prabhayā mahāprabham |
babhau bhavānīpatireva sākṣācchriyā yutaḥ putravatāṃ variṣṭhaḥ || 105 ||
[Analyze grammar]

daṃpatī tau tadā tatra aikapadyena naṃdatuḥ |
abhiṣicyamāna ṛṣibhirāvṛtaḥ surasattamaiḥ || 106 ||
[Analyze grammar]

kumāraḥ krīḍayāmāsa utsaṃge śaṃkarasya ca |
kaṃṭhe sthitaṃ vāsukiṃ ca pāṇibhyāṃ samapīḍayat || 107 ||
[Analyze grammar]

mukhaṃ prapīḍayitvā'sau pāṇīnagaṇayattadā |
ekaṃ trīṇidaśāṣṭau ca viparītakrameṇa ca || 108 ||
[Analyze grammar]

prahasya bhagavāñchaṃbhuruvāca girijāṃ tadā || 109 ||
[Analyze grammar]

maṃdasmitena ca tadā bhagavānmaheśaḥ prāpto mudaṃca paramāṃ girijāsametaḥ |
premṇā sagadgadagirā jagadekabaṃdhurnovāca kiṃcana tadā bhuvanaikabhartā || 110 ||
[Analyze grammar]