Chapter 25

[English text for this chapter is available]

lomaśa uvāca |
tatropaviviśuḥ sarve satkṛtāśca himādriṇā |
te devāḥ saparivārāḥ saharṣāśca savāhanāḥ || 1 ||
[Analyze grammar]

tatraiva ca mahāmātraṃ nirmitaṃ viśvakarmaṇā |
dīptyā paramayā yuktaṃ nivāsārthaṃ svayambhuvaḥ || 2 ||
[Analyze grammar]

tathaiva viṣṇostvaparaṃ bhavanaṃ svayameva hi |
bhāsvaraṃ suvicitra ca kṛtaṃ tvaṣṭrā manoramam |
vaṇḍīgṛhaṃ manojñaṃ ca tathaiva kṛtavānsvayam || 3 ||
[Analyze grammar]

tathaiva śvetaṃ paramaṃ manojñaṃ mahāprabhaṃ devavaraiḥ supūjitam |
kailāsalakṣmīprabhayā mahatyā suśobhitaṃ tadbhavanaṃ cakāra || 4 ||
[Analyze grammar]

tatraiva śaṃbhuḥ parayā vibhūtyā sa sthāpitastena himādriṇā vai || 5 ||
[Analyze grammar]

etasminnaṃtare menā samāyātā sakhīgaṇaiḥ |
nīrājanārthaṃ śaṃbhuṃ ca ṛṣibhiḥ parivāritā || 6 ||
[Analyze grammar]

tadā vāditradirghopairnāditaṃ bhuvanatrayam |
nīrājanaṃ kṛtaṃ tasya menayā ca tapasvinaḥ || 7 ||
[Analyze grammar]

avalokya parā sādhvī menā'jānāddharaṃ tadā |
girijoktamanusmṛtya menā vismayamāgatā || 8 ||
[Analyze grammar]

yadvai puroktaṃ ca tayā pārvatyā mama sannidhau |
tato'dhikaṃ prapaśyāmi sauṃdaryaṃ parameṣṭhinaḥ |
maheśasya mayā dṛṣṭamanirvācyaṃ ca saṃprati || 9 ||
[Analyze grammar]

evaṃ vismayamāpannā viprapatnībhirāvṛtā |
ahatāṃ barayugmena śobhitā varavarṇinī || 10 ||
[Analyze grammar]

kaṃcukī paramā divyā nānāratnaiśca śobhitā |
aṃgīkṛtā tadā devyā rarāja parayā śriyā || 11 ||
[Analyze grammar]

bibhratī ca tadā hāraṃ divyaratnavibhūṣitam |
valayāni mahārhāṇi śuddhacāmīkarāṇi ca || 12 ||
[Analyze grammar]

tatropaviṣṭā subhagā dhyāyaṃtī parameśvaram |
sakhībhiḥ sevyamānā sā viprapatnībhireva ca || 13 ||
[Analyze grammar]

etasminnaṃtare tatra gargo vākyamabhāṣata |
pāṇigrahārthaṃ śaṃbhuṃ ca ānayadhvaṃ svamaṃdiram |
tvaritenaiva velāyāmasyāmeva vicakṣaṇāḥ || 14 ||
[Analyze grammar]

tacchrutvā vacanaṃ tasya gargasya ca mahātmanaḥ |
abhyutthānaparāḥ sarve parvatāḥ sakalatrakāḥ || 15 ||
[Analyze grammar]

mahāvibhūtyā saṃyuktāḥ sarve maṃgalapāṇayaḥ |
sālaṃkṛtāstadā teṣāṃ patnyolaṃkāramaṃḍitāḥ || 16 ||
[Analyze grammar]

upāyanānyanekāni jagṛhuḥ snigdhalocanāḥ |
tadā vāditraghoṣeṇa brahmaghoṣeṇa bhūyasā || 17 ||
[Analyze grammar]

ājagmuḥ sakalātrāste yatra devo maheśvaraḥ |
pramathairāvṛtastatra caṃḍyā caivābhisevitaḥ || 18 ||
[Analyze grammar]

tathā maharṣibhistatra tathā devagaṇaiḥ saha |
ebhiḥ parivṛtaḥ śrīmāñchaṃkaro lokaśaṃkaraḥ || 19 ||
[Analyze grammar]

śrutvā vāditranirghoṣaṃ sarve śaṃkarasevakāḥ |
utthitā aikāpadyena devairṛṣibhirāvṛtāḥ || 20 ||
[Analyze grammar]

tathodyato yoginācakrayuktā gaṇā gaṇānāṃ gaṇānāṃ patirekavarcasām |
śivaṃpuraskṛtya tadānubhāvāstathaiva sarve gaṇanāyakāśca || 21 ||
[Analyze grammar]

tadyoginī cakramatipracaṃḍaṃ ṭaṃkārabherīravanisvanena |
caṃḍīṃ puraskṛtya bhayānakāṃ tadā mahāvibhūtyā samalaṃkṛtāṃ tadā || 22 ||
[Analyze grammar]

kaṃṭhe karkoṭakaṃ nāgaṃ hārabhūtaṃ ca kāra sā |
padakaṃ vṛścikānāṃ ca daṃdaśūkāṃśca bibhratī || 23 ||
[Analyze grammar]

karṇāvataṃsānsā dadhre pāṇipādamayāṃstathā |
raṇe hatānāṃ vīrāṇāṃ śirāṃsyurasicāparān || 24 ||
[Analyze grammar]

dvīpicarmaparīdhānā yoginīcakrasaṃyutā |
kṣetrapālāvṛtā tadvadbhairavaiḥ parivāritā || 25 ||
[Analyze grammar]

tathā pretaiśca bhūtaiśca kapaṭaiḥ parivāritā |
vīrabhadrādayaścaiva gaṇāḥ paramadāruṇāḥ |
ye dakṣayajñanāśārthe śivenājñāpitāstadā || 26 ||
[Analyze grammar]

tathā kālī bhairavī ca māyā caiva bhayāvahā |
tripurā ca jayā caiva tathā kṣemakarī śubhā || 27 ||
[Analyze grammar]

anyāścaiva tathā sarvāḥ puraskṛtya sadāśivam |
gaṃtukāmāścogratarā bhūtaiḥ pretaiḥ samāvṛtāḥ || 28 ||
[Analyze grammar]

etāḥ sarvā vilokyātha śivabhakto janārddanaḥ |
maharṣīśca puraskṛtya hyamarāṃśca tathaiva ca |
anasūyāṃ puraskṛtya tathaiva ca hyaruṃdhatīm || 29 ||
[Analyze grammar]

viṣṇuruvāca |
caṇḍīṃ kuru samīpasthāṃ lokapālanatāṃ prabho || 30 ||
[Analyze grammar]

taduktaṃ viṣṇunā vākyaṃ niśamya jagadīśvaraḥ |
uvāca prahasanneva caṃḍīṃ prati sadāśivaḥ || 31 ||
[Analyze grammar]

atraiva sthīyatāṃ caṃḍīṃ yāvadudvahanaṃ bhavet |
mama bhāvānvijānāsi kāryākārye suśobhane || 32 ||
[Analyze grammar]

evamākarṇya vacanaṃ śaṃbhoramitatejasaḥ |
uvāca kupitā caṃḍī viṣṇumuddiśya sādaram || 33 ||
[Analyze grammar]

tathānye pramathāḥ sarve viṣṇumūcuḥ prakopitāḥ |
yatrayatra śivo bhāti tatratatra vayaṃ prabho || 34 ||
[Analyze grammar]

tvayā nivāritāḥ kasmādvayamābhyudaye pare |
teṣāṃ tadvacanaṃ śrutvā keśavovākyamabravīt || 35 ||
[Analyze grammar]

caṇḍīmuddiśya pramathānanyāṃścaiva tathāvidhān |
yūyaṃ caiva mayā proktā mā kopaṃ karttumarhatha || 36 ||
[Analyze grammar]

evamuktāstadā tena caṃḍīmukhyā gaṇāstadā |
ekāṃtamāśritāḥ sarve viṣṇuvākyājjvaladdhṛdaḥ || 37 ||
[Analyze grammar]

tāvatsarve samāyātāḥ parvateṃdrasya maṃtriṇaḥ |
sakalatrāḥ saṃbhrameṇa maheśaṃ prati satvaram || 38 ||
[Analyze grammar]

paṃcavādyapraghoṣeṇa brahmaghoṣeṇa bhūyasā |
yoṣidbhiḥ saṃvṛtāstatra gītaśabdena bhūyasā || 39 ||
[Analyze grammar]

evaṃ prāptā yatra śaṃbhuḥ sakalaiḥ parivāritaḥ |
āgatya kalaśaiḥ sākaṃ snāpito hi sadāśivaḥ |
strībhirmaṃgalagītena sarvābharaṇabhūṣitaḥ || 40 ||
[Analyze grammar]

ṛṣayo devagaṃdharvāstathānye parvatottamāḥ |
śaṃbhyagragāstadā jagmuḥ striyaścaiva supūjitāḥ |
babhau chatreṇa mahatā dhrimāṇena mūrddhani || 41 ||
[Analyze grammar]

cāmarai vīrjyamāno'sau mukuṭena virājitaḥ |
brahmā viṣṇustathā caṃdro lokapālastathaiva ca || 42 ||
[Analyze grammar]

agragā hyapi śobhaṃtaḥ śriyā paramayā yutāḥ |
tathā śaṃkhāśca bheryaśca paṭahānakagomukhāḥ || 43 ||
[Analyze grammar]

tathaiva gāyakāḥ sarve paramamaṃgalam |
punaḥ punaravādyaṃta vāditrāṇi mahotsave || 44 ||
[Analyze grammar]

aruṃdhatī mahābhāgā anasūyā tathaiva ca |
sāvitrī ca tathā lakṣmīrmātṛbhiḥ parivāritāḥ || 45 ||
[Analyze grammar]

ebhiḥ sameto jagadekabaṃdhurbabhau tadānīṃ parameṇa varcasā |
sacaṃdrasūryānilavāyunā vṛtaḥ salokapālapravarairmaharṣibhiḥ || 46 ||
[Analyze grammar]

sa vījyamānaḥ pavanenaḥ sākṣācchatraṃ ca tasmai śaśinā hyadhiṣṭhitam |
sūryaḥ purastādabhavatprakāśakaḥ śriyānvito viṣṇurabhūcca sannidhau || 47 ||
[Analyze grammar]

puṣpairvavarṣurhyavakīryamāṇā devāstadānīṃ munibhiḥ sametāḥ |
yayau gṛhaṃ kāṃcanakuṭṭimaṃ mahanmahāvi bhūtyāpariśobhitaṃ tadā |
viveśa śaṃbhuḥ parayā saparyayā saṃpūjyamāno naradevadānavaiḥ || 48 ||
[Analyze grammar]

evaṃ samāgataḥ śaṃbhuḥ praviṣṭo yajñamaṇḍapam |
saṃstūyamāno vibudhaiḥ stutibhiḥ parameśvaraḥ || 49 ||
[Analyze grammar]

gajāduttārayāmāsa maheśaṃ parvatottamaḥ |
upaviśya tataḥ pīṭhe kṛtvā nīrājanaṃ mahat || 50 ||
[Analyze grammar]

menayā sakhibhiḥ sākaṃ tathaiva ca purodhasā |
madhuparkādikaṃ sarvaṃ yatkṛtaṃ caiva tatra vai || 51 ||
[Analyze grammar]

brahmaṇā noditaḥ sadyaḥ purodhāḥ kṛtavānprabhuḥ |
maṃgalaṃ śubhakalyāṇaṃ prastāvasadṛśaṃ bahu || 52 ||
[Analyze grammar]

aṃtarvedyāṃ saṃpraveśya yatra sā pārvatī sthitā |
vedikopari tanvaṃgī sarvābharaṇabhūṣitā || 53 ||
[Analyze grammar]

tatrānīto haraḥ sākṣādviṣṇunā brahmaṇā saha |
lagnaṃ nirīkṣamāṇāste vācaspatipurogamāḥ || 54 ||
[Analyze grammar]

gargo muniścopaviṣṭastatraiva ghaṭikālaye |
yāvatpūrṇā ghaṭī jātā tāvatpraṇavabhāṣaṇam || 55 ||
[Analyze grammar]

oṃpuṇyeti praṇigadangargo vadhvaṃjaliṃ dadhe |
pārvatyakṣatapūrṇaṃ ca śivopari vavarṣa vai || 56 ||
[Analyze grammar]

tayā saṃpūjito rudro dadhyakṣatakuśādibhiḥ |
mudā paramayā yuktā pārvatī rucirānanā || 57 ||
[Analyze grammar]

vilokayaṃtī śaṃbhuṃ taṃ yadarthe paramaṃ tapaḥ |
kṛtaṃ purā mahādevyā pareṣāṃ paramaṃ mahat || 58 ||
[Analyze grammar]

tapasā tena saṃprāpto jagajjīvanajīvanaḥ |
nāradena tataḥ prokto mahādevo vṛṣadhvajaḥ || 59 ||
[Analyze grammar]

tathā gaṃgādibhiścanyairmunibhiḥ sanakādibhiḥ |
prati pūjāṃ kuru kṣipraṃ pārvatyāśca trilocana |
tadā śivena sā tanvī pūjitārghyākṣatādibhiḥ || 60 ||
[Analyze grammar]

evaṃ parasparaṃ tau ca pārvatīparameśvarau |
arcyamānau tadānīṃ ca śuśubhāte jaganmayau || 61 ||
[Analyze grammar]

trailokyalakṣmyā saṃvītau nirīkṣaṃtau parasparam |
tadā nīrājitau lakṣmyā sāvitryā ca viśeṣataḥ |
aruṃdhatyā tadā tau ca daṃpatī parameśvarau || 62 ||
[Analyze grammar]

anasūyā tathā śaṃbhuṃ pārvatīṃ ca yaśasvinīm |
dṛṣṭvā nīrājayāmāsa prītyutkalitalocanā || 63 ||
[Analyze grammar]

tathaiva sarvā dvijayoṣitaśca nīrājayāmāsuraho punaḥ punaḥ |
satīṃ ca śaṃbhuṃ ca vilokayaṃtyastathaiva sarvā muditā hasaṃtyaḥ || 64 ||
[Analyze grammar]

lomaśa uvāca |
etasminnaṃtare tatra gargācāryapraṇoditaḥ |
himavānmenayā sārddhaṃ kanyāṃ dātuṃ pracakrame || 65 ||
[Analyze grammar]

haimaṃ kalaśamādāya menā cārddhāṃ gāmāśritā |
himādreśca mahābhāgā sarvābharaṇabhūṣitā || 66 ||
[Analyze grammar]

tadā himādriṇā prokto viśvanātho varapradaḥ |
brahmaṇā saha saṃgatya viṣṇunā ca tathaiva ca || 67 ||
[Analyze grammar]

sārddhaṃ purodhasā caiva gargeṇa sumahātmanā |
kanyādānaṃ karomyadya devadevasya śūlinaḥ || 68 ||
[Analyze grammar]

prayogo bhaṇyatāṃ brahmannasminsamaya āgate |
tatheti matvā te sarve kālajñā dvijasattamāḥ || 69 ||
[Analyze grammar]

kathyatāṃ tāta gotraṃ svaṃ kulaṃ caiva viśeṣataḥ |
kathayasva mahābhāga ityākarṇya vacastathā |
sumukhena vimukhaḥ sadyo hyaśocyaḥ śocyatāṃ gataḥ || 70 ||
[Analyze grammar]

evaṃvidhaḥ suravarairṛṣibhistadānīṃ gaṃdharvayakṣamunisiddhagaṇaistathaiva |
dṛṣṭo niruttaramukho bhagavānmaheśo hāsyaṃ cakāra subhṛśaṃ tvatha nāradaśca || 71 ||
[Analyze grammar]

vīṇāṃ prakaṭayāmāsa brahmaputro'tha nāradaḥ |
tadānīṃ vārito dhīmānvīṇāṃ mā vādaya prabho || 72 ||
[Analyze grammar]

ityuktaḥ parvatenaiva nārado vākyamabravīt |
tvayā pṛṣṭo bhavaḥ sākṣātsvagotrakathanaṃ prati || 73 ||
[Analyze grammar]

asya gotraṃ kulaṃ caiva nāda eva paraṃ gire |
nāde pratiṣṭhitaḥ śaṃbhurnādo hyasminpratiṣṭhitaḥ || 74 ||
[Analyze grammar]

tasmānnādamayaḥ śaṃbhurnādācca pratilabhyate |
tasmādvīṇā mayā cādya vāditā hi paraṃtapa || 75 ||
[Analyze grammar]

asya gotraṃ kulaṃ nāma na jānaṃti hi parvata |
brahmādayo hi vivudhā anyeṣāṃ caiva kā kathā || 76 ||
[Analyze grammar]

tvaṃ hi mūḍhatvamāpanno na jānāsi hi kiṃcana |
vācyāvācyaṃ maheśasya viṣayā hi bahirmukhāḥ || 77 ||
[Analyze grammar]

yeye āgamikāścādre naṣṭāste nātra saṃśayaḥ |
arūpoyaṃ virūpākṣo hyakulīno'yamucyate || 78 ||
[Analyze grammar]

agotro'yaṃ giriśreṣṭha jāmātā te na saṃśayaḥ |
na karttavyo vimarśo'tra bhavatā vibudhena hi || 79 ||
[Analyze grammar]

na jānaṃti haraṃ sarve kiṃ bahūktyā mama prabho |
yasyājñānānmahābhāga mohitā ṛṣayo hyamī || 80 ||
[Analyze grammar]

brahmāpi taṃ na jānāti mastakaṃ parameṣṭhinaḥ |
viṣṇurgato hi pātālaṃ na dṛṣṭo hi tathaiva ca || 81 ||
[Analyze grammar]

tena liṃgena mahatā hyagādhena jagattrayam |
vyāptamastīti tadviddhi kimanena prayojanam || 82 ||
[Analyze grammar]

anayārādhitaṃ nūnaṃ tava putryā himālaya |
tattvato hi na jānāsi kathaṃ caiva mahāgire || 83 ||
[Analyze grammar]

ābhyāmutpādyate viśvamābhyāṃ caiva pratiṣṭhitam |
etacchrutvā vacastasya nāradasya mahātmanaḥ || 84 ||
[Analyze grammar]

himādripramukhāḥ sarve tathā ceṃdrapurogamāḥ |
sādhusādhviti te sarve ūcurvismitamānasāḥ || 85 ||
[Analyze grammar]

īśvarasya tu gāṃbhīryaṃ jñātvā sarve vicakṣaṇāḥ |
vismayena samāśliṣṭā ūcuḥ sarve parasparam || 86 ||
[Analyze grammar]

ṛṣaya ūcuḥ |
yasyājñayā jagadidaṃ ca viśālameva jātaṃ parātparamidaṃ nijabodharūpam |
sarvaṃ svataṃtraparameśvarabhāgamyaṃ so'sau trilokanijarūpayuto mahātmā || 87 ||
[Analyze grammar]