Chapter 23

[English text for this chapter is available]

lomaśa uvāca |
etasminnaṃtare tatra maheśena praṇoditāḥ |
ājagmuḥ sahasā sadya ṛṣayo'pi himālayam || 1 ||
[Analyze grammar]

tāndṛṣṭvā sahasotthāya himādriḥ pratimānasaḥ |
pūjayāmāsa tānsarvānuvāca natakaṃdharaḥ || 2 ||
[Analyze grammar]

kimarthamāgatā yūyaṃ brūtāgamanakāraṇam |
tadocuḥ sapta ṛṣayo maheśapreritā vayam || 3 ||
[Analyze grammar]

samāgatāstvatsakāśaṃ kanyāyāśca vilokane |
tānasmānviddhi bhoḥ śaila svāṃ kanyāṃ darśayāśu vai || 4 ||
[Analyze grammar]

tathetyuktvā ṛṣigaṇānānītā tatra pārvatī |
svotsaṃge parigṛhyāśu girīndraḥ putravatsalaḥ |
himavāngirirājo'tha uvāca prahasanniva || 5 ||
[Analyze grammar]

iyaṃ sutā madīyā hi vākyaṃ śruṇuta me punaḥ |
tapasvināṃ variṣṭha'sau virakto madanāṃtakaḥ || 6 ||
[Analyze grammar]

kathamudvahanārthī ca yenānaṃgaḥ kṛta smaraḥ |
atyāsannecātidūre āḍhye dhanavivarjite |
vṛttihīne ca mūrkhe ca kanyādānaṃ na śasyate || 7 ||
[Analyze grammar]

mūḍhāya ca viraktāya ātmasaṃbhāvitāya ca |
āturāya pramattāya kanyādānaṃ na kārayet || 8 ||
[Analyze grammar]

tasmānmayā vicāryaiva bhavadbhirṛṣisattamāḥ |
pradātavyā maheśāya etanme vratamuttamam || 9 ||
[Analyze grammar]

tacchrutvā girirājasya vacanaṃ te maharṣayaḥ |
ekapadyena ūcuste prahasya ca himālayam || 10 ||
[Analyze grammar]

yayā kṛtaṃ tapastīvraṃ yayā cārādhitaḥ śivaḥ |
tapasā tena saṃtuṣṭaḥ prasannodya sadāśivaḥ || 11 ||
[Analyze grammar]

asyāstasya ca bhoḥ śaila na jānāsi ca kiṃcana |
mahimānaṃ paraṃ caiva tasmādenāṃ prayaccha vai || 12 ||
[Analyze grammar]

śivāya girijāmenāṃ kuruṣya vacanaṃ hi naḥ |
tacchrutvā vacanaṃ teṣāmṛṣīṇāṃ bhāvitātmanām || 13 ||
[Analyze grammar]

uvāca tvarayā yuktaḥ parvatānparvateśvaraḥ |
he mero he niṣadhakiṃ gandhamādana mandara |
maināka kriyatāmadya śaṃsadhvaṃ ca yathātatham || 14 ||
[Analyze grammar]

menā tadā uvācedaṃ vākyaṃ vākyaviśāradā |
adhunā kiṃ vimaśana kṛtaṃ kāryaṃ tadaiva hi || 15 ||
[Analyze grammar]

utpanneyaṃ mahābhāgā devakāryārthameva ca |
pradātavyā śivāyeti śivasyārthe'vatāritā || 16 ||
[Analyze grammar]

anayārādhito rudro rudreṇa paribhāvitā |
iyaṃ mahābhāgā śivāya pratidīyatām || 17 ||
[Analyze grammar]

nimittamātraṃ ca kṛtaṃ tayā vai śivapūjane |
etacchrutvā vacastasyāmenāyāḥ paribhāṣitam || 18 ||
[Analyze grammar]

parituṣṭo himādriśca vākyaṃ cedamuvāca ha |
ṛṣīnprati nirīkṣaṃstāṃ kanyeyaṃ mama saṃprati || 19 ||
[Analyze grammar]

tataḥ samānīya sulocanāṃ tāṃ śyāmāṃ nitaṃbārṣitamekhalāṃ śubhām |
vaiḍūryamuktāvalayāndadhānāṃ bhāsvatprabhāṃ cāṃdramasīṃ va rekham || 20 ||
[Analyze grammar]

lāvaṇyāmṛtavāpikāṃ suvadanāṃ gaurīṃ suvāsāṃ śubhāṃ dṛṣṭvā te hyṛṣayo'pi mohamaganbhrāṃtāstadā saṃbhramāt |
nocuḥ kiṃcanā vākyameva sudhiyo hyāsanpramattā iva stabdhāḥ kāntimatīmatīva rucirāṃ trailokyanāthapriyām || 21 ||
[Analyze grammar]

evaṃ tadā te hyṛṣayo'pi mohitā rūpeṇa tasyāḥ kimutātha devatāḥ |
tathaiva sarve ca nirīkṣya tanvīṃ satīṃ girindrasya sutāṃ śivapriyām || 22 ||
[Analyze grammar]

tataḥ punaścaitya śivaṃ śivapriyāḥ śaśaṃsurasmā ṛṣayastadānīm || 23 ||
[Analyze grammar]

ṛṣaya ūcuḥ |
bhūṣitā hi girīndreṇa svasutā nāsti saṃśayaḥ |
udvoḍhuṃ gaccha deveśa devaiśca parivāritaḥ || 24 ||
[Analyze grammar]

gaccha śīghraṃ mahādeva pārvatīmātmajanmane |
tacchrutvā vacanaṃ teṣāṃ prahasyedamuvāca ha || 25 ||
[Analyze grammar]

vivāho hi mahābhāgā na dṛṣṭo na śruto'pi vā |
mayā purā ca ṛṣayaḥ kathyatāṃ ca viśeṣataḥ || 26 ||
[Analyze grammar]

tadocurṛṣayaḥ sarve prahasaṃtaḥ sadāśivam |
viṣṇumāhvaya vai deva brahmaṇaṃ ca śatakratum || 27 ||
[Analyze grammar]

tathā ṛṣigaṇāṃścaiva yakṣagandharvapannagān |
siddhavidyādharāṃścaiva kiṃnarāṃścāpsarogaṇān || 28 ||
[Analyze grammar]

etāṃścānyāṃśca subahūnānayasveti satvaram |
tadākarṇya ṛṣiproktaṃ vākyaṃ vākyaviśāradaḥ || 29 ||
[Analyze grammar]

uvāca nāradaṃ devo viṣṇumānaya satvaram |
brahmāṇaṃ ca mahendraṃ ca anyāṃścaiva samānaya || 30 ||
[Analyze grammar]

śaṃbhorvacanamādāya śirasā lokapāvanaḥ |
jagāma tvarito bhūtvā vaikuṇṭhaṃ viṣṇuvallabhaḥ || 31 ||
[Analyze grammar]

dadarśa devaṃ paramāsane sthitaṃ śriyā ca devyā parisevyamānam |
caturbhujaṃ devavaraṃ mahāprabhaṃ nīlotpalaśyāmatanuṃ vareṇyam || 32 ||
[Analyze grammar]

mahārharatnāvṛtacārukuṇḍalaṃ mahākirīṭottamaratnabhāsvatam |
suvaijayaṃtyā vanamālayā vṛtaṃ sa nāradastaṃ bhuvanaikasundaram || 33 ||
[Analyze grammar]

uvāca nārado'bhyetya śaṃbhorvākyamathādarāt |
brahmavīṇāṃ vādyavīṇāṃ vādyamānaḥ sarvajña ṛṣisattamaḥ || 34 ||
[Analyze grammar]

ehyehi tvaṃ mahāviṣṇo mahādevaṃ tvarānvitaḥ |
udvāhanārthaṃ śaṃbhośca tvamekaḥ kāryasādhakaḥ || 35 ||
[Analyze grammar]

prahasya bhagavānprāha nāradaṃ prati vai tadā |
kathamudvahane buddhirutpannā tasya śūlinaḥ |
vijñātārtho'pi bhagavānnāradaṃ paripṛṣṭavān || 36 ||
[Analyze grammar]

nārada uvāca |
tapasā mahatā rudraḥ pārvatyā paritoṣitaḥ |
svayamevāgatastatra yatrāste girijā satī || 37 ||
[Analyze grammar]

dāso'hamavadacchaṃbhuḥ pārvatyā paritoṣitaḥ |
pārvatīṃ ca samabhyarthya varayasva ca bhāmini || 38 ||
[Analyze grammar]

tvaritenāvadacchaṃbhustvāmāhvayati saṃprati |
tasya tadvacanaṃ śrutvā devadevo janārdanaḥ |
nāradena samāyuktaḥ pārṣadaiḥ parivāritaḥ || 39 ||
[Analyze grammar]

suparṇamāruhya tadā mahātmā yogīśvarāṇāṃ prabhuracyuto mahān |
yayau tadā'kāśapathā hariḥ svayaṃ sanārado devavaraiḥ sametaḥ || 40 ||
[Analyze grammar]

taṃ dṛṣṭvā tvaritaṃ devo yogidhyeyāṃghripaṃkajaḥ |
abhyutthāya mudā yuktaḥ pariṣvajya ca śārṅgiṇam || 41 ||
[Analyze grammar]

tadā hariharau devāvaikapadyena tiṣṭhataḥ |
ūcutuḥ sma tadānyonyaṃ kṣemaṃ kuśalameva ca || 42 ||
[Analyze grammar]

īśvara uvāca |
girijātapasā viṣṇo jito'haṃ nātra saṃśayaḥ |
pāṇigrahārthamevādya gaṃtukāmo himālayam || 43 ||
[Analyze grammar]

yathārthena ca bho viṣṇo kathayāmi tavāgrataḥ |
yadā dakṣeṇa bho viṣṇo pradattā ca purā satī || 44 ||
[Analyze grammar]

na ca saṃkalpavidhinā mayā pāṇigrahaḥ kṛtaḥ |
adhunaiva mayā kāryaṃ karmavistāraṇaṃ bahu || 45 ||
[Analyze grammar]

yatkāryaṃ tanna jānāmi sarvaṃ pāṇigrahocitam |
śaṃbhostadvacanaṃ śrutvā prahasya madhusūdanaḥ || 46 ||
[Analyze grammar]

yāvadvaktuṃ samārebhe tāvadbrahmā samāgataḥ |
iṃdreṇa saha sarvaiśca lokapālaistvarānvitaḥ || 47 ||
[Analyze grammar]

tathaiva devāsurayakṣadānavā nāgāḥ pataṃgāpsaraso maharṣayaḥ |
sametya sarve parivaktumīśamūcustadānīṃ śirasā praṇamya || 48 ||
[Analyze grammar]

gacchagaccha mahādeva asmābhiḥ sahitaḥ prabho |
tato viṣṇuruvācedaṃ prastāvasadṛśaṃvacaḥ || 49 ||
[Analyze grammar]

gṛhyoktavidhinā śaṃbho karma kartumihārhasi || 50 ||
[Analyze grammar]

nāṃdīmukhaṃ maṇḍapasthāpanaṃ ca tathā caitatkuru dharmeṇa yuktam |
mahānadīsaṃgamaṃ varjayitvā kurvaṃti kecidvedamanīṣiṇaśca || 51 ||
[Analyze grammar]

maṇḍapasthāpanaṃ caiva kriyatāṃ hyadhunā vibho |
tathokto viṣṇunā śaṃbhuścakārātmahitāya vai || 52 ||
[Analyze grammar]

brahmādibhiḥ kṛtaṃ tena sarvamabhyudayocitam |
grahāṇāṃ pūjanaṃ cakre kaśyapo brahmaṇā yutaḥ || 53 ||
[Analyze grammar]

tathātriśca vaśiṣṭhaśca gautamotha gururbhṛguḥ |
kaṇvo bṛhaspatiḥ śaktirjamadagniḥ parāśaraḥ || 54 ||
[Analyze grammar]

mārkaṃḍeyaḥ śilāvākaḥ śūnyapālo'kṣataśramaḥ |
agastyaścyavano gargaḥ śilādo'tha mahāmuniḥ || 55 ||
[Analyze grammar]

ete cānye ca bahavo hyāgatāḥ śivasannidhau |
brahmaṇā noditāstatra cakruste vidhivatkriyām || 56 ||
[Analyze grammar]

vedoktavidhinā sarve vedavedāṃgapāragāḥ |
cakrū rakṣāṃ maheśasya kṛtakautukamaṃgalām || 57 ||
[Analyze grammar]

ṛgyajuḥsāmasahitaiḥ sūktairnānāvidhaistathā |
maṃgalāni ca bhūrīṇi ṛṣayastattvavedinaḥ || 58 ||
[Analyze grammar]

abhyaṃjanādikaṃ sarvaṃ cakrustasya parātmanaḥ |
khyātaḥ kaparddastasyaiva śivasya paramātmanaḥ || 59 ||
[Analyze grammar]

anekairmauktikairyuktā muṇḍamālā'bhavattadā |
ye sarpā hyaṃgabhūtāśca te sarve tatkṣaṇādiva |
babhūvurmaḍanānyeva jātarūpamayāni ca || 60 ||
[Analyze grammar]

sarvabhūṣaṇasaṃpanno devadevo maheśvaraḥ |
yayau devaiḥ parivṛtaḥ śailarājapuraṃ prati || 61 ||
[Analyze grammar]

caṃḍikā varabhaginī tadā jātā bhayāvahā |
pretāsanā gatā caṇḍī sarpābharaṇabhūṣitā || 62 ||
[Analyze grammar]

haimaṃ kalaśamādāya pūrṇaṃ mūrdhnā mahāprabhā |
parivārairmahācaṃḍī dīptāsyā hyugralocanā || 63 ||
[Analyze grammar]

tatra bhūtānyanekāni virūpāṇi sahasraśaḥ |
taiḥ sametāgrataścaṃḍī jagāma vikṛtānanā || 64 ||
[Analyze grammar]

tasyāḥ sarve pṛṣṭhataśca gaṇāḥ paramadāruṇāḥ |
koṭyekādaśasaṃkhyākā raudrā rudra priyāśca ye || 65 ||
[Analyze grammar]

tadā ḍamarunirghoṣavyāptamāsījjagattrayam |
bherībhāṃkāraśabdena śaṃkhānāṃ ninadena ca || 66 ||
[Analyze grammar]

tathā duṃdubhinirghoṣaiḥ śabdaḥ kolāhalo'bhavat |
gaṇānāṃ pṛṣṭhato bhūtvā sarve devāḥ samutsukāḥ |
anvayuḥ sarvasiddhāśca lokapālaiḥ samanvitāḥ || 67 ||
[Analyze grammar]

madhye vrajanmaheṃdro'tha airāvatamupāsthitaḥ |
śubhreṇo cchriyamāṇena chatreṇa parameṇa hi || 68 ||
[Analyze grammar]

cāmarairvījyamāno'sau surairbahubhirāvṛtaḥ |
tadā tu vrajamānāsta ṛṣayo bahavo hyamī || 69 ||
[Analyze grammar]

bharadvājādayo viprāḥ śivasyodvahanaṃ prati |
śākinyo yātudhānāśca vetālā brahmarākṣasāḥ || 70 ||
[Analyze grammar]

bhūtapretapiśācāśca tathānye pramathādayaḥ |
pṛcchamānāstadā caṃḍīṃ pṛṣṭhato'nvagamaṃstadā || 71 ||
[Analyze grammar]

kva gatā sā'dhunā caṃḍī dhāvamānāstadā bhṛśam |
prāptā gatā vrajaṃtīṃ tāṃ praṇipatya mahāprabhām || 72 ||
[Analyze grammar]

atha procustadā sarve caṃḍīṃ bhairavasaṃyutām |
vināsmābhiḥ kuto yāsi vada caṃḍi yathā tathā || 73 ||
[Analyze grammar]

prahasyovāca sā caṃḍī bhūtānāṃ tatra śrṛṇvatām |
śaṃbhorudvahanārthāya pretārūḍhā vrajāmyaham || 74 ||
[Analyze grammar]

haimaṃ kalaśamādāya śirasā bibhratī svayam |
karavālīsvarūpeṇa caṃḍī jātā tataḥ svayam || 75 ||
[Analyze grammar]

bhūtaiḥ parivṛtā sarvaiḥ sarveṣāmagrato'vrajat |
gaṇāstāmanujagmuste gaṇānāṃ pṛṣṭhataḥ surāḥ || 76 ||
[Analyze grammar]

iṃdrādayo lokapālā ṛṣayaste'grapṛṣṭhataḥ |
ṛṣīṇāṃ pṛṣṭhato bhūtvā pārṣadāśca mahāprabhāḥ || 77 ||
[Analyze grammar]

viṣṇoramitabhāvajñā mukuṃdācca manoramāḥ |
sarve payodasaṃkāśāḥ sragviṇo vanamālinaḥ |
śrīvatsāṃkadharāḥ sarve pītavāsonvitāśca te || 78 ||
[Analyze grammar]

caturbhujāḥ kuṃḍalinaḥ kirīṭakaṭakāṃgadaiḥ |
hāranūpurasūtraiśca kaṭisūtrāṅgulīyakaiḥ |
śobhitāḥ sarva evaite mahāpuruṣalakṣaṇāḥ || 79 ||
[Analyze grammar]

teṣāṃ madhye gato viṣṇuḥ śriyopetaḥ surārihā || 80 ||
[Analyze grammar]

babhau trilokīkṛtaviśvamaṃgalo mahānubhāvairhṛdi kṛtya dhiṣṭhitaḥ |
śivena sākaṃ paramārthadastadā hariḥ parātmā jagadekabaṃdhuḥ || 81 ||
[Analyze grammar]

sa tārkṣyaputropari saṃsthito mahāṃllakṣmyā sameto bhuvanaikabhartā |
sa cāmarairvījyamāno munīṃdraiḥ sarvaiḥ sameto harirīśvaro mahān || 82 ||
[Analyze grammar]

tathā viriṃcirnijavāhanastho vedaiḥ sametaḥ saha ṣaḍbhiraṃgaiḥ |
tathāgamaiḥ setihāsaiḥ purāṇaiḥ sa saṃvṛto hemagarbho babhūva || 83 ||
[Analyze grammar]

vedhoharibhyāṃ ca tadā suredraiḥ samāvṛtaścarṣibhiḥ saṃparītaḥ |
vṛṣārūḍho vṛṣaketurdurāpoyogīśvarairapi sarvairagamyaḥ || 84 ||
[Analyze grammar]

śuddhasphaṭikasaṃkāśaṃ vṛṣabhaṃ dharmavatsalam |
sameto mātṛbhiścaiva gobhiśca kṛtalakṣaṇam || 85 ||
[Analyze grammar]

ebhissameto'suradānavaiḥ saha yayau maheśo vibudairalaṃkṛtaḥ |
himālayaṃ girivaryaṃ tadānīṃ pāṇigrahārthaṃ pramadottamāyāḥ || 86 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ prathame māheśvarakhaṇḍe kedārakhaṃḍe śrīśivasya vivāhavarṇanaṃnāma trayoviṃśo'dhyāyaḥ || 23 ||
[Analyze grammar]