Chapter 21

[English text for this chapter is available]

lomaśa uvāca |
varddhamānā tadā sādhvī rarāja prativāsaram |
aṣṭavarṣā yadā jātā himālayagṛhe satī || 1 ||
[Analyze grammar]

maheśo himavaddroṇyāṃ tatāpa paramaṃ tapaḥ |
sarvairgaṇaiḥ parivṛto vīrabhadrādibhistadā || 2 ||
[Analyze grammar]

etattapo juṣāṇaṃ taṃ maheśaṃ himavānyayau |
tatpādapallavaṃ draṣṭuṃ pārvatyā saha buddhimān || 3 ||
[Analyze grammar]

yāvatsamāgato draṣṭaṃ naṃdināsau nivāritaḥ |
dvāri sthite ca tadā kṣaṇamekaṃ sthiro'bhavat || 4 ||
[Analyze grammar]

punarvijñāpayāmāsa naṃdinā himavāngiriḥ |
vijñapto naṃdinā śaṃbhuracalo draṣṭumāgataḥ || 5 ||
[Analyze grammar]

tadākarṇya vacastasya naṃdinaḥ parameśvaraḥ |
ānayasva giriṃ cātra naṃdinaṃ vākyamabravīt || 6 ||
[Analyze grammar]

tatheti matvā naṃdī taṃ parvataṃ ca himācalam |
ānayāmāsa sa tathā śaṃkaraṃ lokaśaṃkaram || 7 ||
[Analyze grammar]

dṛṣṭvā tadānīṃ sakaleśvaraṃ prabhuṃ tapo juṣāṇaṃ vinimīlitekṣaṇam || 8 ||
[Analyze grammar]

kaparddhinaṃ caṃdrakalāvibhūṣaṇaṃ vedāṃtavedyaṃ paramātmani sthitam |
vavaṃda śīrṣṇā ca tadā himācalaḥ parāṃ mudaṃ prāpadahīnasattvaḥ || 9 ||
[Analyze grammar]

uvāca vākyaṃ jagadekamaṃgalaṃ himālayo vākyavidāṃ variṣṭhaḥ || 10 ||
[Analyze grammar]

sabhāgyo'haṃ mahādeva prasādāttava śaṃkara |
pratyahaṃ cāgamiṣyāmi darśanārthaṃ tava prabho || 11 ||
[Analyze grammar]

anayā saha deveśa anujñāṃ dāturmahasi |
śrutvā tu vacanaṃ tasya devadevo maheśvaraḥ || 12 ||
[Analyze grammar]

āgaṃtavyaṃ tvayā nityaṃ darśanārthaṃ mamācala |
kumārīṃ ca gṛhe sthāpya nānyathā mama darśanam || 13 ||
[Analyze grammar]

acalaḥ pratyuvācedaṃ giriśaṃ natakaṃdharaḥ |
kasmānmayānayā sārddhaṃ nāgaṃtavyaṃ taducyatām |
acalaṃ ca vrīta śaṃbhuḥ prahasanvākyamabravīt || 14 ||
[Analyze grammar]

iyaṃ kumārī suśroṇī tanvī cāruprabhāṣiṇī |
nānetavyā matsamīpe vārayāmi punaḥ punaḥ || 15 ||
[Analyze grammar]

etacchrutvā vacanaṃ tasya śaṃbhornirāmayaṃ niḥspṛhaniṣṭhuraṃ vā |
tapasvinoktaṃ vacanaṃ niśamya uvāca gaurī ca vihasya śaṃbhum || 16 ||
[Analyze grammar]

gauryuvāca |
tapaḥśaktyānvitaḥ śaṃbho karoṣi vipulaṃ tapaḥ |
tava buddhiriyaṃ jātā tapastaptuṃ mahātmanaḥ || 17 ||
[Analyze grammar]

kastvaṃ kā prakṛtiḥ sūkṣmā bhagavaṃstadvimṛśyatām |
pārvatyāstadvacaḥ śrutvā maheśo vākyamabravīt || 18 ||
[Analyze grammar]

tapasā parameṇaiva prakṛtiṃ nāśayāmyaham |
prakṛtyā rahitaḥ subhru ahaṃ tiṣṭhami tattvataḥ |
tasmācca prakṛte siddhair kāryaḥ saṃgrahaḥ kvacit || 19 ||
[Analyze grammar]

pārvatyuvāca |
yaduktaṃ parayā vācā vacananaṃ śaṃkara tvayā |
sā kiṃ prakṛti rnaiva syādatītastāṃ bhavānkatham || 20 ||
[Analyze grammar]

yacchṛṇopi yadaśrāsi yacca paśyasi śaṃkara |
vāgvādena ca kiṃ kāryamasmāke cādhunā prabho || 21 ||
[Analyze grammar]

tatsarvaṃ prakṛteḥ kāryaṃ mithyāvādo nirrthakaḥ |
prakṛteḥ parato bhūtvā kimarthaṃ tapyate tapaḥ || 22 ||
[Analyze grammar]

tvayā śaṃbho'dhunā hyasmingirau himavati prabho |
prakṛtyā milito'si tvaṃ na jānāsi hi śaṃkara || 23 ||
[Analyze grammar]

vāgvādena ca kiṃ kāryamasmākaṃ cādhunā prabho |
prakṛteḥ paratastvaṃ ca yadi satyaṃ vacastava |
tarhi tvayā na bhetavyaṃ mama śaṃkara saṃprati || 24 ||
[Analyze grammar]

prahasya bhagavāndevo girijāṃ pratyuvāca ha || 25 ||
[Analyze grammar]

mahādeva uvāca |
pratyahaṃ kuru me sevāṃ girije sādhubhāṣiṇi || 27 ||
[Analyze grammar]

ityevamuktvā girijāṃ maheśo himālayaṃ vākyamatho babhāṣe |
atraiva so'haṃ tapasā pareṇa carāmi bhūmyāṃ paramārthabhāvaḥ || 27 ||
[Analyze grammar]

tapastaptumanujñā me dātavyā parvatādhipa |
anujñayā vinā kiṃcittapaḥ kartuṃ na pāryate || 28 ||
[Analyze grammar]

etacchrutvā vacastasya devadevasya śūlinaḥ |
prahasya himavāñchaṃbhumidaṃ vacanamabravīt || 29 ||
[Analyze grammar]

tvadīyaṃ hi jagatsarvaṃ sadevāsuramānuṣam |
kimahaṃ tu mahādeva tuccho bhūtvā dadāmi te || 30 ||
[Analyze grammar]

evamukto himavatā śaṃkaro lokaśaṃkaraḥ |
prahasya girirājaṃ taṃ yāhīti prāha sādaram || 31 ||
[Analyze grammar]

śaṃkareṇābyanujñātaḥ svagṛhaṃ himavānyayau |
sārddhaṃ girijayā so'pi pratyahaṃ darśane sthitaḥ || 32 ||
[Analyze grammar]

evaṃ katipayaḥ kālo gataścopāsanāttayoḥ || 33 ||
[Analyze grammar]

sutāpitrośca tatraiva śaṃkaro duratikramaḥ |
pārvatīṃ prati tatraiva ciṃtāmāpedire surāḥ || 34 ||
[Analyze grammar]

te ciṃtyamānāśca surāstadānīṃ kathaṃ maheśo girijāṃ sameṣyati |
kiṃ kāryamadyaiva vayaṃ ca kurmo bṛhaspate tatkathayasva mā ciram || 35 ||
[Analyze grammar]

bṛhaspatiruvācedaṃ maheṃdraṃ prati sadvacaḥ |
evametattvayā kāryaṃ maheṃdra śrūyatāṃ tadā || 36 ||
[Analyze grammar]

etatkāryaṃ madanenaiva rājannānyaḥ samartho bhavitā triloke |
viplāvitaṃ tāpasānāṃ tapo hi tasmāttvarātprārthanīyo hi māraḥ || 37 ||
[Analyze grammar]

gurorvacanamākarṇya āhvayanmadanaṃ hariḥ |
āhvānādājagāmātha madanaḥ kāryasādhakaḥ || 38 ||
[Analyze grammar]

ratyā sametaḥ saha mādhavena sa puṣpadhanvā purataḥ sabhāyām |
maheṃdramāgamya uvāca vākyaṃ sagarvitaṃ lokamanoharaṃ ca || 39 ||
[Analyze grammar]

ahamākāritaḥ kasmādbrūhi me'dya śacīpate |
kiṃ kāryaṃ karavāṇyadya kathyatāṃ mā vilaṃbitam || 40 ||
[Analyze grammar]

mama smaraṇamātreṇa vibhraṣṭā hi tapasvinaḥ |
tvameva jānāsi hare mama vīryaparākramau || 41 ||
[Analyze grammar]

mama vīryaṃ ca jānāti śakteḥ putraḥ parāśaraḥ |
evaṃ cānaye ca bahavo bhṛgvādya ṛṣayo hyamī || 42 ||
[Analyze grammar]

gururapyabhijānāti bhāryotathyasya caiva hi |
tasyāṃ jāto bharadvājo guruṇā saṃkaro hi saḥ || 43 ||
[Analyze grammar]

bharadvājo mahābhāga ityuvāca gurustadā |
jānāti mama vīryaṃ ca śauryaṃ caiva prajāpatiḥ || 44 ||
[Analyze grammar]

krodho hi mama baṃdhuśca mahābalaparakramaḥ |
ubhābhyāṃ drāvitaṃ viśvaṃ jaṃgamājaṃgamaṃ mahat |
brahmādistaṃbaparyaṃtaṃ plāvitaṃ sacarācaram || 45 ||
[Analyze grammar]

devā ūcuḥ |
madanadvaṃ samarthosi asmāñjetuṃ sadaiva hi |
maheśaṃ prati gacchāśu surakāryārthasiddhaye |
pārvatyā sahitaṃ śaṃbhuṃ kuruṣvādya mahāmate || 46 ||
[Analyze grammar]

evamabhyarthito devairmadano viśvamohanaḥ |
jagāma tvarito bhūtvā apsarobhiḥ samanvitaḥ || 47 ||
[Analyze grammar]

tato jagāmāśu mahādhanurddharo visphārya cāpaṃ kusumānvitaṃ mahat |
tathaiva bāṇāṃśca manoramāṃśca pragṛhya vīro bhuvanaikajetā |
tasminhimādrau paridṛśyamāno'vanau smaro yodhayatāṃ variṣṭhaḥ || 48 ||
[Analyze grammar]

tatrāgatā tadā raṃbhā urvaśī puṃjikasthalī |
sumlocā miśrakeśī ca subhagā ca tilottamā || 49 ||
[Analyze grammar]

anyāśca vividhāḥ jātāḥ sāhāyye madanasya ca |
apsaraso gaṇairdṛṣṭā madanena sahaiva tāḥ || 50 ||
[Analyze grammar]

sarve gaṇāśca sahasā madanena vimohitāḥ |
bhṛṃgiṇā ca tadā raṃbhā caṇḍena saha corvaśī || 51 ||
[Analyze grammar]

menakā vīrabhadreṇa caṇḍena puṃjikasthalī |
tilottamādayastatra saṃvṛtāśca gaṇaistadā || 52 ||
[Analyze grammar]

amattabhūtairbahubhistrapāṃ tyaktvā manīṣibhiḥ |
akāle kokilā bhiśca vyāptāmāsīnmahītalam || 53 ||
[Analyze grammar]

aśokāścaṃpakāścūtā yūthyaścaiva kadaṃbakāḥ |
nīṣāḥ priyālāḥ panasā rājavṛkṣāścarāyaṇāḥ || 54 ||
[Analyze grammar]

drākṣāvallayaḥ pradṛśyaṃte bahulā nāgakeśarāḥ |
tathā kadalyaḥ ketakyo bhramarairupaśobhitāḥ || 55 ||
[Analyze grammar]

mattā madanasaṃgena haṃsībhiḥ kalahaṃsakāḥ |
kareṇubhirgajāhyāsañchikhaṃḍībhiḥ śikhaṃḍinaḥ || 56 ||
[Analyze grammar]

niṣkāmā hyaturā hyāsañchivasaṃparkajairguṇaiḥ |
akasmācca tathābhūtaṃ kathaṃ jātaṃ vimṛśya ca || 57 ||
[Analyze grammar]

śailādo hi mahātejā naṃdī hyamitavikramaḥ |
rakṣasaṃ vibudhānāṃ vā kṛtyamastītyaciṃtayat || 58 ||
[Analyze grammar]

etasminnaṃtare tatra madano hi dhanurddharaḥ |
paṃcabāṇānsamāropya svakīye dhanuṣi dvijāḥ |
tarośchāyāṃ samāśritya devadārugatāṃ tadā || 59 ||
[Analyze grammar]

nirīkṣya śaṃbhuṃ paramāsane stitaṃ tapo juṣāṇaṃ parameṣṭhināṃ patim |
gaṃgādharaṃ nīlatamālakaṃṭhaṃ kapardinaṃ candrakalāsametam || 60 ||
[Analyze grammar]

bhujaṃgabhogāṃkitasarvagātraṃ paṃcānanaṃ siṃhaviśālavikramam |
karpūragaure parayānvitaṃ ca sa veddhukāmo madanastapasvinam || 61 ||
[Analyze grammar]

durāsadaṃ dīptimatāṃ variṣṭhaṃ maheśamugraṃ saha mādhavena |
yāvacchivaṃ veddhukāmaḥ śareṇa tāvadyātā girijā viśvamātā |
sakhījanaiḥ saṃvṛtā pūjanārthaṃ sadāśivaṃ maṃgalaṃ maṃgalānām || 62 ||
[Analyze grammar]

kanakakusumamālāṃ saṃdadhe nīlakaṃṭhe sitakiraṇamanojñādurllabhā sā tadānīm |
smitavikasitanetrā cāruvaktraṃ śivasya sakalajananitrī vīkṣamāṇā babhūva || 63 ||
[Analyze grammar]

tāvadviddhaḥ śareṇaiva mohanākhyena catvarāt |
vidhyamānastadā śaṃbhuḥ śanairunmīlya locane |
dadarśa girijāṃ devobdhiryathā śaśinaḥ kalām || 64 ||
[Analyze grammar]

cāruprasannavadanāṃ biṃboṣṭhīṃ sasmitekṣaṇām |
sudvijāmagnijāṃ tanvīṃ viśālavadanotsavām || 65 ||
[Analyze grammar]

gaurīṃ prasannamudrāṃ ca viśvamohanamohanām |
yayā trilokaracanā kṛtā brahmādibhiḥ saha || 66 ||
[Analyze grammar]

utpattipālanavināśakarī ca yā vai kṛtvāgrataḥ sattvarajastamāṃsi |
sā cetanena dadṛśe purato hareṇa saṃmohanī sakalamaṃgalamaṃgalaikā || 67 ||
[Analyze grammar]

tāṃ nirīkṣya bhavo devo girijāṃ lokapāvanīm |
mumoha darśanāttasyā madanenāturīkṛtaḥ |
vismayotphullanayano babhūva sahasā śivaḥ || 68 ||
[Analyze grammar]

evaṃ vilokamāno'sau devadevo jagatpatiḥ |
manasā dūyamānena idamāha sadāśivaḥ || 69 ||
[Analyze grammar]

anayā mohitaḥ kasmāttapaḥstho'haṃ nirāmayaḥ |
kutaḥ kasmācca kenedaṃ kṛtamasti mamāpriyam || 70 ||
[Analyze grammar]

tato vyalokayacchaṃbhurddikṣu sarvāsu sādaram |
tāvaddṛṣṭo dakṣiṇasyāṃ diśi hyāttaśarāsanaḥ || 71 ||
[Analyze grammar]

cakrīkṛtadhanuḥ sajjaṃ cakre beddhuṃ sadāśivam |
yāvatpunaḥ saṃdhayati madano madanāṃtakam |
tāvaddṛṣṭo maheśena saroṣeṇa tadā dvijāḥ || 72 ||
[Analyze grammar]

nirīkṣitastṛtīyena cakṣuṣā parameṇa hi |
madanastatkṣaṇādeva jvālāmālāvṛto'bhavat |
hāhākāro mahānāsīddevānāṃ tatra paśyatām || 73 ||
[Analyze grammar]

devā ūcuḥ |
devadeva mahādeva devānāṃ varado bhava |
girijāyāḥ sahāyārthaṃ preṣito madano'dhunā || 74 ||
[Analyze grammar]

vṛthā tvayātha dagdho'sau madano hi mahāprabhaḥ || 75 ||
[Analyze grammar]

tvayā hi kāryaṃ jagadekabaṃdho kāryaṃ surāṇāṃ parameṇa varcasā |
asyāṃ samutpatsyati deva śaṃbho tenaiva sarvaṃ bhavatīha kāryam || 76 ||
[Analyze grammar]

tārakeṇa mahādeva devāḥ saṃpīḍitā bhṛśam |
tadarthaṃ jīvitaṃ cāsya dattvā ca girijāṃ prabho || 77 ||
[Analyze grammar]

varayasva mahābhāga devākārye bhava kṣamaḥ |
gajāsurāttavayā trātā vayaṃ sarve divaukasaḥ || 78 ||
[Analyze grammar]

kālakūṭācca nūnaṃ hi rakṣitāḥ smo na cānyathā |
bhasmāsurācca sarveśa tvayā trātā na saṃśayaḥ || 79 ||
[Analyze grammar]

madanoyaṃ samāyātaḥ surāṇāṃ kāryasiddhaye |
tasmāttvayā rakṣaṇīya upakāraḥ paro hi naḥ || 80 ||
[Analyze grammar]

vinā tena jagatsarvaṃ nāśameṣyati śaṃkara |
niṣkāmastvaṃ kathaṃ śaṃbho svabuddhyā ca vimṛsyatām || 81 ||
[Analyze grammar]

tadovāca ruṣāviṣṭo devānprati maheśvaraḥ |
vinā kāmena bho devā bhavitavyaṃ na cānyathā || 82 ||
[Analyze grammar]

yadāḥkāmaṃ puraskṛtya sarve devāḥ savāsavāḥ |
padabhraṣṭāśca duḥkhena vyāptā dainyaṃ samāśritāḥ || 83 ||
[Analyze grammar]

kāmo hi narakāyaiva sarveṣāṃ prāṇināṃ dhruvam |
duḥkharūpī hyanaṃgo'yaṃ jānīdhvaṃ mama bhāṣitam || 84 ||
[Analyze grammar]

tārako'pi durācāro niṣkāmo'dya bhaviṣyati |
vinākāmena ca kathaṃ pāpamācarate naraḥ || 85 ||
[Analyze grammar]

tasmātkāmo mayā dagdhaḥ sarveṣāṃ śāṃtihetave |
yuṣmābhiśca suraiḥ sarvairasuraiśca maharṣibhiḥ || 86 ||
[Analyze grammar]

anyaiḥ prāṇibhirevātra tapase dhīyatāṃ manaḥ |
kāmakrodhavihīnaṃ ca jagatsarvaṃ mayā kṛtam || 87 ||
[Analyze grammar]

tasmādenaṃ pāpinaṃ duḥkhamūlaṃ na jīvayiṣyāmi surāḥ pratīkṣyatām |
nirantaraṃ cātmasukhaprabodhamānaṃdalakṣaṇamāgādhamananyarūpam || 88 ||
[Analyze grammar]

evamuktāstadā tena śaṃbhunā parameṣṭhinā |
ūcurmaharṣayaḥ sarve śakara lokaśaṃkaram || 89 ||
[Analyze grammar]

yaduktaṃ bhavatā śaṃbho paraṃ śreyaskaraṃ hi naḥ |
kiṃ tu vakṣyāma deveśa śrūyatāṃ cāvadhāryatām || 90 ||
[Analyze grammar]

yathā sṛṣṭamidaṃ viśvaṃ kāmakrodhasamanvitam |
tatsarvaṃ kāmarūpaṃ hi sa kāmo na tu hanyate || 91 ||
[Analyze grammar]

dharmārthakāmāmokṣāśca catvāro hyekarūpatām |
nītāyena mahādeva sa kāmo'yaṃ na hanyate || 92 ||
[Analyze grammar]

kathaṃ tvayā hi saṃdagdhaḥ kāmo hi duratikramaḥ |
yena saṃghaṭitaṃ viśvamābrahmasthāvarātmakam || 93 ||
[Analyze grammar]

kāmena hīyate viśvaṃ kāmena pālyate |
kāmenotpadyate viśvaṃ tasmātkāmo mahābalaḥ || 94 ||
[Analyze grammar]

yasmātkrodho bhavatyugro yena tvaṃ ca vaśīkṛtaḥ |
tasmātkāmaṃ mahādeva saṃbodhayitumarhasi || 95 ||
[Analyze grammar]

tvayā saṃpādito deva madano hi mahābalaḥ |
samartho hi samarthatvāttatsāmarthyaṃ kariṣyati || 96 ||
[Analyze grammar]

ṛṣibhiścaivamukto'pi dviguṇaṃ rūpamāsthitaḥ |
cakṣuṣā hi tṛtīyena dagdhukāmo harastadā || 97 ||
[Analyze grammar]

munibhiścāraṇaiḥ siddhairgaṇaiścāpi sadāśivaḥ |
stutaśca vaṃdito rudraḥ pinākī vṛṣavāhanaḥ || 98 ||
[Analyze grammar]

madanaṃ ca tathā dagdhvā tyaktvā taṃ parvataṃ ruṣā |
himavaṃtābhidhaṃ sadyastirodhānagato'bhavat || 99 ||
[Analyze grammar]

tirodhānagataṃ devī vīkṣya dagdhaṃ ca manmatham |
sakokilaṃ sacūtaṃ ca sabhṛṃgaṃ sahacaṃpakam || 100 ||
[Analyze grammar]

tathaiva dagdhaṃ madanaṃ vilokya ratyā vilāpaṃ ca tadā manasvinī |
sabāṣpadīrghaṃ vimanā vimṛsya kathaṃ sa rudro vaśago bhavenmama || 101 ||
[Analyze grammar]

evaṃ vimṛśya suciraṃ girijā tadānīṃ saṃmohamāpa ca satī hi tathā babhāṣe |
saṃmuhyamānā rudatīṃ nirīśyaratirmahārūpavatīṃ manasvinīm || 102 ||
[Analyze grammar]

mā viṣādaṃ kuru sakhi madanaṃ jīvayāmyaham |
tvadarthaṃ bho viśālākṣi tapasā'rādhayāmyaham || 103 ||
[Analyze grammar]

haraṃ rudraṃ virupākṣaṃ devadevaṃ jagadgurum |
mā ciṃtāṃ kuru suśromi madanaṃ jīvayāmyaham || 104 ||
[Analyze grammar]

evama śvāsya tāṃ sādhvī girijāṃ ratiraṃjasā |
tapastepe ca sumahatpatiṃ prāptuṃ sumadhyamā || 105 ||
[Analyze grammar]

madano yatra dagdhaśca rudreṇa paramātmanā |
tapyamānāṃ tapastatra nārado dadṛśe tadā || 106 ||
[Analyze grammar]

uvāca gatvā sahasā bhāminīṃ ratimaṃtike |
kasyāsi tvaṃ viśālākṣi kena vā tapyate tapaḥ || 107 ||
[Analyze grammar]

taruṇī rūpasaṃpannā saubhāgyena pareṇa hi |
nāradasya vacaḥ śrutvā roṣeṇa mahatā tadā |
uvāca vākyaṃ madhuraṃ kiṃcinniṣṭhurameva ca || 108 ||
[Analyze grammar]

ratiruvāca |
nārado'si mayā jñātaḥ kumārastvaṃ na saṃśayaḥ |
svasvarūpādarśanaṃ ca kartumarhasi suvrata || 109 ||
[Analyze grammar]

yathāgatena mārgeṇa gaccha tvaṃ mā vilaṃbitam |
baṭo na kiṃcijjānāsi kevalaṃ kalikṛnmahān || 110 ||
[Analyze grammar]

parastrīkāmukāḥ kṣudrā viṭā vyasaninaśca ye |
tathā hyakarmiṇaḥ stabdhāsteṣāṃ madhye tvamagraṇīḥ || 111 ||
[Analyze grammar]

evaṃ nirbhartsito ratyā nārado munisattamaḥ |
svayaṃ jagāma tvarītaṃ śaṃbaraṃ daityapuṃgavam || 112 ||
[Analyze grammar]

śaśaṃsa daityarājāya dagdhaṃ madanameva ca |
rudreṇa krodhayuktena tasya bhāryā manasvinī || 113 ||
[Analyze grammar]

tāmānaya mahābhāga bhāryāṃ kuru mahābala |
atīva rūpasaṃpannā yā ānītāstvayānagha |
tāsāṃ madhye rūpavatī ratiḥ sā madanapriyā || 114 ||
[Analyze grammar]

evamākarṇya vacanaṃ devarṣerbhāvitātmanaḥ |
jagāma sahasā tatra yatrāste sā suśobhanā || 115 ||
[Analyze grammar]

tāṃ dṛṣṭvā su viśālākṣīṃ ratiṃ madanamohinīm |
uvāca prahasanvākyaṃ śaṃbaro devasaṃkaṭaḥ || 116 ||
[Analyze grammar]

ehi tanvi mayā sārddhaṃ rājyaṃ bhogānyatheṣṭataḥ |
bhuṃkṣva devi prasādānme tapasā kiṃ prayojanam || 117 ||
[Analyze grammar]

evamuktā tadā tena śaṃbareṇa mahātmanā |
uvāca tanvī madhuraṃ mahiṣī madanasya sā || 118 ||
[Analyze grammar]

vidhavāhaṃ mahābāho naivaṃ bhāṣitumarhasi |
rājā tvaṃ sarvadaityānāṃ lakṣṇaiḥ parivāritaḥ || 119 ||
[Analyze grammar]

etattadvacanaṃ śrutvā śaṃbaraḥ kāmamohitaḥ |
kare grahītu kāmo'sau tadā ratyā nivāritaḥ || 120 ||
[Analyze grammar]

vimṛśya manasā sarvamajeyatvaṃ ca tasya vai |
mā spṛśa tvaṃ ca re mūḍha mama saṃsparśajena vai || 121 ||
[Analyze grammar]

saṃparkeṇa ca dagdho'si nānyathā mama bhāṣitam |
tadovāca mahātejāḥ śaṃbaraḥ prahasanniva || 122 ||
[Analyze grammar]

vibhīṣikābhirbahvībhirmāṃ bhīṣayasi mānini |
gaccha śīghraṃ mama gṛhaṃ bahūktyā kiṃ prayojanam || 123 ||
[Analyze grammar]

ityucyamānena tadā nītā sā prasabhaṃ tathā |
svapuraṃ paramaṃ tanvī śaṃbareṇa manasvinī || 124 ||
[Analyze grammar]

kṛtā mahānase'dhyakṣā nāmnā māyāvatīti ca || 125 ||
[Analyze grammar]

ṛṣaya ūcuḥ |
pārvatyādhikṛtaṃ sarvaṃ madanānayanaṃ prati |
saṃbareṇa hṛtātanvī madanasya priyā satī |
ata ūrdhvaṃ tadā sūta kiṃ jātaṃ tatra varṇyatām || 126 ||
[Analyze grammar]

sūta uvāca |
gataṃ tadā śivaṃ dṛṣṭvā dagdhvā madanamojasā |
pārvatī tapasā yuktā sthitā tatraiva bhāminī || 127 ||
[Analyze grammar]

pitrā tena tadā tanvī mātrā caiva vicāritā |
bāle ehi gṛhe śīghraṃ mā śramaṃ kartumarhasi || 128 ||
[Analyze grammar]

uktā tābhyāṃ tadā sādhvī girijā vākyamabravīt || 129 ||
[Analyze grammar]

pārvatyuvāca |
nāgacchāmi gṛhaṃ mātastāta me śrṛṇu tattvataḥ |
vākyaṃ dharmārthayuktaṃ ca yena tvaṃ toṣameṣyasi || 130 ||
[Analyze grammar]

śaṃbhuḥ pareṣāṃ paramo dagdho yena mahābalaḥ |
madano mama sānnidhyamānaye'traiva taṃ śivam || 131 ||
[Analyze grammar]

durlabhohi tadā śaṃbhuḥ prāṇināṃ gṛhamicchatām |
nāgacchāmi gṛhaṃ mātastasmātsarvaṃ vimṛśyatām || 132 ||
[Analyze grammar]

tadovāca mahātejā himavānsvasutāṃ prati |
durārādhyaḥ śivaḥ sākṣātsarvadevanamaskṛtaḥ |
tvayā prāptumaśakyo hi tasmāttvaṃ svagṛhaṃ vraja || 133 ||
[Analyze grammar]

sā bāṣpapūritenaiva kaṃṭhena svasutāṃ prati |
uvāca menā tanvaṃgiyāhi śīghraṃ gṛhaṃ prati || 134 ||
[Analyze grammar]

tadā prahasya covāca mātaraṃ prati pārvatī |
pratijñāṃ śrṛṇu me mātastapasā parameṇa hi || 135 ||
[Analyze grammar]

atraiva taṃ samānīya varayāmi vicakṣaṇam |
nāśayāmi rudrasya rudratvaṃ vāravarṇini || 136 ||
[Analyze grammar]

sukharūpaṃ parityajya girijā ca manasvinī |
śaṃbhorāradhanaṃ cakre parameṇa samādhinā || 137 ||
[Analyze grammar]

jayā ca vijayā caiva mādhavī ca sulocanā |
suśrutā ca śrutā caiva tathaiva ca śukī parā || 138 ||
[Analyze grammar]

pramlocā subhagā śyāmā citrāṃgī cāruṇī svadhā |
etāścānyāśca bahavaḥ sakhyastā girijāṃ prati |
upāsāṃcakrire sā ca devagarbhā ca bhāminī || 139 ||
[Analyze grammar]

tapasā paramogreṇa caraṃtī cāruhāsinī |
madano yatra dagdhaśca rudreṇa ca mahātmanā |
tatraiva vediṃ kṛtvā ca tasyopari susaṃsthitā || 140 ||
[Analyze grammar]

tyaktvā jalāśanaṃ bālā parṇādā hyabhavacca sā |
tataḥ sā'rdrāṇi parṇāni tyaktvā śuṣkāṇi cādade || 141 ||
[Analyze grammar]

śuṣkāṇi caiva parṇāni nāśitāni tayā yadā |
aparṇeti ca vikhyātā babhuva tanumadhyamā || 142 ||
[Analyze grammar]

vāyupānaratā jātā aṃbupānādanaṃtaram |
kālakrameṇa mahatā babhūva girijā satī |
ekāṃguṣṭhena ca tadā dadhāra ca nijaṃ vapuḥ || 143 ||
[Analyze grammar]

evamugreṇa tapasā śaṃkarārādhanaṃ satī |
cakāra parayā tuṣṭyā śaṃbhoḥ prītyarthameva ca || 144 ||
[Analyze grammar]

paraṃ bhāvaṃ samāśritya jaganmaṃgalamaṃgalā |
tuṣṭyarthaṃ ca maheśasya tatāpa paramaṃ tapaḥ || 145 ||
[Analyze grammar]

evaṃ divyasahasrāṇi varṣāṇi ca tatāpa vai |
himā layastadāgatya pārvatīṃ kṛtaniścayām || 146 ||
[Analyze grammar]

sabhāryaḥ sa sutāmāpta uvāca ca mahāsatīm |
mā khidyatāṃ mahādevi tapasānena bhāmini || 147 ||
[Analyze grammar]

kva rudro dṛśyate bāle virakto nātra saṃśayaḥ |
tvaṃ tanvī taruṇī bālā tapasā ca vimohitā || 148 ||
[Analyze grammar]

bhaviṣyati na saṃdehaḥ satyaṃ prativadāmi te |
tasmāduttiṣṭha yāhyāśu svagṛhaṃ varavarṇini || 149 ||
[Analyze grammar]

kiṃ tena tava rudreṇa ye dagdhaḥ purā'naghe |
madano nirvikāritvāttaṃ kathaṃ prārthayiṣyasi || 150 ||
[Analyze grammar]

gaganastho yathā caṃdro grahītuṃ na hi śakyate |
tathaiva durgamaḥ śarbhurjānīhi tvaṃ śucismite || 151 ||
[Analyze grammar]

tathaiva menayā coktā tathā sahyādriṇā satī |
meruṇā maṃdareṇaiva mainākena tathaiva ca || 152 ||
[Analyze grammar]

ebhiruktā tadā tanvī pārvatī tapasi sthitā |
uvāca prahasantteva himavaṃtaṃ śucismitā || 153 ||
[Analyze grammar]

purā proktaṃ tvayā tāta aṃba kiṃ vismṛtaṃ tvayā |
adhunaiva pratijñāṃ ca śrṛṇudhvaṃ mama bāṃdhavāḥ || 154 ||
[Analyze grammar]

virakto'sau mahādevo madano yena vai hataḥ |
taṃ toṣayāmi tapasā śaṃkaraṃ lokaśaṃkaram || 155 ||
[Analyze grammar]

sarve yūyaṃ ca gacchaṃtu nātra kāryā vicāraṇā |
dagdho hi madano yena yena dagdhaṃ girervanam || 156 ||
[Analyze grammar]

tamānayāmi cātraiva tapasā kevalena hi |
tapobalena mahatā susevyo hi sadāśivaḥ || 157 ||
[Analyze grammar]

taṃ jānīdhvaṃ mahābhāgāḥ satyaṃsatyaṃ vadāmyaham || 158 ||
[Analyze grammar]

saṃbhāṣamāṇā jananīṃ tadānīṃ himālayaṃ caiva tathā ca menām |
tathaiva meruṃ mitabhāṣiṇī tadā sā maṃdaraṃ parvatarājakanyā |
jagmustadā tena pathā ca parvatā yathāgatenāpi vicakṣamāṇāḥ || 159 ||
[Analyze grammar]

gateṣu teṣu sarveṣu sakhībhiḥ parivāritā |
tatraiva ca tapastepe paramārthā satī tadā || 160 ||
[Analyze grammar]

tapasā tena mahatā taptamāsīccarācaram |
tadā surāsurāḥ sarve brahmāṇaṃ śaraṇaṃ gatāḥ || 161 ||
[Analyze grammar]

devā ūcuḥ |
tvayā sṛṣṭamidaṃ sarvaṃ jagaddeva carācaram |
trātumarhasi devānnastvadanyo nopapadyate || 162 ||
[Analyze grammar]

asmākaṃ rakṣaṇe śakta ityākarṇya vacastadā |
vimṛśya ca tadā brahmā manasā parameṇa hi || 163 ||
[Analyze grammar]

girijātapasodbhūtaṃ dāvāgniṃ paramaṃ mahat |
jñātvā brahmā jagā māśu kṣīrābdhiṃ paramādbhutam || 164 ||
[Analyze grammar]

tatra suptaṃ suplayaṃke śeṣākhye cātiśobhane |
lakṣmyā pādopayugalaṃ sevyamānaṃ niraṃtaram || 165 ||
[Analyze grammar]

dūrasthenāpi tārkṣyeṇa natakaṃdharadhāriṇā |
sevyamānaṃ śriyā kāṃtyā kṣāṃtyā vṛttyā dayādibhiḥ || 166 ||
[Analyze grammar]

navaśaktiyutaṃ viṣṇuṃ pārpadaiḥ parivāritam |
kumudotha kumudvāṃśca sanakaśca sanaṃdanaḥ || 167 ||
[Analyze grammar]

sanātano mahābhāgaḥ prasupto vijayo'rijit |
jayaṃtaśca jayatseno jayaścaiva mahāprabhaḥ || 168 ||
[Analyze grammar]

sanatkumāraḥ sutapā nāradaścaiva tuṃburuḥ |
pāṃcajanyo mahāśaṃkho gadā kaumodakī tathā || 169 ||
[Analyze grammar]

sudarśanaṃ tathā cāpaṃ śārṅgaṃ ca paramādbhutam |
etāni vai rūpavaṃti dṛṣṭāni parameṣṭhinā || 170 ||
[Analyze grammar]

viṣṇoḥ samīpe paramāmano bhṛśaṃ sametya sarve suradānavāstadā |
viṣṇuṃ cāhuḥ parameṣṭhināṃ patiṃ tīre tadānīmudadhermahātmanaḥ || 171 ||
[Analyze grammar]

trāhitrāhi mahāviṣṇo taptānnaḥ śaraṇāgatān |
tapasogreṇa mahatā pārvatyāḥ parameṇa hi |
śeṣāsane copaviṣṭa uvāca parameśvaraḥ || 172 ||
[Analyze grammar]

yuṣmābhiḥ sahitaścāpi vrajāmi parameśvaram |
mahādevaṃ prārthayāmo girijāṃ prati vai surāḥ || 173 ||
[Analyze grammar]

pāṇigrahārthamadhunā devadevaḥ pinākadhṛk |
yathā neṣyati tatraiva kariṣyāmo'dhunā vayam || 174 ||
[Analyze grammar]

tasmādvayaṃ gamiṣyāmo yatra rudro mahāprabhuḥ |
tapasogreṇa saṃyukto hyāste paramamaṃgalaḥ || 175 ||
[Analyze grammar]

viṣṇostadvacanaṃ śrutvā ūcuḥ sarve surāsurāḥ |
na yāsyāmo vayaṃ sarve virūpākṣaṃ mahāprabham || 176 ||
[Analyze grammar]

yadā dagdhaḥ purā tena madano duratikramaḥ |
tathaiva dhakṣyatyasmākaṃ nātra kāryā vicāraṇā || 177 ||
[Analyze grammar]

prahasya bhagavānviṣṇuruvāca parameśvaraḥ |
mā bhayaṃ kriyatāṃ sarvaiḥ śivarūpī sadāśivaḥ || 178 ||
[Analyze grammar]

sa na dhakṣyati sarveṣāṃ devānāṃ bhayanāśanaḥ |
tasmādbhavadbhirgatavyaṃ mayā sārddhaṃ vicakṣaṇāḥ || 179 ||
[Analyze grammar]

śaṃbhuṃ purāṇaṃ puruṣaṃ hyadhīśaṃ vareṇyarūpaṃ ca paraṃ parāṇām |
tapo juṣāṇaṃ paramārtharūpaṃ parātparaṃ taṃ śaraṇaṃ vrajāmi || 180 ||
[Analyze grammar]