Chapter 13

[English text for this chapter is available]

lomaśa uvāca |
tataste garjjamānāśca ākṣipaṃtaḥ surānraṇe |
śatakratupramukhyāṃstanmahābalaparākramān || 1 ||
[Analyze grammar]

vimānamāruhya tadā mahātmā vairocaniḥ sarvabalena sārddham |
daityaiḥ sameto vividhairmahābalaiḥ surānpradudrāva mahābhayāvaham || 2 ||
[Analyze grammar]

svāni rūpāṇi bibhraṃtaḥ samāpetuḥ sa hasraśaḥ |
kecidvyāghrānsamārūḍhā mahiṣāṃśca tathā pare || 3 ||
[Analyze grammar]

aśvānkecitsamārūḍhā dvipānkecittathā pare |
siṃhāṃstathā pare rūḍhāḥ śārdūlāñcharabhāṃstathā || 4 ||
[Analyze grammar]

mayūrānrājahaṃsāṃśca kukkuṭāṃśca tathā pare |
keciddhayānsamārūḍhā uṣṭrānaśvatarānapi || 5 ||
[Analyze grammar]

gajānkharānpare caiva śakaṭāṃśca tathā pare |
pādātā bahavo daityāḥ khaṅgaśaktyṛṣṭipāṇayaḥ || 6 ||
[Analyze grammar]

parighāyudhinaḥ pāśaśūlamudgarapāṇayaḥ |
asilomānvitāḥ kecidbhuśuṃḍīparighāyudhāḥ || 7 ||
[Analyze grammar]

hayanāgarathāścānye samārūḍhāḥ prahāriṇaḥ |
vimānāni samārūḍhā balimukhyāḥ sahasraśaḥ || 8 ||
[Analyze grammar]

sparddhamānāstatānyonyaṃ garjaṃtaśca muhurmuhuḥ |
vṛṣaparvā hyuvā cedaṃ balinaṃ daityapuṃgavam || 9 ||
[Analyze grammar]

tvayā kṛtaṃ mahābāho iṃdreṇa saha saṃgamam |
viśvāso naiva kartavyo durhṛdā ca kathaṃcana || 10 ||
[Analyze grammar]

ūnenāpi hi tucchena vairiṇāpi kathaṃcana |
maitrī buddhimatā kāryā āpadyapi nivartate || 11 ||
[Analyze grammar]

na viśvasetpūrvavirodhinā kvacitparājitāḥ smo'tha bale tvayādhunā |
purāṇaduṣṭāḥ kathamadya vai punarmaṃtraṃ vikartuṃ na ca te yateran || 12 ||
[Analyze grammar]

ityūcuste durādharṣā yoddhukāmā vyavasthitāḥ |
dhvajaiśchatraiḥ patākaiśca raṇabhūmimamaṃḍayan || 13 ||
[Analyze grammar]

cāmaraiśca diśaḥ sarvā lopitaṃ ca raṇasthalam |
tathā sarve surāstatra daityānprati samutsukāḥ || 14 ||
[Analyze grammar]

pītvāmṛtaṃ mahābhāgā vāhānyāruhya daṃśitāḥ |
gajārūḍho maheṃdropi vajrapāṇiḥ pratāpavān |
sūryaścoccaiḥ śravārūḍho mṛgā rūḍhaśca candramāḥ || 15 ||
[Analyze grammar]

chatracāmarasaṃvītāḥ śobhitā vijayaśriyā |
praṇamya viṣṇuṃ te sarva iṃdrādyā jayakāṃkṣiṇaḥ || 16 ||
[Analyze grammar]

te viṣṇunā hyanujñātā asurānprati vai ruṣā |
asurāśca mahākāyā bhīmākṣā bhīmavikramāḥ || 17 ||
[Analyze grammar]

teṣāṃ boramabhūdyuddhaṃ devānāṃ dānavaiḥ saha |
tumulaṃ ca mahāghoraṃ sarvabhūtabhayāvaham || 18 ||
[Analyze grammar]

śaradhārānvitaṃ sarvaṃ babhūva paramādbhutam |
tataśca ṭacaṭāśabdā babhūvuśca diśodaśa || 19 ||
[Analyze grammar]

tato nimiṣamātreṇa śaraghātayutā bhavan |
śaratomaranārācairāhatāścāpatanbhuvi || 20 ||
[Analyze grammar]

vidhyamānāstathā kecidvividhuścāparānraṇe |
bhallairbhagnāśca patitā nārācaiḥ śakalīkṛtāḥ || 21 ||
[Analyze grammar]

kṣuraprahāritāḥ keciddaityā dānavarākṣasāḥ |
śilīmukhairmāritāśca bhagnāḥ kecicca dānavāḥ || 22 ||
[Analyze grammar]

evaṃ bhagnaṃ dānavānāṃ ca sainyaṃ dṛṣṭvā devā garjamānāḥ samaṃtāt |
hṛṣṭāḥ sarve saṃmilitvā tadānīṃ labdhvā yuddhe te jayaṃ ślāghayante || 23 ||
[Analyze grammar]

śaṃkhavāditraghoṣeṇa pūritaṃ ca jagattrayam |
devānprati kṛtāmarṣā dānavāste mahābalāḥ || 24 ||
[Analyze grammar]

baliprabhṛtayaḥ sarve saṃbhrameṇotthitāḥ punaḥ |
vimānaiḥ sūryasaṃkāsairanekaiśca samanvitāḥ || 25 ||
[Analyze grammar]

dvaṃdvayuddhaṃ sutumulaṃ devānāṃ dānavaiḥ saha |
saṃpravṛttaṃ punaścaiva parasparajigīṣayā || 26 ||
[Analyze grammar]

balinā dānaveṃdreṇa maheṃdro yuyudhe tadā |
tathā yamo mahābāhurnamucyā saha saṃgataḥ || 27 ||
[Analyze grammar]

nairṛtaḥ praghasenaiva pāśī kuṃbhena saṃgataḥ |
nikuṃbhenaiva sumahadyuddhaṃ cakre sadārayaḥ || 28 ||
[Analyze grammar]

somena saha rāhuśca yuddhaṃ cakre sudāruṇam |
rāhuṇā candradehotthamamṛtaṃ bhakṣitaṃ tadā |
saṃparkādamṛsyaiva yathā rāhustathā'bhavat || 29 ||
[Analyze grammar]

tāni sarvāṇi dṛṣṭāni śaṃbhunā parameṣṭhinā |
āśrayo'haṃ ca sarveṣāṃ bhūtānāṃ nātra saṃśayaḥ |
asurāṇāṃ surāṇāṃ ca sarveṣāmapi vallabhaḥ || 30 ||
[Analyze grammar]

evamuktastadā rāhuḥ praṇamya śirasā śivam |
maulau sthitastadā caṃdro amṛtaṃ vyasṛjadbhayāt || 31 ||
[Analyze grammar]

tena tasya hi jātāni śirāṃsi subahūnyapi |
ekapadyena teṣāṃ ca srajaṃ kṛtvā manoharām |
babaṃdha śaṃbhuḥ śirasi śirobhūṣaṇavatkṛtam || 32 ||
[Analyze grammar]

aśanātkālakūṭasya nīlakaṃṭho'bhavattadā |
devānāṃ kāryasiddhyarthaṃ muṃḍamālā tathā kṛtā || 33 ||
[Analyze grammar]

dadhāra śirasā tāṃ ca muṇḍamālāṃ maheśvaraḥ || 34 ||
[Analyze grammar]

tayā srajā'sau śuśubhe mahātmā devādidevastripurāṃtako haraḥ |
gajāsuro yena nipātito mahānathāṃdhako yena kṛtaśca cūrṇaḥ || 35 ||
[Analyze grammar]

gaṃgā dhṛtā yena śirassumadhye caṃdraṃ ca cūḍe kṛtavānbhayāpahaḥ |
vedāḥ purāṇāni tathāgamāśca tathaiva nānāśrutayo'tha śāstram || 36 ||
[Analyze grammar]

jalpaṃti nānāgamabhedairmīmāṃsamānāśca bhavaṃti mūkāḥ |
nānāgamārcāyamataprabhedairnirūpyamāṇo jagadekabaṃdhuḥ || 37 ||
[Analyze grammar]

śivaṃ hi nityaṃ paramātmadaivaṃ vedaikavedyaṃ paramātmadivyam |
vihāya taṃ mūḍhajanāḥ pramattāḥ śivaṃ na jānaṃti parātmarūpam || 38 ||
[Analyze grammar]

yenaiva sṛṣṭaṃ vidhṛtaṃ ca yena yena śritaṃ yena kṛtaṃ samagram |
yasyāṃśabhūtaṃ hi jagatkadācidvedāṃtavedyaḥ paramātmā śivaśca || 39 ||
[Analyze grammar]

āḍhyo vāpi daridro vā uttamo hyadhamo'pi vā |
śivabhaktirato nityaṃ śiva eva na saṃśayaḥ || 40 ||
[Analyze grammar]

yo vā parakṛtāṃ pūjāṃ śivasyopari śobhitām |
dṛṣṭvā saṃtoṣamāyāti dāyaṃ prāpnoti tatsamam || 41 ||
[Analyze grammar]

ye dīpamālāṃ kurvaṃti kārtikyāṃ śraddhayānvitāḥ |
yāvatkālaṃ prajvalaṃti dīpāste liṃgamagrataḥ |
tāvadyugasahasrāṇi dātā svarge mahīyate || 42 ||
[Analyze grammar]

kausuṃbhatailasaṃyuktā dīpā dattāḥ śivālaye |
dātāraste'pi kailāse modante śivasaṃnidhau || 43 ||
[Analyze grammar]

atasītailasaṃyuktā dīpā dattāḥ śivālaye |
te śivaṃ yāṃti saṃyuktāḥ kulānāṃ ca śatena vai || 44 ||
[Analyze grammar]

jñānino'pi hi jāyaṃte dīpadānaphalena hi || 45 ||
[Analyze grammar]

tilatailena saṃyuktā dīpā dattāḥ śivālaye |
te śivaṃ yāṃti saṃyuktāḥ kulānāṃ ca śatena vai || 46 ||
[Analyze grammar]

ghṛtāktā yaiḥ kṛtā dīpā dīpitāśca śivālaye |
te yāṃti paramaṃ sthānaṃ kulalakṣasamanvitāḥ || 47 ||
[Analyze grammar]

karpūrāgurudhūpaiśca ye yajaṃti sadā śivam |
ārārtikāṃ sakarppūrāṃ ye kurvaṃti dinedine |
te prāpnuvaṃti sāyujyaṃ nātra kāryā vicāraṇā || 48 ||
[Analyze grammar]

ekakālaṃ dvikālaṃ vā trikālaṃ ye hyataṃdritāḥ |
liṃgārcanaṃ prakurvaṃti te rudrā nātra saṃśayaḥ || 49 ||
[Analyze grammar]

rudrākṣadhāraṇaṃ ye ca kurvaṃti śivapūjane |
dāne tapasi tīrthe ca parvakāle hyataṃdritāḥ |
teṣāṃ yatsukṛtaṃ sarvamanaṃtaṃ bhavati dvijāḥ || 50 ||
[Analyze grammar]

rudrākṣā ye śivenoktāstācchṛṇudhvaṃ dvijottamāḥ |
ārambhaikamukhaṃ tāvadyābadvaktrāṇi ṣoḍaśa |
eteṣāṃ dvau ca vijñeyau śreṣṭhau tārayituṃ dvijāḥ || 51 ||
[Analyze grammar]

rudrākṣāṇāṃ paṃcamukhakhastathā caikamukhaḥ smṛtaḥ |
ye dhārayaṃtyekamukhaṃ rudrākṣamaniśaṃ narāḥ |
rudralokaṃ ca gacchaṃti modante rudrasaṃnidhau || 52 ||
[Analyze grammar]

japastapaḥ kriyā yogaḥ snānaṃ dānārcanādikam |
kriyate yacchṛbhaṃ karmma hyanaṃtaṃ cākṣadhāraṇāt || 53 ||
[Analyze grammar]

śunaḥ kaṃṭhanibaddho'pi rudrākṣo yadi vartate |
so'pi saṃtāritastena nātra kāryā vicāraṇā || 54 ||
[Analyze grammar]

tathā rudrākṣasaṃbaṃdhātpāpamapikṣayaṃ vrajet |
evaṃ jñātvā śubhaṃ karma kāryaṃ rudrākṣabaṃdhanāt || 55 ||
[Analyze grammar]

tripuṇḍradhāraṇaṃ yeṣāṃ vibhūtvā mantrapūtayā |
te rudraloke rudrāśca bhaviṣyaṃti na saṃśayaḥ || 56 ||
[Analyze grammar]

kapilāyāśca saṃgṛhya gomayaṃ cāṃtarikṣagam |
śuṣkaṃ kṛtvātha saṃdāhyaṃ vibhūtyarthaṃ śivapriyaiḥ || 57 ||
[Analyze grammar]

vibhūtīti samākhyātā sarvapāpapraṇāśinī |
lalāṭeṃ'guṣṭharekhā ca ādau bhāvyā prayatnataḥ || 58 ||
[Analyze grammar]

madhyamāṃ varjayitvā tu aṃgulīkdvayena ca |
evaṃ trirekhāsaṃyukto lalāṭe yasya dṛśyate |
sa śaivaḥ śivavajjñeyo darśanātpāpanāśanaḥ || 59 ||
[Analyze grammar]

jaṭādharāśca ye śaivāḥ sapta paṃca tathā nava |
jaṭā ye sthāpiyiṣyaṃti śaivena vidhinā yutāḥ || 60 ||
[Analyze grammar]

te śivaṃ prāpnuvaṃ tīha nātra kāryā vicāraṇā |
rudrākṣadhāraṇaṃ kāryaṃ śivabhaktairviśeṣataḥ || 61 ||
[Analyze grammar]

alpena vā mahattvena pūjito vā sadāśivaḥ |
kulakoṭiṃ samuddhṛtya śivena saha modate || 62 ||
[Analyze grammar]

tasmācchivātparataraṃ nāsti kiṃciddvijottamāḥ |
yadaivamucyate śāstre tatsarvaṃ śivakāraṇam || 63 ||
[Analyze grammar]

śivo dātā hi lokānāṃ kartā caivānumoditā |
śivaśaktyātmakaṃ viśvaṃ jānīdhvaṃ hi dvijottamāḥ || 64 ||
[Analyze grammar]

śiveti dvyakṣaraṃ nāma trāyate mahato bhayāt |
tasmācchivaściṃtyatāṃ vai smaryatāṃ ca dvijottamāḥ || 65 ||
[Analyze grammar]

ṛṣaya ūcuḥ |
somanāthasya māhātmyaṃ jñātaṃ tasya prasādataḥ |
rāhoḥ śirobhayātsarve rakṣitāḥ parameṣṭhinā || 66 ||
[Analyze grammar]

surāśceṃdrādayaścānye tasminyuddhe sudāruṇe |
ata ūrdhvaṃ surāḥ sarve kimakurvata ucyatām || 67 ||
[Analyze grammar]

śivasya mahimā sarvaḥ śrutastava mukhodgataḥ |
atha yuddhasya vṛttāntaḥ kathyatāṃ paramārthataḥ || 68 ||
[Analyze grammar]

lomaśa uvāca |
yadā hi daityaiśca parājitāḥ surāḥ śambhuṃ ca sarve śaraṇaṃ prapannāḥ |
śivaṃ praṇemuḥ sahasā surottamā yuddhāya sarve ca mano dadhustadā || 69 ||
[Analyze grammar]

tathaiva daityā api yudhyamānā utsāhayuktātibalāśca sarve |
devaiḥ sametāśca punaḥ punaśca yuddhaṃ pracakruḥ paramāstrayuktāḥ || 70 ||
[Analyze grammar]

evaṃ ca sarve hyasurāḥ surāśca śaktyṛṣṭiśūlaiḥ parighaiḥ paraśvadhaiḥ |
jayārthinomarṣayutāḥ parasparaṃ siṃhā yathā haimavatīṃ durātyayāḥ |
nihanyamānā hyasurāḥ suraistadā nānāstrayogaiḥ paramairnipetuḥ || 71 ||
[Analyze grammar]

cakruste sakalāmurvī māṃsaśoṇitakardamām |
mahīṃ vṛkṣādrisaṃyuktāṃ sasāgaravanākarām || 72 ||
[Analyze grammar]

śirāṃsi ca kabandhāni kavacāni mahāṃti ca |
dhvajārathāḥ patākāśca gajavājiśirāṃsi ca || 73 ||
[Analyze grammar]

bahantyaścāpagā hyāsannadyo bhīrubhayāvahāḥ |
agādhāḥ śoṇitodāśca taraṃto brahmarākṣasāḥ |
tayaṃti parānbhūtapratapramatharākṣasān || 74 ||
[Analyze grammar]

śākinīḍākinīsaṃghā yakṣiṇyo'tha sahasraśaḥ |
nānākeliṣu saṃyuktāḥ parasparamudānvitāḥ || 75 ||
[Analyze grammar]

evaṃ saṃkrīḍamānāste bhūtapramatharākṣasāḥ |
raṇe tasminmahāraudre devāsurasamāgame || 76 ||
[Analyze grammar]

balinā saha devendro yuyudhe'dbhutavikramaḥ |
śaktyā jaghāna deveṃdraṃ vairocaniramarṣaṇaḥ || 77 ||
[Analyze grammar]

tāṃ śaktiṃ vañcayāmāsa mahendro laghuvikramaḥ |
jaghāna sa baliṃ yatnāddaityeṃdraṃ parameṇa hi || 78 ||
[Analyze grammar]

vajreṇa śitadhāreṇa bāhuṃ ciccheda vikramī |
gātāsurapatadbhūmau vimānātsūryasaṃnnibhāt || 79 ||
[Analyze grammar]

patitaṃ ca baliṃ dṛṣṭvā vṛṣaparvā rūpānvitaḥ |
vavarṣa śaradhārābhiḥ payoda iva parvatam || 80 ||
[Analyze grammar]

maheṃdraṃ sagajaṃ caiva sahamānaṃ śitāñcharān |
tadā yuddhamabhūdvoraṃ mahendravṛṣaparvaṇoḥ || 81 ||
[Analyze grammar]

nipātya vṛṣaparvāṇamiṃdraḥ parabalārdanaḥ || 82 ||
[Analyze grammar]

tato vajreṇa mahatā dānavānavadhīdraṇe |
śirasi ccheditāḥ kecitkecitkaṃdharato hatāḥ || 83 ||
[Analyze grammar]

vihvalāśca kṛtāḥ kecidiṃdreṇa kupitena ca |
tathā yamena nihatā vāyunā varuṇena ca || 84 ||
[Analyze grammar]

kubereṇa hatāścānye nairṛtena tathā pare |
agninā nihatāḥ kecidīśenaiva vidāritāḥ || 85 ||
[Analyze grammar]

evaṃ tadā tairnihatā balīyaso mahāsurā vikramaśāninaśca |
suraistu sarvaiḥ saha lokapālaiḥ śivaprasādā bhihatāstadānīm || 86 ||
[Analyze grammar]

tato mahādaityavaro durātmā sa kalānemiḥ paramāstrayuktaḥ |
yayau tadānīṃ surasattamāṃstānhaṃtuṃ sadā krūramatiḥ sa ekaḥ || 87 ||
[Analyze grammar]

siṃhārūḍho daṃśitaśca triśulena hi saṃyutaḥ |
daityānāmarbudenaiva siṃhārūḍhena saṃvṛtaḥ || 88 ||
[Analyze grammar]

te siṃhā daṃśitāḥ sarve mahābalaparākramāḥ |
teṣu siṃheṣu cārūḍhā mahādaityāśca tatsamāḥ || 89 ||
[Analyze grammar]

āyāṃtīṃ daityasenāṃ tāṃ sarvāṃ siṃhavibhūṣitām |
kālanemiyutāṃ dṛṣṭvā devā iṃdrapurogamāḥ |
bhayamājagmuratulaṃ tadā dhyānaparā bhavan || 90 ||
[Analyze grammar]

kiṃ kurmo'dya vayaṃ sarve kathaṃ jeṣyāma cādbhutam |
etādṛśamasaṃkhyākamanīkaṃ siṃhasaṃvṛtam || 91 ||
[Analyze grammar]

evaṃ viciṃtyamānāste hyāgatastatra nāradaḥ |
nāradena ca tatsarvaṃ purāvṛttaṃ mahattaram || 92 ||
[Analyze grammar]

kathitaṃ ca maheṃdrāya kālanemestapobalam |
ajeyatvaṃ ca saṃgrāme varadānabalena tu || 93 ||
[Analyze grammar]

viṣṇuṃ vinā vayaṃ devā aśaktā raṇamaṃḍale |
jetuṃ ca sa tato viṣṇuḥ smaryatāṃ parameśvaraḥ |
tamālanīlo varadaḥ sarvairvijayakāṃkṣibhiḥ || 94 ||
[Analyze grammar]

nāradasya vacaḥ śrutvā tadā devāstvarānvitāḥ |
dhyānena ca mahāviṣṇuṃ tataḥ parabalārddanam |
smaraṃtaḥ paramātmānamidamūcuśca taṃ vibhum || 95 ||
[Analyze grammar]

devā ūcuḥ |
namastubhyaṃ bhagavate namaste viśvamaṃgalam |
śrīnivāsa namastubhyaṃ śrīpate te namonamaḥ || 96 ||
[Analyze grammar]

adyāsmānbhayabhītāṃstvaṃ kālanemibhayārditān |
trātumarhasi daityācca devānāmabhayaprada || 97 ||
[Analyze grammar]

evaṃ dhyātaḥ saṃsmṛtaśca prādurbhūto haristadā |
nīlo garuḍamāruhya jagatāmabhayapradaḥ || 98 ||
[Analyze grammar]

cakrapāṇistadāyāto devānāṃ vijayāya ca |
gaganasthaṃ mahāviṣṇuṃ garuḍopari saṃsthitam |
śrīvāsamenaṃ durddharṣaṃ yoddhukāmaṃ dadarśire || 99 ||
[Analyze grammar]

tathā dṛṣṭvā kālanemistadānīṃ prahasyamāno'tiruṣā balānvitaḥ |
kastvaṃ mahābhāga vareṇyarūpaḥ śyāmo yuvā vāraṇamattavikramaḥ |
kare gṛhītaṃ niśitaṃ mahāprabhaṃ cakraṃ ca kasmātkathayasva me prabho || 100 ||
[Analyze grammar]

śrībhagavānuvāca |
yuddhārthamiha cāyāto devānāṃ kāryasiddhaye |
tvaṃ sthiro bhava re maṃda dahāmyadya na saṃśayaḥ || 101 ||
[Analyze grammar]

śrutvā bhagavato vākyaṃ kālanemiḥ pratāpavān |
uvāca ruṣito bhūtvā bhagavaṃtamadhokṣajam || 102 ||
[Analyze grammar]

mūlabhūto hi devānāṃ bhagavānyuddhadurmadaḥ |
yuddhaṃ kuru mayā sārddhaṃ yadi śūro'si saṃprati || 103 ||
[Analyze grammar]

prahasya bhagavānviṣṇuruvācedaṃ mahāprabhaḥ |
gaganastho bhava tvaṃ hi mahīstho'haṃ bhavāmi vai || 104 ||
[Analyze grammar]

apraśastaṃ ca viṣamaṃ yuddhaṃ caiva yathā bhavet |
tathā kuru mahābāho gagano vā mahītale || 105 ||
[Analyze grammar]

tatheti matvā hi mahānubhāvo daityaiḥ sameto'rbudasaṃkhyakaiśca |
siṃhoparisthaiśca mahānubhāvairmahābalaiḥ krūrataraistadānīm || 106 ||
[Analyze grammar]

gaganamatha jagāhe maṃdamaṃdaṃ mahātmā hyasuragaṇasameto viśvarūpaṃ jighāṃsuḥ |
triśikhamaparamugraṃ gṛhya saṃdeśaceṣṭādaśanavikṛtavaktro yoddhukāmo hariṃ saḥ || 107 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe samudramaṃthanākhyāne devāsurasaṃgrāmavarṇanaṃnāma trayodaśo'dhyāyaḥ || 13 ||
[Analyze grammar]