Chapter 10

[English text for this chapter is available]

munaya ūcuḥ |
yattvayā kathitaṃ brahmanbrahmāṃḍaṃ sacarācaram |
bhasmībhūtaṃ rudrakopātkālakūṭāgninā'tha़khilam || 1 ||
[Analyze grammar]

brahmāṃḍāṃtarataḥ kiṃ tu rudraṃ manyāmahe vayam |
tadā carācaraṃ naṣṭaṃ brahmaviṣṇupurogamam || 2 ||
[Analyze grammar]

bhasmībhūtaṃ rudrakopātkathaṃ sṛṣṭiḥ pravartitā |
kuto brahmā ca viṣṇuśca kutaścaṃdrapurogamāḥ || 3 ||
[Analyze grammar]

anye surā surāḥ kutra bhasmībhūtā layaṃ gatāḥ |
ata ūrdhvaṃ kimabhavattatsarvaṃ vaktumarhasi || 4 ||
[Analyze grammar]

vyāsaprasādātsakalaṃ vettha tvaṃ nāparo hi tat |
tasmājjñānamayaṃ śāstraṃ tajjānāsi na cāparaḥ || 5 ||
[Analyze grammar]

iti pṛṣṭastadā sarvairmunibhirbhāvitātmabhiḥ |
sūto vyāsaṃ namaskṛtya vākyaṃ cedamathābravīt || 6 ||
[Analyze grammar]

lomaśa uvāca |
yadā brahmāṃḍamadhyasthā vyāptā devā viṣāgninā |
haribrahmādayo hyete lokapālāḥ savāsavāḥ |
tadā vijñāpitaḥ śaṃbhurheraṃbena mahātmanā || 7 ||
[Analyze grammar]

heraṃba uvāca |
he rudra he mahādeva he sthāṇo ha jagatpate |
mayā vighnaṃ vinodena kṛtaṃ teṣāṃ sudurjayam || 8 ||
[Analyze grammar]

bhayena mati mohāttvāṃ nārccayaṃti ca māmapi |
udyogaṃ ye prakurvanti teṣāṃ kleśo'dhiko bhavet || 9 ||
[Analyze grammar]

evamabhyarthitastena pinākī vṛṣabhadhvajaḥ |
vighnāṃdhakārasūryeṇa gaṇādhipatinā tadā || 10 ||
[Analyze grammar]

liṃgarūpo'bravīcchaṃbhurnirākāro nirāmayaḥ |
niraṃjano vyomakeśaḥ kaparddī nīlalohitaḥ || 11 ||
[Analyze grammar]

maheśvara uvāca |
heraṃba śrṛṇu me vākyaṃ śraddhayā parayā yutaḥ |
ahaṃkārātmakaṃ caiva jagadetaccarācaram || 12 ||
[Analyze grammar]

sthitiṃ karotyahaṃkāraḥ pralayotpattimeva ca |
jagadādaugaṇapate tadā vijñaptimātrataḥ || 13 ||
[Analyze grammar]

māyāvirahitaṃ śāṃtaṃ dvaitādvaitaparaṃ sadā |
jñaptimātrasvarūpaṃ tatsadānaṃdaikalakṣaṇam || 14 ||
[Analyze grammar]

gaṇapatiruvāca |
yadi tvaṃ kevalo hyātmā paramānandalakṣaṇaḥ |
tasmāttvadaparaṃ kiṃcinnānyadasti paraṃtapa || 15 ||
[Analyze grammar]

nānārūpaṃ kathaṃ jātaṃ surāsuravilakṣaṇam |
vicitraṃ mohajananaṃ tribhirddevaiśca lakṣitam || 16 ||
[Analyze grammar]

bhūtagrāmaiścaturbhiśca nānābhedaiḥ samanvitaiḥ |
jātaṃ saṃsāracakraṃ ca nityānityavilakṣaṇam || 17 ||
[Analyze grammar]

parasparavirodhena jñānavādena mohitāḥ |
karmavādaratāḥ kecitkecitsvaguṇamāśritāḥ || 18 ||
[Analyze grammar]

jñānaniṣṭhāśca ye kecitparasparavirodhinaḥ |
evaṃ saṃśayamāpannaṃ trāhi māṃ vṛṣabhadhvaja || 19 ||
[Analyze grammar]

ahaṃ gaṇaśca kutratyāḥ kva cāyaṃ vṛṣabhaḥ prabho |
ete cānye ca bahavaḥ kuto jātāśca kutra vai || 20 ||
[Analyze grammar]

kṛtāḥ sarve mahābhāgāḥ sāttvikā rājasāśca vai |
prahasya bhagavāñchaṃbhurgaṇeśaṃ vaktumudyataḥ || 21 ||
[Analyze grammar]

maheśvara uvāca |
kālaśaktyā ca jātāni rajaḥsattvatamāṃsi ca |
tairāvṛtaṃ jagatsarvaṃ sadevāsumānuṣam || 22 ||
[Analyze grammar]

paridṛśyamānametaccānaśvaraṃ paramārthataḥ |
viddhyetatsarvasiddhyaiva kṛtakatvācca naśvaram || 23 ||
[Analyze grammar]

lomaśa uvāca |
yāvadgaṇeśasaṃyukto bhāṣamāṇaḥ sadāśivaḥ |
liṃgarūpī viśvarūpaḥ prādurbhūtā sadāśivāt || 24 ||
[Analyze grammar]

śivarūpā jagadyoniḥ kāryakāraṇarūpiṇī |
liṃgarūpī sa bhagavānnimagnastatkṣaṇādabhūt || 25 ||
[Analyze grammar]

ekā sthitā parā śaktirbrahmavidyātmalakṣaṇā |
gaṇeśo vismayāviṣṭo hyavalokanatatparaḥ || 26 ||
[Analyze grammar]

ṛṣaya ūcuḥ |
prakṛtyantargataṃ sarvaṃ jagadetaccarācaram |
gaṇeśasya pṛthaktvaṃ ca kathaṃ jātaṃ taducyatām || 27 ||
[Analyze grammar]

lomaśa uvāca |
sākṣātprakṛtyāḥ saṃbhūto gaṇeśo bhagavānabhūt |
yathārūpaḥ śivaḥ sākṣāttadrūpo hi gaṇeśvaraḥ || 28 ||
[Analyze grammar]

śivena saha saṃgrāmo hyabhūttasya mahātmanaḥ |
ajñānātprakṛto bhūtvā bahukālaṃ nirantaram || 29 ||
[Analyze grammar]

tasya dṛṣṭvā hyajeyatvaṃ gajārūḍhasya tattadā |
triśūlenāhanacchaṃbhuḥ sagajaṃ tamapātayat || 30 ||
[Analyze grammar]

tadā stuto mahādevaḥ paraśaktyā paraṃtapaḥ |
paraśaktimuvācedaṃ varaṃ varaya śobhane || 31 ||
[Analyze grammar]

tadā vṛto mahādevo vareṇa parameṇa hi |
yo'yaṃ tvayā hato deva mama putro na saṃśayaḥ || 32 ||
[Analyze grammar]

tvāṃ na jānātyayaṃ mūḍhaḥ prakṛtyaṃśasamudbhavaḥ |
tasmātputraṃ jīvayemaṃ mama tṛṣṭyarthameva ca || 33 ||
[Analyze grammar]

prahasya bhagavānrudro māyāputramajīvayat |
siṃdhuravadanenaiva mukhe sa samayojayat || 34 ||
[Analyze grammar]

tadā gajānano jātaḥ prasādācchaṃkarasya ca |
māyāputropi nirmāyo jñānavānsaṃbabhūva ha || 35 ||
[Analyze grammar]

ātmajñānāmṛtenaiva nityatṛpto nirāmayaḥ |
samādhisaṃsthito raudraḥ kālakālāṃtako'bhavat || 36 ||
[Analyze grammar]

yogadaṃḍārthamutpāṭya svakīyaṃ daśanaṃ mahat |
kare gṛhya gaṇādhyakṣaḥ śabdhabrahmātivarttate |
ṛddhisiddhidvayenaiva ekatvena virājitaḥ || 37 ||
[Analyze grammar]

ye te gaṇāśca vighnāśca ye cānye'bhyadhikā bhuvi |
teṣāmapi patirjātaḥ kṛto'sau śaṃbhunā tadā || 38 ||
[Analyze grammar]

tasmādvi lokayāmāsa prakṛtiṃ viśvarūpiṇīm |
pṛthaksthitvāgrato jānālliṃgaṃ prakṛtimeva ca |
dadarśa vimalaṃ liṃgaṃ prakṛtisthaṃ svabhāvataḥ || 39 ||
[Analyze grammar]

ātmānaṃ ca gaṇaiḥ sāddhaṃ tathaiva ca jagattrayam |
līnaṃ liṃge samastaṃ taddherambo jñānavānapi || 40 ||
[Analyze grammar]

mumoha ca punaḥ saṃjñāṃ pratilabhya prayatnataḥ |
nanāma śirasā tābhyāmīśābhyāṃ sa gaṇeśvaraḥ || 41 ||
[Analyze grammar]

tadā dadarśa tatraiva lokasaṃhārakārakam |
brahmāṇaṃ caiva rudraṃ ca viṣṇuṃ caiva sadāśivam || 42 ||
[Analyze grammar]

dadarśa pretatulyāni liṃgaśaktyātmakāni ca |
brahmāṇḍagolakānyeva koṭiśaḥ paramāṇuvat || 43 ||
[Analyze grammar]

līyaṃte ca vilīyaṃte maheśe liṃgarūpiṇi |
prakṛtyaṃtargataṃ liṃgaṃ liṃgasyāṃtargatā ca sā || 44 ||
[Analyze grammar]

śaktyā liṃgaṃ ca saṃchannaṃ tadā sarvamadṛśyata |
liṃgena śaktiḥ saṃchannā parasparamavartata || 45 ||
[Analyze grammar]

śivābhyāṃ saṃśritaṃ lokaṃ jagadetaccarācaram |
gaṇeśo vāpi tajjñānaṃ na pare'pi tathāvidan || 46 ||
[Analyze grammar]

tadovāca mahātejā gaṇādhyakṣo gaṇaiḥ saha |
saśaktikaṃ stūyamānaḥ śaktyā ca parayā tadā || 47 ||
[Analyze grammar]

gaṇeśa uvāca |
namāmi devaṃ śaktyānvitaṃ jñānarūpaṃ prasannaṃ jñānātparaṃ paramaṃjyotirūpam |
rūpātparaṃ paramaṃ tattvarūpaṃ tattvātparaṃ paramaṃ maṃgalaṃ ca ānaṃdākhyaṃ niṣkalaṃ nirviṣādam || 48 ||
[Analyze grammar]

dhūmātparamayovahnirdhūmavatpratibhāsate |
prakṛtyaṃtargastvaṃ hi lakṣyase jñānisaṃbhavaḥ |
prakṛtyaṃtargatastvaṃ hi māyāvyaktiritīyase || 49 ||
[Analyze grammar]

evaṃvidhastvaṃ bhagavansvamāyayā sṛjasyatholuṃpasi pāsi viśvam |
asmādgarātsarvamidaṃ pranaṣṭaṃ sabrahmavipreṃdrayutaṃ carācaram || 50 ||
[Analyze grammar]

yathā purāsīrbhagavānmaheśastrailokyanātho'si carācarātmā |
kuruṣya śīghraṃ sahajīvakośaṃ carācaraṃ tatsakalaṃ pradagdham || 51 ||
[Analyze grammar]

lomaśa uvāca |
evaṃ stuto gaṇeśena bhagavānbhūtabhāvanaḥ |
yadutthitaṃ kālakūṭaṃ lokasaṃhārakārakam || 52 ||
[Analyze grammar]

liṃgarūpeṇa tadgrastaṃ vimalaṃ cākarottadā |
sadevāsuramartyāśca sarvāṇi trijaganti ca |
tatkṣaṇādrakṣitānyeva kṛpayā parayā yutaḥ || 53 ||
[Analyze grammar]

brahmā viṣṇuḥ sureṃdraśca lokapālāḥ saharṣayaḥ |
yakṣā vidyādharāḥ siddhā gaṃdharvāpsarasāṃ gaṇāḥ |
utthitāścaiva te sarve nidrāparigatā iva || 54 ||
[Analyze grammar]

vismayena samāviṣṭā babhūvurjātasādhvasāḥ |
sarve devāsurāścaiva ūcurāścaryavattataḥ || 55 ||
[Analyze grammar]

kva kālakūṭaṃ sumahadyena vidrāvitā vayam |
mṛtaprāyāḥ kṛtāḥ sadyaḥ salokapālakā hyamī || 56 ||
[Analyze grammar]

ityabruvaṃstadā daityāstūṣṇīṃbhūtāstadā sthitāḥ |
śakrādayo lokapālā viṣṇuṃ sarveśvareśvaram |
brahmāṇaṃ ca puraskṛtya idamūcuḥ samedhitā || 57 ||
[Analyze grammar]

kenedaṃ kāritaṃ viṣṇo na vidāmo'lpamedhasaḥ |
tadā prahasya bhagavānbrahmaṇā saha taiḥ suraiḥ || 58 ||
[Analyze grammar]

samādhimagamansarve'pyekāgramanasastadā |
tattvajñānena nirhṛtya kāmakrodādikāndvijāḥ || 59 ||
[Analyze grammar]

tadātmani sthitaṃ liṃgamapaśyanvi budhādayaḥ |
viṣṇuṃ puraskṛtya tadā tuṣṭuvuḥ paramārthataḥ || 60 ||
[Analyze grammar]

ātmanā paramātmānaṃ yoginaḥ paryupāsate || 61 ||
[Analyze grammar]

liṃgameva paraṃ jñānaṃ liṃgameva paraṃ tapaḥ |
liṃgameva paro dharmo liṃgameva parā gatiḥ |
tasmālliṃgātparataraṃ yacca kiṃcinna vidyate || 62 ||
[Analyze grammar]

evaṃ bruvaṃto hi tadā surāsurāḥ salokapālā ṛṣibhiśca sākam |
viṣṇuṃ puraskṛtya tamālavarṇaṃ śaṃbhuṃ śaraṇyaṃ śaraṇaṃ prapannāḥ || 63 ||
[Analyze grammar]

trāhitrāhi mahādeva kṛpālo parameśvara |
purā trātā yathā sarve tathātvaṃ trātumarhasi || 64 ||
[Analyze grammar]

taddevadeva bhavataścaraṇāraviṃdaṃ sevānubaṃdhamahimānamanaṃtarūpam |
tvadāśritaṃ yatparamānukaṃpayā namo'stu te devavara prasīda || 65 ||
[Analyze grammar]

liṃgasvarūpamadhyastho bhagavānbhūtabhāvanaḥ |
sarvaiḥ suragaṇaiḥ sākaṃ babhāṣedaṃ ramāpatiḥ || 66 ||
[Analyze grammar]

tvaṃ liṃgarūpī bhagavāñjagatāmabhayapradaḥ |
viṣṇunā saṃstuto devo liṃgarūpī maheśvaraḥ || 67 ||
[Analyze grammar]

mṛtāstrātā garātsarve tasmānmṛtyuṃjaya prabho |
rakṣarakṣa mahākāla tripurāṃta namostu te || 68 ||
[Analyze grammar]

viṣṇunā saṃstuto devo liṃgarūpī maheśvaraḥ |
prādurbabhūva sāṃbo'tha bodhayanniva tānsurān || 69 ||
[Analyze grammar]

he viṣṇo he surāḥ sarva ṛṣayaḥ śrūyatāmidam |
manyate'pi hi saṃsāre anitye nityatākulam || 70 ||
[Analyze grammar]

avilokayatā'tmātmanā vibudhādayaḥ |
kiṃ yajñaiḥ kiṃ tapobhiśca kimudyogena karmaṇām || 71 ||
[Analyze grammar]

ekatvena pṛthaktvena kiṃcinnaiva prayojanam |
yasmādbhavadbhirmilitaiḥ kṛtaṃ yatkarma duṣkaram || 72 ||
[Analyze grammar]

kṣīrābdhermathanaṃ tattu amṛtārthaṃ kathaṃ kṛtam |
mṛtyuṃ jayaṃ nirākṛtya avajñāya ca māṃ sadā || 73 ||
[Analyze grammar]

tasmātsarve mṛtyumukhaṃ patitā vai na saṃśayaḥ |
asmābhirnirmito devo gaṇeśaḥ kāryasiddhaye || 74 ||
[Analyze grammar]

na namaṃti gaṇeśaṃ ca durgāṃ caiva tathāvidhām |
kleśabhājo bhaviṣyati nātra kāryā vicāraṇā || 75 ||
[Analyze grammar]

yūyaṃ sarve tvadharmiṣṭhāḥ stabdhāḥ paṃḍitamāninaḥ |
kāryākāryamavijñāya kevalaṃ mānamohitāḥ || 76 ||
[Analyze grammar]

tasmātkālamukhe sarve patitā nātra saṃśayaḥ |
sarve śrutiparā yūyamiṃdrādyā devatāgaṇāḥ || 77 ||
[Analyze grammar]

prarocanaparāḥ sarve kṣudrāśceṃdrādayo vṛthā |
nātmānaṃ ca prapaṃcena vetsi tvaṃ hi śacīpate || 78 ||
[Analyze grammar]

kṛtaḥ prayatno hi mahānamṛtārthaṃ tvayā śaṭha |
aśvamedhaśatenaiva yadrājyaṃ prāptavānasi |
api tacca parādhīna tanna jānāsi durmate || 79 ||
[Analyze grammar]

yairvadavākyaistvaṃ mūḍha saṃstuto'si tapasvibhiḥ |
te mūḍhāsto ṣayaṃti tvāṃ tattadrāgaparāyaṇāḥ || 80 ||
[Analyze grammar]

viṣṇo tvaṃ ca pakṣapātānna jānāsi hitāhitam |
kecidadhatāstvayā viṣṇo rakṣitāścaiva kecana || 81 ||
[Analyze grammar]

icchāyuktastvamatraiva sadā bālakaceṣṭitaḥ |
ye'nye ca lokapāḥ sarve teṣāṃ vārtā kutastviha || 82 ||
[Analyze grammar]

anyathā hi kṛte hyarthe anyathātvaṃ bhaviṣyati |
kāryasiddhirbhavedyena bhavadbhirvismṛtaṃ ca tat || 83 ||
[Analyze grammar]

yenādya rakṣitāḥ sarve kālakūṭamahābhayāt |
yena nīlīkṛto viṣṇuryena sarve parājitāḥ || 84 ||
[Analyze grammar]

lokā bhasmīkṛtā yena tasmādyenāpi rakṣitāḥ |
tasyārccanāvidhiḥ kāryo gaṇeśasya mahātmanaḥ || 85 ||
[Analyze grammar]

karmāraṃbhe tu vighneśaṃ ye nārcaṃti gaṇādhipam |
kāryasiddhirna teṣāṃ vai bhavettu bhavatāṃ yathā || 86 ||
[Analyze grammar]

etanmaheśasya vaco niśamya surāsurāḥ kiṃnaracāraṇāśca |
pūjāvidhānaṃ paramārthato'pi papracchurenaṃ ca tadā girīśam || 87 ||
[Analyze grammar]