Chapter 7

[English text for this chapter is available]

| lomaśa uvāca |
tadā ca te surāḥ sarva ṛṣayopi bhayānvitāḥ |
īḍire liṃgamaiśaṃ ca brahmādyā jñānavihvalāḥ || 1 ||
[Analyze grammar]

brahmovāca |
tvaṃ liṃgarūpī tu mahāprabhāvo vedāṃtavedyosi mahātmarūpi |
yenaiva sarve jagadātmamūlaṃ kṛtaṃ sadānaṃdapareṇa nityam || 2 ||
[Analyze grammar]

tvaṃ sākṣī sarvalokānāṃ hartā tvaṃ ca vicakṣaṇaḥ |
rakṣaṇosi mahādeva bhairavosi jagatpate || 3 ||
[Analyze grammar]

tvayā liṃgasvarūpeṇa vyāptametajjagattrayam |
kṣudrāścaiva vayaṃ nātha māyāmohitacetasaḥ || 4 ||
[Analyze grammar]

ahaṃ surā'surāḥ sarve yakṣagaṃdharvarākṣasāḥ |
pannagāśca piśācāśca tathā vidyādharā hyamī || 5 ||
[Analyze grammar]

tvaṃhi viśvasṛjāṃ sraṣṭā tvaṃ hi devo jagatpatiḥ |
kartā tvaṃ bhuvanasyāsya tvaṃ hartā puruṣaḥ paraḥ || 6 ||
[Analyze grammar]

trāhyasmākaṃ mahādeva devadeva namo'stu te |
evaṃ stuto hi vai dhātrā liṃgarūpī maheśvaraḥ || 7 ||
[Analyze grammar]

ṛṣayaḥ stotukāmāste maheśvaramakalmaṣam |
astuvangīrbhiragryābhiḥ śrutigītābhirādṛtāḥ || 8 ||
[Analyze grammar]

ṛṣaya ūcuḥ |
ajñānino vayaṃ kāmānna viṃdāmo'sya saṃsthitim |
tvaṃ hyātmā paramātmā ca prakṛtistvaṃ vibhāvinī || 9 ||
[Analyze grammar]

tvameva mātā ca pitā tvameva tvameva baṃdhuśca sakhā tvame |
tvamīśvaro vedavidekarūpo mahānubhāvaiḥ pariciṃtyamānaḥ || 10 ||
[Analyze grammar]

tvamātmā sarvabhūtānāmeko jyotirivaidhasām |
sarvaṃ bhavati yasmāttvattasmātsarvo'si nityadā || 11 ||
[Analyze grammar]

yasmācca saṃbhavatyetattasmācchaṃbhuriti prabhuḥ || 12 ||
[Analyze grammar]

tvatpādapaṃkajaṃ prāptā vayaṃ sarve surādayaḥ |
ṛṣayo devagaṃdharvā vidyādharamahoragāḥ || 13 ||
[Analyze grammar]

tasmācca kṛpayā śaṃbho pāhyasmāñjagataḥ pate || 14 ||
[Analyze grammar]

mahādeva uvāca |
śrṛṇudhvaṃ tu vaco me'dya kriyatāṃ ca tvarānvitaiḥ |
viṣṇuṃ sarve prārthayaṃtu tvaritena tapodhanāḥ || 15 ||
[Analyze grammar]

tasya tadvacanaṃ śrutvā śaṃkarasya mahātmanaḥ |
viṣṇuṃ sarve namaskṛtya īḍire ca tadā surāḥ || 16 ||
[Analyze grammar]

deva ūcuḥ |
vidyādharāḥ suragaṇā ṛṣayaśca sarve trātāstvayādya sakalājagadekabaṃdho |
tadvatkṛpākarajanānparipālayādya trailokyanātha jagadīśa jagannivāsa || 17 ||
[Analyze grammar]

prahasya bhagavanviṣṇuruvācedaṃ vacastadā |
daityaiḥ prapīḍitā yūyaṃ rakṣitāśca purā mayā || 18 ||
[Analyze grammar]

adyaiva bhayamutpannaṃ liṃgādasmācciraṃtanam |
na śakyate mayā trātumasmālliṃgabhayātsurāḥ || 19 ||
[Analyze grammar]

acyutenaivamuktāste devā ściṃtānvitābhavan |
tadā nabhogatā vāṇī uvācāśvāsya vai surān || 20 ||
[Analyze grammar]

etalliṃgaṃ saṃvṛṇuṣva pūjanāya janārdana |
piṃḍibhūtvā mahābāho rakṣasva sacarācaram |
tatheti matvā bagavānvīrabhadro'bhyapūjayat || 21 ||
[Analyze grammar]

brahmādibhaḥ suragaṇaiḥ sahitaistadānīṃ saṃpūjitaḥ śivavidhānarato mahātmā |
sravīrabhadraḥ śaśiśekharo'sau śivapriyo rudrasamastrilokyām || 22 ||
[Analyze grammar]

liṃgasyārcanayukto'sau vīrabhadro'bhavattadā |
tadrūpasyaiva liṃgasya yena sarvamidaṃ jagat || 23 ||
[Analyze grammar]

udbhāti sthitimāpnoti tathā vilayameti ca |
talliṃgaṃ liṃgamityāhurlayanāttattvavittamāḥ || 24 ||
[Analyze grammar]

brahmāṇḍāgolakairvyāptaṃ tathā rudrākṣabhūṣitam |
tathā liṃgaṃ mahajjātaṃ sarveṣāṃ duratikramam || 25 ||
[Analyze grammar]

tadā sarve'tha vibudhā ṛṣo vai mahāprabhāḥ |
tuṣṭuvuśca mahāliṃgaṃ vedāvādaiḥ pṛthakpṛthak || 26 ||
[Analyze grammar]

aṇoraṇīyāṃstvaṃ deva tathā tvaṃ mahato mahān |
tasmāttvayā vidhātavyaṃ sarvaiṣāṃ liṃgapūjanam || 27 ||
[Analyze grammar]

tadānīmeva sarveṇa liṃgaṃ ca bahuśaḥ kṛtam |
satye brahmeśvaraṃ liṃgaṃ vaikuṇṭhe ca sadāśivaḥ || 28 ||
[Analyze grammar]

amarāvatyāṃ supratiṣṭhamamareśvarasaṃjñakam |
varuṇeśvaraṃ ca vāruṇyāṃ yāmyāṃ kāleśvaraṃ prabhum || 29 ||
[Analyze grammar]

nairṛteśvaraṃ ca nairṛtyāṃ vāyavyāṃ pāvaneśvaram |
kedāraṃ mṛtyuloke ca tathaiva amaresvaram || 30 ||
[Analyze grammar]

oṃkāraṃ narmadāyāṃ ca mahākālaṃ tathaiva ca |
kāśyāṃ viśveśvaraṃ devaṃ prayāge laliteśvaram || 31 ||
[Analyze grammar]

triyambakaṃ brahmagirau kalau bhadreśvaraṃ tathā |
drākṣārāmeśvaraṃ liṃgaṃ gaṃgāsāgarasaṃgame || 32 ||
[Analyze grammar]

saurāṣṭre ca tathā liṃgaṃ someśvaramiti smṛtam |
tathā sarveśvaraṃ vindhye śrīśaile śikhareśvaram |
kāntyāmallālanāthaṃ ca siṃhanāthaṃ ca siṃgale || 33 ||
[Analyze grammar]

virūpākṣaṃ tathā liṃgaṃ koṭiśaṅkarameva ca |
tripurāntakaṃ bhīmeśamamareśvarameva ca || 34 ||
[Analyze grammar]

bhogeśvaraṃ ca pātāle hāṭakeśvarameva ca |
evamādīnyanekāni liṃgāni bhuvanatraye |
sthāpitāni tadā devairviśvopakṛtihetave || 35 ||
[Analyze grammar]

liṃgeśaiśca tathā sarvaiḥ pūrṇamāsījjagattrayam |
tathā ca vīrabhadrāṃśāḥ pūjārthamamaraiḥ kṛtāḥ || 36 ||
[Analyze grammar]

tatra viṃśatisaṃskārāsteṣāmaṣṭādhikābhavan |
kathitāḥ śaṃkareṇaiva liṃgasyācanasūcakāḥ || 37 ||
[Analyze grammar]

saṃti rudreṇa kathitāḥ śivadharmā sanātanāḥ |
vīrabhadro yathā rudrastathānye guravaḥ smṛtāḥ || 38 ||
[Analyze grammar]

gurorjātāśca guravo vikhyātā bhuvanatraye |
liṃgasya mahimāna tu nandī jānāti tattvataḥ || 39 ||
[Analyze grammar]

tathā skando hi bhagavānnye te nāmadhārakāḥ |
yathoktāḥ śivadharamā hi nandinā parikīrttitāḥ || 40 ||
[Analyze grammar]

śailādena mahābhāgā vicitrā liṃgadhārakāḥ |
śavasyopari liṃgaṃ ca dhriyate ca purātanaiḥ || 41 ||
[Analyze grammar]

liṃgena saha pañcatvaṃ liṃgena saha jīvitam |
ete dharmāḥ supratiṣṭhāḥ śailādena pratiṣṭhitāḥ || 42 ||
[Analyze grammar]

dharmaḥ pāśupataḥ śreṣṭhaḥ skandena pratipālitaḥ || 43 ||
[Analyze grammar]

śuddhā pañcākṣarī vidyā prāsādī tadanantaram |
ṣaḍakṣarī tathā vidyā prāsādasya ca dīpikā || 44 ||
[Analyze grammar]

skandāttatsamanuprāptamagastyena mahātmanā |
paścādācāryabhedena hyāgamā bahavo'bhavan || 45 ||
[Analyze grammar]

kiṃ tu vai bahunoktena śvi ityakṣaradvayam |
uccārayaṃti sa nityaṃ te rudrā nātra saṃśayaḥ || 46 ||
[Analyze grammar]

satāṃ mārgaṃ puraskṛtya ye sarve te purāṃtakāḥ |
vīrā māheśvarājñeyāḥ pāpakṣayakarā nṛṇām || 47 ||
[Analyze grammar]

prasaṃgenānupaṃkṣeṇa śradvayā ca yadṛcchayā |
śivabhaktiṃ prakurvanti ye vai te yāṃti sadgatim || 48 ||
[Analyze grammar]

śrṛṇudhvaṃ kathayāmīha itihāsaṃ purātanam |
kṛtaṃ śivālayaṃ yacca pataṃgyā mārjanaṃ purā || 49 ||
[Analyze grammar]

āgatā bhakṣaṇārthaṃ hi naivedyaṃ kena cārpitam |
mārjanaṃ rajastasyāḥ pakṣābhyāmabhavatpurā || 50 ||
[Analyze grammar]

tena karmavipākena uttamaṃ svargamāgatā |
bhuktvā svargasukhaṃ cograṃ punaḥ saṃsāramāgatā || 51 ||
[Analyze grammar]

kāśirājasutā jātā sundarīnāma viśrutā |
pūrvābhyāsācca kalyāṇī babhūva paramā satī || 52 ||
[Analyze grammar]

uṣasyuṣasi tanvaṃgī śivadvāraratā sadā |
saṃmārjanaṃ ca kurute bhaktyā paramayā yutā || 53 ||
[Analyze grammar]

svayameva tadā devī sundarī rājakanyakā |
tathābhūtāṃ ca tāṃ dṛṣṭvā ṛṣiruddālako'bravīt || 54 ||
[Analyze grammar]

sukumārī satī bāle svayameva kathaṃ śubhe |
saṃmārjanaṃ ca kuruṣe kanyake tvaṃ śucismite || 55 ||
[Analyze grammar]

dāsī dāsyaśca bahavaḥ saṃti devi tavāgrataḥ |
tavājñayā kariṣyaṃti sarvaṃ saṃmārjanādikam || 56 ||
[Analyze grammar]

ṛṣestadvacanaṃ śrutvā prahasyedamuvāca ha || 57 ||
[Analyze grammar]

śivasevāṃ prakurvāṇāḥ śivabhaktipuraskṛtāḥ |
ye narāścaiva nāryyaśca śivalokaṃ vrajaṃti vai || 58 ||
[Analyze grammar]

saṃmārjanaṃ ca pāṇibhyāṃ padbhyāṃ yānaṃ śivālaye |
tasmānmayā ca kriyate saṃmārjanamataṃdritam || 59 ||
[Analyze grammar]

anyatkiñcinna jānāmi ekaṃ saṃmārjanaṃ vinā |
ṛṣistadvacanaṃ śrutvā manasā ca vimṛśya hi || 60 ||
[Analyze grammar]

anayā kiṃ kṛtaṃ pūrvaṃ keyaṃ kasya prasādataḥ |
tadā jñānaṃ ca ṛṣiṇā tatsarvaṃ jñānacakṣuṣā |
vismayena samāviṣṭastūṣṇīṃbhūto'bhavattadā || 61 ||
[Analyze grammar]

savismayo'bhūdatha tadviditvā uddālako jñānavatāṃ variṣṭhaḥ |
śivaprabhāvaṃ manasā viciṃtya jñānātparaṃ bodhamavāpa śāṃtaḥ || 62 ||
[Analyze grammar]