Chapter 13

[English text for this chapter is available]

devyuvāca |
kalau kaluṣite kāle durjaye duratikrame |
apuṇyatamasācchanne loke dharmaparāṅmukhe || 1 ||
[Analyze grammar]

kṣīṇe varṇāśramācāre saṃkaṭe samupasthite |
sarvādhikāre saṃdigdhe niścite vāpi paryaye || 2 ||
[Analyze grammar]

tadopadeśe vihate guruśiṣyakrame gate |
kenopāyena mucyaṃte bhaktāstava maheśvara || 3 ||
[Analyze grammar]

īśvara uvāca |
āśritya paramāṃ vidyāṃ hṛdyāṃ pañcākṣarīṃ mama |
bhaktyā ca bhāvitātmāno mucyaṃte kalijā narāḥ || 4 ||
[Analyze grammar]

manovākkāyajairdoṣairvaktuṃ smartumagocaraiḥ |
dūṣitānāṃ kṛtaghnānāṃ niṃdakānāṃ chalātmanām || 5 ||
[Analyze grammar]

lubdhānāṃ vakramanasāmapi matpravaṇātmanām |
mama pañcākṣarī vidyā saṃsārabhayatāriṇī || 6 ||
[Analyze grammar]

mayaivamasakṛddevi pratijñātaṃ dharātale |
patito 'pi vimucyeta madbhakto vidyayānayā || 7 ||
[Analyze grammar]

devyuvāca |
karmāyogyo bhavenmartyaḥ patito yadi sarvathā |
karmāyogena yatkarma kṛtaṃ ca narakāya hi || 8 ||
[Analyze grammar]

tataḥ kathaṃ vimucyeta patito vidyayā 'nayā |
īśvara uvāca |
tathyametattvayā proktaṃ tathā hi śṛṇu sundari || 8 ||
[Analyze grammar]

rahasyamiti matvaitadgopitaṃ yanmayā purā |
samaṃtrakaṃ māṃ patitaḥ pūjayedyadi mohitaḥ || 9 ||
[Analyze grammar]

nārakī syānna sandeho mama pañcākṣaraṃ vinā |
abbhakṣā vāyubhakṣāśca ye cānye vratakarśitāḥ || 10 ||
[Analyze grammar]

teṣāmetairvratairnāsti mama lokasamāgamaḥ |
bhaktyā pañcākṣareṇaiva yo hi māṃ sakṛdarcayet || 11 ||
[Analyze grammar]

so 'pi gacchenmama sthānaṃ mantrasyāsyaiva gauravāt |
tasmāttapāṃsi yajñāśca vratāni niyamāstathā || 12 ||
[Analyze grammar]

pañcākṣarārcanasyaite koṭyaṃśenāpi no samaḥ |
baddho vāpyatha mukto vā pāśātpañcākṣareṇa yaḥ || 13 ||
[Analyze grammar]

pūjayenmāṃ sa mucyeta nātra kāryā vicāraṇā |
arudro vā sarudro vā sakṛtpañcākṣareṇa yaḥ || 14 ||
[Analyze grammar]

pūjayetpatito vāpi mūḍho vā mucyate naraḥ |
ṣaḍakṣareṇa vā devi tathā pañcākṣareṇa vā || 15 ||
[Analyze grammar]

sa brahmāṃgena māṃ bhaktyā pūjayedyadi mucyate |
patito 'patito vāpi mantreṇānena pūjayet || 16 ||
[Analyze grammar]

mama bhakto jitakrodho salabdho 'labdha eva vā |
alabdhālabdha eveha koṭikoṭiguṇādhikaḥ || 17 ||
[Analyze grammar]

tasmāllabdhvaiva māṃ devi mantreṇānena pūjayet |
labdhvā saṃpūjayedyastu maitryādiguṇasaṃyutaḥ || 18 ||
[Analyze grammar]

brahmacaryarato bhaktyā matsādṛśyamavāpnuyāt |
kimatra bahunoktena bhaktāssarvedhikāriṇaḥ || 19 ||
[Analyze grammar]

mama pañcākṣare maṃtre tasmācchreṣṭhataro hi saḥ |
pañcākṣaraprabhāveṇa lokavedamaharṣayaḥ || 20 ||
[Analyze grammar]

tiṣṭhaṃti śāśvatā dharmā devāssarvamidaṃ jagat |
pralaye samanuprāpte naṣṭe sthāvarajaṃgame || 21 ||
[Analyze grammar]

sarvaṃ prakṛtimāpannaṃ tatra saṃlayameṣyati |
eko 'haṃ saṃsthito devi na dvitīyo 'sti kutracit || 22 ||
[Analyze grammar]

tadā vedāśca śāstrāṇi sarve pañcākṣare sthitāḥ |
te nāśaṃ naiva saṃprāptā macchaktyā hyanupālitāḥ || 23 ||
[Analyze grammar]

tatassṛṣṭirabhūnmattaḥ prakṛtyātmaprabhedataḥ |
guṇamūrtyātmanāṃ caiva tatovāṃtarasaṃhṛtiḥ || 24 ||
[Analyze grammar]

tadā nārāyaṇaśśete devo māyāmayīṃ tanum |
āsthāya bhogiparyaṃkaśayane toyamadhyagaḥ || 25 ||
[Analyze grammar]

tannābhipaṃkajājjātaḥ pañcavaktraḥ pitāmahaḥ |
sisṛkṣamāṇo lokāṃstrīnna sakto hyasahāyavān || 26 ||
[Analyze grammar]

munīndaśa sasarjādau mānasānamitaujasaḥ |
teṣāṃ siddhivivṛddhyarthaṃ māṃ provāca pitāmahaḥ || 27 ||
[Analyze grammar]

matputrāṇāṃ mahādeva śaktiṃ dehi maheśvara |
ityevaṃ prārthitastena pañcavaktradharo hyaham || 28 ||
[Analyze grammar]

pañcākṣarāṇi kramaśaḥ proktavānpadmayonaye |
sa pañcavadanaistāni gṛhṇaṃllokapitāmahaḥ || 29 ||
[Analyze grammar]

vācyavācakabhāvena jñātavānmāṃ maheśvaram |
jñātvā prayogaṃ vividhaṃ siddhamaṃtraḥ prajāpatiḥ || 30 ||
[Analyze grammar]

putrebhyaḥ pradadau maṃtraṃ maṃtrārthaṃ ca yathātatham |
te ca labdhvā maṃtraratnaṃ sākṣāllokapitāmahāt || 31 ||
[Analyze grammar]

tadājñaptena mārgeṇa madārādhanakāṃkṣiṇaḥ |
merostu śikhare ramye muṃjavānnāma parvataḥ || 32 ||
[Analyze grammar]

matpriyaḥ satataṃ śrīmānmadbhaktai rakṣitassadā |
tasyābhyāśe tapastīvraṃ lokaṃ sraṣṭuṃ samutsukāḥ || 33 ||
[Analyze grammar]

divyaṃ varṣasahasraṃ tu vāyubhakṣāssamācaran |
teṣāṃ bhaktimahaṃ dṛṣṭvā sadyaḥ pratyakṣatāmiyām || 34 ||
[Analyze grammar]

ṛṣiṃ chaṃdaśca kīlaṃ ca bījaśaktiṃ ca daivatam |
nyāsaṃ ṣaḍaṃgaṃ digbaṃdhaṃ viniyogamaśeṣataḥ || 35 ||
[Analyze grammar]

proktavānahamāryāṇāṃ jagatsṛṣṭivivṛddhaye |
tataste maṃtramāhātmyādṛṣayastapasedhitāḥ || 36 ||
[Analyze grammar]

sṛṣṭiṃ vitanvate samyaksadevāsuramānuṣīm |
asyāḥ paramavidyāyāssvarūpamadhunocyate || 37 ||
[Analyze grammar]

ādau namaḥ prayoktavyaṃ śivāya tu tataḥ param |
saiṣā pañcākṣarī vidyā sarvaśrutiśirogatā || 38 ||
[Analyze grammar]

sarvajātasya sarvasya bījabhūtā sanātanī |
prathamaṃ manmukhodgīrṇā sā mamaivāsti vācikā || 39 ||
[Analyze grammar]

taptacāmīkaraprakhyā pīnonnatapayodharā |
caturbhujā trinayanā bāleṃdukṛtaśekharā || 40 ||
[Analyze grammar]

padmotpalakarā saumyā varadābhayapāṇikā |
sarvalakṣaṇasaṃpannā sarvābharaṇabhūṣitā || 41 ||
[Analyze grammar]

sitapadmāsanāsīnā nīlakuṃcitamūrdhajā |
asyāḥ pañcavidhā varṇāḥ prasphuradraśmimaṃḍalāḥ || 42 ||
[Analyze grammar]

pītaḥ kṛṣṇastathā dhūmraḥ svarṇābho rakta eva ca |
pṛthakprayojyā yadyete biṃdunādavibhūṣitāḥ || 43 ||
[Analyze grammar]

ardhacandranibho biṃdurnādo dīpaśikhākṛtiḥ |
bījaṃ dvitīyaṃ bījeṣu maṃtrasyāsya varānane || 44 ||
[Analyze grammar]

dīrghapūrvaṃ turīyasya pañcamaṃ śaktimādiśet |
vāmadevo nāma ṛṣiḥ paṃktiśchanda udāhṛtam || 45 ||
[Analyze grammar]

devatā śiva evāhaṃ mantrasyāsya varānane |
gautamo 'trirvarārohe viśvāmitrastathāṃgirāḥ || 46 ||
[Analyze grammar]

bharadvājaśca varṇānāṃ kramaśaścarṣayaḥ smṛtāḥ |
gāyatryanuṣṭuptriṣṭupca chaṃdāṃsi bṛhatī virāṭ || 47 ||
[Analyze grammar]

indro rudro harirbrahmā skaṃdasteṣāṃ ca devatāḥ |
mama pañcamukhānyāhuḥ sthāne teṣāṃ varānane || 48 ||
[Analyze grammar]

pūrvādeścordhvaparyaṃtaṃ nakārādi yathākramam |
adāttaḥ prathamo varṇaścaturthaśca dvitīyakaḥ || 49 ||
[Analyze grammar]

pañcamaḥ svaritaścaiva tṛtīyo nihataḥ smṛtaḥ |
mūlavidyā śivaṃ śaivaṃ sūtraṃ pañcākṣaraṃ tathā || 50 ||
[Analyze grammar]

nāmānyasya vijānīyācchaivaṃ me hṛdayaṃ mahat |
nakāraśśira ucyeta makārastu śikhocyate || 51 ||
[Analyze grammar]

śikāraḥ kavacaṃ tadvadvakāro netramucyate |
yakāro 'straṃ namassvāhā vaṣaṭhuṃvauṣaḍityapi || 52 ||
[Analyze grammar]

phaḍityapi ca varṇānāmante 'ṅgatvaṃ yadā tadā |
tatrāpi mūlamaṃtro 'yaṃ kiṃcidbhedasamanvayāt || 53 ||
[Analyze grammar]

tatrāpi pañcamo varṇo dvādaśasvarabhūṣitaḥ |
tāsmādanena maṃtreṇa manovākkāyabhedataḥ || 54 ||
[Analyze grammar]

āvayorarcanaṃ kuryājjapahomādikaṃ tathā |
yathāprajñaṃ yathākālaṃ yathāśāstraṃ yathāmati || 55 ||
[Analyze grammar]

yathāśakti yathāsaṃpadyathāyogaṃ yathārati |
yadā kadāpi vā bhaktyā yatra kutrāpi vā kṛtā || 56 ||
[Analyze grammar]

yena kenāpi vā devi pūjā muktiṃ nayiṣyate |
mayyāsaktena manasā yatkṛtaṃ mama sundari || 57 ||
[Analyze grammar]

matpriyaṃ ca śivaṃ caiva krameṇāpyakrameṇa vā |
tathāpi mama bhaktā ye nātyaṃtavivaśāḥ punaḥ || 58 ||
[Analyze grammar]

teṣāṃ sarveṣu śāstreṣu mayeva niyamaḥ kṛtaḥ |
tatrādau saṃpravakṣyāmi mantrasaṃgrahaṇaṃ śubham || 59 ||
[Analyze grammar]

yaṃ vinā niṣphalaṃ jāpyaṃ yena vā saphalaṃ bhavet || 60 ||
[Analyze grammar]