Chapter 19

[English text for this chapter is available]

ṛṣaya ūcuḥ |
kathaṃ dakṣasya dharmārthaṃ pravṛttasya durātmanaḥ |
maheśaḥ kṛtavān vighnametadicchāma veditum || 1 ||
[Analyze grammar]

vāyuruvāca |
viśvasya jagato māturapi devyāstapobalāt |
pitṛbhāvamupāgamya mudite himavadgirau || 2 ||
[Analyze grammar]

deve 'pi tatkṛtodvāhe himavacchikharālaye |
saṃkīḍati tayā sārdhaṃ kāle bahutare gate || 3 ||
[Analyze grammar]

vaivasvate 'ṃtare prāpte dakṣaḥ prācetasaḥ svayam |
aśvamedhena yajñena yakṣyamāṇo 'nvapadyata || 4 ||
[Analyze grammar]

tato himavataḥ pṛṣṭhe dakṣo vai yajñamāharat |
gaṃgādvāre śubhe deśe ṛṣisiddhaniṣevite || 5 ||
[Analyze grammar]

tasya tasminmakhedevāḥ sarve śakra purogamāḥ |
gamanāya samāgamya buddhimāpedire tadā || 6 ||
[Analyze grammar]

ādityā vasavo rudrāssādhyāssaha marudgaṇaiḥ |
ūṣmapāḥ somapāścaiva ājyapā dhūmapāstathā || 7 ||
[Analyze grammar]

aśvinau pitaraścaiva tathā cānye maharṣayaḥ |
viṣṇunā sahitāḥ sarve svāgatā yajñabhāginaḥ || 8 ||
[Analyze grammar]

dṛṣṭvā devakulaṃ sarvamīśvareṇa vināgatam |
dadhīco manyunāviṣṭo dakṣamevamabhāṣata || 9 ||
[Analyze grammar]

dadhīca uvāca |
aprapūjye caiva pūjā pūjyānāṃ cāpya pūjane |
naraḥ pāpamavāpnoti mahadvai nātra saṃśayaḥ || 10 ||
[Analyze grammar]

asatāṃ saṃmatiryatra satāmavamatistathā |
daṃḍo devakṛtastatra sadyaḥ patati dāruṇaḥ || 11 ||
[Analyze grammar]

evamuktvā tu viprarṣiḥ punardakṣamabhāṣata |
pūjyaṃ tu paśubhartāraṃ kasmānnārcayase prabhum || 12 ||
[Analyze grammar]

dakṣa uvāca |
saṃti me bahavo rudrāḥ śūlahastāḥ kapardinaḥ |
ekādaśāvasthitā ye nānyaṃ vedmi maheśvaram || 13 ||
[Analyze grammar]

dadhīca uvāca |
kimebhiramarairanyaiḥ pūjitairadhvare phalam |
rājā cedadhvarasyāsya na rudraḥ pūjyate tvayā || 14 ||
[Analyze grammar]

brahmaviṣṇumaheśānāṃ sraṣṭā yaḥ prabhuravyayaḥ |
brahmādayaḥ piśācāṃtā yasya kaiṃkaryavādinaḥ || 15 ||
[Analyze grammar]

prakṛtīnāṃ paraścaiva puruṣasya ca yaḥ paraḥ |
ciṃtyate yogavidvadbhi ṛṣibhistattvadarśibhiḥ || 16 ||
[Analyze grammar]

akṣaraṃ paramaṃ brahma hyasacca sadasacca yat |
anādimadhyanidhanamapratarkyaṃ sanātanam || 17 ||
[Analyze grammar]

yaḥ sraṣṭā caiva saṃhartā bhartā caiva maheśvaraḥ |
tasmādanyaṃ na paśyāmi śaṃkarātmānamadhvare || 18 ||
[Analyze grammar]

dakṣa uvāca |
etanmakheśasya suvarṇapātre haviḥ samastaṃ vidhimaṃtrapūtam |
viṣṇornayāmyapratimasya bhāgaṃ prabhorvibhajyāvahanīyamadya || 19 ||
[Analyze grammar]

dadhīca uvāca |
yasmānnārādhito rudrassarvadeveśvareśvaraḥ |
tasmāddakṣa tavāśeṣo yajño 'yaṃ na bhaviṣyati || 20 ||
[Analyze grammar]

ityuktvā vacanaṃ kruddho dadhīco munisattamaḥ |
nirgamya ca tato deśājjagāma svakamāśramam || 21 ||
[Analyze grammar]

nirgate 'pi munau tasmindevā dakṣaṃ na tatyajuḥ |
avaśyamanubhāvitvādanarthasya tu bhāvinaḥ || 22 ||
[Analyze grammar]

etasminneva kāle tu jñātvaitatsarvamīśvarāt |
dagdhuṃ dakṣādhvaraṃ viprā devī devamacodayat || 23 ||
[Analyze grammar]

devyā saṃcodito devo dakṣādhvarajighāṃsayā |
sasarja sahasā vīraṃ vīrabhadraṃ gaṇeśvaram || 24 ||
[Analyze grammar]

sahasravadanaṃ devaṃ sahasrakamalekṣaṇam |
sahasramudgaradharaṃ sahasraśarapāṇikam || 25 ||
[Analyze grammar]

śūlaṭaṃkagadāhastaṃ dīptakārmukadhāriṇam |
cakravajradharaṃ ghoraṃ caṃdrārdhakṛtaśekharam || 26 ||
[Analyze grammar]

kuliśodyotitakaraṃ taḍijjvalitamūrdhajam |
daṃṣṭrākarālaṃ bibhrāṇaṃ mahāvaktraṃ mahodaram || 27 ||
[Analyze grammar]

vidyujjihvaṃ pralaṃboṣṭhaṃ meghasāgaraniḥsvanam |
vasānaṃ carma vaiyāghraṃ mahadrudhiranisravam || 28 ||
[Analyze grammar]

gaṇḍadvitayasaṃsṛṣṭamaṇḍalīkṛtakuṇḍalam |
varāmaraśiromālāvalīkalitaśekharam || 29 ||
[Analyze grammar]

raṇannūpurakeyūramahākanakabhūṣitam |
ratnasaṃcayasaṃdīptaṃ tārahārāvṛtorasam || 30 ||
[Analyze grammar]

mahāśarabhaśārdūlasiṃhaiḥ sadṛśavikramam |
praśastamattamātaṃgasamānagamanālasam || 31 ||
[Analyze grammar]

śaṃkhacāmarakuṃdendumṛṇālasadṛśaprabham |
satuṣāramivādrīndraṃ sākṣājjaṃgamatāṃ gatam || 32 ||
[Analyze grammar]

jvālāmālāparikṣiptaṃ dīptamauktikabhūṣaṇam |
tejasā caiva dīvyaṃtaṃ yugāṃta iva pāvakam || 33 ||
[Analyze grammar]

sa jānubhyāṃ mahīṃ gatvā praṇataḥ prāṃjalistataḥ |
pārśvato devadevasya paryatiṣṭhadgaṇeśvaraḥ || 34 ||
[Analyze grammar]

manyunā cāsṛjadbhadrāṃ bhadrakālīṃ maheśvarīm |
ātmanaḥ karmasākṣitve tena gaṃtuṃ sahaiva tu || 35 ||
[Analyze grammar]

taṃ dṛṣṭvāvasthitaṃ vīrabhadraṃ kālāgnisannibham |
bhadrayā sahitaṃ prāha bhadramastviti śaṃkaraḥ || 36 ||
[Analyze grammar]

sa ca vijñāpayāmāsa saha devyā maheśvaram |
ājñāpaya mahādeva kiṃ kāryaṃ karavāṇyaham || 37 ||
[Analyze grammar]

tatastripurahā prāha haimavatyāḥ priyecchayā |
vīrabhadraṃ mahābāhuṃ vācā vipulanādayā || 38 ||
[Analyze grammar]

devadeva uvāca |
prācetasasya dakṣasya yajñaṃ sadyo vināśaya |
bhadrakālyā sahāsi tvametatkṛtyaṃ gaṇeśvara || 39 ||
[Analyze grammar]

ahamapyanayā sārdhaṃ raibhyāśramasapīpataḥ |
sthitvā vīkṣe gaṇeśāna vikramaṃ tava duḥsaham || 40 ||
[Analyze grammar]

vṛkṣā kanakhale ye tu gaṃgādvārasamīpagāḥ |
suvarṇaśṛṃgasya girermerumaṃdarasaṃnibhāḥ || 41 ||
[Analyze grammar]

tasminpradeśe dakṣasya yujñaḥ saṃprati vartate |
sahasā tasya yajñasya vighātaṃ kuru mā ciram || 42 ||
[Analyze grammar]

ityukte sati devena devī himagirīndrajā |
bhadraṃ bhadraṃ ca saṃprekṣya vatsaṃ dhenurivaurasam || 43 ||
[Analyze grammar]

āliṃgya ca samāghrāya mūrdhni ṣaḍvadanaṃ yathā |
sasmitā vacanaṃ prāha madhuraṃ madhuraṃ svayam || 44 ||
[Analyze grammar]

devyuvāca |
vatsa bhadra mahābhāga mahābalaparākrama |
matpriyārthaṃ tvamutpanno mama manyuṃ pramārjaka || 45 ||
[Analyze grammar]

yajñeśvaramanāhūya yajñakarmarato 'bhavat |
dakṣaṃ vaireṇa taṃ tasmādbhiṃdhi yajñaṃ gaṇeśvara || 46 ||
[Analyze grammar]

yajñalakṣmīmalakṣmīṃ tvaṃ bhadra kṛtvā mamājñayā |
yajamānaṃ ca taṃ hatvā vatsa hiṃsaya bhadrayā || 47 ||
[Analyze grammar]

aśeṣāmiva tāmājñāṃ śivayościtrakṛtyayoḥ |
mūrdhni kṛtvā namaskṛtya bhadro gaṃtuṃ pracakrame || 48 ||
[Analyze grammar]

athaiṣa bhagavānkruddhaḥ pretāvāsakṛtālayaḥ |
vīrabhadro mahādevo devyā manyupramārjakaḥ || 49 ||
[Analyze grammar]

sasarja romakūpebhyo romajākhyāngaṇeśvarān |
dakṣiṇādbhujadeśāttu śatakoṭigaviśvarān || 50 ||
[Analyze grammar]

pādāttathorudeśācca pṛṣṭhātpārśvānmukhādgalāt |
guhyādgulphācchiromadhyātkaṃṭhādāsyāttathodarāt || 51 ||
[Analyze grammar]

tadā gaṇeśvarairbhadrairbhadratulyaparākramaiḥ |
saṃchāditamabhūtsarvaṃ sākāśavivaraṃ jagat || 52 ||
[Analyze grammar]

sarve sahasrahastāste sahasrāyudhapāṇayaḥ |
rudrasyānucarāssarve sarve rudrasamaprabhāḥ || 53 ||
[Analyze grammar]

śūlaśaktigadāhastāṣṭaṃkopalaśilādharāḥ |
kālāgnirudrasadṛśāstrinetrāśca jaṭādharāḥ || 54 ||
[Analyze grammar]

nipeturbhṛśamākāśe śataśassiṃhavāhanāḥ |
vineduśca mahānādāñjaladā iva bhadrajāḥ || 55 ||
[Analyze grammar]

tairbhadrairbhagavānmadrastathā parivṛto babhau |
kālānalaśatairyukto yathāṃte kālabhairavaḥ || 56 ||
[Analyze grammar]

teṣāṃ madhye samāruhya vṛṣeṃdraṃ vṛṣabhadhvajaḥ |
jagāma bhagavānbhadraśśubhamabhraṃ yathā bhavaḥ || 57 ||
[Analyze grammar]

tasminvṛṣabhamārūḍhe bhadre tu bhasitaprabhaḥ |
babhāra mauktikaṃ chatraṃ gṛhītasitacāmaraḥ || 58 ||
[Analyze grammar]

sa tadā śuśubhe pārśve bhadrasya bhasitaprabhaḥ |
bhagavāniva śailendraḥ pārśve viśvajagadguroḥ || 59 ||
[Analyze grammar]

so 'pi tena babhau bhadraḥ śvetacāmarapāṇinā |
bālasomena saumyena yathā śūlavarāyudhaḥ || 60 ||
[Analyze grammar]

dadhmau śaṃkhaṃ sitaṃ bhadraṃ bhadrasya purataḥ śubham |
bhānukaṃpo mahātejā hemaratnairalaṃkṛtaḥ || 61 ||
[Analyze grammar]

devaduṃdubhayo nedurdivyasaṃkulaniḥsvanāḥ |
vavṛṣuśśataśo mūrdhni puṣpavarṣaṃ balāhakāḥ || 62 ||
[Analyze grammar]

phullānāṃ madhugarbhāṇāṃ puṣpāṇāṃ gaṃdhabaṃdhavaḥ |
mārgānukūlasaṃvāhā vabuśca pathi mārutāḥ || 63 ||
[Analyze grammar]

tato gaṇeśvarāḥ sarve mattā yuddhabaloddhatāḥ |
nanṛturmumudur1 edurjahasurjagadurjaguḥ || 64 ||
[Analyze grammar]

tadā bhadragaṇāṃtaḥstho babhau bhadraḥ sa bhadrayā |
yathā rudragaṇāṃtaḥ sthastryambakoṃbikayā saha || 65 ||
[Analyze grammar]

tatkṣaṇādeva dakṣasya yajñavāṭaṃ raṇmayam |
praviveśa mahābāhurvīrabhadro mahānugaḥ || 66 ||
[Analyze grammar]

tatastu dakṣapratipāditasya kratupradhānasya gaṇapradhānaḥ |
prayogabhūmiṃ praviveśa bhadro rudro yathāṃte bhuvanaṃ didhakṣuḥ || 67 ||
[Analyze grammar]