Chapter 3

[English text for this chapter is available]

brahamovāca |
yato vāco nivartaṃte aprāpya manasā saha |
ānaṃdaṃ yasya vai vidvānna bibheti kutaścana || 1 ||
[Analyze grammar]

yasmātsarvamidaṃ brahmaviṣṇurudrendrapūrvakam |
saha bhūtendriyaiḥ sarvaiḥ prathamaṃ saṃprasūyate || 2 ||
[Analyze grammar]

kāraṇānāṃ ca yo dhātā dhyātā paramakāraṇam |
na saṃprasūyate 'nyasmātkutaścana kadācana || 3 ||
[Analyze grammar]

sarvaiśvaryeṇa saṃpanno nāmnā sarveśvaraḥ svayam |
sarvairmumukṣubhirdhyeyaśśaṃbhurākāśamadhyagaḥ || 4 ||
[Analyze grammar]

yo 'gre māṃ vidadhe putraṃ jñānaṃ ca prahiṇoti me |
tatprasādānmayālabdhaṃ prājāpatyamidaṃ padam || 5 ||
[Analyze grammar]

īśo vṛkṣa iva stabdho ya eko divi tiṣṭhati |
yenedamakhilaṃ pūrṇaṃ puruṣeṇa mahātmanā || 6 ||
[Analyze grammar]

eko bahūnāṃ jaṃtūnāṃ niṣkriyāṇāṃ ca sakriyaḥ |
ya eko bahudhā bījaṃ karoti sa maheśvaraḥ || 7 ||
[Analyze grammar]

jīvairebhirimāṃllokānsarvānīśo ya īśate || 1 ||
[Analyze grammar]

ya eko bhāgavānrudro na dvitīyo 'sti kaścana || 8 ||
[Analyze grammar]

sadā janānāṃ hṛdaye saṃniviṣṭo 'pi yaḥ paraiḥ |
alakṣyo lakṣayanviśvamadhitiṣṭhati sarvadā || 9 ||
[Analyze grammar]

yastu kālātpramuktāni kāraṇānyakhilānyapi |
anantaśaktirevaiko bhagavānadhitiṣṭhati || 10 ||
[Analyze grammar]

na yasya divaso rātrirna samāno na cādhikaḥ |
svabhāvikī parāśaktirnityā jñānakriye api || 11 ||
[Analyze grammar]

yadidaṃ kṣaramavyaktaṃ yadapyamṛtamakṣaram |
tāvubhāvakṣarātmānāveko devaḥ svayaṃ haraḥ || 12 ||
[Analyze grammar]

īśate tadabhidhyānādyojanāsattvabhāvanaḥ |
bhūyo hyasya paśorante viśvamāyā nivartate || 13 ||
[Analyze grammar]

yasminna bhāsate vidyunna sūryo na ca candramāḥ |
yasya bhāsā vibhātīdamityeṣā śāśvatī śrutiḥ || 14 ||
[Analyze grammar]

eko devo mahādevo vijñeyastu maheśvaraḥ |
na tasya paramaṃ kiṃcitpadaṃ samadhigamyate || 15 ||
[Analyze grammar]

ayamādiranādyantassvabhāvādeva nirmalaḥ |
svatantraḥ paripūrṇaśca svecchādhīnaścarācaraḥ || 16 ||
[Analyze grammar]

aprākṛtavapuḥ śrīmāṃllakṣyalakṣaṇavarjitaḥ |
ayaṃ mukto mocakaśca hyakālaḥ kālacodakaḥ || 17 ||
[Analyze grammar]

sarvoparikṛtāvāsassarvāvāsaśca sarvavit |
ṣaḍvidhādhvamayasyāsya sarvasya jagataḥ patiḥ || 18 ||
[Analyze grammar]

uttarottarabhūtānāmuttaraśca niruttaraḥ |
anantānantasandohamakaraṃdamadhuvrataḥ || 19 ||
[Analyze grammar]

akhaṃḍajagadaṃḍānāṃ piṃḍīkaraṇapaṃḍitaḥ |
audāryavīryagāṃbhīryamādhuryamakarālayaḥ || 20 ||
[Analyze grammar]

naivāsya sadṛśaṃ vastu nādhikaṃ cāpi kiṃcana |
atulaḥ sarvabhūtānāṃ rājarājaśca tiṣṭhati || 21 ||
[Analyze grammar]

anena citrakṛtyena prathamaṃ sṛjyate jagat |
aṃtakāle punaścedaṃ tasminpralayameṣyate || 22 ||
[Analyze grammar]

asya bhūtāni vaśyāni ayaṃ sarvaniyojakaḥ |
ayaṃ tu parayā bhaktyā dṛśyate nānyathā kvacit || 23 ||
[Analyze grammar]

vratāni sarvadānāni tapāṃsi niyamāstathā |
kathitāni purā sadbhirbhāvārthaṃ nātra saṃśayaḥ || 24 ||
[Analyze grammar]

hariścāhaṃ ca rudraśca tathānye ca surāsurāḥ |
tapobhirugrairadyāpi tasya darśanakāṃkṣiṇaḥ || 25 ||
[Analyze grammar]

adṛśyaḥ patitairmūḍhairdurjanairapi kutsitaiḥ |
bhaktairantarbahiścāpi pūjyaḥ saṃbhāṣya eva ca || 26 ||
[Analyze grammar]

tadidaṃ trividhaṃ rūpaṃ sthūlaṃ sūkṣmaṃ tataḥ param |
asmadādyamarairdṛśyaṃ sthūlaṃ sūkṣmaṃ tu yogibhiḥ || 27 ||
[Analyze grammar]

tataḥ paraṃ tu yannityaṃ jñānamānaṃdamavyayam |
tanniṣṭhaistatparairbhaktairdṛśyaṃ tadvratamāśritaiḥ || 28 ||
[Analyze grammar]

bahunātra kimuktena guhyādguhyataraṃ param |
śive bhaktirna sandehastayā yukto vimucyate || 29 ||
[Analyze grammar]

prasādādeva sā bhaktiḥ prasādo bhaktisaṃbhavaḥ |
yathā cāṃkurato bījaṃ bījato vā yathāṃkuraḥ || 30 ||
[Analyze grammar]

prasādapūrvikā eva paśossarvatra siddhayaḥ |
sa eva sādhanairante sarvairapi ca sādhyate || 31 ||
[Analyze grammar]

prasādasādhanaṃ dharmassa ca vedena darśitaḥ |
tadabhyāsavaśātsāmyaṃ pūrvayoḥ puṇyapāpayoḥ || 32 ||
[Analyze grammar]

sāmyātprasādasaṃparko dharmasyātiśayastataḥ |
dharmātiśayamāsādya paśoḥ pāpaparikṣayaḥ || 33 ||
[Analyze grammar]

evaṃ prakṣīṇapāpasya bahubhirjanmabhiḥ kramāt |
sāṃbe sarveśvare bhaktirjñānapūrvā prajāyate || 34 ||
[Analyze grammar]

bhāvānuguṇamīśasya prasādo vyatiricyate |
prasādātkarmasaṃtyāgaḥ phalato na svarūpataḥ || 35 ||
[Analyze grammar]

tasmātkarmaphalatyāgācchivadharmānvayaḥ śubhaḥ |
sa ca gurvanapekṣaśca tadapekṣa iti dvidhā || 36 ||
[Analyze grammar]

tatrānapekṣātsāpekṣo mukhyaḥ śataguṇādhikaḥ |
śivadharmānvayasyāsya śivajñānasamanvayaḥ || 37 ||
[Analyze grammar]

jñanānvayavaśātpuṃsaḥ saṃsāre doṣadarśanam |
tato viṣayavairāgyaṃ vairāgyādbhāvasādhanam || 38 ||
[Analyze grammar]

bhāvasiddhyupapannasya dhyāne niṣṭhā na karmaṇi |
jñānadhyānābhiyuktasya puṃso yogaḥ pravartate || 39 ||
[Analyze grammar]

yogena tu parā bhaktiḥ prasādastadanaṃtaram |
prasādānmucyate jaṃturmuktaḥ śivasamo bhavet || 40 ||
[Analyze grammar]

anugrahaprakārasya kramo 'yamavivakṣitaḥ |
yādṛśī yogyatā puṃsastasya tādṛganugrahaḥ || 41 ||
[Analyze grammar]

garbhastho mucyate kaścijjāyamānastathāparaḥ |
bālo vā taruṇo vātha vṛddho vā mucyate paraḥ || 42 ||
[Analyze grammar]

tiryagyonigataḥ kaścinmucyate nārako 'paraḥ |
aparastu padaṃ prāpto mucyate svapadakṣaye || 43 ||
[Analyze grammar]

kaścitkṣīṇapado bhūtvā punarāvartya mucyate |
kaścidadhvagatastasmin sthitvāsthitvā vimucyate || 44 ||
[Analyze grammar]

tasmānnaikaprakāreṇa narāṇāṃ muktiriṣyate |
jñānabhāvānurūpeṇa prasādenaiva nirvṛtiḥ || 45 ||
[Analyze grammar]

tasmādasya prasādārthaṃ vāṅmanodoṣavarjitāḥ |
dhyāyaṃtaśśivamevaikaṃ sadāratanayāgnayaḥ || 46 ||
[Analyze grammar]

tanniṣṭhāstatparāssarve tadyuktāstadupāśrayāḥ |
sarvakriyāḥ prakurvāṇāstameva manasāgatāḥ || 47 ||
[Analyze grammar]

dīrghasūtrasamārabdhaṃ divyavarṣasahasrakam |
satrāṃte maṃtrayogena vāyustatra gamiṣyati || 48 ||
[Analyze grammar]

sa eva bhavataḥ śreyaḥ sopāyaṃ kathayiṣyati |
tato vārāṇasī puṇyā purī paramaśobhanā || 49 ||
[Analyze grammar]

gaṃtavyā yatra viśveśo devyā saha pinākadhṛk |
sadā viharati śrīmān bhaktānugrahakāraṇāt || 50 ||
[Analyze grammar]

tatrāścaryaṃ mahaddṛṣṭvā matsamīpaṃ gamiṣyatha |
tato vaḥ kathayiṣyāmi mokṣopāya dvijottamāḥ || 51 ||
[Analyze grammar]

yenaikajanmanā muktiryuṣmatkaratale sthitā |
anekajanmasaṃsārabaṃdhanirmokṣakāriṇī || 52 ||
[Analyze grammar]

etanmanomayaṃ cakraṃ mayā sṛṣṭaṃ visṛjyate |
yatrāsya śīryate nemiḥ sa deśastapasaśśubhaḥ || 53 ||
[Analyze grammar]

ityuktvā sūryasaṃkāśaṃ cakraṃ dṛṣṭvā manomayam |
praṇipatya mahādevaṃ visasarja pitāmahaḥ || 54 ||
[Analyze grammar]

te 'pi hṛṣṭatarā viprāḥ praṇamya jagatāṃ prabhum |
prayayustasya cakrasya yatra nemiraśīryata || 55 ||
[Analyze grammar]

cakraṃ tadapi saṃkṣiptaṃ ślakṣṇaṃ cāruśilātale |
vimalasvādupānīye nijapāta vane kvacit || 56 ||
[Analyze grammar]

tadvanaṃ tena vikhyātaṃ naimiṣaṃ munipūjitam |
anekayakṣagaṃdharvavidyādharasamākulam || 57 ||
[Analyze grammar]

aṣṭādaśa samudrasya dvīpānaśnanpurūravāḥ |
vilāsavaśamurvaśyā yāto daivena coditaḥ || 58 ||
[Analyze grammar]

akrameṇa haranmohādyajñavāṭaṃ hiraṇmayam |
munibhiryatra saṃkruddhaiḥ kuśavajrairnipātitaḥ || 59 ||
[Analyze grammar]

viśvaṃ sisṛkṣamāṇā vai yatra viśvasṛjaḥ purā |
satramārebhire divyaṃ brahmajñā gārhapatyagāḥ || 60 ||
[Analyze grammar]

ṛṣibhiryatra vidvadbhiḥ śabdārthanyāyakovidaiḥ |
śaktiprajñākriyāyogairvidhirāsīdanuṣṭhitaḥ || 61 ||
[Analyze grammar]

yatra vedavido nityaṃ vedavādabahiṣkṛtān |
vādajalpabalairghnaṃti vacobhirativādinaḥ || 62 ||
[Analyze grammar]

sphaṭikamayamahībhṛtpādajābhyaśśilābhyaḥ prasaradamṛtakalpassvacchapānīyaramyam |
atirasaphalavṛkṣaprāyamavyālasattvaṃ tapasa ucitamāsīnnaimiṣaṃ tanmunīnām || 63 ||
[Analyze grammar]