Chapter 21

[English text for this chapter is available]

vāmadeva uvāca |
ye muktā yatayasteṣāṃ dāhakarmma na vidyate |
mṛte śarīre khananaṃ taddehasya śrutaṃ mayā || 1 ||
[Analyze grammar]

tatkarmācakṣva suprītyā kārtikeya guro mama |
tvattonyo na hi saṃvaktā triṣu lokeṣu vidyate || 2 ||
[Analyze grammar]

pūrṇāhaṃ bhāvamāśritya ye muktā dehapaṃjarāt |
ye tūpāsanamārgeṇa dehamuktāḥ paraṃgataḥ || 3 ||
[Analyze grammar]

teṣāṃ gativiśeṣañca bhagavañchaṃkarātmaja |
vaktumarhasi suprītyā māṃ vicāryya svaśiṣyataḥ || 4 ||
[Analyze grammar]

||sūta uvāca |
munivijñaptimākarṇya śaktiputrassurārihā |
prāhātyantarahasyaṃ tadbhṛguṇā śrutamīśvarāt || 5 ||
[Analyze grammar]

|| subrahmaṇya uvāca |
idameva mune guhyaṃ bhṛgave śivayogine |
uktaṃ bhagavatā sākṣātsarvajñena pinākinā || 6 ||
[Analyze grammar]

vakṣye tadadya te brahmanna deyaṃ yasya kasyacit |
deyaṃ śiṣyāya śāntāya śivabhaktiyutāya vai || 7 ||
[Analyze grammar]

samādhistho yatiḥ kaścicchivabhāvena dehabhuk |
asti cetsa mahādhīraḥ paripūrṇaśśivo bhavet || 8 ||
[Analyze grammar]

adhairyyacitto yaḥ kaścitsamādhiṃ na ca viṃdati |
tadupāyampravakṣyāmi sāvadhānatayā śṛṇu || 9 ||
[Analyze grammar]

tripadārthaparijñānaṃ vedāntāgamavākyajam |
śrutvā gurormukhādyogamabhyasetsa yamādikam || 10 ||
[Analyze grammar]

tatkurvansa yatissamyakchivadhyānaparo bhavet |
niyamena mune nityaṃ praṇavāsaktamānasaḥ || 11 ||
[Analyze grammar]

dehadaurbalyavaśato yadyadhairyyadharo yatiḥ |
akāmaśca śivaṃ smṛtvā sa jīrṇāṃ svāṃ tanuṃ tyajet || 12 ||
[Analyze grammar]

sadāśivānugrahato naṃdinā preritā mune |
ātivāhikarūpiṇyo devatāḥ pañca viśrutāḥ || 13 ||
[Analyze grammar]

ātmahantākṛtiḥ kācijjyottiḥpuṃjavapuṣmatī |
ahno'bhimāninī kācicchuklapakṣābhimāninī || 14 ||
[Analyze grammar]

uttarāyaṇarūpā ca paṃcānugrahatatparā |
dhūmrā tamasvinī rātriḥ kṛṣṇapakṣābhimāninī || 15 ||
[Analyze grammar]

dakṣiṇāyanarūpeti viśrutāḥ pañca devatāḥ |
tāsāṃ vṛttiṃ śṛṇuṣvādya vāmadeva mahāmune || 16 ||
[Analyze grammar]

tāḥ paṃcadevatā jīvānkarmānuṣṭhāna tatparān |
gṛhītvā tridivaṃ yāṃti tatpuṇyavaśato mune || 17 ||
[Analyze grammar]

bhuktvā bhogānyathoktāṃśca te tatpuṇyakṣaye punaḥ |
mānuṣaṃ lokamāsādya bhajate janmapūrvavat || 18 ||
[Analyze grammar]

tāḥ punaḥ paṃcadhā mārgaṃ vibhajyārabhya bhūtalam |
agnyādikramatāṃ gṛhyaṃ sadāśivapadaṃ yatiḥ || 19 ||
[Analyze grammar]

ninīya vandyacaraṇau devadevasya pṛṣṭhataḥ |
tiṣṭhaṃtyanugrahākārāḥ karmmaṇyeva prayojitāḥ || 20 ||
[Analyze grammar]

samāgatamabhiprekṣya devadevassadā śivaḥ |
viraktaścenmahāmaṃtratātparyamupadiśya ca || 21 ||
[Analyze grammar]

svasāmyaṃ ca vapurdatte gāṇapatyebhiṣicya ca |
anugṛhṇāti sarveśaśśaṃkaraḥ sarvanāyakaḥ || 22 ||
[Analyze grammar]

mṛgaṭaṃkatriśūlāgryavaradānavibhūṣitam |
trinetraṃ candraśakalaṃ gaṃgollāsijaṭādharam || 23 ||
[Analyze grammar]

adhiṣṭhitavimānāgryaṃ sarvadaṃ sarvakāmadam |
iti śākhāviraktaścedrudrakanyāsamāvṛtam || 24 ||
[Analyze grammar]

nṛtyagītamṛdaṃgādivādyaghoṣamanoharam |
divyāmbarasragālepa bhūṣaṇairapi bhūṣitam || 25 ||
[Analyze grammar]

divyāmṛtaghaṭaiḥ pūrṇaṃ divyāṃbhaḥparipūritam |
sūryakoṭipratīkāśaṃ caṃdrakoṭisuśītalam || 26 ||
[Analyze grammar]

manovegaṃ sarvagaṃ ca vimānamanugṛhya ca |
bhuktabhogasya tasyāpi bhogakautūhalakṣaye || 27 ||
[Analyze grammar]

nipātya śaktiṃ tīvratarāṃ prakṛtyā hyati durgamām |
kāntāraṃ dagdhukāmāntānmalayānalasuprabhām || 28 ||
[Analyze grammar]

anugṛhya mahāmaṃtratātparyamparameśvaraḥ |
pūrṇohaṃ bhāvanārūpaḥ śaṃbhura smīti niścalam || 29 ||
[Analyze grammar]

anugṛhya samādhiśca svadāsyaspandarūpiṇīḥ |
ravyādikarmmasāmarthyarūpāḥ siddhīranargalāḥ || 30 ||
[Analyze grammar]

āyuḥ kṣaye padmayoneḥ punarāvṛttivarjitām |
muktiṃ ca paramāṃ tasmai prayacchati jagadguruḥ || 31 ||
[Analyze grammar]

etadeva padaṃ tasmātsarvaiśvaryyaṃ samaṣṭimat |
muktighaṃṭāpathaṃ ceti vedāṃtānāṃ viniścayaḥ || 32 ||
[Analyze grammar]

mumūrṣostasya mandasya yatessatsampradāyinaḥ |
yatayaḥ sānukūlatvāttiṣṭheyuḥ parita stadā || 33 ||
[Analyze grammar]

tatassarve ca te tatra praṇavādīnyanukramāt |
upadiśya ca vākyāni tātparyaṃ ca samāhitāḥ || 34 ||
[Analyze grammar]

varṇayeyuḥ sphuṭaṃ prītyā śivaṃ saṃsmārayansadā |
nirguṇaṃ paramajyotiḥ praṇamya vilayāvadhi || 35 ||
[Analyze grammar]

eteṣāṃ samamevātra saṃskārakrama ucyate |
asaṃskṛtaśarīrāṇāṃ daurgatyaṃ naiva jāyate || 36 ||
[Analyze grammar]

saṃnyasya sarvakarmmāṇi śivāśrayaparā yataḥ |
dehaṃ dūṣayatasteṣāṃ rājño rāṣṭraṃ ca naśyati || 37 ||
[Analyze grammar]

tadgrāmavāsinaste'pi bhaveyurbhṛśaduḥkhinaḥ |
taddoṣaparihārāya vidhānaṃ caivamucyate || 38 ||
[Analyze grammar]

sa tu nama hariṇyāya cetyārabhya vinamradhīḥ |
nama āmīvatkebhyāntaṃ tatkāle prajapenmanum || 39 ||
[Analyze grammar]

oṃmityante japandevayajanampūrayettataḥ |
tataśśāntirbhavettasya doṣasya hi munīśvara || 40 ||
[Analyze grammar]

putrādayo yathā nyāyaṃ kuryyussaṃskāramuttamam |
vacmi tatkṛpayā vipra sāvadhānatayā śṛṇu || 41 ||
[Analyze grammar]

abhyarcya snāpya śuddhodairabhyarcya kusumādibhiḥ |
śrīrudracamakābhyāṃ ca rudrasūktena ca kramāt || 42 ||
[Analyze grammar]

śaṃkhaṃ ca purataḥ sthāpya tajjalenābhiṣicya ca |
puṣpaṃ nidhāya śirasi praṇavena pramārjayet || 43 ||
[Analyze grammar]

kaupīnādīni saṃtyajya punaranyāni dhārayet |
bhasmanoddhūlayettasya sarvāṃgaṃ vidhinā tataḥ || 44 ||
[Analyze grammar]

tripuṇḍraṃ ca vidhānena tilakaṃ candanena ca |
viracya puṣpairmālābhiralaṃkuryyātkalevaram || 45 ||
[Analyze grammar]

uraḥ kaṇḍaśirobāhuprakoṣṭhaśrutiṣu kramāt |
rudrākṣamālābharaṇairalaṃkuryyācca maṃtrataḥ || 46 ||
[Analyze grammar]

sudhūpitaṃ samutthāpya śikyopari nidhāya ca |
paṃcabrahmamaye ramye rathe saṃsthāpayettanum || 47 ||
[Analyze grammar]

oṃmādyaiḥ paṃcabhirbrahmamaṃtraissadyādibhiḥ krmāt |
sugaṃdhakusumairmālyairalaṃkuryyādrathaṃ ca tam || 48 ||
[Analyze grammar]

nṛtyavādyairbrāhmaṇānāṃ vedaghoṣaiśca sarvataḥ |
grāmampradakṣiṇīkṛtya gacche tpretaṃ tamudvahan || 49 ||
[Analyze grammar]

tataste yatinaḥ sarve tathā prācyāmathāpi vā |
udīcyampuṇyadeśe tu puṇyavṛkṣasamīpataḥ || 50 ||
[Analyze grammar]

khanitvā devayajanaṃ daṇḍamātrapramāṇataḥ |
praṇavavyāhṛtibhyāṃ ca prokṣya cāstīryya ca kramāt || 51 ||
[Analyze grammar]

śamīpatraśca kusumairuttarāgraṃ tadūrdhvataḥ |
āstīrya darbhāṃstatpīṭhaṃ cailājinakuśottaram || 52 ||
[Analyze grammar]

praṇavena brahmabhiśca pañcagavyena tāṃ tanum |
prokṣyābhiṣicya raudreṇa sūktena praṇavena ca || 53 ||
[Analyze grammar]

śaṃkhatoyenābhiṣicya mūrdhni puṣpaṃ viniḥkṣipet |
tadgatasyānukūlo'sau śivasmaraṇatatparaḥ || 54 ||
[Analyze grammar]

oṃmityatha samuddhṛtya svastivācanapūrvakam |
garte yogāsane sthāpya prāṅmukhaṃ syādyathā tathā || 55 ||
[Analyze grammar]

gaṃdhapuṣpairalaṃkṛtvā dhūpaguggulunā tataḥ |
viṣṇo havyamiti procya rakṣasveti vadandadet || 56 ||
[Analyze grammar]

daṇḍaṃ dakṣiṇahaste tu vāme dadyātkamaṇḍalum |
prajāpate na tvadetānyanyo maṃtreṇa sodakam || 57 ||
[Analyze grammar]

brahmajajñānamprathamamitimaṃtreṇa mastake |
spṛśañjaptvā rudrasūktaṃ bhuvormadhye spṛśañjapet || 58 ||
[Analyze grammar]

māno mahāntamityādicaturbhirmastakantataḥ |
nālikereṇa nirbhidyādavaṭaṃ pūrayettataḥ || 59 ||
[Analyze grammar]

paṃcabhirbrahmabhisspṛṣṭvā japetsthalamananyadhīḥ |
yo devānāmupakramya yaḥ paraḥ sa maheśvaraḥ || 60 ||
[Analyze grammar]

iti japtvā mahādevaṃ sāṃbaṃ saṃsārabheṣajam |
sarvajñamaparādhīnaṃ sarvānugrahakārakam || 61 ||
[Analyze grammar]

ekāratnisamutsedhamaratnidvayavistṛtam |
mṛdā pīṭhaṃ prakalpyātha gopaye nopalepayet || 62 ||
[Analyze grammar]

caturasraṃ ca tanmadhye gaṃdhākṣatasamanviteḥ |
sugaṃdhakusumairbilvaistulasyā ca samarcayet || 63 ||
[Analyze grammar]

praṇavena tato dayāddhūpadīpau payohaviḥ |
dattvā pradakṣiṇīkṛtya namaskuryyācca paṃcadhā || 64 ||
[Analyze grammar]

praṇavaṃ dvādaśāvṛttvā saṃjapya praṇamettataḥ |
digvidikkramato dadyādbrahmādyampraṇavena ca || 65 ||
[Analyze grammar]

evaṃ daśāhaparyyaṃtaṃ vidhiste samudāhṛtaḥ |
yatīnāṃ munivaryyāthaikādaśāhavidhiṃ śṛṇu || 66 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ yatīnānmaraṇānantaradaśāhaparyyaṃtakṛtyavarṇanannāmaikaviṃśo'dhyāyaḥ || 21 ||
[Analyze grammar]