Chapter 19

[English text for this chapter is available]

prajñānaṃ brahmavākyārthaḥ pūrvameva prabodhitaḥ |
ahaṃpadasyārthabhūtaḥ śaktyātmā parameśvaraḥ || 1 ||
[Analyze grammar]

akāraḥ sarvavarṇāgryaḥ prakāśaḥ paramaḥ śivaḥ |
hakāro vyomarūpaḥ syācchaktyātmā saṃprakīrtitaḥ || 2 ||
[Analyze grammar]

śivaśaktyostu saṃyogādānandaḥ satatoditaḥ |
brahmeti śivaśaktyostu sarvātmatvamiti sphuṭam || 3 ||
[Analyze grammar]

pūrvamevopadiṣṭaṃ tatsohamasmīti bhāvayet |
tattvamityatra taditi saśabdārthaḥ prabodhitaḥ || 4 ||
[Analyze grammar]

anyathā so'hamityatra viparītārthabhāvanā |
ahaṃśabdastu puruṣastaditi syānnapuṃsakam |
evamanyonyavairudhyādanvayo nabhavettayoḥ || 5 ||
[Analyze grammar]

strīpuṃrūpasya jagataḥ kāraṇaṃ cānyathā bhavet |
sa tattvamasi ityevamupadeśārthabhāvanā || 6 ||
[Analyze grammar]

ayamātmeti vākye ca puṃrūpaṃ padayugmakam |
īśena rakṣaṇīyatvādīśāvasyamidaṃ jagat || 7 ||
[Analyze grammar]

prajñānātmā yadeveha tadamutreti cintayet |
yaḥ sa eveti vidvadbhissiddhāntibhirihocyate || 8 ||
[Analyze grammar]

uparisthitavākye ca yo'mutra sa iha sthitaḥ |
iti pūrvavadevārthaḥ puruṣo viduṣāṃ mataḥ || 9 ||
[Analyze grammar]

anyadeva tadviditādatho || aviditādapi |
asminvākye phalasyāpi vaiparītyavibhāvanā || 10 ||
[Analyze grammar]

yathāsyāttadvadevātra vakṣyāmi śrūyatāṃ mune |
ayathāviditāchabdo pūrvavadviditāditi || 11 ||
[Analyze grammar]

pravṛttissyāttadviditāttathaivāviditātparam |
anyadeva hi saṃsiddhyai na bhavediti niścitam || 12 ||
[Analyze grammar]

eṣa ta ātmāṃtaryāmī yo'mṛtaśca śivassvayam |
yaścāyampuruṣe śaṃbhuryaścāditye vyavasthitaḥ || 13 ||
[Analyze grammar]

sa cā'sau seti pārthakyaṃ naikaṃ sarvaṃ sa īritaḥ |
sopādhidvayamasyārtha upacārāttathocyate || 14 ||
[Analyze grammar]

taṃ śambhunāthaṃ śrutayo vadanti hi hiraṇmayam |
hiraṇya bāhava iti sarvāṃgasyo palakṣalam || 15 ||
[Analyze grammar]

anyathā tatpatitvaṃ tu na bhavediti yatnataḥ |
 ya eṣontariti śaṃbhuśchāndogye śrūyate śivaḥ || 16 ||
[Analyze grammar]

hiraṇyaśmaśruvāṃstadvaddhiraṇyamayakeśavān |
nakhamārabhya keśāgrā sarvatrāpi hiraṇmayaḥ || 17 ||
[Analyze grammar]

ahamasmi paraṃ brahma parāparaparātparam |
iti vākyasya tātparyaṃ vadāmi śrūyatāmidam || 18 ||
[Analyze grammar]

ahaṃpadasyārthabhūtaḥ śaktyātmā śivaīritaḥ |
sa evāsmīti vākyārtha yojanā bhavati dhruvam || 19 ||
[Analyze grammar]

sarvotkṛṣṭaśca sarvātmā parabrahma sa īritaḥ |
paraścāthāparaśceti parātparamiti tridhā || 20 ||
[Analyze grammar]

rudro brahmā ca viṣṇuśca proktāḥ śrutyaiva nānyathā |
tebhyaśca paramo devaḥ paraśabdena bodhitaḥ || 21 ||
[Analyze grammar]

vedaśāstra gurūṇāṃ ca vākyābhyā savaśācchiśoḥ |
pūrṇānandamayaśśaṃbhuḥ prādurbhūto bhaveddhṛdi || 22 ||
[Analyze grammar]

sarvabhūtasthitaśśambhussa evāhaṃ na saṃśayaḥ |
tattvajātasya sarvasya prāṇosmyahamahaṃ śivaḥ || 23 ||
[Analyze grammar]

ityuktvā punarapyāha śivastattvatrayasya ca |
prāṇosmītyatra pṛthvyādiguṇāntagrahaṇānmune || 24 ||
[Analyze grammar]

ātmatattvāni sarvāṇi gṛhītānīti bhāvaya |
punaśca sarvagrahaṇaṃ vidyātattvaśivātmanoḥ || 25 ||
[Analyze grammar]

tattvayoścāsmyahaṃ prāṇāssarvasssarvātmako hyaham |
jīvasya cāntaryāmitvājjīvo'haṃ tasya sarvadā || 26 ||
[Analyze grammar]

yadbhūtaṃ yacca bhavyaṃ yadbhavipyatsarvameva ca |
manmayatvādahaṃ sarvaḥ sarvo vai rudra ityapi || 27 ||
[Analyze grammar]

śrutirāha mune sā hi sākṣācchivamukhodgatā |
sarvātmā paramairebhirguṇairnityasamanvayāt || 28 ||
[Analyze grammar]

svasmātparātmavirahādadvitīyo'hameva hi |
sarvaṃ khalvidaṃ brahmeti vākyārthaḥ pūrvvamīritaḥ || 29 ||
[Analyze grammar]

pūrṇo'haṃ bhāvarūpatvānnityamukto'hameva hi |
paśavo matprasādena muktā madbhāvamāśritāḥ || 30 ||
[Analyze grammar]

yo'sau sarvātmakaśśambhusso'haṃ sa śivo'smyaham |
iti vai sarvavākyārtho vāmadeva śivoditaḥ || 31 ||
[Analyze grammar]

itīśaśrutivākyābhyāmupadiṣṭārthamādarāt |
sākṣācchivaikyadaṃ puṃsāṃ śiśogururupādiśet || 32 ||
[Analyze grammar]

ādāya śaṃkhaṃ sādhāramastramantreṇa bhasmanā |
śodhya tatpuratassthāpya caturasre samarcite || 33 ||
[Analyze grammar]

omityabhyarcya gandhādyairastraṃ vastropaśobhitam |
vāsitaṃ jalamāpūrya sampūjyomiti mantrataḥ || 34 ||
[Analyze grammar]

saptadhaivābhimaṃtryātha praṇavena punaśca tam |
yastvantaraṃ kiṃcidasti kurute tyatibhītibhāk || 35 ||
[Analyze grammar]

ityāha śrutisattattvaṃ dṛḍhātmā gatabhīrbhava |
ityābhāṣya svayaṃ śiṣyaṃ devaṃ dhyāyansamarcayet || 36 ||
[Analyze grammar]

śiṣyāsanaṃ samprapūjya ṣaḍutthāpanamārgataḥ |
śivāsanaṃ ca saṃkalpya śivamūrtiṃ prakalpayet || 37 ||
[Analyze grammar]

pañca brahmāṇi vinyasya śiraḥ pādāvasānakam |
muṇḍavatkrakalābhedaiḥ praṇavasya kalā api || 38 ||
[Analyze grammar]

aṣṭatriṃśanmaṃtrarūpā śśiṣyadehe'tha mastake |
samāvāhya śivaṃ mudrāḥ sthāpanīyāḥ pradarśayet || 39 ||
[Analyze grammar]

tataścāṅgāni vinyasya sarvajñānītyanukramāt |
kalpayedupacārāṃśca ṣoḍaśāsanapūrvakān || 40 ||
[Analyze grammar]

pāyasānnañca naivedyaṃ samarpyo magnijāyayā |
gaṇḍūṣācamanārghyādi dhūpadīpādikaṃ kramāt || 41 ||
[Analyze grammar]

nāmāṣṭakena sampūjya brāhmaṇairvedapāragaiḥ |
japedbrahmavidāpnoti bhṛgurvai vāruṇistataḥ || 42 ||
[Analyze grammar]

yo devānāmupakramyaḥ yaḥ paraḥ sa maheśvaraḥ |
ityaṃtaṃ tasya purataḥ kahlārādivirnitām || 43 ||
[Analyze grammar]

ādāya mālāmutthāya śrīvirūpākṣa nirmite |
śāstre paṃcāśike rūpe siddhiskandhaṃ japecchanaiḥ || 44 ||
[Analyze grammar]

khyātiḥ pūrṇohamityaṃtaṃ sānukūlena cetasā |
deśikastasya śiṣyasya kaṇṭhadeśe samarpayet || 45 ||
[Analyze grammar]

tilakaṃ vandanenātha sarvāṅgālepanaṃ punaḥ |
svasampradāyānuguṇaṃ kārayecca yathāvidhi || 46 ||
[Analyze grammar]

tataśca deśikaḥ prītyā nāmaśrīpādasaṃjñitam |
chatrañca pādukāṃ dadyāddūrvākalpavikalpanam || 4 ||
[Analyze grammar]

vyākhyātatvañca karmmādigurvāsanaparigraham |
anugṛhya gurustasmai śiṣyāya śivarūpiṇe || 48 ||
[Analyze grammar]

śivohamasmīti sadā samādhistho bhaveti tam |
samprocyātha svayaṃ tasmai namaskāraṃ samācaret || 49 ||
[Analyze grammar]

sampradāyānuguṇyena namaskuryustathāpare |
śiṣyastadā samutthāya namaskuryādguruntathā |
gurorapi guruṃ tasya śiṣyāṃśca svagurorapi || 50 ||
[Analyze grammar]

evaṃ kṛtanamaskāraṃ śiṣyandadyādguruḥ svayam |
suśīlaṃ yatavācaṃ taṃ vinayāvanataṃ sthitam || 51 ||
[Analyze grammar]

adyaprabhṛti lokānāmanugrahaparo bhava |
parīkṣya vatsaraṃ śiṣyamaṃgīkuru vidhānataḥ || 52 ||
[Analyze grammar]

rāgādidoṣānsaṃtyajya śivadhyānaparo bhava |
satsampradāyasaṃsiddhaissaṃgaṃ kuru na cetaraiḥ || 53 ||
[Analyze grammar]

anabhyarcya śivaṃ jātumā bhuṃkṣvāprāṇa saṃkṣayam |
gurubhaktiṃ samāsthāya sukhī bhava sukhī bhava || 54 ||
[Analyze grammar]

iti kramādguruvaro dayālurjñānasāgaraḥ |
sānukūlena cittena samaṃ śiṣyaṃ samācaret || 55 ||
[Analyze grammar]

tava snehānmayāyaṃ vai vāmadeva munīśvara |
yogapaṭṭaprakāraste prokto guhyataro'pi hi || 56 ||
[Analyze grammar]

ityuktvā ṣaṇmukhastasmai kṣaurasnānavidhikramam |
vaktumārabhata prītyā yatīnāṃ kṛpayā śubham || 57 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ yogapaṭṭavidhivarṇanaṃnāmaikonaviṃśo'dhyāyaḥ || 19 ||
[Analyze grammar]