Chapter 47

[English text for this chapter is available]

|| ṛṣiruvāca |
āsīcchumbhāsuro daityo niśuṃbhaśca pratāpavān |
trailokyamojasā krāntaṃ bhrātṛbhyāṃ sacarācaram || 1 ||
[Analyze grammar]

tābhyāmprapīḍitā devā himavantaṃ samāyayuḥ |
jananīṃ sarvabhūtānāṃ kāmadātrīṃ vavandire || 2 ||
[Analyze grammar]

devā ūcuḥ |
jaya durge maheśāni jayātmīyajanapriye |
trailokyatrāṇakāriṇyai śivāyai te namonamaḥ || 3 ||
[Analyze grammar]

namo muktipradāyinyai parāmbāyai namonamaḥ |
namaḥ samastasaṃsārotpattisthityantakārike || 4 ||
[Analyze grammar]

kālikārūpasaṃpanno namaskārākṛte namaḥ |
chinnamastāsvarūpāyai śrīvidyāyai namostu te || 5 ||
[Analyze grammar]

bhuvaneśi namastubhyaṃ namaste bhairavākṛte |
namostu bagalāmukhyai dhūmāvatyai namonamaḥ || 6 ||
[Analyze grammar]

namastripurasundaryyai mātaṅgayai te namonamaḥ |
ajitāyai namastubhyaṃ vijayāyai namonamaḥ || 7 ||
[Analyze grammar]

jayāyai maṃgalāyai te vilāsinyai namonamaḥ |
dogdhrīrūpe namastubhyaṃ namo ghorākṛte'stu te || 8 ||
[Analyze grammar]

mano'parājitākāre nityākāre namonamaḥ |
śaraṇāgatapālinyai rudrāṇyai te namonamaḥ || 9 ||
[Analyze grammar]

namo vedāntavedyāyai namaste paramātmane |
anantakoṭibrahmāṇḍanāyikāyai namonamaḥ || 10 ||
[Analyze grammar]

iti devaiḥ stutā gaurī prasannā varadā śivā |
provāca tridaśānsarvānyuṣmābhiḥ stūyate'tra kā || 11 ||
[Analyze grammar]

tato gaurītanorekā prādurāsītkumārikā |
sovāca miṣatāṃ teṣāṃ śivaśaktiṃ parādarāt || 12 ||
[Analyze grammar]

stotraṃ me kriyate mātaḥ samastaiḥ svargavāsibhiḥ |
niśuṃbhaśuṃbhadaityābhyāṃ prabalābhyāṃ prapīḍitaiḥ || 13 ||
[Analyze grammar]

śarīrakośādyattasyā nirgatā tena kauśikī |
nāmnā sā gīyate sākṣācchuṃbhāsuranibarhiṇī || 14 ||
[Analyze grammar]

caivogratārikā proktā mahogratārikāpi ca |
prādurbhūtā yataḥ sā vai mātaṃgītyucyate bhuvi || 15 ||
[Analyze grammar]

babhāṣe nikhilāndevānyūyaṃ tiṣṭhata nirbhayāḥ |
kāryaṃ vaḥ sādhayiṣyāmi svatantrāhaṃ vināśrayam || 16 ||
[Analyze grammar]

ityuktvā sā tadā devī tarasāntarhitā'bhavat |
cāṇḍamuṇḍau tu tāndevīmadrāṣṭāṃ sevakau tayoḥ || 17 ||
[Analyze grammar]

dṛṣṭvā manoharaṃ tasyā rūpaṃ netrasukhāvaham |
petatustau dharāmadhye naṣṭasaṃjñau vimohitau || 18 ||
[Analyze grammar]

gatvā vyājahratuḥ sarvaṃ rājñe vṛttāntamāditaḥ |
dṛṣṭā kācinmayā pūrvā nārī rājanmanoramā || 19 ||
[Analyze grammar]

himavacchikhare ramye saṃsthitā siṃhavāhinī |
samantāddevakanyābhiḥ sevitā baddhapāṇibhiḥ || 20 ||
[Analyze grammar]

kurute pādasaṃvāhaṃ kācitsaṃskurute kacān |
pāṇisaṃvāhanaṃ kācitkācinnetrāñjanaṃ nyadhāt || 21 ||
[Analyze grammar]

kācid gṛhītvā hastenādarśaṃ darśayate mukham |
nāgavallīṃ dadātyekā lavaṃgailādisaṃyutām || 22 ||
[Analyze grammar]

patadgrahaṃ kare kṛtvā sthitā kācitsakhī puraḥ |
bhūṣayatyakhilāṃgāni kācidbhūṣāmbarādibhiḥ || 23 ||
[Analyze grammar]

kadalīstaṃbhajaṃghoruḥ kīranāsā'hidaurlatā |
raṇanmañjīracaraṇā ramyamekhalayā yutā || 24 ||
[Analyze grammar]

lasatkastūrikāmodamuktāhāracalastanī |
graiveyakalasadgrīvā lalantīdāmamaṇḍitā || 25 ||
[Analyze grammar]

arddhacandradharā devī maṇikuṇḍaladhāriṇī |
ramyaveṇirviṃśālākṣī locanatrayabhūṣitā || 26 ||
[Analyze grammar]

sākṣarā mālikopetā paṇirājitakaṃkaṇā |
svarṇormikāṃgulirbhrājatpārihāryyalasatkarā || 27 ||
[Analyze grammar]

śubhavastrāvṛtā gaurī padmāsanavirājitā |
kāśmīrabindutilakā candrālaṃkṛtamastakā || 28 ||
[Analyze grammar]

taḍiddyutirmahāmūlyāmbara colonnamatkucā |
bhujairaṣṭābhiruttuṃgairdhārayantī varāyudhān || 29 ||
[Analyze grammar]

tādṛśī nāsurī nāgī na gandharvī na dānavī |
vidyate triṣu lokeṣu yādṛśī sā manoramā || 30 ||
[Analyze grammar]

tasmātsaṃbhogayogyatvaṃ tasyāstvayyeva śobhate |
nārīratnaṃ yataḥ sā vai puṃratnaṃ ca bhavānprabho || 31 ||
[Analyze grammar]

ityuktaṃ caṇḍamuṇḍābhyāṃ niśamya sa mahāsuraḥ |
dūtaṃ sugrīvanāmānaṃ preṣayāmāsa tāṃ prati || 32 ||
[Analyze grammar]

gaccha dūta tuṣārādrau tatrāste kāpi sundarī |
sā netavyā prayatnena kathayitvā vaco mama || 33 ||
[Analyze grammar]

iti vijñāpitastena sugrīvo dānavottamaḥ |
gatvā himācalaṃ prāha jagadambāṃ maheśvarīm || 34 ||
[Analyze grammar]

dūta uvāca |
devi śuṃbhāsuro daityo niśuṃbhastasya cānujaḥ |
vikhyātastriṣu lokeṣu mahā balaparākramaḥ || 35 ||
[Analyze grammar]

cārohaṃ preṣitastena sannidhinte samāgamam |
sa yajjagau sureśāni tatsamākarṇayādhunā || 36 ||
[Analyze grammar]

indrādīnsamare jitvā teṣāṃ ratnānyapāharam |
devabhāgaṃ svayaṃ bhuñje yāge dattaṃ surādibhiḥ || 37 ||
[Analyze grammar]

strīratnaṃ tvāmahaṃ manye sarvaratnopari sthitam |
sā tvaṃ mamānujaṃ māṃ vā bhajatātkāmajai rasaiḥ || 38 ||
[Analyze grammar]

iti dūtoktamākarṇya vacanaṃ śuṃbhabhāṣitam |
jagāda sā mahāmāyā bhūteśaprāṇavallabhā || 39 ||
[Analyze grammar]

|| devyuvāca |
satyaṃ vadasi bho dūta nānṛtaṃ kiṃciducyate |
parantvekā kṛtā pūrvaṃ pratijñā tānnibodha me || 40 ||
[Analyze grammar]

yo me darpaṃ vidhunute yo māṃ jayati saṃgare |
utsahe tamahaṃ kartuṃ patiṃ nānyamiti dhruvam || 41 ||
[Analyze grammar]

sa tvaṃ kathaya śuṃbhāya niśuṃbhāya vaco mama |
yathā yuktaṃ bhavedevaṃ vidadhātu tathā'tra saḥ || 42 ||
[Analyze grammar]

itthaṃ devīvacaḥ śrutvā sugrīvo nāma dānavaḥ |
rājñe vijñāpayāmāsa gatvā tatra savistaram || 43 ||
[Analyze grammar]

atha dūtoktamākarṇya śuṃbho bhairavaśāsanaḥ |
dhūmrākṣaṃ prāha sakrodhaḥ senānyaṃ balināṃ varam || 44 ||
[Analyze grammar]

he dhūmrākṣa tuṣārādrau vartate kāpi sundarī |
tāmānaya drutaṃ gatvā yathā yāsyati sātra vai || 45 ||
[Analyze grammar]

tasyā ānayane bhītirna kāryyā'surasattama |
yuddhaṃ kāryaṃ prayatnena yadi sā yoddhumicchati || 46 ||
[Analyze grammar]

evaṃ vijñāpito daityo dhūmralocanasaṃjñakaḥ |
gatvā himācalaṃ prāha bhuvaneśīmumāṃśajām || 47 ||
[Analyze grammar]

bharturmamāntikaṃ gaccha nocettvāṃ ghātayāmyaham |
puṣṭyā'surāṇāṃ sahitaḥ sahasrāṇāṃ nitaṃbini || 48 ||
[Analyze grammar]

devyuvāca |
daityarāṭpreṣito vīra haṃsi cetkiṃ karomi te |
parantvasādhyaṃ gamanaṃ manye saṃgrāmamantarā || 49 ||
[Analyze grammar]

ityuktastāmanvadhāvaddānavo dhūmralocanaḥ |
huṃkāroccāraṇenaiva tandadāha maheśvarī || 50 ||
[Analyze grammar]

tataḥ prabhṛti sā devī dhūmāvatyucyate bhuvi |
ārādhitā svabhaktānāṃ śatruvarganikartinī || 51 ||
[Analyze grammar]

dhūmrākṣe nihate devyā vāhanenātikopinā |
carvitāstadgaṇāssarve'palāyantāvaśeṣitāḥ || 52 ||
[Analyze grammar]

itthaṃ devyā hataṃ daityaṃ śrutvā śuṃbhaḥ pratāpavān |
cakāra bahulaṃ kopaṃ sandaṣṭoṣṭhapuṭadvayaḥ || 53 ||
[Analyze grammar]

caṇḍaṃ muṃḍaṃ raktabījaṃ praiṣayatkramato' surān |
tepi cājñāpitā daityā yayuryatrāmbikā sthitā || 54 ||
[Analyze grammar]

siṃhārūḍhā bhagavatīmaṇimādibhirāśritām |
bhāsayaṃtī diśo bhāsā dṛṣṭvocurddānavarṣabhāḥ || 55 ||
[Analyze grammar]

he devi tarasā mūlaṃ yāhi śuṃbhaniśuṃbhayoḥ |
anyathā ghātayiṣyāmaḥ sagaṇāṃ tvāṃ savāhanām || 56 ||
[Analyze grammar]

vṛṇīṣva taṃ patiṃ vāme lokapālādibhiḥ stutam |
prapatsyase mahānaṃdaṃ devānāmapi durlabham || 57 ||
[Analyze grammar]

ityuktamākalayyāmbā smayitvā parameśvarī |
udājahāra sā devī sūnṛtaṃ rasavadvacaḥ || 58 ||
[Analyze grammar]

devyuvāca |
advitīyo maheśānaḥ parabrahma sadāśivaḥ |
yattattvanna vidurvedā viṣṇvādīnāṃ ca kā kathā || 59 ||
[Analyze grammar]

tasyāhaṃ prakṛtiḥ sakṣmā kathamanyaṃ patimvṛṇe |
siṃhī kāmāturā naiva jambukaṃ vṛṇute kvacit || 60 ||
[Analyze grammar]

kareṇurgardabhaṃ naiva dvīpinī śaśakaṃ na vā |
mṛṣā vadata bho daityo mṛtyuvyālaniyaṃtritāḥ || 61 ||
[Analyze grammar]

yūyaṃ prayāta pātālaṃ yudhyadhvaṃ śaktirasti cet |
iti krodhakaraṃ vākyaṃ śrutvocuste parasparam || 62 ||
[Analyze grammar]

abalāṃ manasi jñātvā na hanmo bhavatīṃ vayam |
atho sthiraihi pañcāsye yuddhecchā mānase'sti cet || 63 ||
[Analyze grammar]

teṣāmevaṃ vivadatāṃ kalahaḥ samavarddhata |
vavṛṣu samare bāṇā ubhayorddalayośśitāḥ || 64 ||
[Analyze grammar]

evaṃ taiḥ samaraṃ kṛtvā līlayā parameśvarī |
jaghāna caṇḍamuṇḍābhyāṃ raktabījaṃ mahāsuram || 65 ||
[Analyze grammar]

dveṣabuddhiṃ vidhāyāpi tridaśasthitayo'pyamī |
ante'prāpanparaṃ lokaṃ yaṃllokaṃ yānti tajjanāḥ || 66 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ dhūmralocana caṇḍamuṇḍaraktabījavadho nāma saptacatvāriṃśo'dhyāyaḥ || 47 ||
[Analyze grammar]