Chapter 31

[English text for this chapter is available]

śaunaka uvāca |
devānāṃ dānavānāṃ ca gandharvoragarakṣasām |
sṛṣṭiṃ tu vistareṇemāṃ sūtaputra vadāśu me || 1 ||
[Analyze grammar]

sūta uvāca |
yadā na vavṛdhe sā tu vīraṇasya prajāpatiḥ |
sutāṃ sutapasā yuktāmāhvayatsargakāraṇāt || 2 ||
[Analyze grammar]

sa maithunena dharmeṇa sasarja vividhāḥ prajāḥ |
tāḥ śṛṇu tvaṃ mahāprājña kathayāmi samāsataḥ || 3 ||
[Analyze grammar]

tasyāṃ putrasahasrāṇi vīriṇyāṃ paṃca vīryavān |
āśritya janayāmāsa dakṣa eva prajāpatiḥ || 4 ||
[Analyze grammar]

etānsṛṣṭāṃstu tāndṛṣṭvā nāradaḥ prāha vai muniḥ |
sarvaṃ sa tu samutpanno nāradaḥ parameṣṭhinaḥ || 5 ||
[Analyze grammar]

śrutavānvā kaśyapādvai puṃsāṃ sṛṣṭirbhaviṣyati |
dakṣasyeva duhitṛṣu tasmāttānabravīttu saḥ || 6 ||
[Analyze grammar]

ajānataḥ kathaṃ sṛṣṭiṃ bāliśā vai kariṣyatha |
diśaṃ kāṃcidajānaṃtastasmādvijñāya tāṃ bhuvam || 7 ||
[Analyze grammar]

ityuktāḥ prayayussarve āśāṃ vijñātumojasā |
tadaṃtaṃ na hi saṃprāpya na nivṛttāḥ piturgṛham || 8 ||
[Analyze grammar]

tajjñātvā janayāmāsa punaḥ paṃcaśatānsutān |
tānuvāca punasso'pi nāradassarvadarśanaḥ || 9 ||
[Analyze grammar]

nārada uvāca |
bhuvo mānamajānaṃtaḥ kathaṃ sṛṣṭiṃ kariṣyatha |
sarve hi bāliśāḥ kiṃ hi sṛṣṭikartuṃ samudyatāḥ || 10 ||
[Analyze grammar]

sūta uvāca |
te'pi tadvacanaṃ śrutvā niryātāssarvatodiśam |
subalāśvā dakṣasutā haryaśvā iva te purā || 11 ||
[Analyze grammar]

anaṃtaṃ puṣkaraṃ prāpya gatāste'pi parābhavam |
adyāpi na nivartaṃte samudrebhya ivāpagāḥ || 12 ||
[Analyze grammar]

tadāprabhṛti vai bhrātā bhrāturanveṣaṇe rataḥ |
prayāto naśyati mune tanna kāryyaṃ vipaścitā || 13 ||
[Analyze grammar]

tāṃścāpi naṣṭānvijñāya putrāndakṣaḥ prajāpatiḥ |
sa ca krodhā ddadau śāpaṃ nāradāya mahātmane || 14 ||
[Analyze grammar]

kutracinna labhasveti saṃsthitiṃ kalahapriya |
tava sānnidhyato loke bhavecca kalahassadā || 15 ||
[Analyze grammar]

sāṃtvito'tha vidhātrā hi sa dakṣastu prajāpatiḥ |
kanyāḥ ṣaṣṭyasṛjatpaścādvīriṇyāmiti naḥ śrutam || 16 ||
[Analyze grammar]

dadau sa daśa dharmāya kaśyapāya trayodaśa |
saptaviṃśati somāya catasro'riṣṭanemine || 17 ||
[Analyze grammar]

dve caivaṃ brahmaputrāya dve caivāṅgirase tadā |
dve kṛśāśvāya viduṣe tāsāṃ nāmāni me śṛṇu || 18 ||
[Analyze grammar]

aruṃdhatī vasuryyāmirlambā bhānurmarutvatī |
saṃkalpā ca muhūrtā ca saṃdhyā viśvā ca vai mune || 19 ||
[Analyze grammar]

dharmapatnyo mune tvetāstāsvapatyāni me śṛṇu |
viśvedevāstu viśvāyāssādhyānsādhyā vyajāyata || 20 ||
[Analyze grammar]

marutvatyāṃ marutvaṃto vasostu vasavastathā |
bhānostu bhānavassarve muhūrtāyāṃ muhūrtajāḥ || 21 ||
[Analyze grammar]

lambāyāścaiva ghoṣo'tha nāgavīthī ca yāmijā |
pṛthivī viṣamastasyāmarundhatyāmajāyata || 22 ||
[Analyze grammar]

saṃkalpāyāstu satyātmā jajñe saṃkalpa eva hi |
ayādayā vasoḥ putrā aṣṭau tāñchṛṇu śaunaka || 23 ||
[Analyze grammar]

ayo dhuvaśca somaśca dharaścaivānilo'nalaḥ |
pratyūṣaśca prabhāsaśca vasavā'ṣṭā ca nāmataḥ || 24 ||
[Analyze grammar]

ayasya putro vaitaṇḍaḥ śramaḥ śāṃto munistathā |
dhruvasya putro bhagavānkālo lokabhāvanaḥ || 25 ||
[Analyze grammar]

somasya bhagavānvarcā varcasvī yena jāyate |
dharasya putro draviṇo hutahavyavahastathā || 26 ||
[Analyze grammar]

manoharāyāśśiśiraḥ prāṇo'tha ramaṇastathā |
anilasya śivā bhāryyā yasyāḥ putrāḥ purojavaḥ || 27 ||
[Analyze grammar]

avijñātagatiścaiva dvau putrāvanilasya tu |
agniputraḥ kumārastu śarastambe śriyāvṛte || 28 ||
[Analyze grammar]

tasya śākho viśākhaśca naigameyaśca pṛṣṭhataḥ |
apatyaṃ kṛttikānāṃ tu kārtikeya iti smṛtaḥ || 29 ||
[Analyze grammar]

pratyūṣasya tvabhūtputra ṛṣirnāmnā tu devalaḥ |
dvau putrau devalasyāpi prajāvantau manīṣiṇau || 30 ||
[Analyze grammar]

bṛhaspate tu bhaginī varastrī brahmacāriṇī |
yogasiddhā jagatkṛtsnaṃ samaṃtādvyacarattadā || 31 ||
[Analyze grammar]

prabhāsasya tu sā bhāryyā vasūnāmaṣṭamasya ca |
viśvakarmā mahābhāga tasya jajñe prajāpatiḥ || 32 ||
[Analyze grammar]

kartā śilpasahasrāṇāṃ tridaśānāṃ ca vārddhakiḥ |
bhūṣaṇānāṃ ca sarveṣāṃ kartā śilpavatāṃ varaḥ || 33 ||
[Analyze grammar]

yassarvāsāṃ vimānāni devatānāṃ cakāra ha |
manuṣyāścopajīvanti yasya śilpaṃ mahātmanaḥ || 34 ||
[Analyze grammar]

matāṃtaramāha |
raivato'jo bhavo bhīmo vāma ugro vṛṣākapiḥ |
ajaikapādahirbudhnyo bahurūpo mahāniti || 39 ||
[Analyze grammar]

sarūpāyāṃ prasūtasya striyāṃ rudraśca koṭiśaḥ |
tatraikādaśamukhyāstu tannāmāni mune śṛṇu || 36 ||
[Analyze grammar]

ajaikapādahirbudhnyastvaṣṭā rudraśca vīryavān |
haraśca bahurūpaśca tryambakaścāparājitaḥ || 37 ||
[Analyze grammar]

vṛṣākapiśca śambhuśca kapardī raivatastathā |
ekādaśaite kathitā rudrāstribhuvaneśvarāḥ || 38 ||
[Analyze grammar]

śataṃ tvevaṃ samākhyātaṃ rudrāṇāmamitaujasām |
śṛṇu kaśyapapatnīnāṃ nāmāni munisattama || 39 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ sargavarṇanaṃ nāmaika'triṃśodhyāyaḥ || 31 ||
[Analyze grammar]