Chapter 30

[English text for this chapter is available]

sūta uvāca |
saṃsṛṣṭāsu prajāsveva āpavo'tha prajāpratiḥ |
lebhe vai puruṣaḥ patnīṃ śatarūpāmayo nijām || 1 ||
[Analyze grammar]

āpavasya mahimnā tu divamāvṛtya tiṣṭhataḥ |
dharmeṇaiva mahātmā sa śatarūpāpyajāyata || 2 ||
[Analyze grammar]

sā tu varṣaśataṃ taptvā tapaḥ paramaduścaram |
bhartāraṃ dīptatapasaṃ puruṣaṃ pratyapadyata || 3 ||
[Analyze grammar]

sa vai svāyaṃbhuvo jajñe puruṣo manurucyate |
tasyaikasaptatiyugaṃ manvaṃtaramihocyate || 4 ||
[Analyze grammar]

vairājātpuruṣādvīrā śatarūpā vyajāyata |
priyavratottānapādau vīrakāyāmajāyatām || 5 ||
[Analyze grammar]

kāmyā nāma mahābhāgā kardamasya prajāpateḥ |
kāmyāputrāstrayastvāsansamrāṭsākṣiraviṭprabhuḥ || 6 ||
[Analyze grammar]

uttānapādo'janayatputrāñchakrasamānprabhuḥ |
dhruvaṃ ca tanayaṃ divyamātmānaṃdasuvarcasam || 7 ||
[Analyze grammar]

dharmasya kanyā suśroṇī sunītirnāma viśrutā |
utpannā cāpi dharmmeṇa dhuvasya jananī tathā || 8 ||
[Analyze grammar]

dhruvo varṣasahasrāṇi trīṇi divyāni kānane |
tapastepe sa bālastu prārthayansthānamavyayam || 9 ||
[Analyze grammar]

tasmai brahmā dadau prītassthānamātmasamaṃ prabhuḥ |
acalaṃ caiva puratassaptarṣīṇāṃ prajāpatiḥ || 10 ||
[Analyze grammar]

tasmātpuṣṭiśca dhānyaśca dhruvātputrau vyajāyatām |
puṣṭirevaṃ samutthāyāḥ pañcaputrānakalmaṣān || 11 ||
[Analyze grammar]

ripuṃ ripuṃjayaṃ vipraṃ vṛkalaṃ vṛṣatejasam |
riporevaṃ ca mahiṣī cākṣuṣaṃ sarvatodiśam || 12 ||
[Analyze grammar]

ajījanatpuṣkariṇyāṃ varuṇaṃ cākṣuṣo manuḥ |
manorajāyanta daśa naḍvalāyāṃ mahaujasaḥ || 13 ||
[Analyze grammar]

kanyāyāṃ hi muniśreṣṭha vaiśyajanma prajāyateḥ |
pururmāsaḥ śatadyumnastapasvī satyavitkaviḥ || 14 ||
[Analyze grammar]

agniṣṭomo'tirātraścātimanyussuyaśā daśa |
pūrorajanayatputrānṣaḍāgneyī mahāprabhān || 15 ||
[Analyze grammar]

aṅgaṃ sumanasaṃ khyātiṃ sṛtimaṃgirasaṃ gayam |
aṅgātsunīthā bhāryyā vai venamekamasūyata || 16 ||
[Analyze grammar]

apacāreṇa venasya kopasteṣāṃ mahānabhūt |
huṃkāreṇaiva taṃ jaghnurmunayo dharmatatparāḥ || 17 ||
[Analyze grammar]

atha prajārthamṛṣayaḥ prārthitāśca sunīthayā |
sārasvatāstadā tasya mamaṃthurdakṣiṇaṃ karam || 18 ||
[Analyze grammar]

venasya pāṇau mathite saṃbabhūva tataḥ pṛthuḥ |
sa dhanvī kavacī jātastejasādityasannibhaḥ || 19 ||
[Analyze grammar]

avatārasya viṣṇorhi prajāpālanahe tave |
dharmasaṃrakṣaṇārthāya duṣṭānāṃ daṃḍahetave || 20 ||
[Analyze grammar]

pṛthurvainyastadā pṛdhvīmarakṣatkṣatrapūrvajaḥ |
rājasūyābhiṣiktānāmādyassa vasudhāpatiḥ || 21 ||
[Analyze grammar]

tasmāccaiva samutpannau nipuṇau sūtamāgadhau |
teneyaṃ gaurmuniśreṣṭha dugdhā sarvahitāya vai || 22 ||
[Analyze grammar]

sarveṣāṃ vṛttidaścābhūddevarṣisura rakṣasām |
manuṣyāṇāṃ viśeṣeṇa śatayajñakaro nṛpaḥ || 23 ||
[Analyze grammar]

pṛthoḥ putrau tu jajñāte dharmajñau bhuvi pārthivau |
vijitāśvaśca haryakṣo mahāvīrau suviśrutau || 24 ||
[Analyze grammar]

śikhaṃḍinī cājanayatputraṃ prācīnabarhiṣam |
prācīnāgrāḥ kuśāstasya pṛthivītalacāriṇaḥ || 25 ||
[Analyze grammar]

samudratanayā tena dharmatassuvivāhitā |
reje'dhikataraṃ rājā kṛtadāro mahāprabhuḥ || 26 ||
[Analyze grammar]

samudratanayāyāstu daśa prācīnabarhiṣaḥ |
babhūvustanayā divyā bahuyajñakarasya vai || 27 ||
[Analyze grammar]

sarve prācetasā nāmnā dhanurvedasya pāragāḥ |
apṛthagdharmācaraṇāste'tapyaṃta mahattapaḥ || 28 ||
[Analyze grammar]

daśavarṣasahasrāṇi samudrasalileśayāḥ |
rudragītaṃ japaṃtaśca śivadhyānaparāyaṇāḥ || 29 ||
[Analyze grammar]

tapaścaratsu pṛthivyāmabhavaṃśca mahīruhāḥ |
arakṣyamāṇāyāṃ pṛthvyāṃ babhūvātha prajākṣayaḥ || 30 ||
[Analyze grammar]

tāndṛṣṭvā tu nivṛttāste tapaso labdhasadvarāḥ |
cukrudhurmuniśārdūla dagdhukāmā stapobalāḥ || 31 ||
[Analyze grammar]

prācetasā mukhebhyaste prāsṛjannagnimārutau |
vṛkṣānunmūlya vāyustānadahaddhavyavāhanaḥ || 32 ||
[Analyze grammar]

vṛkṣakṣayaṃ tato dṛṣṭvā kiṃciccheṣeṣu śākhiṣu |
upagamyābravīdetānrājā somaḥ pratāpavān || 33 ||
[Analyze grammar]

soma uvāca |
kopaṃ yacchata rājānassarve prācīnabarhiṣaḥ |
anubhūtānukanyeyaṃ vṛkṣāṇāṃ varavarṇinī || 34 ||
[Analyze grammar]

bhaviṣyaṃ jānatā sā tu dhṛtā garbheṇa vai mayā |
bhāryyā vo'stu mahābhāgāssomavaṃśavivarddhinī || 35 ||
[Analyze grammar]

asyāmutpatsyate vidvāndakṣo nāma prajāpatiḥ |
sṛṣṭikartā mahātejā brahmaputraḥ purātanaḥ || 36 ||
[Analyze grammar]

yuṣmākaṃ tejasārddhena mama cānena tejasā |
brahmatejomayo bhūpaḥ prajā saṃvarddhayiṣyati || 37 ||
[Analyze grammar]

tatassomasya vacanājjagṛhuste pracetasaḥ |
bhāryyāṃ dharmeṇa tāṃ prītyā vṛkṣajāṃ varavarṇinīm || 38 ||
[Analyze grammar]

tebhyastasyāstu saṃjajñe dakṣo nāma prajāpatiḥ |
so'pi jajñe mahātejāssomasyāṃśena vai mune || 39 ||
[Analyze grammar]

acarāṃśca carāṃścaiva dvipado'tha catuṣpadaḥ |
saṃsṛjya manasā dakṣo maithunīṃ sṛṣṭimārabhat || 40 ||
[Analyze grammar]

vīraṇasya sutāṃ nāmnā vīraṇīṃ sa prajāpateḥ |
upayeme suvidhinā sudharmeṇa pativratām || 41 ||
[Analyze grammar]

haryyaśvānayutaṃ tasyāṃ sutānpuṇyānajījanat |
te viraktā babhūvuśca nāradasyopadeśataḥ || 42 ||
[Analyze grammar]

tacchutvā sa punardakṣassubalāśvānajījanat |
nāmatastanayāṃstasyāṃ sahasraparisaṃkhyayā || 43 ||
[Analyze grammar]

te'pi bhrātṛpathā yātāstanmunerupadeśataḥ |
nāgamanpitṛsānnidhyaṃ viraktā bhikṣumārgiṇaḥ || 44 ||
[Analyze grammar]

tacchrutvā śāpamākruddho munaye dussahaṃ dadau |
kutracinna labhasveti saṃsthitiṃ kalahapriya || 45 ||
[Analyze grammar]

sāṃtvito'tha vidhātrā hi sa paścādasṛjatstriyaḥ |
mahājvālāsvarūpeṇa guṇaiścāpi munīśvaraḥ || 46 ||
[Analyze grammar]

dadau sa daśa dharmāya kaśyapāya trayodaśa |
dve caivaṃ brahmaputrāya dve caivāṅgirase tadā || 47 ||
[Analyze grammar]

dve kṛśāśvāya viduṣe munaye munisattama |
śiṣṭāssomāya dakṣo'pi nakṣatrākhyā dadau prabhuḥ || 48 ||
[Analyze grammar]

tābhyo dakṣasya putrībhyo jātā devāsurādayaḥ |
bahavastanayā khyātāstaissarvaiḥ pūritaṃ jagat || 49 ||
[Analyze grammar]

tataḥ prabhṛti viprendra prajā maithunasaṃbhavāḥ |
saṃkalpāddarśanātsparśātpūrveṣāṃ sṛṣṭirucyate || 50 ||
[Analyze grammar]

|| śaunaka uvāca |
aṃguṣṭhādbrahmaṇo jajñe dakṣaścoktastvayā purā |
kathaṃ prācetasatvaṃ hi punarlebhe mahātapāḥ || 51 ||
[Analyze grammar]

etaṃ me saṃśayaṃ sūta pratyākhyātuṃ tvamarhasi |
citrametatsa somasya kathaṃ śvaśuratāṃ gataḥ || 52 ||
[Analyze grammar]

|| sūta uvāca |
utpattiśca nirodhaśca nityaṃ bhūteṣu vartate |
kalpekalpe bhavaṃtyete sarve dakṣādayo mune || 53 ||
[Analyze grammar]

imāṃ visṛṣṭiṃ dakṣasya yo vidyātsacarācarām |
prajāvānāyuṣā pūrṇassvargaloke mahīyate || 54 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ sargavarṇanaṃ nāma triṃśo'dhyāyaḥ || 30 ||
[Analyze grammar]