Chapter 2

[English text for this chapter is available]

sanatkumāra uvāca |
ityākarṇya munervākyamupamanyormahātmanaḥ |
jātabhaktirmahādeve kṛṣṇaḥ provāca taṃ munim || 1 ||
[Analyze grammar]

|| śrīkṛṣṇa uvāca |
upamanyo mune tāta kṛpāṃ kuru mamopari |
ye ye śivaṃ samārādhya kāmānāpuśca tānvada || 2 ||
[Analyze grammar]

sanatkumāra uvāca |
ityākarṇyopamanyussa muniśśaivavaro mahān |
kṛṣṇavākyaṃ supraśasya pratyuvāca kṛpānidhiḥ || 3 ||
[Analyze grammar]

upamanyuruvāca |
yairyairbhavārādhanataḥ prāpto hṛtkāma eva hi |
tāṃstānbhaktānpravakṣyāmi śṛṇu tvaṃ vai yadūdvaha || 4 ||
[Analyze grammar]

śarvātsarvāmaraiśvaryyaṃ hiraṇyakaśipuḥ purā |
varṣāṇāṃ daśalakṣāṇi so'labhaccandraśekharāt || 5 ||
[Analyze grammar]

tasyā'tha putrapravaro nandano nāma viśrutaḥ |
sa ca śarvavarādindraṃ varṣāyutamadhonayat || 6 ||
[Analyze grammar]

viṣṇucakraṃ ca taddhoraṃ vajramākhaṇḍalasya ca |
śīrṇaṃ purā'bhavatkṛṣṇa tadaṃgeṣu mahāhave || 7 ||
[Analyze grammar]

na śastrāṇi vahaṃtyaṃge dharmatastasya dhīmataḥ |
grahasyātibalasyājau cakravajramukhānyapi || 8 ||
[Analyze grammar]

ardyamānāśca vibudhā graheṇa subalīyasā |
devadattavarā jaghnurasurendrāssurānbhṛśam || 9 ||
[Analyze grammar]

tuṣṭo vidyutprabhasyāpi trailokyeśvaratā madāt |
śatavarṣasahasrāṇi sarvalokeśvaro bhavaḥ || 10 ||
[Analyze grammar]

tathā putrasahasrāṇāmayutaṃ ca dadau śivaḥ |
mama cānucaro nityaṃ bhaviṣyasyabravīditi || 11 ||
[Analyze grammar]

kuśadvīpe śubhaṃ rājyamadadādbhagavānbhavaḥ |
sa tasmai śaṅkaraḥ prītyā vāsudeva prahṛṣṭadhīḥ || 12 ||
[Analyze grammar]

dhātrā sṛṣṭaśśatamakho daityo varṣaśataṃ purā |
tapaḥ kṛtvā sahasraṃ tu putrāṇāmalabhadbhavāt || 13 ||
[Analyze grammar]

yājñavalkya iti khyāto gīto vedeṣu vai muniḥ |
ārādhya sa mahādevaṃ prāptavāñjñānamuttamam || 14 ||
[Analyze grammar]

vedavyāsastu yo nāmnā prāptavānatulaṃ yaśaḥ |
so'pi śaṃkaramārādhya trikālajñānamāptavān || 15 ||
[Analyze grammar]

indreṇa vālakhilyāste paribhūtāstu śaṅkarāt |
lebhire somahartāraṃ garuḍaṃ sarvadurjayam || 16 ||
[Analyze grammar]

āpaḥ pranaṣṭāḥ sarvāśca pūrvaroṣātkaparddinaḥ |
śarvaṃ samakapālena devairiṣṭvā pravartitam || 17 ||
[Analyze grammar]

atrerbhāryyā cānasūyā trīṇi varṣaśatāni ca |
muśaleṣu nirāhārā suptvā śarvāttatassutān || 18 ||
[Analyze grammar]

dattātreyaṃ muniṃ lebhe candraṃ durvāsasaṃ tathā |
gaṃgāṃ pravartayāmāsa citrakūṭe pativratā || 19 ||
[Analyze grammar]

vikarṇaśca mahādevaṃ tathā bhaktasukhāvaham |
prasādya mahatīṃ siddhimāptavānmadhusūdana || 20 ||
[Analyze grammar]

citraseno nṛpaśśaṃbhuṃ prasādya dṛḍhabhaktimān |
samastanṛpabhītibhyo'bhayaṃ prāpātulaṃ ca kam || 21 ||
[Analyze grammar]

śrīkaro gopikāsūnurnṛpapūjāvilokanāt |
jātabhaktirmahādeve paramāṃ siddhimāptavān || 22 ||
[Analyze grammar]

citrāṅgado nṛpasutassīmantinyāḥ patirhare |
śivānugrahato magno yamunāyāṃ mṛto na hi || 23 ||
[Analyze grammar]

sa ca takṣālayaṃ gatvā tanmaitrīṃ prāpya suvrataḥ |
āyātaḥ svagṛhaṃ prīto nānādhanasamanvitaḥ || 24 ||
[Analyze grammar]

sīmaṃtinī priyā tasya somavrataparāyaṇā |
śivānugrahataḥ kṛṣṇa lebhe saubhāgyamuttamam || 25 ||
[Analyze grammar]

tatprabhāvādvrate tasminneko dvijasutaḥ purā |
kaścitstrītvaṃ gato lobhātkṛtadārākṛtiśchalāt || 26 ||
[Analyze grammar]

caṃcukā puṃścalī duṣṭā gokarṇe dvijataḥ purā |
śrutvā dharmakathāṃ śaṃbhorbhaktyā prāpa parāṃ gatim || 27 ||
[Analyze grammar]

svastryanugrahataḥ pāpī biṃdugo caṃcukāpatiḥ |
śrutvā śivapurāṇaṃ sa sadgatiṃ prāpa śāṃkarīm || 28 ||
[Analyze grammar]

piṃgalā gaṇikā khyātā madarāhvo dvijādhamaḥ |
śaivamṛṣabhamabhyarcya lebhāte sadgatiṃ ca tau || 29 ||
[Analyze grammar]

mahānandābhidhā kaścidveśyā śivapadādṛtā |
dṛḍhātpaṇātsuprasādya śivaṃ lebhe ca sadgatim || 30 ||
[Analyze grammar]

kaikeyī dvijabālāḥ ca sādarāhvā śivavratā |
paramaṃ hi sukhaṃ prāpa śiveśavratadhāraṇāt || 31 ||
[Analyze grammar]

vimarṣaṇaśca nṛpatiśśivabhaktiṃ vidhāya vai |
gatiṃ lebhe parāṃ kṛṣṇa śivānugrahataḥ purā || 32 ||
[Analyze grammar]

durjanaśca nṛpaḥ pāpī bahustrīlaṃpaṭaḥ khalaḥ |
śivabhaktyā śivaṃ prāpa nirliptaḥ sarvakarmasu || 33 ||
[Analyze grammar]

sastrīkaśśabaro nāmnā śaṃkaraśca śivavratī |
citābhasmarato bhaktyā lebhe tadgatimuttamām || 34 ||
[Analyze grammar]

sauminī nāma cāṇḍālī saṃpūjyājñānato hi sā |
lebhe śaivīṃ gatiṃ kṛṣṇa śaṃkarānugrahātparāt || 35 ||
[Analyze grammar]

mahākālābhidho vyādho kirātaḥ parahiṃsakaḥ |
samabhyarcya śivaṃ bhaktyā lebhe sadgatimuttamām || 36 ||
[Analyze grammar]

durvāsā muniśārdūlaśśivānugrahataḥ purā |
tastāra svamataṃ loke śivabhaktiṃ vimuktidām || 37 ||
[Analyze grammar]

kauśikaśca samārādhya śaṃkaraṃ loka śaṃkaram |
brāhmaṇo'bhūtkṣatriyaśca dvitīya iva padmabhūḥ || 36 ||
[Analyze grammar]

śivamabhyarcya sadbhaktyā viraṃciśśaivasattamaḥ |
abhūtsargakaraḥ kṛṣṇa sarvalokapitāmahaḥ || 39 ||
[Analyze grammar]

mārkaṇḍeyo munivaraściraṃjīvī mahāprabhuḥ |
śivabhaktavaraḥ śrīmāñśivānugrahato hare || 40 ||
[Analyze grammar]

devendro hi mahāśaivastrailokyaṃ bubhuje purā |
śivānugrahataḥ kṛṣṇa sarvadevādhipaḥ prabhuḥ || 41 ||
[Analyze grammar]

baliputro mahāśaivaśśivānugrahato vaśī |
bāṇo babhūva brahmāṇḍanāyakassakaleśvaraḥ || 42 ||
[Analyze grammar]

hariśśaktiśca sadbhaktyā dadhīcaśca maheśvaraḥ |
śivānugrahato'bhūvaṃstathā rāmo hi śāṃkaraḥ || 43 ||
[Analyze grammar]

kaṇādo bhārgavaścaiva gururgautama eva ca |
śivabhaktyā babhūvuste mahāprabhava īśvarā || 44 ||
[Analyze grammar]

śākalyaśśaṃsitātmā ca navavarṣaśātānyapi |
bhavamārādhayāmāsa manoyajñena mādhava || 45 ||
[Analyze grammar]

tutoṣa bhagavānāha graṃthakartā bhaviṣyasi |
vatsākṣayyā ca te kīrtistrailokye prabhaviṣyati || 46 ||
[Analyze grammar]

akṣayaṃ ca kulaṃ te'stu maharṣibhiralaṃkṛtam |
bhaviṣyasi ṛṣiśreṣṭha sūtrakartā tatastataḥ || 47 ||
[Analyze grammar]

ityevaṃ śaṃkarātprāpa varaṃ munivarassa vai |
trailokye vitataścāsītpūjyaśca yadunandana || 48 ||
[Analyze grammar]

sāvarṇiriti vikhyāta ṛṣirāsītkṛte yuge |
iha tena tapastaptaṃ ṣaṣṭivarṣaśatāni ca || 49 ||
[Analyze grammar]

tamāha bhagavānrudrassākṣāttuṣṭosmi te'nagha |
graṃthakṛllokavikhyāto bhavitāsyajarāmaraḥ || 50 ||
[Analyze grammar]

evaṃvidho mahādevaḥ puṇyapūrvataraistataḥ |
samarccitaśśubhānkāmānpradadāti yathepsitān || 51 ||
[Analyze grammar]

ekenaiva mukhenāhaṃ vaktuṃ bhagavato guṇāḥ |
ye saṃti tānna śaknomi hyapi varṣaśatairapi || 52 ||
[Analyze grammar]

iti śrīśivamahāpurāṇe paṃcamyāmumāsaṃhitāyāṃ sanatkumāravyāsasaṃvāde upamanyūpadeśo nāma dvitīyo'dhyāyaḥ || 2 ||
[Analyze grammar]