Chapter 40

[English text for this chapter is available]

ṛṣaya ūcuḥ |
sūta te vacanaṃ śrutvā parānandaṃ vayaṃ gatāḥ |
vistarātkathaya prītyā tadeva vratamuttamam || 1 ||
[Analyze grammar]

kṛtaṃ purā tu keneha sūtaitadvratamuttamam |
kṛtvāpyajñānataścaiva prāptaṃ kiṃ phalamuttamam || 2 ||
[Analyze grammar]

|| sūta uvāca |
śrūyatāmṛṣayassarve kathayāmi purātanam |
itihāsaṃ niṣādasya sarvapāpapraṇāśanam || 3 ||
[Analyze grammar]

purā kaścidvane bhillo nāmnā hyāsīdgurudruhaḥ |
kuṭumbī balavānkrūraḥ krūrakarmaparāyaṇaḥ || 4 ||
[Analyze grammar]

nirantaraṃ vane gatvā mṛgānhanti sma nityaśaḥ |
cauryyaṃ ca vividhaṃ tatra karoti sma vane vasan || 5 ||
[Analyze grammar]

bālyādārabhya teneha kṛtaṃ kiṃcicchubhaṃ nahi |
mahānkālo vyatīyāya vane tasya durātmanaḥ || 6 ||
[Analyze grammar]

kadācicchivarātriśca prāptāsīttatra śobhanā |
na durātmā sma jānāti mahadvananivāsakṛt || 7 ||
[Analyze grammar]

etasminsamaye bhillo mātrā pitrā striyā tathā |
prārthitaśca kṣudhā'viṣṭairbhakṣyaṃ dehi vanecara || 8 ||
[Analyze grammar]

iti saṃprārthitaḥ so'pi dhanurādāya satvaram |
jagāma mṛgahiṃsārthaṃ babhrāma sakalaṃ vanam || 9 ||
[Analyze grammar]

daivayogāttadā tena na prāptaṃ kiṃcideva hi |
astaprāptastadā sūryassa vai duḥkhamupāgataḥ || 10 ||
[Analyze grammar]

kiṃ kartavyaṃ kva gaṃtavyaṃ na prāptaṃ me'dya kiṃcana |
bālāśca ye gṛhe teṣāṃ kiṃ pitrośca bhaviṣyati || 11 ||
[Analyze grammar]

madīyaṃ vai kalatraṃ ca tasyāḥ kiṃcidbhaviṣyati |
kiṃcidgṛhītvā hi mayā gaṃtavyaṃ nānyathā bhavet || 12 ||
[Analyze grammar]

itthaṃ vicārya sa vyādho jalāśaya samīpagaḥ |
jalāvataraṇaṃ yatra tatra gatvā svayaṃ sthitaḥ || 13 ||
[Analyze grammar]

avaśyamatra kaścidvai jīvaścaivāgamiṣyati |
taṃ hatvā svagṛhaṃ prītyā yāsyāmi kṛtakāryakaḥ || 14 ||
[Analyze grammar]

iti matvā sa vai vṛkṣamekaṃ bilvetisaṃjñakam |
samāruhya sthitastatra jalamādāya bhillakaḥ || 15 ||
[Analyze grammar]

kadā yāsyati kaścidvai kadā hanyāmahaṃ punaḥ |
iti buddhiṃ samāsthāya sthito'sau kṣuttṛṣānvitaḥ || 16 ||
[Analyze grammar]

tadrātrau prathame yāme mṛgī tvekā samāgatā |
tṛṣārtā cakitā sā ca protphālaṃ kurvatī tadā || 17 ||
[Analyze grammar]

tāṃ dṛṣṭvā ca tadā tena tadvadhārthamatho śaraḥ |
saṃhṛṣṭena drutaṃ viṣṇo dhanuṣi sve hi saṃdadhe || 18 ||
[Analyze grammar]

ityevaṃ kurvatastasya jalaṃ bilvadalāni ca |
patitāni hyadhastatra śivaliṃgamabhūttataḥ || 19 ||
[Analyze grammar]

yāmasya prathamasyaiva pūjā jātā śivasya ca |
tanmahimnā hi tasyaiva pātakaṃ galitantadā || 20 ||
[Analyze grammar]

tatratyaṃ caiva tacchabdaṃ śrutvā sā hariṇī bhiyā |
vyādhaṃ dṛṣṭvā vyākulā hi vacanaṃ cedamabravīt || 21 ||
[Analyze grammar]

||mṛgyuvāca |
kiṃ kartumicchasi vyādha satyaṃ vada mamāgrataḥ |
tacchutvā hariṇīvākyaṃ vyādho vacanamabravīt || 22 ||
[Analyze grammar]

||vyādha uvāca |
kuṭumbaṃ kṣudhitaṃ me'dya hatvā tvāṃ tarpayāmyaham |
dāruṇaṃ tadvacaśśrutvā dṛṣṭvā taṃ durddharaṃ khalam || 23 ||
[Analyze grammar]

kiṃ karomi kva gacchāmi hyupāyaṃ racayāmyaham |
itthaṃ vicāryaṃ sā tatra vacanaṃ cedamabravīt || 24 ||
[Analyze grammar]

|| mṛgyuvāca |
manmāṃsena sukhaṃ te syāddehasyānarthakāriṇaḥ |
adhikaṃ kiṃ mahatpuṇyaṃ dhanyāhaṃ nātra saṃśayaḥ || 25 ||
[Analyze grammar]

upakārakarasyaiva yatpuṇyaṃ jāyate tviha |
tatpuṇyaṃ śakyate naiva vaktuṃ varṣaśatairapi || 25 ||
[Analyze grammar]

paraṃ tu śiśavo me'dya vartaṃte svāśrame'khilāḥ |
bhaginyai tānsamarpyaiva prāyāsye svāmine'tha vā || 27 ||
[Analyze grammar]

na me mithyāvacastvaṃ hi vijānīhi vanecara |
āyāsyeha punaśceha samīpaṃ te na saṃśayaḥ || 28 ||
[Analyze grammar]

sthitā satyena dharaṇī satyenaiva ca vāridhiḥ |
satyena jaladhārāśca satye sarvampratiṣṭhitam || 29 ||
[Analyze grammar]

|| sūta uvāca |
ityukto'pi tayā vyādho na mene tadvaco yadā |
tadā suvismitā bhītā vacanaṃ sābravītpunaḥ || 30 ||
[Analyze grammar]

mṛgyuvāca |
śṛṇu vyādha pravakṣyāmi śapathaṃ hi karomyaham |
āgaccheyaṃ yathā te na samīpaṃ svagṛhādgatā || 31 ||
[Analyze grammar]

brāhmaṇo vedavikretā sandhyāhīnastrikālakam |
striyassvasvāmino hyājñāṃ samullaṃghya kriyānvitāḥ || 32 ||
[Analyze grammar]

kṛtaghne caiva yatpāpaṃ tatpāpaṃ vimukhe hare |
drohiṇaścaiva yatpāpaṃ tatpāpaṃ dharmalaṃghane || 33 ||
[Analyze grammar]

viśvāsaghātake tacca tathā vai chalakartari |
tena pāpena limpāmi yadyahaṃ nāgame punaḥ || 34 ||
[Analyze grammar]

ityādyanekaśapathānmṛgī kṛtvā sthitā yadā |
tadā vyādhasya viśvasya gaccheti gṛhamabravīt || 35 ||
[Analyze grammar]

mṛgī hṛṣṭājalaṃ pītvā gatā svāśramamaṇḍalam |
tāvacca prathamo yāmastasya nidrāṃ vinā gataḥ || 36 ||
[Analyze grammar]

tadīyā bhaginī yā vai mṛgī ca paribhāvitā |
tasyā mārgaṃ vicinvantī hyājagāma jalārthinī || 37 ||
[Analyze grammar]

tāṃ dṛṣṭvā ca svayaṃ bhillo'kārṣīdbāṇasya karṣaṇam |
pūrvavajjalapatrāṇi patitāni śivopari || 38 ||
[Analyze grammar]

yāmasya ca dvitīyasya tena śaṃbhormahātmanaḥ |
pūjā jātā prasaṃgena vyādhasya sukhadāyinī || 39 ||
[Analyze grammar]

mṛgī sā prāha taṃ dṛṣṭvā kiṃ karoṣi vanecara |
pūrvavatkathitaṃ tena tacchrutvāha mṛgī punaḥ || 40 ||
[Analyze grammar]

mṛgyuvāca |
dhanyāhaṃ śrūyatāṃ vyādha saphalaṃ dehadhāraṇam |
anityena śarīreṇa hyupakāro bhaviṣyati || 41 ||
[Analyze grammar]

parantu mama bālāśca gṛhe tiṣṭhanti cārbhakāḥ |
bhartre tāṃśca samarpyaiva hyāgamiṣyāmyahaṃ punaḥ || 42 ||
[Analyze grammar]

vyādha uvāca |
tvayā coktaṃ na manyehaṃ hanmi tvāṃ nātra saṃśayaḥ |
tacchutvā hariṇī prāha śapathaṃ kurvatī hare || 43 ||
[Analyze grammar]

mṛgyuvāca |
śṛṇu vyādha pravakṣyāmi nāgaccheyaṃ punaryadi |
vācā vicalito yastu sukṛtaṃ tena hāritam || 44 ||
[Analyze grammar]

pariṇītā striyaṃ hitvā gacchatyanyāṃ ca yaḥ pumān |
vedadharmaṃ samullaṃghya kalpitena ca yo vrajet || 45 ||
[Analyze grammar]

viṣṇubhaktisamāyuktaḥ śivanindāṃ karoti yaḥ |
pitroḥ kṣayāhamāsādya śūnyaṃ caivākramediha || 46 ||
[Analyze grammar]

kṛtvā ca pāratāpaṃ hi karoti vacanaṃ punaḥ |
tena pāpena liṃpāmi nāgaccheyaṃ punaryadi || 47 ||
[Analyze grammar]

sūta uvāca || |
ityuktaśca tayā vyādho gacchetyāha mṛgīṃ ca saḥ |
sā mṛgī ca jalaṃ pītvā hṛṣṭā'gacchatsvamāśramam || 48 ||
[Analyze grammar]

tāvaddvitīyo yāmo vai tasya nidrāṃ vinā gataḥ |
etasminsamaye tatra prāpte yāme tṛtīyake || 49 ||
[Analyze grammar]

jñātvā vilaṃbaṃ cakitastadanveṣaṇatatparaḥ || |
tadyāme mṛgamadrākṣījjalamārgagataṃ tataḥ || 50 ||
[Analyze grammar]

puṣṭaṃ mṛgaṃ ca taṃ dṛṣṭvā hṛṣṭo vanacarassa vai |
śaraṃ dhanuṣi saṃdhāya hantuṃ taṃ hi pracakrame || 51 ||
[Analyze grammar]

tadaivaṃ kurvatastasya bilvapatrāṇi kānicit |
tatprārabdhavaśādviṣṇo patitāni śivopari || 52 ||
[Analyze grammar]

tena tṛtīyayāmasya tadrātrau tasya bhāgyataḥ |
pūjā jātā śivasyaiva kṛpālutvaṃ pradarśitam || 53 ||
[Analyze grammar]

śrutvā tatra ca taṃ śabdaṃ kiṃ karoṣīti prāha saḥ |
kuṭumbārthamahaṃ hanmi tvāṃ vyādhaśceti sobravīt || 54 ||
[Analyze grammar]

tacchrutvā vyādhavacanaṃ hariṇo hṛṣṭamānasaḥ |
drutameva ca taṃ vyādhaṃ vacanaṃ cedamabravīt || 55 ||
[Analyze grammar]

hariṇa uvāca |
dhanyohaṃ puṣṭimānadya bhavattṛptirbhaviṣyati |
yasyāṃgaṃ nopakārāya tasya sarvaṃ vṛthā gatam || 56 ||
[Analyze grammar]

yo vai sāmarthyayuktaśca nopakāraṃ karoti vai |
tatsāmarthyaṃ bhavedvyarthaṃ paratra narakaṃ vrajet || 57 ||
[Analyze grammar]

parantu bālakān svāṃśca samarpya jananīṃ śiśūn |
āśvāsyāpyatha tān sarvānāgamiṣyāmyahaṃ punaḥ || 58 ||
[Analyze grammar]

ityuktastena sa vyādho vismitotīva cetasi |
manāk śuddhamanānaṣṭapāpapuṃjo vaco'bravīt || 59 ||
[Analyze grammar]

vyādha uvāca |
ye ye samāgatāścātra tete sarve tvayā yathā |
kathayitvā gatā hyatra nāyāntyadyāpi vaṃcakāḥ || 60 ||
[Analyze grammar]

tvaṃ cāpi saṃkaṭe prāpto vyalīkaṃ ca gamiṣyasi |
mama sañjīvanaṃ cādya bhaviṣyati kathaṃ mṛga || 61 ||
[Analyze grammar]

mṛga uvāca |
śṛṇu vyādha pravakṣyāmi nānṛtaṃ vidyate mayi |
satyena sarvaṃ brahmāṇḍaṃ tiṣṭhatyeva carācaram || 62 ||
[Analyze grammar]

yasya vāṇī vyalīkā hi tatpuṇyaṃ galitaṃ kṣaṇāt |
tathāpi śṛṇu vai satyāṃ pratijñāṃ mama bhillaka || 63 ||
[Analyze grammar]

sandhyāyāṃ maithune ghasre śivarātryāṃ ca bhojane |
kūṭasākṣye nyāsahāre saṃdhyāhīne dvije tathā || 64 ||
[Analyze grammar]

śivahīnaṃ mukhaṃ yasya nopakartā kṣamo'pi san |
parvaṇi śrīphalasyaiva troṭane'bhakṣyabhakṣaṇe || 65 ||
[Analyze grammar]

asaṃpūjya śivaṃ bhasmarahitaścānnabhuk ca yaḥ |
eteṣāṃ pātakaṃ me syānnāgaccheyaṃ punaryadi || 66 ||
[Analyze grammar]

śiva uvāca |
iti śrutvā vacastasya gaccha śīghraṃ samāvraja |
sa vyādhenaivamuktastu jalaṃ pītvā gato mṛgaḥ || 67 ||
[Analyze grammar]

te sarve militāstatra svāśrame kṛtasupraṇāḥ |
vṛttāṃtaṃ caiva taṃ sarvaṃ śrutvā samyak parasparam || 68 ||
[Analyze grammar]

gantavyaṃ niścayeneti satyapāśena yaṃtritāḥ |
āśvāsya bālakāṃstatra gantumutkaṇṭhitāstadā || 69 ||
[Analyze grammar]

mṛgī jyeṣṭhā ca yā tatra svāminaṃ vākyamabravīt |
tvāṃ vinā bālakā hyatra kathaṃ sthāsyaṃti vai mṛga || 70 ||
[Analyze grammar]

prathamaṃ tu mayā tatra pratijñā ca kṛtā prabho |
tasmānmayā ca gantavyaṃ bhavadbhyāṃ sthīyatāmiha || 71 ||
[Analyze grammar]

iti tadvacanaṃ śrutvā kaniṣṭhā vākyamabravīt |
ahaṃ tvatsevikā cādya gacchāmi sthīyatāṃ tvayā || 72 ||
[Analyze grammar]

tacchrutvā ca mṛgaḥ prāha gamyate tatra vai mayā |
bhavatyau tiṣṭhatāṃ cātra mātṛtaḥ śiśurakṣaṇam || 73 ||
[Analyze grammar]

tatsvāmivacanaṃ śrutvā menāte tanna dharmataḥ |
procuḥ prītyā svabhartāraṃ vaidhavye jīvitaṃ ca dhik || 74 ||
[Analyze grammar]

bālānāśvāsya tāṃstatra samarpya sahavāsinaḥ |
gatāste sarva evāśu yatrāste vyādhasattamaḥ || 75 ||
[Analyze grammar]

te bālā api sarve vai vilokyānusamāgatāḥ |
eteṣāṃ yā gatiḥ syādvai hyasmākaṃ sā bhavatviti || 76 ||
[Analyze grammar]

tān dṛṣṭvā harṣito vyādho bāṇaṃ dhanuṣi saṃdadhe |
punaśca jalapatrāṇi patitāni śivopari || 77 ||
[Analyze grammar]

tena jātā caturthasya pūjā yāmasya vai śubhā |
tasya pāpantadā sarvaṃ bhasmasādabhavat kṣaṇāt || 78 ||
[Analyze grammar]

mṛgī mṛgī mṛgaścocuśśīghraṃ vai vyādhasattama |
asmākaṃ sārthakaṃ dehaṃ kuru tvaṃ hi kṛpāṃ kuru || 79 ||
[Analyze grammar]

|| śiva uvāca |
iti teṣāṃ vacaśśrutvā vyādho vismayamāgataḥ |
śivapūjāprabhāveṇa jñānaṃ durlabhamāptavān || 80 ||
[Analyze grammar]

ete dhanyā mṛgāścaiva jñānahīnāssusaṃmatāḥ |
svīyenaiva śarīreṇa paropakaraṇe ratāḥ || 81 ||
[Analyze grammar]

mānuṣyaṃ janma saṃprāpya sādhitaṃ kiṃ mayādhunā |
parakāyaṃ ca saṃpīḍya śarīraṃ poṣitaṃ mayā || 82 ||
[Analyze grammar]

kuṭumbaṃ poṣitaṃ nityaṃ kṛtvā pāpānyanekaśaḥ |
evaṃ pāpāni hā kṛtvā kā gatirme bhaviṣyati || 23 ||
[Analyze grammar]

kāṃ vā gatiṃ gamiṣyāmi pātakaṃ janmataḥ kṛtam |
idānīṃ ciṃtayāmyevaṃ dhigdhik ca jīvanaṃ mama || 84 ||
[Analyze grammar]

iti jñānaṃ samāpanno bāṇaṃ saṃvārayaṃstadā |
gamyatāṃ ca mṛgaśreṣṭhā dhanyāḥ stha iti cābravīt || 85 ||
[Analyze grammar]

śiva uvāca |
ityukte ca tadā tena prasannaśśaṃkarastadā |
pūjitaṃ ca svarūpaṃ hi darśayāmāsa saṃmatam || 86 ||
[Analyze grammar]

saṃspṛśya kṛpayā śaṃbhustaṃ vyādhaṃ prītito'bravīt |
varaṃ brūhi prasanno'smi vratenānena bhillaka || 87 ||
[Analyze grammar]

vyādho'pi śivarūpaṃ ca dṛṣṭvā mukto'bhavatkṣaṇāt |
papāta śivapādāgre sarvaṃ prāptamiti buvan || 88 ||
[Analyze grammar]

śivo'pi suprannātmā nāma datvā guheti ca |
vilokya taṃ kṛpādṛṣṭyā tasmai divyānvarānadāt || 89 ||
[Analyze grammar]

śiva uvāca |
śṛṇu vyādhādya bhogāṃstvaṃ bhuṃkṣva divyānyathepsitān |
rājadhānīṃ samāśritya śṛṃgaverapure parām || 90 ||
[Analyze grammar]

anapāyā vaṃśavṛddhiśślāghanīyaḥ surairapi |
gṛhe rāmastava vyādha samāyāsyati niścitam || 91 ||
[Analyze grammar]

kariṣyati tvayā maitrī madbhaktasnehakārakaḥ |
matsevāsaktacetāstvaṃ muktiṃ yāsyasi durlabhām || 92 ||
[Analyze grammar]

etasminnaṃtare te tu kṛtvā śaṃkaradarśanam |
sarve praṇamya sanmuktiṃ mṛgayoneḥ prapedire || 93 ||
[Analyze grammar]

vimānaṃ ca samāruhya divyadehā gatāstadā |
śivadarśanamātreṇa śāpānmuktā divaṃ gatāḥ || 94 ||
[Analyze grammar]

vyādheśvaraḥ śivo jātaḥ parvate hyarbudācale |
darśanātpūjanātsadyo bhuktimuktipradāyakaḥ || 95 ||
[Analyze grammar]

vyādhopi taddinānnūnaṃ bhogānsa surasattama |
bhuktvā rāmakṛpāṃ prāpya śivasāyujyamāptavān || 96 ||
[Analyze grammar]

ajñānātsa vratañcaitatkṛtvā sāyujyamāptavān |
kiṃ punarbhaktisaṃpannā yānti tanmayatāṃ śubhām || 97 ||
[Analyze grammar]

vicāryya sarvaśāstrāṇi dharmāṃścaivāpyanekaśaḥ |
śivarātrivratamidaṃ sarvotkṛṣṭaṃ prakīrtitam || 98 ||
[Analyze grammar]

vratāni vividhānyatra tīrthāni vividhāni ca |
dānāni ca vicitrāṇi makhāśca vividhāstathā || 99 ||
[Analyze grammar]

tapāṃsi vividhānyeva japāścaivāpya nekaśaḥ |
naitena samatāṃ yānti śivarātrivratena ca || 100 ||
[Analyze grammar]

tasmācchubhataraṃ caitatkartavyaṃ hitamīpsubhiḥ |
śivarātrivratandivyaṃ bhukti muktipradaṃ sadā || 101 ||
[Analyze grammar]

etatsarvaṃ samākhyātaṃ śivarātrivrataṃ śubham |
vratarājeti vikhyātaṃ kimanyacchrotumicchasi || 102 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ vyādheśvaramāhātmye śivarātrivratamāhātmyavarṇanaṃ nāma catvāriṃśo'dhyāyaḥ || 40 ||
[Analyze grammar]