Chapter 28

[English text for this chapter is available]

sūta uvāca |
rāvaṇaḥ rākṣasaśreṣṭho mānī mānaparāyaṇaḥ |
ārarādha haraṃ bhaktyā kailāse parvatottame || 1 ||
[Analyze grammar]

ārādhitaḥ kiyatkālaṃ na prasanno haro yadā |
tadā cānyattapaścakre prāsādārthe śivasya saḥ || 2 ||
[Analyze grammar]

nataścāyaṃ himavatassiddhisthānasya vai gireḥ |
paulastyo rāvaṇaśśrīmāndakṣiṇe vṛkṣakhaṃḍake || 3 ||
[Analyze grammar]

bhūmau gartaṃ vara kṛtvā tatrāgniṃ sthāpya sa dvijāḥ |
tatsannidhau śivaṃ sthāpya havanaṃ sa cakāra ha || 4 ||
[Analyze grammar]

grīṣme paṃcāgnimadhyastho varṣāsu sthaṃḍileśayaḥ |
śīte jalāṃtarastho hi tridhā cakre tapaśca saḥ || 5 ||
[Analyze grammar]

cakāraivaṃ bahutapo na prasannastadāpi hi |
paramātmā maheśāno durārādhyo durātmabhiḥ || 6 ||
[Analyze grammar]

tataśśirāṃsi chittvā ca pūjanaṃ śaṃkarasya vai |
prārabdhaṃ daityapatinā rāvaṇena mahātmanā || 7 ||
[Analyze grammar]

ekaikaṃ ca śiraśchinnaṃ vidhinā śivapūjane |
evaṃ satkramatastena cchinnāni nava vai yadā || 6 ||
[Analyze grammar]

ekasminnavaśiṣṭe tu prasannaśśaṃkarastadā |
āvirbabhūva tatraiva saṃtuṣṭo bhaktavatsalaḥ || 9 ||
[Analyze grammar]

śirāṃsi pūrvavatkṛtvā nīrujāni tathā prabhuḥ |
manorathaṃ dadau tasmādatulaṃ balamuttamam || 10 ||
[Analyze grammar]

prasādaṃ tasya saṃprāpya rāvaṇassa ca rākṣasaḥ |
pratyuvāca śivaṃ śambhuṃ nataskaṃdhaḥ kṛtāṃjaliḥ || 11 ||
[Analyze grammar]

rāvaṇa uvāca |
prasanno bhava deveśa laṃkāṃ ca tvāṃ nayāmyaham |
saphalaṃ kuru me kāmaṃ tvāmahaṃ śaraṇaṃ gataḥ || 12 ||
[Analyze grammar]

sūta uvāca |
ityuktaśca tadā tena śaṃbhurvai rāvaṇena saḥ |
pratyuvāca vicetaskaḥ saṃkaṭaṃ paramaṃ gataḥ || 13 ||
[Analyze grammar]

|| śiva uvāca |
śrūyatāṃ rākṣasaśreṣṭha vaco me sāravattayā |
nīyatāṃ svagṛhe me hi sadbhaktyā liṃgamuttamam || 14 ||
[Analyze grammar]

bhūmau liṃgaṃ yadā tvaṃ ca sthāpayiṣyasi tatra vai |
sthāsyatyatra na saṃdeho yathecchasi tathā kuru || 15 ||
[Analyze grammar]

sūta uvāca |
ityuktaśśaṃbhunā tena rāvaṇo rākṣaseśvaraḥ |
tatheti tatsamādāya jagāma bhavanaṃ nijam || 16 ||
[Analyze grammar]

āsīnmūtrotsargakāmo mārge hi śivamāyayā |
tatstaṃbhituṃ na śaktobhūtpaulastyo rāvaṇaḥ prabhuḥ || 17 ||
[Analyze grammar]

dṛṣṭvaikaṃ tatra vai gopaṃ prārthya liṃgaṃ dadau ca tat |
muhūrtake hyatikrāṃte gopobhūdvikalastadā || 18 ||
[Analyze grammar]

bhūmau saṃsthāpayāmāsa tadbhāreṇātipīḍitaḥ |
tatraiva tatsthitaṃ liṃgaṃ vajasārasamudbhavam |
sarvakāmapradaṃ caiva darśanātpāpahārakam || 19 ||
[Analyze grammar]

vaidyanātheśvaraṃ nāmnā talliṃgamabhavanmune |
prasiddhaṃ triṣu lokeṣu bhuktimuktipradaṃ satām || 20 ||
[Analyze grammar]

jyotirliṃgamidaṃ śreṣṭhaṃ darśanātpūjanādapi |
sarvapāpaharaṃ divyaṃ bhuktivarddhanamuttamam || 21 ||
[Analyze grammar]

tasmiṃliṃge sthite tatra sarvalokahitāya vai |
rāvaṇaḥ svagṛhaṃ gatvā varaṃ prāpya mahottamam |
priyāyai sarvamācakhyau sukhenāti mahāsuraḥ || 22 ||
[Analyze grammar]

tacchrutvā sakalā devāśśakrādyā munayastathā |
parasparaṃ samāmantrya śivāsaktadhiyo'malāḥ || 23 ||
[Analyze grammar]

tasminkāle surāssarve haribrahmādayo mune |
ājagmustatra suprītyā pūjāṃ cakrurviśeṣataḥ || 24 ||
[Analyze grammar]

pratyakṣaṃ taṃ tadā dṛṣṭvā pratiṣṭhāpya ca te surāḥ |
vaidyanātheti saṃprocya natvā nutvā divaṃ yayuḥ || 25 ||
[Analyze grammar]

ṛṣaya ūcuḥ |
tasmiṃlliṃge sthite tatra rāvaṇe ca gṛhaṃ gate |
kiṃ ki caritramabhūttāta tatastadvada vistarāt || 26 ||
[Analyze grammar]

sūta uvāca |
rāvaṇopi gṛhaṃ gatvā varaṃ prāpya mahottamam |
priyāyai sarvamācakhyau mumodāti mahāsuraḥ || 27 ||
[Analyze grammar]

tacchrutvā sakalaṃ devāśśakrādyā munayastathā |
parasparaṃ sumūcuste samudvignā munīśvarāḥ || 28 ||
[Analyze grammar]

devādaya ūcuḥ |
rāvaṇoyaṃ durātmā hi devadrohī khalaḥ kudhīḥ |
śivādvaraṃ ca saṃprāpya duḥkhaṃ dāsyati no'pi saḥ || 29 ||
[Analyze grammar]

kiṃ kurmaḥ kva ca gacchāmaḥ kiṃ bhaviṣyati vā punaḥ |
duṣṭaśca dakṣatāṃ prāptaḥ kiṃkiṃ no sādhayiṣyati || 30 ||
[Analyze grammar]

iti duḥkhaṃ samāpannāśśakrādyā munayassurāḥ |
nāradaṃ ca samāhūya papracchurvikalāstadā || 31 ||
[Analyze grammar]

devā ūcuḥ |
sarvaṃ kāryyaṃ samarthosi kartuṃ tvaṃ munisattama |
upāyaṃ kuru devarṣe devānāṃ duḥkhanāśane || 32 ||
[Analyze grammar]

rāvaṇoyaṃ mahāduṣṭaḥ kiṃki naiva kariṣyati |
kva yāsyāmo vayaṃ cātra duṣṭenāpīḍitā vayam || 33 ||
[Analyze grammar]

nārada uvāca |
duḥkhaṃ tyajata bho devā yuktiṃ kṛtvā ca yāmyaham |
devakāryaṃ kariṣyāmi kṛpayā śaṃkarasya vai || 34 ||
[Analyze grammar]

sūta uvāca |
ityuktvā sa tu devarṣiragamadrāvaṇālayam |
satkāraṃ samanuprāpya prītyovācākhilaṃ ca tat || 35 ||
[Analyze grammar]

nārada uvāca |
rākṣasottama dhanyastvaṃ śaivavaryyastapomanāḥ |
tvāṃ dṛṣṭvā ca mano medya prasannamati rāvaṇa || 36 ||
[Analyze grammar]

svavṛttaṃ brūhyaśeṣeṇa śivārādhanasaṃbhavam |
iti pṛṣṭastadā tena rāvaṇo vākyamabravīt || 37 ||
[Analyze grammar]

rāvaṇa uvāca |
gatvā mayā tu kailāse taporthaṃ ca mahāmune |
tatraiva bahukālaṃ vai tapastaptaṃ sudāruṇam || 38 ||
[Analyze grammar]

yadā na śaṃkarastuṣṭastataśca parivartitam |
āgatya vṛkṣakhaṃḍe vai punastaptaṃ mayā mune || 39 ||
[Analyze grammar]

grīṣme paṃcāgnimadhye tu varṣāsu sthaṃḍileśayaḥ |
śīte jalāṃtarastho hi kṛtaṃ caiva tridhā tapaḥ || 40 ||
[Analyze grammar]

evaṃ mayā kṛtaṃ tatra tapotyugraṃ munīśvara |
tathāpi śaṃkaro mahyaṃ na prasanno'bhavanmanāk || 41 ||
[Analyze grammar]

tadā mayā tu kruddhena bhūmau gartaṃ vidhāya ca |
tatrāgniṃ samādhāya pārthivaṃ ca prakalpya ca || 42 ||
[Analyze grammar]

gaṃdhaiśca caṃdanaiścaiva dhūpaiśca vividhaistadā |
naivedyaiḥ pūjitaśśambhurārārtikavidhānataḥ || 43 ||
[Analyze grammar]

praṇipātaiḥ stavaiḥ puṇyaistoṣitaśśaṃkaro mayā |
gītairnṛtyaiśca vādyaiśca mukhāṃgulisamarpaṇaiḥ || 44 ||
[Analyze grammar]

etaiśca vividhaiścānyairupāyairbhūribhirmune |
śāstroktena vidhānena pūjito bhagavān haraḥ || 45 ||
[Analyze grammar]

na tuṣṭaḥ sanmukho jāto yadā ca bhagavānharaḥ |
tadāhaṃ duḥkhitobhūvaṃ tapaso'prāpya satphalam || 46 ||
[Analyze grammar]

dhik śarīraṃ balaṃ caiva dhik tapaḥ karaṇaṃ mama |
ityuktvā tu mayā tatra sthāpitegnau hutaṃ bahu || 47 ||
[Analyze grammar]

punaśceti vicāryaiva tvakṣāmyagnau nijāṃ tanum |
saṃchinnāni śirāṃsyeva tasmin prajvalite śucau || 48 ||
[Analyze grammar]

succhitvaikaikaśastāni kṛtvā śuddhāni sarvaśaḥ |
śaṃkarāyārpitānyeva navasaṃkhyāni vai mayā || 49 ||
[Analyze grammar]

yāvacca daśamaṃ chettuṃ prārabdhamṛṣisattama |
tāvadāvirabhūttatra jyotīrūpo harassvayam || 50 ||
[Analyze grammar]

māmeti vyāharat prītyā drutaṃ vai bhaktavatsalaḥ |
prasannaśca varaṃ brūhi dadāmi manasepsitam || 51 ||
[Analyze grammar]

ityukte ca tadā tena mayā dṛṣṭo maheśvaraḥ |
prāṇatassaṃstutaścaiva karau baddhvā subhaktitaḥ || 52 ||
[Analyze grammar]

tadā vṛtaṃ mayaitacca dehi me hyatulaṃ balam |
yadi prasanno deveśa durllabhaṃ kiṃ bhavenmama || 53 ||
[Analyze grammar]

śivena parituṣṭena sarvaṃ dattaṃ kṛpālunā |
mahyaṃ manobhilaṣitaṃ girā procya tathāstviti || 54 ||
[Analyze grammar]

amoghayā sudṛṣṭyā vai vaidyavadyojitāni me |
śirāṃsi saṃdhayitvā tu dṛṣṭāni paramātmanā || 55 ||
[Analyze grammar]

evaṃkṛte tadā tatra śarīraṃ pūrvavanmama |
jātaṃ tasya prasādācca sarvaṃ prāptaṃ phalaṃ mayā || 56 ||
[Analyze grammar]

tadā ca prārthito me saṃsthitosau vṛṣabhadhvajaḥ |
vaidyanātheśvaro nāmnā prasiddhobhūjjagattraye || 57 ||
[Analyze grammar]

darśanātpūjanājjyotirliṃgarūpo maheśvaraḥ |
bhuktimuktiprado loke sarveṣāṃ hitakārakaḥ || 58 ||
[Analyze grammar]

jyotirliṃgamahaṃ tadvai pūjayitvā viśeṣataḥ |
praṇipatyāgataścātra vijetuṃ bhuvanatrayam || 59 ||
[Analyze grammar]

sūta uvāca |
tadīyaṃ tadvacaḥ śrutvā devarṣirjātasaṃbhramaḥ |
vihasya ca manasyeva rāvaṇaṃ nārado'bravīt || 60 ||
[Analyze grammar]

nārada uvāca |
śrūyatāṃ rākṣasaśreṣṭha kathayāmi hitaṃ tava |
tvayā tadeva karttavyaṃ maduktaṃ nānyathā kvacit || 61 ||
[Analyze grammar]

tvayoktaṃ yacchivenaiva hitaṃ dattaṃ mamādhunā |
tatsarvaṃ ca tvayā satyaṃ na mantavyaṃ kadācana || 62 ||
[Analyze grammar]

ayaṃ vai vikṛtiṃ prāptaḥ kiṃ kiṃ naiva bravīti ca |
satyaṃ naiva bhavettadvai kathaṃ jñeyaṃ priyosti me || 63 ||
[Analyze grammar]

iti gatvā punaḥ kāryyaṃ kuru tvaṃ hyahitāya vai |
kailāsoddharaṇe yatnaḥ kartavyaśca tvayā punaḥ || 64 ||
[Analyze grammar]

yadi caivoddhṛtaścāyaṃ kailāso hi bhaviṣyati |
tadaiva saphalaṃ sarvaṃ bhaviṣyati na saṃśayaḥ || 65 ||
[Analyze grammar]

pūrvavatsthāpayitvā tvaṃ punarāgaccha vai sukham |
niścayaṃ paramaṃ gatvā yathecchasi tathā kuru || 66 ||
[Analyze grammar]

sūta uvāca |
ityuktassa hitaṃ mene rāvaṇo vidhimohita |
satyaṃ matvā munervākyaṃ kailāsamagamattadā || 67 ||
[Analyze grammar]

gatvā tatra samuddhāraṃ cakre tasya giressa ca |
tatrasthaṃ caiva tatsarvaṃ viparyastaṃ parasparam || 68 ||
[Analyze grammar]

girīśopi tadā dṛṣṭvā kiṃ jātamiti sobravīt |
girijā ca tadā śaṃbhuṃ pratyuvāca vihasya tam || 69 ||
[Analyze grammar]

girijovāca |
sacchiśyasya phalaṃ jātaṃ samyagjātaṃ tu śiṣyataḥ |
śāntātmane suvīrāya dattaṃ yadatulaṃ balam || 70 ||
[Analyze grammar]

sūta uvāca |
girijāyāśca sākūtaṃ vacaḥ śrutvā maheśvaraḥ |
kṛtaghnaṃ rāvaṇaṃ matvā śaśāpa baladarpitam || 71 ||
[Analyze grammar]

mahādeva uvāca |
re re rāvaṇa durbhakta mā garvaṃ vaha durmate |
śīghraṃ ca tava hastānāṃ darpaghnaśca bhavediha || 72 ||
[Analyze grammar]

sūta uvāva |
iti tatra ca yajjātaṃ nāradaḥ śrutavāṃstadā |
rāvaṇopi prasannātmā'gātsvadhāma yathāgatam || 73 ||
[Analyze grammar]

niścayaṃ paramaṃ kṛtvā balī balavimohitaḥ |
jagadvaśaṃ hi kṛtavānrāvaṇaḥ paradarpahā || 74 ||
[Analyze grammar]

śivājñayā ca prāptena divyāstreṇa mahaujasā |
rāvaṇasya prati bhaṭo nālaṃ kaścidabhūttadā || 75 ||
[Analyze grammar]

ityetacca samākhyātaṃ vaidyanātheśvarasya ca |
māhātmyaṃ śṛṇvatāṃ pāpaṃ nṛṇāṃ bhavati bhasmasāt || 76 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ vaidyanātheśvarajyotirliṃgamāhātmyavarṇanaṃ nāmāṣṭāviṃśo'dhyāyaḥ || 28 ||
[Analyze grammar]