Chapter 25

[English text for this chapter is available]

|| sūta uvāca |
kadācidgautamenaiva jalārthaṃ preṣitā nijāḥ |
śiṣyāstatra gatā bhaktyā kamaṃḍalukarā dvijāḥ || 1 ||
[Analyze grammar]

śiṣyāñjalasamīpe tu gatāndṛṣṭvā nyaṣedhayan |
jalārthamagatāṃstatra carṣipatnyopyanekaśaḥ || 2 ||
[Analyze grammar]

ṛṣipatnyo vayaṃ pūrvaṃ grahīṣyāmo vidūrataḥ |
paścāccaiva jalaṃ grāhyamityevaṃ paryabhartsayan || 3 ||
[Analyze grammar]

parāvṛtya tadā taiśca ṛṣipatnyai niveditam |
sā cāpi tānsamādāya samāśvāsya ca taiḥ svayam || 4 ||
[Analyze grammar]

jalaṃ nītvā dadau tasmai gautamāya tapasvinī |
nityaṃ nirvāhayāmāsa jalena ṛṣisattamaḥ || 5 ||
[Analyze grammar]

tāścaivamṛṣipatnyastu kruddhāstāṃ paryabhartsayan |
parāvṛtya gatāssarvāstūṭajānkuṭilāśayāḥ || 6 ||
[Analyze grammar]

svāmyagre viparītaṃ ca tadvṛttaṃ nikhilaṃ tataḥ |
duṣṭāśayābhiḥ strībhiśca tābhirvai viniveditam || 7 ||
[Analyze grammar]

atha tāsāṃ vacaḥ śrutvā bhāvikarmavaśāttadā |
gautamāya ca saṃkuddhāścāsaṃste paramarṣayaḥ || 8 ||
[Analyze grammar]

vighnārthaṃ gautamasyaiva nānāpūjopahārakaiḥ |
gaṇeśaṃ pūjayāmāsussaṃkuddhāste kubuddhayaḥ || 9 ||
[Analyze grammar]

āvirbabhūva ca tadā prasanno hi gaṇeśvaraḥ |
uvāca vacanaṃ tatra bhaktādhīnaḥ phalapradaḥ || 10 ||
[Analyze grammar]

gaṇeśa uvāca |
prasanno'smi varaṃ brūta yūyaṃ kiṃ karavāṇyaham |
tadīyaṃ tadvacaḥ śrutvā ṛṣayaste'buvaṃstadā || 11 ||
[Analyze grammar]

ṛṣaya ūcuḥ |
tvayā yadi varo deyo gautamassvāśramādbahiḥ |
niṣkāsyaṃ no ṛṣibhiḥ paribhartsya tathā kuru || 12 ||
[Analyze grammar]

sūta uvāca |
sa evaṃ prārthitastaistu vihasya vacanaṃ punaḥ |
provācebhamukhaḥ prītyā bodhayaṃstānsatāṃ gatiḥ || 13 ||
[Analyze grammar]

gaṇeśa uvāca |
śrūyatāmṛṣayassarve yuktaṃ na kriyate'dhunā |
aparādhaṃ vinā tasmai krudhyatāṃ hānireva ca || 14 ||
[Analyze grammar]

upaskṛtaṃ purā yaistu tebhyo duḥkhaṃ hitaṃ na hi |
yadā ca dīyate duḥkhaṃ tadā nāśo bhavediha || 15 ||
[Analyze grammar]

īdṛśaṃ ca tapaḥ kṛtvā sādhyate phalamuttamam |
śubhaṃ phalaṃ svayaṃ hitvā sādhyate nāhitaṃ punaḥ || 16 ||
[Analyze grammar]

sūta uvāca |
ityevaṃ vacanaṃ śrutvā tasya te munisattamāḥ |
buddhimohaṃ tadā prāptā idameva vaco'bruvan || 17 ||
[Analyze grammar]

ṛṣaya ūcuḥ |
kartavyaṃ hi tvayā svāminnidameva na cānyathā |
ityuktastu tadā devo gaṇeśo vākyamabravīt || 18 ||
[Analyze grammar]

gaṇeśa uvāca |
asādhussādhutāṃ caiva sādhuścāsādhutāṃ tathā |
kadācidapi nāpnoti brahmoktamiti niścitam || 19 ||
[Analyze grammar]

yadā ca bhavatāṃ duḥkhaṃ jātaṃ cānaśanātpurā |
tadā sukhaṃ pradattaṃ vai gautamena maharṣiṇā || 20 ||
[Analyze grammar]

idānīṃ vai bhavadbhiśca tasmai duḥkhaṃ pradīyate |
netadyuktatamaṃ loke sarvathā suvicāryatām || 21 ||
[Analyze grammar]

strībalānmohitā yūyaṃ na me vākyaṃ kariṣyatha |
etaddhitatamaṃ tasya bhaviṣyati na saṃśayaḥ || 22 ||
[Analyze grammar]

punaścāyamṛṣiśreṣṭho dāsyate vassukhaṃ dhruvam |
tāraṇaṃ na ca yuktaṃ syādvaramanyaṃ vṛṇīta vai || 23 ||
[Analyze grammar]

sūta uvāca |
ityevaṃ vacanaṃ tena gaṇeśena mahātmanā |
yadyapyuktamṛṣibhyaśca tadapyete na menire || 24 ||
[Analyze grammar]

bhaktādhīnatayā sotha śivaputrobravīttadā |
udāsīnena manasā tānṛṣīnduṣṭaśemuṣīn || 25 ||
[Analyze grammar]

gaṇeśa uvāca |
bhavadbhiḥ prārthyate yacca kariṣye'haṃ tathā khalu |
paścādbhāvi bhavedeva ityuktvāṃtardadhe punaḥ || 26 ||
[Analyze grammar]

gautamassa na jānāti munīnāṃ vai durāśayam |
ānandamanasā nityaṃ patnyā karma cakāra tat || 27 ||
[Analyze grammar]

tadantare ca yajjātaṃ caritaṃ varayogataḥ |
tadduṣṭarṣiprabhāvāttu śrūyatāṃ tanmunīśvarāḥ || 28 ||
[Analyze grammar]

gautamasya ca kedāre tatrāsanvrīhayo yavāḥ |
gaṇeśastatra gaurbhūtvā jagāma kila durbalā || 29 ||
[Analyze grammar]

kaṃpamānā ca sā gatvā tatra tadvarayogataḥ |
vrīhīnsaṃbhakṣayāmāsa yavāṃśca munisattamāḥ || 30 ||
[Analyze grammar]

etasminnantare daivādgautamastatra cāgataḥ |
sa dayālustṛṇastaṃmbairvārayāmāsa tāṃ tadā || 31 ||
[Analyze grammar]

tṛṇastaṃbena sā spṛṣṭā papāta pṛthivītale |
mṛtā ca tatkṣaṇādeva tadṛṣeḥ paśyatastadā || 32 ||
[Analyze grammar]

ṛṣayaśchannarūpāste ṛṣipatnyastathāśubhāḥ |
ūcustatra tadā sarve kiṃ kṛtaṃ gautamena ca || 33 ||
[Analyze grammar]

gautamo'pi tathāhalyāmāhūyāsītsuvismitaḥ |
uvāca duḥkhato viprā dūyamānena cetasā || 34 ||
[Analyze grammar]

gautama uvāca |
kiṃ jātaṃ ca kathaṃ devi kupitaḥ parameśvaraḥ |
kiṃ kartavyaṃ kva gantavyaṃ hatyā ca samupasthitā || 35 ||
[Analyze grammar]

sūta uvāca ||etasminnantare vipro gautamaṃ paryabhartsayan |
viprapatnyastathā'halyāṃ durvacobhirvyathāṃ daduḥ || 36 ||
[Analyze grammar]

durbuddhayaśca tacchiṣyāssutāsteṣāṃ tathaiva ca |
gautama paribhartsyaiva pratyūcurdhigvaco muhuḥ || 37 ||
[Analyze grammar]

ṛṣaya ūcuḥ |
mukhaṃ na darśanīyaṃ te gamyatāṃ gamyatāmiti |
dṛṣṭvā goghnamukhaṃ sadyassacailaṃ snānamācaret || 38 ||
[Analyze grammar]

yāvadāśramamadhye tvaṃ tāvadeva havirbhujaḥ |
pitaraśca na gṛhṇaṃti hyasmaddattaṃ hi kiñcana || 39 ||
[Analyze grammar]

tasmādgacchānyatastvaṃ ca parivārasamanvitaḥ |
vilambaṃ kuru naiva tvaṃ dhenuhanpāpakāraka || 40 ||
[Analyze grammar]

sūta uvāca |
ityuktvā te ca taṃ sarve pāṣāṇaissamatāḍayan |
vyathāṃ daduratīvāsmai tvahalyāṃ ca duruktibhiḥ || 41 ||
[Analyze grammar]

tāḍito bhartsito duṣṭairgautamo giramabravīt |
ito gacchāmi munayo hyanyatra nivasāmyaham || 42 ||
[Analyze grammar]

ityuktvā gautamastasmātsthānācca nirgatastadā |
gatvā krośaṃ tadā cakre hyāśramaṃ tadanujñayā || 43 ||
[Analyze grammar]

yāvaccaivābhiśāpo vai tāvatkāryyaṃ na kiṃcana |
na karmaṇyadhikāro'sti daive pitrye'tha vaidike || 44 ||
[Analyze grammar]

māsārdhaṃ ca tato nītvā munīnsaṃprārthayattadā |
gautamo munivaryyassa tena duḥkhena dukhitaḥ || 45 ||
[Analyze grammar]

gautama uvāca |
anukaṃpyo bhavadbhiśca kathyatāṃ kriyate mayā |
yathā madīyaṃ pāpaṃ ca gacchatviti nivedyatām || 46 ||
[Analyze grammar]

sūta uvāca |
ityuktāste tadā viprā nocuścaiva parasparam |
atyaṃtaṃ sevayā pṛṣṭā militā hyekatassthitāḥ || 47 ||
[Analyze grammar]

gautamo dūrataḥ sthitvā natvā tānṛṣisattamān |
papraccha vinayāviṣṭaḥ kiṃ kāryaṃ hi mayādhunā || 48 ||
[Analyze grammar]

ityukte muninā tena gautamena mahātmanā |
militāssakalāste vai munayo vākyamabruvan || 49 ||
[Analyze grammar]

ṛṣaya ūcuḥ |
niṣkṛtiṃ hi vinā śuddhirjāyate na kadācana |
tasmāttvaṃ dehaśuddhyarthaṃ prāyaścittaṃ samācara || 50 ||
[Analyze grammar]

trivāraṃ pṛthivīṃ sarvāṃ krama pāpaṃ prakāśayan |
punarāgatya cātraiva cara māsavrataṃ tathā || 51 ||
[Analyze grammar]

śatamekottaraṃ caiva brahmaṇo'sya girestathā |
prakramaṇaṃ vidhāyaivaṃ śuddhiste ca bhaviṣyati || 52 ||
[Analyze grammar]

athavā tvaṃ samānīya gaṃgāsnānaṃ samācara |
pārthivānāṃ tathā koṭiṃ kṛtvā devaṃ niṣevaya || 53 ||
[Analyze grammar]

gaṃgāyāṃ ca tataḥ snātvā punaścaiva bhaviṣyati |
purā daśa tathā caikaṃ girestvaṃ kramaṇaṃ kuru || 54 ||
[Analyze grammar]

śata kuṃbhaistathā snātvā pārthivaṃ niṣkṛtirbhavet |
iti tairṣibhiḥ proktastathetyomiti tadvacaḥ || 55 ||
[Analyze grammar]

pārthivānāṃ tathā pūjāṃ gireḥ prakramaṇaṃ tathā |
kariṣyāmi muniśreṣṭhā ājñayā śrīmatāmiha || 56 ||
[Analyze grammar]

ityuktvā sarṣivaryaśca kṛtvā prakramaṇaṃ gireḥ |
pūjayāmāsa nirmāya pārthivānmunisattamaḥ || 57 ||
[Analyze grammar]

ahalyā ca tatassādhvī tacca sarvaṃ cakāra sā |
śiṣyāśca pratiśiṣyāśca cakrussevāṃ tayostadā || 58 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ gautamavyavasthāvarṇanaṃ nāma paṃcaviṃśo'dhyāyaḥ || 25 ||
[Analyze grammar]