Chapter 4

[English text for this chapter is available]

|| sūta uvāca |
kadācitsa ṛṣiśreṣṭho hyatrirbrahmavidāṃ varaḥ |
jāgṛtaśca jalaṃ dehi pratyuvāca priyāmiti || 1 ||
[Analyze grammar]

sāpi sādhvī tvavaśyaṃ ca gṛhītvātha kamaṇḍalum |
jagāma vipine tatra jalaṃ me nīyate kutaḥ || 2 ||
[Analyze grammar]

kiṃ karomi kva gacchāmi kuto nīyeta vai jalam |
iti vismayamāpannā tāṃ gaṃgāṃ hi dadarśa sā || 3 ||
[Analyze grammar]

tāmanuvrajatī yāvat sābravīcca sadā hi tām |
gaṃgā saridvarā devī bibhratī sundarāṃ tanum || 4 ||
[Analyze grammar]

gaṃgovāca |
prasannāsmi ca te devi kutra yāsi vadādhunā |
dhanyā tvaṃ subhage satyaṃ tavājñāṃ ca karomyaham || 5 ||
[Analyze grammar]

sūta uvāca |
tadvacaśca tadā śrutvā ṛṣipatnī tapasvinī |
pratyuvāca vacaḥ prītyā svayaṃ sucakitā dvijāḥ || 6 ||
[Analyze grammar]

anasūyovāca |
kā tvaṃ kamalapatrākṣi kuto vā tvaṃ samāgatā |
tathyaṃ brūhi kṛpāṃ kṛtvā sādhvī supravadā satī || 7 ||
[Analyze grammar]

sūta uvāca |
ityukte ca tayā tatra munipatnyā munīśvarāḥ |
saridvarā divyarūpā gaṃgā vākyamathābravīt || 8 ||
[Analyze grammar]

gaṃgovāca |
svāminaḥ sevanaṃ dṛṣṭvā śivasya ca parātmanaḥ |
sādhvi dharmaṃ ca te dṛṣṭvā sthitāsmi tava sannidhau || 9 ||
[Analyze grammar]

ahaṃ gaṃgā samāyātā bhajanātte śucismite |
vaśībhūtā hyahaṃ jātā yadicchasi vṛṇīṣva tat || 10 ||
[Analyze grammar]

sūta uvāca |
ityukte gaṃgayā sādhvī namaskṛtya puraḥ sthitā |
uvāceti jalaṃ dehi cetprasannā mamā'dhunā || 11 ||
[Analyze grammar]

ityetadvacanaṃ śrutvā gartaṃ kurṣviti sā'bravīt |
śīghraṃ cāyācca tatkṛtvā sthitā tatkṣaṇamātrataḥ || 12 ||
[Analyze grammar]

tatra sā ca praviṣṭā ca jalarūpamabhūttadā |
āścaryyaṃ paramaṃ gatvā gṛhītaṃ ca jalaṃ tayā || 13 ||
[Analyze grammar]

uvāca vacanaṃ caitallokānāṃ sukhahetave |
anasūyā muneḥ patnī divyarūpāṃ saridvarām || 14 ||
[Analyze grammar]

anasūyovāca |
yadi tvaṃ suprasannā me vartase ca kṛpāmayi |
sthātavyaṃ ca tvayā tāvanmatsvāmī yāvadā vrajet || 15 ||
[Analyze grammar]

sūta uvāca |
iti śrutvānasūyāyā vacanaṃ sukhadaṃ satām |
gaṃgovāca prasannāti hyatrerdāsyasi me'naghe || 16 ||
[Analyze grammar]

ityukte ca tayā tatra hyanapāyi kṛtantathā |
svāmine tajjalaṃ divyaṃ dattvā tatpurataḥ sthitā || 17 ||
[Analyze grammar]

sa ṛṣiścāpi suprītyā svācamya vidhipūrvakam |
papau divyaṃ jalaṃ tacca pītvā sukhamavāpa ha || 18 ||
[Analyze grammar]

aho nityaṃ jalaṃ yacca pīyate tajjalaṃ na hi |
vicāryeti ca tenāśu paritaścāvalokitam || 19 ||
[Analyze grammar]

śuṣkānvṛkṣānsamālokya diśo rūkṣatarāstathā |
uvāca tāmṛṣiśreṣṭho na jātaṃ varṣaṇaṃ punaḥ || 20 ||
[Analyze grammar]

taduktaṃ tatsamākarṇya netineti priyāntadā |
tāmuvāca punaḥ so'pi jalaṃ nītaṃ kutastvayā || 21 ||
[Analyze grammar]

ityukte tu tadā tena vismayaṃ paramaṃ gatā |
anasūyā svamanasi sacintā tu munīśvarāḥ || 22 ||
[Analyze grammar]

nivedyate mayā cedvai tadotkarṣo bhavenmama |
nivedyate yadā naiva vratabhaṅgo bhavenmama || 23 ||
[Analyze grammar]

nobhayaṃ ca tathā syādvai nivedyaṃ tattathā mama |
iti yāvadvicāryeta tāvatpṛṣṭā punaḥ punaḥ || 24 ||
[Analyze grammar]

athānugrahataḥ śaṃbhoḥ prāptabuddhiḥ pativratā |
uvāca śrūyatāṃ svāminyajjātaṃ kathayāmi te || 25 ||
[Analyze grammar]

anasūyovāca |
śaṃkarasya pratāpācca tavaiva sukṛtaistathā |
gaṃgā samāgatātraiva tadīyaṃ salilantvidam || 26 ||
[Analyze grammar]

sūta uvāca |
evaṃ vacastadā śrutvā munirvismayamānasaḥ |
priyāmuvāca suprītyā śaṃkaraṃ manasā smaran || 27 ||
[Analyze grammar]

atriruvāca |
priye sundari tvaṃ satyamatha vācaṃ vyalīkakām |
bravīṣi ca yathārthaṃ tvaṃ na manye durlabhantvidam || 28 ||
[Analyze grammar]

asādhyaṃ yogibhiryacca devairapi sadā śubhe |
taccaivādya kathaṃ jātaṃ vismayaḥ paramo mama || 29 ||
[Analyze grammar]

yadyevaṃ dṛśyate cedvai tanmayehaṃ na cānyathā |
iti tadvacanaṃ śrutvā pratyuvāca patipriyā || 30 ||
[Analyze grammar]

anasūyovāca |
āgamyatāṃ mayā sārddhaṃ tvayā nātha mahāmune |
saridvarāyā gaṃgāyā draṣṭumicchā bhavedyadi || 31 ||
[Analyze grammar]

sūta uvāca |
ityuktvā tu samādāya patiṃ taṃ sā pativratā |
gatā drutaṃ śivaṃ smṛtvā yatra gaṃgā saridvarā || 32 ||
[Analyze grammar]

darśayāmāsa tāṃ tatra gaṃgāṃ patye pativratā |
garte ca saṃsthitāṃ tatra svayaṃ divyasvarūpiṇīm || 33 ||
[Analyze grammar]

tatra gatvā ṛṣiśreṣṭho gartaṃ ca jalapūritam |
ākaṇṭhaṃ sundaraṃ dṛṣṭvā dhanyeyamiti cābravīt || 34 ||
[Analyze grammar]

kiṃ madīyaṃ tapaścaiva kimanyeṣāṃ punastadā |
ityukto muniśārdūlo bhaktyā tuṣṭāva tāṃ tadā || 35 ||
[Analyze grammar]

tato hi sa munistatra susnātaḥ subhage jale |
ācamya punarevātra stutiṃ cakre punaḥ punaḥ || 36 ||
[Analyze grammar]

anasūyāpi saṃsnātā sundare tajjale tadā |
nityaṃ cakre muniḥ karma sānasūyāpi suvratā || 37 ||
[Analyze grammar]

tatassovāca tāṃ gaṃgā gamyate svasthalaṃ mayā |
ityukte ca punaḥ sādhvī tāmuvāca saridvarām || 38 ||
[Analyze grammar]

anasūyovāca |
yadi prasannā deveśi yadyasti ca kṛpā mayi |
tvayā stheyaṃ niścalatvādasmindevi tapovane || 39 ||
[Analyze grammar]

mahatāṃ ca svabhāvaśca nāṃgīkṛtya parityajet |
ityuktā ca karau baddhvā tāṃ tuṣṭāva punaḥpunaḥ || 40 ||
[Analyze grammar]

ṛṣiścāpi tathovāca tvayā stheyaṃ saridvare |
sānukūlā bhava tvaṃ hi sanāthāndevi naḥ kuru || 41 ||
[Analyze grammar]

tadīyaṃ tadvacaḥ śrutvā ramyaṃ gaṃgā saridvarā |
prasannamānasā gaṃgā'nasūyāṃ vākyamabravīt || 42 ||
[Analyze grammar]

gaṃgovāca |
śaṃkarārcanasaṃbhūtaphalaṃ varṣasya yacchasi |
svāminaśca tadā sthāsye devānāmupakāraṇāta || 43 ||
[Analyze grammar]

tathā dānairna me tuṣṭistīrthasnānaistathā ca vai |
yajñaistathātha vā yogairyathā pātivratena ca || 44 ||
[Analyze grammar]

pativratāṃ yathā dṛṣṭvā manasaḥ prīṇanaṃ bhavet |
tathā nānyairupāyaiśca satyaṃ me vyāhṛtaṃ sati || 45 ||
[Analyze grammar]

pativratāṃ striyaṃ dṛṣṭvā pāpanāśo bhavenmama |
śuddhā jātā viśeṣeṇa gaurītulyā pativratā || 46 ||
[Analyze grammar]

tasmācca yadi lokasya hitāya tatprayacchasi |
tarhyahaṃ sthiratāṃ yāsye yadi kalyāṇamicchasi || 47 ||
[Analyze grammar]

sūta uvāca |
ityevaṃ vacanaṃ śrutvā'nasūyā sā pativratā |
gaṃgāyai pradadau puṇyaṃ sarvaṃ tadvarṣasaṃbhavam || 48 ||
[Analyze grammar]

mahatāṃ ca svabhāvo hi pareṣāṃ hitamāvahet |
suvarṇaṃ candanaṃ cekṣurasastatra nidarśanam || 49 ||
[Analyze grammar]

etaddṛṣṭvānasūyaṃ tatkarma pātivrataṃ mahat |
prasannobhūnmahādevaḥ pārthivādāvirāśu vai || 50 ||
[Analyze grammar]

śaṃbhuruvāca |
dṛṣṭvā te karma sādhvyetat prasanno'smi pativrate |
varaṃ brūhi priye matto yataḥ priyatarāsi me || 51 ||
[Analyze grammar]

atha tau dampatī śaṃbhumabhūtāṃ sundarākṛtim |
pañcavaktrādisaṃyuktaṃ haraṃ prekṣya suvismitau || 52 ||
[Analyze grammar]

natvā stutvā karau baddhvā mahābhaktisamanvitau |
avocetāṃ samabhyarcya śaṃkaraṃ lokaśaṃkaram || 53 ||
[Analyze grammar]

dampatī ūcatuḥ |
yadi prasanno deveśa prasannā jagadambikā |
asmiṃstapovane tiṣṭha lokānāṃ sukhado bhava || 54 ||
[Analyze grammar]

prasannā ca tadā gaṃgā prasannaśca śivastadā |
ubhau tau ca sthitau tatra yatrāsīdṛṣisattamaḥ || 55 ||
[Analyze grammar]

atrīśvaraśca nāmnāsīdīśvaraḥ paraduḥkhahā |
gaṃgā sāpi sthitā tatra tadā gartetha māyayā || 56 ||
[Analyze grammar]

taddinaṃ hi samārabhya tatrākṣayyajalaṃ sadā |
hastamātre hi tadgarte gaṃgā mandākinī hyabhūt || 57 ||
[Analyze grammar]

tatraiva ṛṣayo divyāḥ samājagmussahāṃganāḥ |
tīrthāttīrthācca te sarve te purā nirgatā dvijāḥ || 58 ||
[Analyze grammar]

yavāśca vrīhayaścaiva yajñayāgaparāyaṇāḥ |
yuktā ṛṣivaraistaiśca homaṃ cakruśca te janāḥ || 59 ||
[Analyze grammar]

karmabhistaiśca saṃtuṣṭā vṛṣṭiṃ cakrurghanāstadā |
ānandaḥ paramo loke babhūvātimunīśvarāḥ || 60 ||
[Analyze grammar]

atrīśvarasya māhātmyamityuktaṃ vaḥ sukhāvaham |
bhuktimuktipradaṃ sarvakāmadaṃ bhakti varddhanam || 61 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāmatrīśvaramāhātmyavarṇanaṃ nāma caturtho'dhyāyaḥ || 4 ||
[Analyze grammar]