Chapter 40

[English text for this chapter is available]

nandīśvara uvāca |
sanatkumāra sarvajña śṛṇu līlāmparātmanaḥ |
bhaktavātsalyasaṃyuktāṃ taddṛḍhatvavidarbhitām || 1 ||
[Analyze grammar]

śivopyatha svabhṛtyaṃ vai preṣayāmāsa sa drutam |
bāṇārthe ca tadā tatrārjunopi samagāttataḥ || 2 ||
[Analyze grammar]

ekasmin samaye prāptau bāṇārthaṃ tadgaṇārjunau |
arjunastaṃ parābhartsya svabāṇaṃ cāgrahīttadā || 3 ||
[Analyze grammar]

gaṇa provāca taṃ tatra kimarthaṃ gṛhyate śaraḥ |
bāṇaścaivāsmadīyo vai mucyatāṃ ṛṣisattama || 4 ||
[Analyze grammar]

ityuktastena bhillasya gaṇena munisattamaḥ |
sorjunaḥ śaṃkaraṃ smṛtvā vacanaṃ ca tamabravīt || 5 ||
[Analyze grammar]

arjuna uvāca |
ajñātvā kiṃca vadasi mūrkhosi tvaṃ vanecara |
bāṇaśca mocito me'dya tvadīyaśca kathaṃ punaḥ || 6 ||
[Analyze grammar]

rekhārūpaṃ ca picchāni mannāmāṃkita eva ca |
tvadīyaśca kathaṃ jātaḥ svabhāvo dustyajastava || 7 ||
[Analyze grammar]

|| nandīśvara uvāca |
ityevantadvacaḥ śrutvā vihasya sa gaṇeśvaraḥ |
arjunaṃ ṛṣirūpaṃ taṃ bhillo vākyamupādade || 8 ||
[Analyze grammar]

tāpasa śrūyatāṃ re tvaṃ na tapaḥ kriyate tvayā |
veṣataśca tapasvī tvaṃ na yathārthaṃ chalāyate || 9 ||
[Analyze grammar]

tapasvī ca kathaṃ mithyā bhāṣate kurute naraḥ |
naikākinaṃ ca māṃ tvaṃ ca jānīhi vāhinīpatim || 10 ||
[Analyze grammar]

bahubhirvanabhillaiśca yuktaḥ svāmī sa āsata |
samarthassarvathā kartuṃ vigrahānugrahau punaḥ || 11 ||
[Analyze grammar]

vartate tasya vāṇīyaṃ yo nītaśca tvayādhunā |
ayaṃ bāṇaśca te pārśve na sthāsyati kadācana || 12 ||
[Analyze grammar]

tapaḥphalaṃ kathaṃ tvaṃ ca hātumicchasi tāpasa |
cauryyācchalārdyamānācca vismayātsatya bhañjanāt || 13 ||
[Analyze grammar]

tapasā kṣīyate satyametadeva mayā śrutam |
tasmācca tapasastedya bhaviṣyati phalaṃ kutaḥ || 14 ||
[Analyze grammar]

tasmācca mucyate bāṇātkṛtaghnastvaṃ bhaviṣyasi |
mamaiva svāmino bāṇastavārthe mocito dhruvam || 15 ||
[Analyze grammar]

śatruśca māritastena punarbāṇaśca rakṣitaḥ |
atyantaṃ ca kṛtaghnosi tapośubhakarastathā || 16 ||
[Analyze grammar]

satyaṃ na bhāṣase tvaṃ ca kimataḥ siddhimicchasi |
prayojanaṃ cedbāṇena svāmī ca yācyatāṃ mama || 17 ||
[Analyze grammar]

īdṛśāṃśca bahūnbāṇāṃstadā dātuṃ kṣamaḥ svayam |
rājā ca vartate me'dya kiṃ tvevaṃ yācyate tvayā || 18 ||
[Analyze grammar]

upakāraṃ parityajya hyapakāraṃ samīhase |
naitadyuktaṃ tvayādyaiva kriyate tyaja cāpalam || 19 ||
[Analyze grammar]

nandīśvara uvāca |
ityevaṃ vacanantasya śrutvā pārthorjunastadā |
krodhaṃ kṛtvā śivaṃ smṛtvā mitaṃ vākyamathābravīt || 20 ||
[Analyze grammar]

|| arjuna uvāca |
śṛṇu bhilla pravakṣyāmi na satyaṃ tava bhāṣaṇam |
yathā jātistathā tvāṃ ca jānāmi hi vanecara || 21 ||
[Analyze grammar]

ahaṃ rājā bhavāṃścauraḥ kathaṃ yuddhaprayuktatā |
yuddhaṃ me sabalaiḥ kāryaṃ nādhamairhi kadācana || 22 ||
[Analyze grammar]

tasmātte ca tathā svāmī bhaviṣyati bhavādṛśaḥ |
dātāraśca vayaṃ proktāścaurā yūyaṃ vanecarāḥ || 23 ||
[Analyze grammar]

kathaṃ yācyo mayā bhillarāja evaṃ ca sāmpratam |
tvameva yācase naiva bāṇaṃ māṃ kiṃ vanecaraḥ || 24 ||
[Analyze grammar]

dadāmi te tathā bāṇānsanti me bahavo dhruvam |
rājā ca grahaṇaṃ caiva na dāsyati tathā bhavet || 25 ||
[Analyze grammar]

kimpunaśca tathā bāṇānprayacchāmi vanecara |
yadi me yā cikīrṣā syātkathaṃ nāgamyate'dhunā || 26 ||
[Analyze grammar]

yathāgacchatu te bhartā kimarthaṃ bhāṣate'dhunā |
āgatya ca mayā sārddhaṃ jitvā yuddhe ca māmpunaḥ || 27 ||
[Analyze grammar]

nītvā bāṇamimaṃ bhilla svāmī te vāhinīpatiḥ |
nijālayaṃ sukhaṃ yātu vilaṃbaḥ kriyate katham || 28 ||
[Analyze grammar]

nandīśvara uvāca |
maheśvarakṛpāprāptasadbalasyārjunasya hi |
ityetadvacanaṃ śrutvā bhillo vākyamathābravīt || 29 ||
[Analyze grammar]

bhilla uvāca |
ajñosi tvaṃ ṛṣirnāsi maraṇaṃ tvīhase katham |
dehi bāṇaṃ sukhantiṣṭha tvanyathā kleśabhāgbhaveḥ || 30 ||
[Analyze grammar]

nandīśvara uvāca |
ityuktastena bhillena śivasacchaktiśobhinā |
gaṇena pāṇḍavastaṃ ca prāha smṛtvā ca śaṅkaram || 31 ||
[Analyze grammar]

arjuna uvāca |
madvākyantattvato bhilla śṛṇu tvaṃ ca vanecara |
āgamiṣyati te svāmī darśayiṣye phalantadā || 32 ||
[Analyze grammar]

na śobhate tvayā yuddhaṃ kariṣye svāminā tava |
upahāsakaraṃ jñeyaṃ yuddhaṃ siṃhasṛgālayoḥ || 33 ||
[Analyze grammar]

śrutaṃ ca madvacaste'dya drakṣyasi tvaṃ mahābalam |
gaccha svasvāminaṃ bhilla yathecchasi tathā kuru || 34 ||
[Analyze grammar]

nandīśvara uvāca |
ityuktastu gatastatra bhillaḥ pārthena vai mune |
śivāvatāro yatrāste kirāto vāhinīpatiḥ || 35 ||
[Analyze grammar]

athārjunasya vacanaṃ bhillanāthāya vistarāt |
sarvaṃ nivedayāmāsa tasyai bhillaparātmane || 36 ||
[Analyze grammar]

sa kirāteśvaraḥ śrutvā tadvaco harṣamāgataḥ |
ājagāma svasainyena śaṃkaro bhillarūpadhṛk || 37 ||
[Analyze grammar]

arjunaśca tadā senāṃ kirātasya ca pāṇḍavaḥ |
dṛṣṭvā gṛhītvā saśarandhanuḥ sanmukha āyayau || 38 ||
[Analyze grammar]

atho kirātaśca punaḥ preṣayāmāsa taṃ caram |
tanmukhena jagau vākyambhāratāya mahātmane || 39 ||
[Analyze grammar]

kirāta uvāca |
paśya sainyaṃ tapasvistvaṃ muñca bāṇaṃ vrajādhunā |
maraṇaṃ svalpakāryārthaṃ kathamicchasi sāmpratam || 40 ||
[Analyze grammar]

bhrātarastava duḥkhārttāḥ kalatraṃ ca tataḥ param |
pṛthivī hastatastedya yāsyatīti matirmama || 41 ||
[Analyze grammar]

|| nandīśvara uvāca |
ityuktaṃ parameśena pārthadārḍhyaparīkṣayā |
sarvathārjunarakṣārthaṃ dhṛtarūpeṇa śaṃbhunā || 42 ||
[Analyze grammar]

ityuktastu tadāgatya sagaṇaśśaṃkaraśca tat |
vistarādvṛttamakhilamarjunāya nyavedayat || 43 ||
[Analyze grammar]

tacchrutvā tu punaḥ prāha prārthastaṃ dūtamāgatam |
vāhinīpataye vācyamviparītambhaviṣyati || 44 ||
[Analyze grammar]

yadyahaṃ caiva te bāṇaṃ yacchāmi ca madīyakam |
kulasya dūṣaṇaṃ cāhaṃ bhaviṣyāmi na saṃśayaḥ || 45 ||
[Analyze grammar]

bhrātaraścaiva dukhārtāḥ bhavantu ca tathā dhruvam |
vidyāśca niṣphalāḥ syustāstasmādāgaccha vai dhruvam || 46 ||
[Analyze grammar]

siṃhaścaiva śṛgālādvā bhīto naiva mayā śrutaḥ |
tathā vanecarādrājā na bibheti kadācana || 47 ||
[Analyze grammar]

nandīśvara uvāca |
ityuktastaṃ punargatvā svāminaṃ pāṇḍavena saḥ |
sarvaṃ nivedayāmāsa taduktaṃ hi viśeṣataḥ || 48 ||
[Analyze grammar]

atha sopi kirātāhvo mahādevassasainyakaḥ |
tacchrutvā sainyasaṃyukto hyarjunaṃ cāgamattadā || 49 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāma kirātāvatāravarṇane bhillārjunasaṃvādonāma catvāriṃśo'dhyāyaḥ || 40 ||
[Analyze grammar]