Chapter 19

[English text for this chapter is available]

nandīśvara uvāca |
athānyaccaritaṃ śambho śśṛṇu prītyā mahāmune |
yathā babhūva durvāsāśśaṃkaro dharmahetave || 1 ||
[Analyze grammar]

brahmaputro vabhūvātitapasvī brahmavitprabhuḥ |
anasūyāpati rdhīmānbrahmājñāpratipālakaḥ || 2 ||
[Analyze grammar]

sunirdeśādbrahmaṇo hi sastrīkaḥ putrakāmyayā |
sa tryakṣakulanāmānaṃ yayau ca tapase girim || 3 ||
[Analyze grammar]

prāṇānāyamya vidhivannirvindhyātaṭinītaṭe |
tapaścacāra sumahadadvandvo'bdaśatammuniḥ || 4 ||
[Analyze grammar]

ya eka īśvaraḥ kaścidavikāro mahāprabhuḥ |
sa me putravaraṃ dadyāditi niścitamānasaḥ || 5 ||
[Analyze grammar]

bahukālo vyatīyāya tasmiṃstapati sattapaḥ |
āvirbabhūva tatkāttu śucirjvālā mahīyasī || 6 ||
[Analyze grammar]

tayā sannikhilā lokā dagdhaprāyā munīśvarāḥ |
tathā surarṣayaḥ sarve pīḍitā vāsavādayaḥ || 7 ||
[Analyze grammar]

atha sarve vāsavādyā surāśca munayo mune |
brahmasthānaṃ yayuśśīghraṃ tajjvālātiprapīḍitāḥ || 8 ||
[Analyze grammar]

natvā nutvā vidhindevāstatsvaduḥkhannyavedayan |
brahmā saha suraistāta viṣṇulokaṃ yayāvaram || 9 ||
[Analyze grammar]

tatra gatvā ramānāthaṃ natvā nutvā vidhissuraiḥ |
svaduḥkhantatsamācakhyau viṣṇave'nantakaṃ mune || 10 ||
[Analyze grammar]

viṣṇuśca vidhinā devai rudrasthānaṃ yayau drutam |
haraṃ praṇamya tatretya tuṣṭāva parameśvaram || 11 ||
[Analyze grammar]

stutvā bahutayā viṣṇuṃ svaduḥkhaṃ ca nyavedayat |
śarvaṃ jvālāsamudbhūtamatreśca tapasaḥ param || 12 ||
[Analyze grammar]

atha tatra samestāstu brahmaviṣṇumaheśvarāḥ |
mune saṃmantrayāñcakruranyonyaṃ jagatāṃ hitam || 13 ||
[Analyze grammar]

tadā brahmādayo devāstrayaste varadarṣabhāḥ |
jagmustadāśramaṃ śīghraṃ varandātuntadarṣaye || 14 ||
[Analyze grammar]

svacihnacihnitāṃstānsa dṛṣṭvātrirmunisattamaḥ |
praṇanāma ca tuṣṭāva vāgbhiriṣṭābhirādarāt || 15 ||
[Analyze grammar]

tatassa vismito viprastānuvāca kṛtāñjaliḥ |
brahmaputro vinītātmā brahmaviṣṇuharābhidhān || 16 ||
[Analyze grammar]

atriruvāca |
he brahman he hare rudra pūjyāstrijagatāmmatāḥ |
prabhavaśceśvarāḥ sṛṣṭirakṣāsaṃhārakārakāḥ || 17 ||
[Analyze grammar]

eka eva mayā dhyāta īśvaraḥ putrahetave |
yaḥ kaścidīśvaraḥ khyāto jagatāṃ svastriyā saha || 18 ||
[Analyze grammar]

yūyaṃ trayasturāḥ kasmādāgatā varadarṣabhāḥ |
etanme saṃśayaṃ chittvā tato dattepsitaṃ varam || 19 ||
[Analyze grammar]

iti śrutvā vacastasya pratyūcuste surāstrayaḥ |
yādṛkkṛtaste saṃkalpastathaivābhūnmunīśvara || 20 ||
[Analyze grammar]

vayaṃ trayo bhaveśānāssamānā varadarṣabhāḥ |
asmadaṃśabhavāstasmādbhaviṣyanti sutāstrayaḥ || 21 ||
[Analyze grammar]

viditā bhuvane sarve pitroḥ kīrtivivarddhanāḥ |
ityuktāste trayo devāssvadhāmāni yayurmudā || 22 ||
[Analyze grammar]

varaṃ labdhvā munisso'tha jagāma svāśramaṃ mudā |
yuto'nusūyayā prīto brahmānaṃdaprado mune || 23 ||
[Analyze grammar]

atha brahmā hariśśambhuravateruḥ striyāṃ tataḥ |
putrarūpaiḥ prasannātmanānālīlā prakāśakāḥ || 24 ||
[Analyze grammar]

vidheraṃśādvidhurjajñe'nasūyāyāṃ munīśvarāt |
āvirbabhūvodadhitaḥ śipto devessa eva hi || 25 ||
[Analyze grammar]

viṣṇoraṃśātstriyāntasyāmatrerdatto vyajāyata |
saṃnyāsapaddhatiryena varddhitā paramā mune || 26 ||
[Analyze grammar]

durvāsā muniśārdūlaḥ śivāṃśānmunisattamaḥ |
jajñe tasyāṃ striyāmatrervaradharmapravartakaḥ || 27 ||
[Analyze grammar]

bhūtvā rudraśca durvāsā brahmatejovivarddhanaḥ |
cakre dharmaparīkṣāñca bahūnāṃ sa dayāparaḥ || 28 ||
[Analyze grammar]

sūryavaṃśe samutpanno yo'mbarīṣo nṛpo'bhavat |
tatparīkṣāmakārṣītsa tāṃ śṛṇu tvaṃ munīśvara || 29 ||
[Analyze grammar]

so'mbarīṣo nṛpavaraḥ saptadvīparasāpatiḥ |
niyamaṃ hi cakārāsāvekādaśyā vrate dṛḍham || 30 ||
[Analyze grammar]

ekādaśyā vrataṃ kṛtvā dvādaśyāṃ caiva pāraṇām |
kariṣyāmīti sudṛḍhasaṃkalpastu narādhipaḥ || 31 ||
[Analyze grammar]

jñātvā tanniyamantasya durvāsā munisattamaḥ |
tadantikaṃ gataśśiṣyairbahubhiśśaṃkarāṃśajaḥ || 32 ||
[Analyze grammar]

pāraṇe dvādaśīṃ svalpāṃ jñātvā yāvatsa bhojanam |
karttuṃ vyavasitastāvadāgataṃ sa nyamantrayat || 33 ||
[Analyze grammar]

tataḥ snānārthamagamaddurvāsāḥ śiṣyasaṃyutaḥ |
vilambaṃ kṛtavāṃstatra parīkṣārthaṃ munirbahu || 34 ||
[Analyze grammar]

dharmavighnaṃ tadā jñātvā sa nṛpaḥ śāstraśāsanāt |
jalamprāśyāsthitastatra tadāgamanakāṃkṣayā || 35 ||
[Analyze grammar]

etasminnantare tatra durvāsā munirāgataḥ |
kṛtāśanaṃ nṛpaṃ jñātvā parīkṣārthaṃ dhṛtākṛtiḥ || 36 ||
[Analyze grammar]

cukrodhāti nṛpe tasminparīkṣārthaṃ vṛṣasya saḥ |
provāca vacanantūgraṃ sa muniśśaṃkarāṃśajaḥ || 37 ||
[Analyze grammar]

durvāsā uvāca |
māṃ nimantrya nṛpābhojya jalaṃ pītantvayādhama |
darśayāmi phalaṃ tasya duṣṭadaṇḍadharo hyaham || 38 ||
[Analyze grammar]

ityuktvā krodhatāmrākṣo nṛpaṃ dagdhuṃ samudyataḥ |
samuttasthau drutaṃ cakraṃ tatsthaṃ rakṣārthamaiśvaram || 39 ||
[Analyze grammar]

prajajvālāti taṃ cakraṃ muniṃ dagdhuṃ sudarśanam |
śivarūpaṃ tamajñātvā śivamāyāvimohitam || 40 ||
[Analyze grammar]

etasminnantare vyomavāṇyuvācāśarīriṇī |
ambarīṣammahātmānaṃ brahmabhaktaṃ ca vaiṣṇavam || 41 ||
[Analyze grammar]

vyomavāṇyuvāca |
sudarśanamidaṃ cakraṃ haraye śambhunārpitam |
śāṃtaṃ kuru prajvalitamadya durvāsase nṛpa || 42 ||
[Analyze grammar]

durvāsāyaṃ śivaḥ sākṣātsa cakraṃ haraye'rpitam |
evaṃ sādhāraṇamuniṃ na jānīhi nṛpottama || 43 ||
[Analyze grammar]

tava dharmaparīkṣārthamāgato'yaṃ munīśvaraḥ |
śaraṇaṃ yāhi tasyāśu bhaviṣyatyanyathā layaḥ || 44 ||
[Analyze grammar]

nandīśvara uvāca |
ityuktvā ca nabhovāṇī virarāma munīśvara |
astāvītsa harāṃśaṃ tamambarīṣo'pi cādarāt || 45 ||
[Analyze grammar]

ambarīṣa uvāca |
yadyasti dattamiṣṭaṃ ca svadharmo vā svanuṣṭhitaḥ |
kulaṃ no vipradaivaṃ ceddharerastraṃ praśāmyatu || 46 ||
[Analyze grammar]

yadi no bhagavānprīto madbhakto bhaktavatsalaḥ |
sudarśanamidaṃ cāstraṃ praśāmyatu viśeṣataḥ || 47 ||
[Analyze grammar]

nandīśvara uvāca |
iti stuvati rudrāgre śaivaṃ cakraṃ sudarśanam |
aśāmyatsarvathā jñātvā taṃ śivāṃśaṃ sulabdhadhīḥ || 48 ||
[Analyze grammar]

athāmbarīṣassa nṛpaḥ praṇanāma ca taṃ munim |
śivāvatāraṃ saṃjñāya svaparīkṣārthamāgatam || 49 ||
[Analyze grammar]

suprasanno babhūvātha sa muniḥ śaṃkarāṃśajaḥ |
bhuktvā tasmai varaṃ dattvā svābhīṣṭaṃ svālayaṃ yayau || 50 ||
[Analyze grammar]

ambarīṣaparīkṣāyāṃ durvāsaścaritammune |
proktāmanyaccaritrantvaṃ śṛṇu tasya munīśvara || 51 ||
[Analyze grammar]

punardāśaratheścakre parīkṣāṃ niyamena vai |
munirūpeṇa kālena yaḥ kṛto niyamo mune || 52 ||
[Analyze grammar]

tadaiva muninā tena saumitriḥ preṣito haṭhāt |
tantatyāja drutaṃ rāmo bandhuṃ paṇavaśānmune || 53 ||
[Analyze grammar]

sā kathā vihitā loke munibhirbahudhoditā |
nāto me vistarātproktā jñātā yatsarvadhā budhaiḥ || 54 ||
[Analyze grammar]

niyamaṃ sudṛḍhaṃ dṛṣṭvā suprasanno'bhavanmuniḥ |
durvāsāssuprasannātmā varantasmai pradattavān || 55 ||
[Analyze grammar]

śrīkṛṣṇaniyamasyāpi parīkṣāṃ sa cakāra ha |
tāṃ śṛṇu tvaṃ muniśreṣṭha kathayāmi kathāṃ ca tām || 56 ||
[Analyze grammar]

brahmaprārthanayā viṣṇurvasudevasuto'bhavat |
dharābhārāvatārārthaṃ sādhūnāṃ rakṣaṇāya ca || 57 ||
[Analyze grammar]

hatvā duṣṭānmahāpāpān brahmadrohakarānmalān |
rarakṣa nikhilānsādhūnbrāhmaṇānkṛṣṇanāmabhāk || 58 ||
[Analyze grammar]

brahmabhaktiṃ cakārāti sa kṛṣṇo vasudevajaḥ |
nityaṃ hi bhojayāmāsa surasānbrāhmaṇānbahūn || 59 ||
[Analyze grammar]

brahmabhakto viśeṣeṇa kṛṣṇaśceti prathāmagāta |
saṃdraṣṭukāmassa muniḥ kṛṣṇāntikamagānmune || 60 ||
[Analyze grammar]

rukmaṇīsahitaṃ kṛṣṇaṃ sannaṃ kṛtvā rathe svayam |
saṃyojya saṃsthito vāhaṃ suprasanna uvāha tam || 61 ||
[Analyze grammar]

munī rathātsamuttīrya dṛṣṭvā tāṃ dṛḍhatāmparām |
tasmai bhūtvā suprasanno vajrāṅgatvavarandadau || 62 ||
[Analyze grammar]

dyunadyāmekadā snānaṃ kurvannagno babhūva ha |
lajjitobhūnmuniśreṣṭho durvāsāḥ kautukī mune || 63 ||
[Analyze grammar]

tajjñātvā draupadī snānaṃ kurvatī tatra cādarāt |
tallajjāṃ chādayāmāsa bhinnasvāñcaladānataḥ || 64 ||
[Analyze grammar]

tadādāya pravāhenāgataṃ svanikaṭaṃ muniḥ |
tenācchādya svaguhyaṃ ca tasyai tuṣṭo babhūva saḥ || 65 ||
[Analyze grammar]

draupadyai ca varamprādāttadañcalavivarddhanam |
pāṇḍavānsukhinaścakre draupadī tadvarātpunaḥ || 66 ||
[Analyze grammar]

haṃsaḍimbhau nṛpau kaucitsāvamānakarau khalau |
dattvā nideśaṃ ca harernāśayāmāsa sa prabhuḥ || 67 ||
[Analyze grammar]

brahmatejoviśeṣeṇa sthāpayāmāsa bhūtale |
saṃnyāsapaddhatiñcaiva yathāśāstra vidhikramam || 68 ||
[Analyze grammar]

bahūnuddhārayāmāsa sūpadeśaṃ vibodhya ca |
jñānaṃ dattvā viśeṣeṇa bahūnmuktāṃścakāra saḥ || 69 ||
[Analyze grammar]

itthaṃ cakre sa durvāsā vicitraṃ caritambahu |
dhanyaṃ yaśasyamāyuṣyaṃ śṛṇvatassarvakāmadam || 70 ||
[Analyze grammar]

ya idaṃ śṛṇuyādbhaktyā durvāsaścaritammudā |
śrāvayedvā parāṃ yaśca sa sukhīha paratra ca || 71 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ durvāsaścaritravarṇanaṃ nāmaikonaviṃśo'dhyāyaḥ || 19 ||
[Analyze grammar]